1-2. Rosai ḇefnai fa Yesus ḇyesusa kaku?

YESUS ḇyesusa kaku, snaro iwasen kerower nari snonkaku ḇeḇarḇor sya smuni fa imar. Marmar ḇyedi iso ḇefrur fa ḇyesusa ya ḇa. Mboi Yesus iswar Kmari ma imarisen kako fa ifrur Yahwe sneri imarisen. Yesus ifawi kaku isouser pdef ḇe Yahwe fafisu ismai fafrowes ḇemarḇak kaku ido, nari Yahwe snonsnon Ḇyedi ismai sanandik. Iswar faro snonkaku sya kako. Inja, ifawi snonkaku sya bisa sismai kankenem fyoro-fyoro fyor isouser isof ro imar.

² Yesus ḇyesusa kaku raryano, ḇyeaski pdef. Inja ikofen ḇe manfamyan ḇyesya, ”Aski ayena yaḇuk na faro mko.” (Yoh. 14:27) Yesus ismai ḇaḇeaski ro Allah I, isoine sne ḇemarisen snar fyanam kaku kuker Yahwe I. Inja, Yesus ḇyeḇirḇar werḇa.​—Flp. 4:6, 7. 

3. Ro farkarkor ine, rosai nari kawos ya?

³ Snonkaku koine kam kaksmai fafrowes ḇemnis raris Yesus i ḇaime. Ḇape, ḇeḇe Yesus manfamyan ḇyesya kam na sismai kako fafrowes ro kenem sena. (Mat. 16:24, 25; Yoh. 15:20) Raris Yesus i, fyorno ido kakḇe ḇirḇar kako. Rariso insama ḇaḇeḇirḇar ifrur awer ko fa kona aski ḇa? Mkorama kawos nyan rikyor Yesus ifrurna fafisu ifarmyan ro supswan. Nari kawos kako rariso bisa koso nyan ḇyena fafisu fafrowesna ndrama nkur ko.

4. Rofyor mkokarauser mnuk ḇero 1 Tesalonika 5:17, mkapḇair pan contoh-contoh ḇefasnai Yesus ima inadi ḇesya kwar ro rasras ḇepupes ikenem ro supswan anya.

⁴ Wasya 1 Tesalonika 5:17. Ro ras-ras ḇepupes Yesus ikenem ro supswan anya inadi ḇesya kwar. Fafisu ifrur ras swarapepen marmar ḇyedi, inadi fyor irwas anggur ma mamami ḇaim. (1 Kor. 11:23-25) Fyor skosae ḇaim ro rum skofrur Paskah anya, inadi kayam kuker manfamyan ḇyesi. (Yoh. 17:1-26) Fyor i kuker manfamyan ḇyesya skoraro Urek Zaitun ro roḇ anya, inadi wer. (Mat. 26:36-39, 42, 44) Wos ḇepupes ḇyeja fyor imar ḇaim kako nadi dirya. (Luk. 23:46) Roi ḇejadi ro ras ḇepupes ikenem ro supswan anya ikofenḇair nakam ḇe Yahwe I roro nadi ḇyena.

5. Rosai ḇefnai fa manfamyan sya simkake?

⁵ Rosai ḇefnai fa Yesus ismai fafrowes nabor rariryano bisa fyarmku pdef? Snaro inadi ḇe Yahwe I ḇesya kwar. Mboi manfamyan ḇyesyama sakso rarirya ḇa ro roḇ ani. Inja, fyor skosmai fafrowes ido skomkake. (Mat. 26:40, 41, 43, 45, 56) Fafisu fafrowes na drama nkur ko ido, fandun fa koso Yesus nyan ḇyena fa ’koḇe nadi ḇesyakwar’, rarirya na kofasnai souser ya pdef. Roi risai monda nari kun ro nadi ya?

6. Rariso kakyar bisa ifnoḇek ko fa kosmai aski pdef?

⁶ Insama kona kakyar ḇesambraḇ syadi ido, fandun fa koḇenadi ḇe Yahwe I. (Luk. 17:5; Yoh. 14:1) Snar kokam nari kosmai fafrowes ro Setan, inja kofandun kakyar ḇesambraḇ syadi. (Luk. 22:31) Kosmai samswen ḇeḇor na  ḇerama ḇekur ko rariryano, rariso kakyar bisa ifnoḇek ko fa kosmai aski pdef? Ḇape kosewar nyan kwar fa kofasos samswen koḇena mboi jadi fa nakren bur ko ḇa ido, koḇeḇirḇar awer mboi korir nakam ḇe Yahwe I snar kokyar I monda na ḇefrur samswen koḇena kam namnai. Inja, na koḇe aski kaku snaro kokyar Yahwe I monda ḇesambraḇ syadi fa ḇefnoḇek ko ro samswen koḇena.​—1 Ptr. 5:6, 7.

7. Rosai farkor ro Robert farfyar ḇyedine?

⁷ Fyor koḇenadi ido, nari kona aski pdef fyor samswen ndrama nkur ko. Contoh ya iso Robert, Penatua oso ḇeḇe umur 80. Fyawar ḇo doḇe, ”Anun ḇepyum ro Filipi 4:6, 7 ḇebuk samambraḇ ḇe aya fafisu yasmai samswen naḇor ro kenem ayedi. Fyorno ido yana kumpan ḇa. Fafisu oso yafarmyan ḇe Penatua ḇa. Inja, rosai ḇefnoḇek Robert fa ḇyeaski pdef? ”Fafisu yaḇeḇirḇar yaḇenadi ḇeri. Yaḇenadi ḇesya kwar ma fyor yanadi kuker kakaku ido yaḇaḇir na yaḇe aski kaku.”

8. Imnis ḇeḇekofen ro Yohanes 8:29, rosai wer ḇefrur Yesus ḇyeaski pdef ya?

⁸ Wasya Yohanes 8:29. Sifrur mnis Yesus i ḇa rariryano, ḇyeaski pdef. Rosai ḇefnai ya? Snar ifawi ifrur Yahwe sne Ḇyedi imarisen kwar. Ipyan ḇe i fa isouser pdef ḇa mboi ifrur rarya kwar. Iswar kaku faro Yahwe ma ḇefandun syadi ya iso fyarmyan ḇe Yahwe I. Fyor ryama ḇe supswan ḇaime, Yesus ima ”manḇekir  syadi” Allah ḇyedirya. (Ams. 8:30) Fyor ryo supswan anya, fyarkor snonkaku ḇesesya kuker Kmari marisen Ḇyena. (Mat. 6:9; Yoh. 5:17) Fararur anine nafrur Yesus iryaḇ kaku.​—Yoh. 4:34-36.

9. Rosai ḇefnai fa na koḇe aski pdef rofyor komyaren ro ḇaḇeḇaryas ya?

⁹ Koso Yesus ido fandun fa ”Kofararur pdef kaku ḇeri faro Manseren.” (1 Kor. 15:58) Fafisu ’koḇaryas’ fandun fa komyaren, snar na kona kakara ḇepyum syadi kuker samswen koḇena. (Farfyar 18:5) Contoh ya, snonkaku kosrow ro ḇaḇeḇaryas sya, sismai samswen ḇemarḇak syadi ro ko. Ḇape, fyor sfarkor fa sakswar Yahwe I ma sifrur parenta Ḇyena, kenem sena napyum ma neaski syadi. Fyor komam na, kokyar kaku wer Yahwe na ḇyuk fafnoḇek ḇe ko kako. Inja nari koḇe aski pdef. Srar oso ḇesanekar ma ḇekara kankenem ḇyedi nefromo monda dakḇaḇir rarirya kako. Fyawar ḇo doḇe, ”Yamyaren ro fararur ḇaḇeḇaryas ya ido, yaḇe aski syadi ma yasambraḇ pdef. Yakara ido, yafanam kaku faro Yahwe I fyor yara yaḇaryas.”

10. Farkarkor rosai wun ro Brenda farfyar ḇyedine?

¹⁰ Contoh osower ya iso srar oso ḇenir ḇe Brenda. Srar ine ma inaikir ḇyedi suduf dafduf ḇemun sistem saraf suḇeja. Inja srar ine jadi fa imbran ḇa, ḇyepake monda kursi roda. Fyor syambraḇ ido nari iḇaryas ro rum ḇe rum. Ḇape, roi ifrur ker iso fyas syapram ḇeser anun ḇero Refo faro snonkaku ḇesesya. Ikofen, ”Ro fafisu ine yafawi kaku nari yaprei ro dafduf ayedine ḇa, inja roi yafakapon ro kenem ayedi ya iso ḇaḇeḇaryas ya. Fyor yaḇaryas ido yaḇefnder makakwarek ayena kam. Yafakapon fararur ḇaḇeḇaryas ine ma yafnoḇek snonkaku ḇero moḇ ayedi sya. Mamam ayeja kuker fafisu iyama ipyum syadi wer.”

11-13. (a) Rariso manfamyan sya ma snonkaku ḇesesya sfasnai sima bati ḇekaku faro Yesus i? (b) Moḇsa Yesus sneḇaḇir ḇyeja faro bati ḇyesine?

¹¹ Yesus manfamyan ḇyesine sfasnai kaku sima bati ḇekaku ma ḇefararur kayam kuker Yesus i. Sfasnai kaku sima ”bati ḇefanam syadi ro karyer sesya.” (Ams. 18:24) Inja iswar kaku si. Fyor ani Yesus ḇedar ḇyesya sikyar i ḇaime. (Yoh. 7:3-5) Ro ras oso soḇe swaruser ḇyena namnis ḇa kwar. (Mrk. 3:21) Ḇape komam kada Yesus fyanam syadi faro manfamyan ḇyesine. Ro roḇ imar ḇaim anya, ikofen ḇe si, ”Mkoiso ḇekain fnoḇek aya ḇesya kwar ro fafrowes ḇeḇor yasma kwar.”​—Luk. 22:28.

¹² Fyorno ido, Yesus manfamyan ḇyesine sifrur i fa fyafko. Ḇape myam mura ro sasar sena ḇa. Snaro ifawi sikyar faro i. (Mat. 26:40; Mrk. 10:13, 14; Yoh. 6:66-69) Ro roḇ imar ḇaime, ikofen ḇe snon ḇesoasuser ansine, ”Yor mkoḇe bati, snar yakofen ḇadir faro mko kwar roi ḇeḇor nakam yamnaf kwar ro Mami na.” (Yoh. 15:15) Ḇaḇekayam skoḇenane nafrur fa Yesus syambraḇ. Fafnoḇek skoḇena faro fararmyan nafrur Yesus marisen kaku.​—Luk. 10:17, 21.

¹³ Yesus i kako nya bati eḇesesya wer ro manfamyan ḇyesya. Siso bin ma snon ḇesaramper i ro fararmyan ma  fararur ḇese na. Ono sisya sor i ḇe rum sena insama sfasos anan ḇe i ma ḇyarkus si. (Luk. 10:38-42; Yoh. 12:1, 2) Eḇesesya siso i ro ḇaḇeḇaryas ya ma sḇuk arasai sena fa sisaramperi. (Luk. 8:3) Yesus nya bati ḇepyum snaro mankundi ḇyebati ḇepyum faro si kako. Ifnoḇek si ma dor si fa sifrur roi oso ḇesyadi ro samambraḇ sena ḇa. Inapes rariryano ḇyesyowi kaku roi bati ḇyesine sifrur kwar faro i na. Kokyar kaku bati ḇyesi sifnoḇek i fa nya aski pdef.

14-15. Rariso insama kona bati ḇekaku sya rai? Ma Rariso bisa sḇuk fafnoḇek ḇe ko?

¹⁴ Bati ḇekaku iso bati nari ḇefnoḇek ko fa kosouser pdef ḇe Yahwe I. Imbe komarisen kona bati ḇekaku ido, fandun fa kakḇe bati ḇekaku. Imnis raris Refo dor ko fa koḇuk fafnoḇek faro snonkaku sya, ḇape ḇepon kakuya faro snonkaku ḇefandun kaku fafnoḇek koḇena. (Ef. 4:28) Ro sidang Bedi, mam mansei ḇefandun kaku fafnoḇek Bedi? Mam rawo naek ḇaido srar sisambraḇ fa skaḇkowes ḇa snar semansar binsar kwar ḇaido sidufe, bisa kwoḇes pyan roi sfandun na ke? Bisa buk roḇean faro snonkaku ḇeyananjar sya ke? Wafawi ḇepake situs jw.org^® ma JW Library^® ido, bisa wafnoḇek ḇefawi ḇaim sya ke? Komarisen kofnoḇek snonkaku ḇesesya ro fandandun sena ido, nari koḇeaski.​—Farfyar 20:35.

¹⁵ Bati koḇesya nari sisaramper ko ro fafisu kosmai fafrowes rarirya bisa koḇe aski pdef. Imnis raris Elihu i, fafisu Ayub fyawar samswen ḇyena ḇe i,  ryower pyum kaku. Rarirya kako kuker bati koḇesya. Nari srower pyum ro fafisu kofawar samswen rosai monda kosmai ro kenem koḇena. (Ayb. 32:4) Imboi, bati koḇesine nari sun pyan snemuk faro ko ḇa. Nari mankun koiso ḇesewar anun ḇero Refoya. (Ams. 15:22) Raja Daud fyasnai sne ḇerun kuker dor fafnoḇek ro bati ḇyesya. Ko kako fyor kofandun fafnoḇek ido, komai awer fa kor fafnoḇek ro bati koḇesya. (2 Sam. 17:27-29) Kaku ḇeri, Yahwe iso ḇebuk faro ko bati ḇeradinensya.​—Yak. 1:17.

16. Ro Filipi 4:6, 7, moḇsa kosmai kaku aski rai?

¹⁶ Wasya Filipi 4:6, 7. Rosai ḇefnai fa Yahwe doḇe na kosmai ḇaḇeaski ”ro Yesus Kristus i”? Ine fyasnai nari koḇe aski kaku rofyor kokyar ḇe Yesus i ma kofawi pyum roi ifrur na imnis raris Yahwe marisen Ḇyena. Contoh ya iso, snar Yesus marmar ḇyedi eḇedari sasar koḇena neḇepyos. (1 Yoh. 2:12) Inja nari komarisen kaku. Ro fafisu Yesus ḇye Raja ro Karajan Allah, nari ipyos ḇaḇekandera ḇerama ro mbroḇ koḇedi Setan i. (Yes. 65:17; 1 Yoh. 3:8; Fasasna 21:3, 4) Inja ro fafisu iyama kosmai kankenem ḇeyun marisen. Rofafisu ine Yesus ḇyuk fararur oso ḇe ko mboi ipyan ḇa, rariryano isaramper ko ḇesya kwar. (Mat. 28:19, 20) Inja na koḇebri syadiwer! Insama koḇe aski ido kofandun kakyar, saneraro, ma ḇaḇebri.

17. (a) Moḇsa snonkaku Kristen sya seaski pdef rai? (b) Ro Yohanes 16:33, rosai bisa kosmai na?

¹⁷ Inja, moḇsa kosmai aski ya pdef rofyor fafrowes ndrama nkur ko? Kosomnis raris nyan Yesus ifrur ya. Ḇepon ya, koḇenadi ḇesya kwar. Ḇesuru ya, kosmai samswen rariryano, fandun fa kosouser pdef ḇe Yahwe, ma koḇaryas kuker raryaḇ. Ḇekyor ya, fafisu kosmai fafrowes na, kor fafnoḇek ro bati koḇesya. Rarirya ḇaḇeaski ro Allah nari kyadaun sne ma swaruser koḇena. Ma imnis raris Yesus i, bisa kokrenbur fafrowes ḇebor ḇerama ḇekur ko na.​—Wasya Yohanes 16:33.