FARKARKOR 17
Fafnoḇek ro Yahwe I fa Kosampum Rur Ḇeḇyeḇa Sya
”Kofaḇri fakosampum snonkaku ḇa . . . kosampum samambraḇ ḇeḇeḇru ro supswan ḇepampan ine.”—EF. 6:12.
DOYA 55 Mkomkak Awer Si!
ROI NA KOFARKOR *
1. Imnis Efesus 6:10-13 ikofenna, rariso Yahwe fyasnai iswar kaku ko? Fasnaiḇair pan.
NYAN OSER Yahwe fyasnai saswar ḇeba Ḇyeja ḇe ko iso ifnoḇek ko fa kosampum mḇroḇ koḇedi. Mḇroḇ ḇeba koḇedi iso Setan ma rur ḇeḇyeḇa sya. Yahwe ḇyuk swarapepen ḇe ko kuker mbroḇ koḇesine, ma ikofenḇair moḇsariso kosampum si. (Wasya Efesus 6:10-13.) Kokyar faro Yahwe I kuker sne ḇesiper ma koso farkankin Ḇyena ido, nari kokrenbur Ibiris ankarkar ḇyena. Inja, na kakna kakyar raris Manwawan Paulus i, ”Rofyor Allah iwaira ko, mansei nari ḇesampum koya?”—Rm. 8:31.
2. Ro kali ine rosai na kawos ya?
2 Koḇe snonkaku Kristen ḇekaku ido, komewer kaku fa komam Setan ma rur ḇeḇyeḇa sya roi sifrur na. Roi ḇefandun kaku faro ko iso kowai monda ra Yahwe I ma kofarmyan ḇe I. (Mz. 25:5) Imboi, fandun fa kofawi rariso Setan nyan ḇyukidankar kona. Rosai ḇefnai ya? Insama kosun awer ro denem ḇyena. (2 Kor. 2:11) Ro farkarkor ine nari kawos nyan ḇepon kaku Setan ma rur ḇeḇyeḇa sya sikfrowes snonkaku sya. Na kawos kako rariso bisa kokrenbur awyae sena.
NYAN RUR ḆEḆYEḆA SYA SIKFROWES SNONKAKU SYA
3-4. (a) Ilmu gaib ido rosairiri? (b) Snonkaku ḇekyar faro ilmu gaib sine sefis?
3 Nyan ḇepon Setan ḇyepake fa ḇyukifrowes snonkaku sya iso ilmu gaib ḇaido fawawi ḇeknam ro rur ḇeḇyeḇa sya. Snonkaku ḇena robor sine soḇe sima sifawi syadi kuker roi na ḇeḇejadi na. Contoh ya, soḇe sifawi rosai na ḇeḇejadi ro fafisu iyama kuker sepake kinsor. Ono sisya sepake mon kako. Siyawer soḇe bisa sawos ḇe snonkaku ḇemar sya. Ma eḇese sya wer sepake snonkaku ḇena robor sya ma bisa sawninyan snonkaku ḇesesya, sifnak si kuker aryawin sena. *
4 Snonkaku ḇekyar faro ilmu gaib sine sefis kaku? Survei oso ḇero sup ri 18 ro Amerika Latin ma Myos Karibia nfasnai oser ro snonkaku rikyor sikofen sikyar faro ilmu gaib, mon, ḇaido ḇena aryawin sya. Snonkaku ḇekyar na bisa sawos kuker snonkaku ḇemarsya sakbor kaku. Survei ḇese sifrur ro Afrika wer. Ro diwa, oser ro snonkaku ri suru sifuken si ido soḇe sikyar faro dukun sya. Inja, ro moḇ risai monda koro ya, fandun fa kosasor kaku ko faro roi nane snaro Setan imarisen ’dankarkar supswan ḇesiper’ ine.—Fasasna 12:9.
5. Rariso mamam Yahwe Ḇyeja faro ilmu gaib na?
5 Yahwe ima ”Allah ḇaḇenapnapes.” (Mz. 31:5) Rariso mamam Yahwe Ḇyedi faro ilmu gaib ine? Imarisen ḇa! Yahwe ikofen ḇe snonkaku Israel sya, ”Rofandu mko nasya awer snonkaku ḇerap romawa sesya ḇe farsarser, ḇeḇekinsor, ḇekif robor, ḇesewar aḇyair kinsor, ḇenanem ro fui, ḇefui snonkaku ḇese, ḇeyor anun ro ḇena mon sya ḇaido ḇeḇekinsor sya, ḇaido ḇefuken faro karwar sya. Mansei monda ḇefrur roi nane ido, Yahwe dayin i.” (Ul. 18:10-12) Kirine snonkaku Kristen sya sikenem ro Sasoser Taurat Yahwe ḇyuk ḇe snonkaku Israel sya ḇa. Bape ro dia bisa kofawi Yahwe mamam Ḇyeja faro ilmu gaib ine imnis kaker.—Mal. 3:6.
6. (a) Moḇsa Setan ḇyepake ilmu gaib ine fa ikfrur susa snonkaku sya rai? (b) Imnis Pengkhotbah 9:5, fyor snonkaku oso imar moḇsa ḇyerai?
6 Yahwe ḇyuk swarapepen ḇe ko kuker ilmu gaib snaro ifawi na Setan ḇyepake roi ine fa ikfrur susa ko. Setan ḇyepake nyan ḇeradine insama snonkaku sya sikyar ḇemar sya na sikenem kaker ro dunya ḇese. (Wasya Pengkhotbah 9:5.) Setan i kako ḇyepake ilmu gaib fa ikfrowes snonkaku sya insama simkak ma simewer sisyom ḇe Yahwe I. Imarisen insama ido snonkaku sya sikyar awer ḇe Yahwe I, imboi sikyar faro ilmu gaib na.
NYAN KOSAMPUM ILMU GAIB
7. Rosai Yahwe ikofenḇair ḇe konya?
7 Ro paragraf-paragraf ḇerandak ro farkarkor ine kofarkor kwar nyan Setan ma rur ḇeḇyeḇa sya sepake fa sikfrowes snonkaku sya. Yahwe ikofenḇair nyan rariso insama ido bisa kosampum si. Mkorama kawos na.
8. (a) Rariso insama rur ḇeḇyeḇa sya sifrowes ko ḇa? (b) Rariso Mazmur 146:4 fyasnaibos Setan ankarkar ḇyena kuker marmarya?
8 Kowasya Allah wos Ḇyena ma kokarauser na. Ine iso nyan ḇepon kaku insama Setan ma rur ḇeḇyeḇa sya sifrowes ko ḇa. Allah wos Ḇyena namnis raris sumber ḇesar ḇefasnai mnis Setan nyan ḇyuk dankar snonkaku sya. (Ef. 6:17) Contoh ya, Refoya ikofenḇair ḇe ko snonkaku ḇemar sya jadi fa sawos ḇe snonkaku ḇekenem kaker sya ḇa. (Wasya Mazmur 146:4.) Refoya kako ikofenḇair Yahwe I monda bisa ḇefawi fafisu ḇepyum iwama. (Yes. 45:21; 46:10) Inja, kowasya Allah wos Ḇyena ma kokarauser na ro ras ḇe ras ido, bisa ipyan ḇe ko fa kosampum ḇaido kokyar faro ankarkar ro rur ḇeḇyeḇa sine ḇa.
9. Rosai monda fandun fa koḇinkwanbur na?
9 Koso awer ḇaido kofrur roi oso ḇefasnai kofararur kayam kuker ilmu gaib na. Snar koma snonkaku Kristen siko, inja kokyar faro ilmu gaib na ḇa. Imnis raris, kora ḇe snonkaku ḇena robor sya ḇa ḇaido kosewar insama kawos ḇe snonkaku ḇemar sya ḇa. Ko kako koso awer ro karamram ḇemnis kuker Refo fyarkor na ḇa. (Yes. 8:19) Nyan ḇeradine nun samswen ḇeba kaku ma bisa nafrur fa kofararur kayam ḇe Setan ma rur ḇeḇyeḇa ḇyesi.
Imnis raris snonkaku Kristen ro fafisu iwara sisawen ḇaido srap roiḇebor ḇeoser kuker ilmu gaib na, fandun fa ko kako kakfrur rarirya. Inja, fandun fa kosasor ko ro rosai kowasya (Mam syos ḇe 10-12)
10-11. (a) Rosai snonkaku Efesus sya sifrur ya rofyor sifawi kakaku ya kwar? (b) Imnis ro 1 Korintus 10:21, rosai ḇefnai fa koso snonkaku Kristen ro abad randak sya nyan sena, ma moḇsai koso nyan ḇepyum sena rai?
10 Kosawen roi ḇebor na ḇeḇeoser kuker ilmu gaib nakam. Ro fafisu iwara snonkaku ri ḇeḇeso ḇero Efesus sya sepake ilmu gaib na. Ḇape ro fafisu sfarkor kakaku ya, sun ḇeri snemuk. ”Sibor kaku ro fandu si, ḇeyakfrur mon kako, siryur syap-syap rawan sena fa sikun na ro ḇarpon kawasa ḇeḇor.” (Farfyar 19:19) Sifrur rarirya insama rur ḇeḇyeḇa ine dawyaye siwer ḇa. Syap senane nek fafaya ḇa. Ḇape srap nakame. Sḇoḇ na ḇa ḇaido sḇuk naḇe snonkaku ḇeḇyeḇa snaro ro mamam seja roi ḇefandun yaiso sifrur fa Yahwe imarisen mboi nana kumpan ya ḇa.
11 Moḇsai koso nyan ḇepyum sena rai? Roi ḇepyum syadi yaiso kesawen roiḇebor ḇefasnai kofararur kayam kuker ilmu gaib na. Ine kako jimat ḇaido roi ḇebor ḇese kokara bisa nadwarek ko ro rur ḇeḇyeḇa sya.—Wasya 1 Korintus 10:21.
12. Fakfuken risai bisa kokarauser na?
12 Fandun fa kosasor ko ro rosai komam ro TV na, kowasya, ma korower na. Kwarauser, ’Yawasya syap, majalah, ḇaido yamam ro internet roi na ḇeḇeoser kuker ilmu gaib na ke? Rariso musik yarower na, felem yamam na ḇaido acara ro TV ma video game yena? Roi nane kam neḇeoser kuker ilmu gaib na ke? Ro acara nane vampir-vampir, rur ḇeḇyeḇa, ḇaido snonkaku ḇena robor sya sisya ke? Roi yamam nane nama ilmu gaib sifrur fa rya nun samswen ḇe aya ḇa ke?’ Komam kada felem ḇefawar legenda ro fafisu naiwara ma felem kartun nakame naser ilmu gaib ḇa. Imboi, farfyar sḇuk fa komam na naser roi ḇekaku ḇa ḇaido roi mankunsi skara monda nairi. Fafisu komam kaḇerna roi komarisen fa kowasya na, komam ma korower na, fandun fa komam pyum na insama roi nane nafrur fa Yahwe imarisen ḇa. Bon yaiso, kosmai ”sneuser ḇesren” ro ḇarpon Allah.—Farfyar 24:16. *
13. Rosai kopok fa kofawar awer na?
13 Fawar awer farfyar kuker rur ḇeḇyeḇa sya. Kosouser Yesus akurfasnai ḇyedi. (1 Ptr. 2:21) Fafisu ryo nanki, ifawi kaku Setan ma rur ḇeḇyeḇa sya moḇ sikenem rai. Ḇape, fafisu ryo supswan, korower fyawar ḇe snonkaku sya ḇa kuker rosai Setan ma rur ḇeḇyeḇa sya sifrur na. Roi fyawar iso Yahwe marisen Ḇyena, mboi Setan ma rur ḇeḇyeḇa sya ḇa. Inja, fandun fa kakfrur raris Yesus i. Kofawar awer kuker rur ḇeḇyeḇa sya. Ḇefandun ya, kawos monda roi ḇepyum yaiso kakaku ya.—Mz. 45:1.
Komkak awer faro rur ḇeḇyeḇa sya snaro Yahwe, Yesus, ma malaikat sya sisambraḇ syadi ro si (Mam syos ḇe 14-15) *
14-15. (a) Rosai ḇefnai fa komkak awer faro rur ḇeḇyeḇa sya? (b) Ro kirine rosai ḇefasnaiḇair Yahwe kyadaunwarek ko?
14 Komkak faro rur ḇeḇyeḇa sya awer. Fyor kokenem ro supswan ine, bisa kosmai roi ḇepyum ḇa na. Kokandor monda kosmai susa, dafduf, ḇaido marmarya bisa ndrama nkur ko. Ḇape kokara awer roi nane kam awyaye ro rur ḇeḇyeḇa sya. Refo ikofen, ”oras ma fafisu kofawiḇa na ndrama myun manseirya kam.” (Pkh. 9:11) Yahwe nya samambraḇ syadi ro rur ḇeḇyeḇa sya. Contoh yaiso, Allah Yahwe ḇyuk ijin fa Setan myun Ayub i ḇa. (Ayb. 2:6) Ro Moses fafisu ḇyedi, Allah Yahwe fyasnai nya samambraḇ syadi ro snonkaku ḇena mon ro Mesir sya. (Kel. 8:18; 9:11) Yahwe ḇyuk papoik ḇeba syadi ḇe Yesus i, inja bisa iyaw Setan ma rur ḇeḇyeḇa sya ro nanki ḇe supswan. Fyoro werḇa Setan ma rur ḇeḇyeḇa sine nari seḇesawen ḇe der ḇekaki kaku iḇarwaḇ, rarirya ipok fa ifrur susa snonkaku sya werḇa.—Fasasna 12:9; 20:2, 3.
15 Kirine Bukti nabor nasya ḇefasnai kaku Yahwe kyadaunwarek kawasa Ḇyesi. Contoh yaiso, ro supswan ḇesiper koḇaryas ma koḇuk farkarkor ḇe snonkaku sya. (Mat. 28:19, 20) Inja, snonkaku sya bisa sifawi roi ḇeḇyeḇa Setan ifrur na. Rarirya, komam kada Setan jadi fa ifrur fararur ḇaḇeḇaryas ya imnai snaro nya samambraḇ ḇa. Inja komkak awer rur ḇeḇyeḇa sine. Kokyar ”Yahwe mkamor ḇyeja myam kaku supswan ḇesiper fa fyasnai samambraḇ ḇyeja faro fandandun snonkaku ḇena sne ḇesiper faro I sya.” (2 Taw. 16:9) Kosouser pdef ḇe Yahwe ido, rur ḇeḇyeḇa sya na sipok fa sifrur susa ko ḇa.
KOSMAI BARAKAS SNAR KOSOUSER YAHWE WOS ḆYENA
16-17. Fawar contoh oso ḇefasnai ḇaḇemakakak ḇa ya bisa ifnoḇek srar oso fa isampum rur ḇeḇyeḇa sya.
16 Fandun fa kofasnai makakak ḇa kuker kosampum rur ḇeḇyeḇa sya, iba syadi wer fafisu kina koḇesya sawos ninyan ko. Mboi komkak ḇa ido, nari Yahwe ḇyebarakas ko. Contoh yaiso srar oso ḇenirḇe Erica, ḇyarek ro Ghana. Fyor fyarkor Refoya ḇyeumur 21. Kamam ḇyedi ima manfarkin agama mboi ḇyepake ilmu gaib. Inja, sidif i fa iso ro samsyom ḇekaku ḇa sena yaiso dakan manfnai sḇuk kwar ḇe allah ḇekaku ḇa sesya. Imewer dan ri. Inja kina ḇyesi soḇe kyoryaye allah ḇekaku ḇa sesya, inja allah sedine na ifrur si fa sidufe ḇaido na sisarḇir.
17 Erica kina ḇyesine sidif i pdef fa iso ro farsamsyom ḇekaku ḇa sedine, ḇape imewer. Inja, siyaw i ro rum skoḇedi. Inja kina ḇeḇesaksi sya sor i fa ḇyarekus si. Inja, Yahwe ḇyebarakas i kuker ḇyuk kina ḇesaksi ansine, inja rya simnis raris kina mankun ḇyesi. (Mrk. 10:29, 30) Kina ḇyesi siyawi ma srap robor ḇyenakam rariryano, Erica isouser pdef ḇe Yahwe I. Ma kirine ḇyebaptis kwar ma ḇye perintis biasa. Imkak faro rur ḇeḇyeḇa ansine ḇa. Fyawar ḇo doḇe, ”Ro ras-ras yaḇenadi ḇesya kwar insama ido kina yesya sakmambir Yahwe I ma simkei ro farkarkor ḇekakuḇa ani rofyor sifarmyan ḇe Yahwe I.”
18. Kokyar faro Yahwe ido barakas rosai kosmai ya?
18 Kokam na kosmai ujian ḇemnis radine ḇa. Ḇape fandun fa kokam kopampum rur ḇeḇyeḇa sine ma kokyar monda ḇe Yahwe I. Rarirya nari kosmai barakas ro Yahwe I, ma Setan na dankar ko werḇa. Inja koswarepen, komam monda awer awyaye Setan ḇyena nafrur fa kofarmyan ḇe Yahwe I werḇa. Snar kofanam ḇe Yahwe I iso ḇefandun syadi ya. Manwawan Yakobus fyas, ”Mkokunem faro Allah, ma kosampum Ibiris, rarirya nari ifrarbur mko! Mkofanam faro Allah, ma nari Allah fyanam faro mko.”—Yak. 4:7, 8.
DOYA 150 Swewar Allah Insama Fyaspar Au
^ par. 5 Yahwe iswar kaku ko inja ḇyuk swarapepen ḇe ko kuker rur ḇeḇyeḇa sya ma ankarkar sena. Rariso rur ḇeḇyeḇa sine sifrowes snonkaku sya rai? Rosai kofrur insama kokren ro ankarkar sena? Ro farkarkor ine nari kawos rariso Yahwe ifnoḇek ko insama rur ḇeḇyeḇa sya sankar ko ḇa.
^ par. 3 KNAM RO WOS ḆEḆESO: Ilmu gaib ido kakyar ma fararur ḇeḇeoser kuker hantu-hantu sya. Ma snonkaku ḇesmai kakyar ḇeradine ikyar snonkaku oso imar ido baken saprop ḇyedi iso ḇemar ya imboi ḇar oso ro snonkaku ani ikenem kaker ma bisa sawos kaker kuker snonkaku ani kuker sepake snonkaku ḇena robor ansine fa sawos kuker ko. Kinsor ma mon iso fararur kayam faro snonkaku ḇena robor sya iso ḇar ro ilmu gaib ine kako. Sifnak snonkaku sya kuker aryawin sena ḇaido sidwarek si ro snonkaku nari imbe ḇefnak si ro aryawin sena kako. Ine imnis ḇa kuker snonkaku ḇefnak ḇramin ḇyeja rofyor ifnak sulap insama ifrur fa snonkaku sya simarisen.
^ par. 12 Penatua sya na jadi fa sḇuk akurfasnai kuker rosai monda na kowasya, komam ma korower na. Imboi, snonkaku Kristen sya fandun fa sun snemuk ro mankunsi oser-oser ro sne asuser sena raris sismai kwar ro Refoya. Sinan sya kako fandun fa smamuser rosai monda na kina ḇyedi siwasya, smam, ma srower naiso hiburan ḇemnis kuker rosai Refo ikofen ya.—Mam ro jw.org® artikel ”Apakah Saksi-Saksi Yehuwa Melarang Film, Bacaan, atau Lagu Tertentu?” ro ḇar MENGENAI KAMI > PERTANYAAN UMUM.
^ par. 54 SONIN: Yesus iso Raja ḇesambraḇ syadi ḇefarkin malaikat syakam. Ma Yahwe karapesa Ḇyedi isya ro ḇo skoḇedi.
