1, 2. (a) Rosai Elifas ma Bildad sukofen kuker rariso Yahwe mamam Ḇyedi faro fararmyan koḇena? (b) Rosai Yahwe ikofen ya?

FAFISU iwara, snon rikyor skorama skawos kuker Ayub i. Oser ro si isoine Elifaz ḇerama ro Teman. Elifaz ifuken Ayub i, ”Na snon oso ḇyefandun faro Allah i ke? Snonkaku oso bena fawawi ḇyefandun faro i ke? Man Bena Papoik na imarisen rofyor wanapes ḇaido ismai fainda rofyor wambran kuker soasuser ke?” (Ayub 22:1-3) Elifaz kyara kankarem ḇyena roḇa. Bati ḇyedi Bildad ḇerama ro Syuah, dakofen wer snonkaku sya na jadi fa sinapes ro ḇarpon Allah ḇa.—Wasya Ayub 25:4.

² Elifaz ma Bildad suḇensewar fa sufrur Ayub kyara fararmyan ḇyena ḇe Yahwe I nḇemaeja ḇa. Snon anskoya skomarisen Ayub ikyar snar koinema koḇemaeja ro Allah ḇarpon Ḇyedi ḇa raris, op, kawis, ḇaido ansyawek sya. (Ayub 4:19; 25:6) Sikofen rarirya snar sifasna sne ḇerun ke? (Ayub 22:29) Kakuḇae, Yahwe ima nya Baba ma koinema kokasun kaku ro mamam Yahwe Ḇyedi. Rofyor kek  ro bon karui ḇaido komam ḇe bandi rofyor koso udara ido, nari komam koinema kokasun kaku. Ḇape nari Yahwe myam fararmyan ma fararur marḇak koḇena faro fanfandun Karajan Ḇyedi imnis rarirya ke? Aroḇa! Yahwe ikofen rosai Elifas, Bildad ma Zofar sikofenna ima roi ḇekaku ḇa. Ramnai Yahwe ikofen imarisen faro Ayub i, doḇe ima ”manfamyan Yedi”. (Ayub 42:7, 8) Inja bisa kokyar snonkaku ḇenapesḇa sya Yahwe fyandun si kako.

3. Rosai Elihu ikofen kuker fararmyan koḇena ḇe Allah I? Rosai knam ro wos ḇyena?

³ Snonkḇor oso ḇenir ḇe Elihu ryower awawos Ayub ma snon rikyor anskoya. Posa ro awawos skoḇena ramnai, Elihu ifuken ḇe Ayub i, ”Ausya ro bar ḇekaku ido, rosai nari waḇuk faro [Yahwe], ḇaido rosai ismai ro Au ya?” (Ayub 35:7) Elihu i kako ikofen fararmyan koḇena ḇe Allah ima roi ḇemaeja kaku ḇa ke? Aroba. Yahwe imsor Elihu i ḇa, imnis snon anskoya. Elihu fyasna roi ḇeḇese. Yahwe ima inapes, inja kakuya fyandun koḇa fa kosyom I. Roi oso ḇaḇeri na kofrur ḇe I insama isma nana nabor ḇaido kofrur fa syamḇrab. Kakuya, rari ḇepyum ma samambraḇ koḇena ndramuma ro Allah ma myam rariso koḇuk na rai.

4. Rariso Yahwe sneḇaḇir Ḇyedi rofyor kofasna snemura ḇe ḇesesya?

⁴ Rofyor kofasna saswar soasuser faro mansei ḇesyom Yahwe ido, myam rosai kofrurna ima nkur ḇe mankundi. Kowasya ro Amsal 19:17, ”Mansei ḇeswar snonkaku ḇesabararsya ḇyuk nyaki ḇe Yahwe I, ma rosai ifrurna nari neḇebak kaḇer faro i.” Yahwe myam rofyor kofasna snemura faro snonkaku ḇesesya. Ima manḇeḇedaw supswan ma farsyos raryano, Yahwe kyinfir fa myam rosai kofrurna ima nyaki faro I. Nari ḇyak kaḇerna kuker roi ḇekakur syadi. Allah roma Ḇyedi Yesus i, ikofen rarirya kako.—Wasya Lukas 14:13, 14.

5. Fakfuken rosai nari kowawosna?

⁵ Ro fafisu iwara, Yahwe dor nabi Yesaya fa ḇyefaker ḇe I ma fyarmyan ḇe I kuker nyan ḇepyum kaku. (Yesaya 6:8-10) Yesaya imarisen faro rosai Yahwe fararyor ḇyena ma ikofen ”Aya Isoine! Wawan aya!” kirine kako, Yahwe ḇyuk swaf faro snonkaku ḇesousersya fa sifrur fararur Ḇyena. Yahwe manfamyan syaran ma syaran ḇyesi sifasna sikako sna snemuk ḇemnis ra Yesaya i. Simarisen sifrur fararur rosai monda ro fararmyan sena ḇe Yahwe I kuker nyan ḇebor ma ro moḇ ḇese ma ro fafisu ḇesamswen kako. Ḇape snonkaku oso bisa ikofen ro mankundi: ’Yaḇesyowi fararur marḇak ro fararmyan ḇe Yahwe I, ḇape roi yafrur ro mankundaya nḇemaeja ke? Aya isya ke roba, Yahwe  nari ifrumnis fararur ḇyenakam.’ Fafisu oso wakḇaḇir radine ke? Mkorama komam rariso sarisa ro manfamyan risuru Yahwe Ḇyedi ro fafisu iwara, Debora ma Barak, ḇefnoḇek kofa kokarem fakfuken-fakfuken anna.

6. Sai ḇefnai napyan ḇe sordade Yabin sya fa sikafyo er Israel sya?

⁶ Barak ima sordade Israel oso, ma Debora ima nabiah. Raja Kanaan ḇenir ḇe Yabin, ”ḇyewomen kuker kandera kaku” er Israel sya swaf taun ri 20. Yabin sordade ḇyesya sisambraḇ ma sirarmomen kaku, inja er Israel ḇero mnu-mnu sya sifrarbur rum sena. Sordade Yabin sna kereta mamamun ri 900, ro kereta anna spof inoi ḇesrew ro mankarmom. Iḇesebur kuker Israel sya, sima sna romamun fa sḇuki mamunḇa ma sna sansun baja fa sḇukidwarek si ḇa.—Hakim-Hakim 4:1-3, 13; 5:6-8. * (Mam fas-fas kasun ro sop.)

7, 8. (a) Parenta rosai Yahwe ḇyuk ḇe Barak i? (b) Rariso er Israel sya sikafyo Yabin sordade ḇyesya? (Mam sonin ro randak artikel ine.)

⁷ Ḇardibur sordade Yabin sya, Israel sima sisambraḇ ḇa ma napyan fa sikafyo si. Ḇape roro nabiah Debora i, Yahwe ḇyuk parenta ḇe Barak i radine, ”Wramura ma mkorespampam ro Bon Tabor, ma wun snonkaku syaran risamfur ro fandu Naftali romawa snon ḇyesi ma ro fandu Zebulon romawa snon ḇyesi. Ma nari yadif Sisera, ḇebukor faro sordade Yabin ma kereta-kereta mamamun ḇyena ma kawasa ḇyesi ro wadi Kisyon ma nari yaḇuk i ro bramsi.”—Hakim-Hakim 4:4-7.

⁸ Barak ikofenḇadir Yahwe fararyor ḇyena, inja snon ri 10.000 ḇemarisen ḇeso srama sfanjur ro Bon Tabor. Ramnai sikame sra smamunmun kuker mbroḇ sesya ro Taanakh. (Wasya Hakim-Hakim 4:14-16.) Yahwe ifnoḇek Israel sya ke? Imbo. Mekem ḇeba dado, inja moḇ ani nafo kuker marser, inja ine nun fainda faro er Israel sya. Barak iyom sordade Sisera sya swaf kilometer ri 24, isof ḇe moḇ oso ḇenir ḇe Harosyet. Ḇape Sisera kereta ḇyeja syun ro marser. Inja syae ro kereta ḇyeja ma ifrar ḇe Zaananim, fanam ḇe Kedes. Ramnai rya dof ro rum kruben bin oso ḇenir ḇe Yael. Snar imbrus fafayaḇa, inja denefmoser. Rofyor denefya, Yael myuni. (Hakim-Hakim 4:17-21) Yahwe ifrur fa Israel sikafyo mbroḇ sesya! * (Fas-fas kasun ro sop.)

9. Rosai kofarkor ro Hakim-Hakim 5:20, 21 ro mamamun kuker Sisera i?

⁹ Bisa kofarkor naborwer kuker sarisa ḇeḇejadi ro Hakim-Hakim ram ḇeḇe 4 kuker kowasya ram ḇeḇeuserya. Hakim-Hakim 5:20, 21 ikofen, ”Ro farsyos maksya smamunmun, ro nyan sena sramura smamun kuker Sisera. War ḇedaf Kisyon idaf pum si fa siki.” Mnuk ine kyurfasna malaikat sifnoḇek er Israel ro mamamun ani ke? Ine  kyurfasna kako meteor nasya nado ke? Refo ikofenḇairḇa. Ḇape Yahwe fyaspar kawasa Ḇyesi kuker ifrur mekem ḇeba dado ro fafisu ḇemnis kaku, inja kereta mamun ri 900 ansya sifrar fasawḇa. Rofyor kowasya ro Hakim-Hakim 4:14, 15, sap kali rikyor Yahwe iso sisandik I snar ḇaḇemkei sismana. Snonkaku Israel ri 10.000 jadi fa sikofenḇa siso ḇemun mbroḇ sesya.

10, 11. Mansei Meroz? Sai ḇefnai fa sifras i?

¹⁰ Kirine mkorama komam roi ḇefandun kaku. Rofyor Israel simkei kwar, Barak ma Debora sudisen sanandik ḇe Yahwe I. Sudisen, ”’Fras Meroz i,’ rarirya wos malaikat Yahwe I, ’wafras kawasa ḇyesi besya kwar, snar srama sifnoḇek Yahwe ḇa, sifnoḇek Yahwe kuker snonkaku ḇemambri sya.’”—Hakim-Hakim 5:23.

¹¹ Mansei Meroz? Kofawimnis kaku ḇa. Ḇape fafras faro Meroz nḇejadi rarirya inja komam aḇyair osoḇaḇeri kuker Meroz isof ro kirine. Imbude Meroz ima mnu ḇeba oso snonkaku ḇyesya simewer sisowarpu Barak i ro mamamun ani. Rofyor snonkaku ri 10.000 simarisen siso ro mamamun kuker Kanaan, snonkaku ḇero Meroz si kako srower kwar rosai Barak ikofen kuker Yahwe fararyor Ḇyena. Ḇaido Meroz imbude mnu oso Sisera iyokef rofyor Barak iyomi. Imbude snonkaku Meroz bisa sfor Sisera i, ḇape sfor i ḇa. Wawasen kada smam sordade ḇefo masasor ani isya ifrar ro nyan sena insama smuni ḇa! Fafisu ya bisa sifrur roi oso ḇefnoḇek Yahwe marisen Ḇyena, ḇape sifrurna na ḇa. Rofyor sifrurna, Yahwe nari ḇyebarakas si. Komam kada snonkaku Meroz sine siḇeseḇur Yael, bin ḇeḇri kaku ani.—Hakim-Hakim 5:24-27.

12. Rari ḇeḇese risuru rosai komam ro Hakim-Hakim 5:9, 10? Ma Rariso ine nawyae ko?

¹² Ro Hakim-Hakim 5:9, 10, komam rari ḇeḇese ro snon ri 10.000 ḇemarisen ḇeso ansya kuker snonkaku ḇemewer ḇeso sya. Debora ma Barak suḇuk wos sandik, ”manfarkin sarar Israel, ḇemarisen ḇemanfamyan ro fandu er ansi”. Rari sena iḇesebur kuker ”ḇeyek keledai bin ḇerik nyanyare”, ḇeḇaḇir fandun ḇa fa siso ro mamamun ani. Snonkaku ansya sikofen siḇe snonkau ”ḇekain ro yar ḇekakur”, ma ’ḇembran ro nyan ya’, simarisen monda sikenem napyan. Ine iḇesebur kuker snon ḇemarisen beso Barak fa smamunmun ro bon Tabor ḇefo karui ma ro wadi Kisyon ḇefo kuker war. Ma snonkaku ḇemarisen ḇekenem napyan mnuk ani ḇyuk swarapepen ḇesi fa ’Skara!’ Ine kyurfasna fandun fa siswarepen snar spampum Yahwe fararyor Ḇyena kwar. Kirine, fandun fa komam rariso mamam koḇena faro fararmyan ḇe Allah.

13. Rariso rari ro keret Ruben, Dan ma Asyer ḇeḇeseḇur kuker Zebulon ma Naftali?

¹³ Snon ri 10.000 sna swaf fa smam ro  mankunsi rariso Yahwe fyasna Mankundi ḇe Manḇepoik ro supswan ma farsyos. Bisa sfawar ḇe snonkaku ḇesesya rofyor sawos kuker ”fararur-fararur ḇenapes ro Yahwe”. (Hakim-Hakim 5:11) Iḇesebur kuker keret Ruben, Dan ma Asyer ḇefandun monda faro arasai sena, raris nai rofanfan sya, wai ḇebana ma pelabuhan, ḇardibur sifrur Yahwe fararur Ḇyena. (Hakim-Hakim 5:15-17) Keret syakam simnis rarirya ḇa. Keret Zebulon ma Naftali ”sfandun kankenem sena ḇa isof simar” insama sifnoḇek Debora ma Barak. (Hakim-Hakim 5:18) Bisa kosmai farkarkor ḇefandun kaku ro rari ḇeḇese anna insama nafnoḇek fararmyan koḇena.

14. Rariso kofasnaḇair snar kofnoḇek Yahwe Karajan Ḇyedi ro kirine?

¹⁴ Kirine, kosonem Yahwe Karajan Ḇyedi kuker mamamun ḇa. Ḇape komarisen kofasnaḇair kofnoḇek fararur ḇaḇebaryas kuker ḇri ma raryaḇ. Kirine sfandun manfamyan ḇebor syadiwer faro fararur Yahwe Ḇyena. Naek srar ma romawa babo syaran ri syaran simarisen fa saksun ro fararur ḇesren ro oras nakam. Imnis raris, ono sisya sḇeperintis, sfararur ro Betel, sbawes Balai Kerajaan, ma sḇesukarelawan ro kebaktian. Penatua ḇeḇeso sya sifararur marḇak ḇe Panitia Penghubung Rumah Sakit ma sfasos kebaktian nakam. Kokyar Yahwe ḇyesyowi kaku fyor kofarmyan ḇe I kuker sne ḇesiper imnis fandandun Ḇyena ma nari ḇyefnder ḇaḇeri fararur marḇak koḇena.—Ibrani 6:10.

15. Fakfuken rosai monda ḇefnoḇek kofa kokyar koraryaḇ pdef ro Yahwe fararur Ḇyena?

¹⁵ Fandun fa komammnis fararmyan koḇena. Bisa kofuken faro mankunko:  ’Yamam monda snonkaku ḇese sifrur nabor syadi ro fararur ani ke? Yakara yasmai nana nabor fyandun syadibur yafarmyan ḇe Yahwe I ke? Ḇaido yamarisen yafarari kakyar ma ḇaḇeḇri ro Barak, Debora, Yael ma snon ri 10.000 ansya, kuker yaḇuk rosai monda yasmana fa yafarmyan ḇe Yahwe I ke? Yakara fa yara ḇe moḇ bese fa yasewar pipi naborwer insa kankenem yedi ipyum syadi ke? Yakara rarirya ido, yaḇenadi faro Yahwe kuker snemuk ani ke? Yakara kwar yara ḇe moḇ ḇese ine nari nawyae kina yedi ma sidang ke?’ * (Mam fas-fas kasun ro sop.)

16. Yahwe isma roi nakam raryano, rosai bisa koḇuk faro I?

¹⁶ Yahwe ḇyuk ḇeko fakamaman ḇeba kaku kuker myam koraryaḇ fa kosonem fandandun Karajan Ḇyedi. Ro fafisu Adam ma Eva su, Setan imarisen snonkaku sya sro ḇar ḇyedi fa spampum Yahwe I. Ḇape rofyor kosonem Karajan Ḇyedi, kofasnaḇairbos ḇe Setan i koro ḇar sarirya. Kakyar ma soasuser koḇena nadif kofa kofarmyan ḇe Yahwe I kuker sne ḇesiper ma kofrur imarisen. (Amsal 23:15, 16) Allah koḇedi bisa ḇyuk farfnoḇek koḇukna kuker soasuser fa kyarem Setan anonef ḇyena. (Amsal 27:11) Soasuser koḇena ima roi ḇemaeja kaku ḇe Yahwe I ma nari nafrur imarisen.

17. Rosai Hakim-Hakim 5:31 fyarkor kuker fafisu iyama?

¹⁷ Ḇarpurya nari snonkaku syakam simarisen Yahwe iso ḇepoik faro si. Kokame kowaf fafisu ani ryama! Nari koḇaḇir imnis raris Debora ma Barak ḇedisen, ”Iḇyemura mbroḇ bedi sipromes, sye, Yahwe, ma ibyekada snonkaku ḇeswar Au simnis oridek ro papoik ḇyena.” (Hakim-Hakim 5:31) Ine nari ḇeḇejadi rofyor Yahwe myunpres Setan ma dunya ḇeḇarḇor ḇyena. Rofyor mamamun ro Armagedon ḇyerak, Yahwe fyandun farfnoḇek ro snonkaku ḇesesya ḇa fa smunpres mḇroḇ ḇyesya. Ma, nari ”kores pdef” ma ”komam fasaspar ro Yahwe I”. (2 Tawarikh 20:17) Ro fafisu ani, kona swaf ḇepyum kaku fa kosonem Yahwe Karajan Ḇyedi kuker ḇri ma raryaḇ.

18. Rariso fararmyan bena kuker sne ḇesiper nun fainda faro ḇesesya?

¹⁸ Debora ma Barak suḇerak dasdisen doya suḇena kuker sanandik faro Yahwe I, ḇape snonkaku sya ḇa. Sudisen, ”Snar er ansi simarisen siso, sanandik faro Yahwe!” (Hakim-Hakim 5:1, 2) Kuker nyan ḇemnis rarirya, rofyor kofarmyan ḇe Yahwe I kuker nyan ḇefandun kaku, nari snonkaku ḇesesya kako simarisen fa sḇuk ”sanandik faro Yahwe!”