Naek Winston, fawar ḇe inko pan rariso swewar Allah I rai?

Yaḇeaḇen ro Queensland, Australia moḇ sifrur yaf roro ya. Kina yesi simyaren seari ḇa. Nkoḇarek ro mnu, inja yasrow mankun kuker snonkaku no ḇa. Fyor yaḇe umur 12 yamarisen yamambir Allah I. Yanadi, yor insama yamambir pyum I. Fyoro ḇa, yasae ro mnu yedi ma yafararur ro Adelaide, Australia Selatan. Yambran farma ḇe Sydney fafisu yaḇe umur 21, ro dia yasrow kuker Pam i. Inja fyawar kuker kelompok oso isoine agama Inggris-Israel. Soḇe snonkaku Inggris syama up ḇero keret-keret ro Israel ma kirine sisyaḇa kwar. Sap mankunsi ḇe up ḇerama ro keret risamfur ro Israel ro karajan utara fyor sun si ḇe women ro abad ḇeḇewar SM. Fyor yakaḇer wer ḇe Adelaide, yafawar topik anine ḇe bati ḇefararur kayam kuker aya ro kantor yedi. Bati yedine fyarkor Refo kuker Saksi-Saksi Yahwe sya. Ro farfyar nuḇedine nufawar kawan kaku ma roi nuyawos yaiso roi Saksi-Saksi Yahwe sya sikyar na. Muniwara insape yafawi roi nufawar nane nama kankarem faro nadi yedi fyor yababa kaker ya. Yafarkor fa yafawi pyum Manḇedaw koḇedi ma Karajan Ḇyeja. Inja yasrow kwar ”inkin mkamor ḇeḇemaeja kaku.”​—Mat. 13:45, 46.

Srar Pam, fyor babo kaker waksewar inkin ani. Inja rariso waksrow i rai?

Yaḇeaben ro kota Coffs Harbour, New South Wales. Nkomyaren nkosun ro ari na. Apus yesuya ma sinan yesya siso kelompok agama Inggris-Israel ine. Bin eba yeja, srar kasun ayedi, napirem ayesya, ma mankun daya nkokame nkoba ro agama ine. Nkokyar Allah imarisen faro up ro er  ḇerama ro Inggris ya. Inja yakyar kaku faro roi ine, mboi yaḇaḇir yafanam ḇe Allah I ḇa. Fyor yaḇe umur 14, ro mnu yeja agama nasya nabore yaso ro nakam raris gereja Anglikan, Baptis, ma Adven ḇape oso ḇaḇeri nafnoḇek aya fa yafanam ḇe Allah I.

Fyoro ḇa kina yedi nkora ḇe Sydney. Ro diwa yasrow kuker Winston, snaro dakmbran farma ḇe diwa. Raris fawar fyawar kwar ani, randak ya nyawos kuker agama na. Ḇape ḇarpur mura fyarkor kuker Saksi Yahwe sya. Inja, na fyas syap ḇe aya ido ryir mnuk ḇero Refo na nasya nabor ro syap ani! Randak ya, yaḇeḇirḇar, ma yamarisen ḇa. Ḇape faḇaḇye mura insape yafawi rosai fyasnai nane nama kakaku ro Allah nairi.

Ro taun 1962, yaraḇe Adelaide insama yafanam syadi ḇe Winston i. Fyasos kwar insama yara mura ido yaḇarekus imbeswa ḇe Saksi yaiso Thomas ma Janice Sloman su. Ro randak ya suma sufarmyan ḇe misionaris ro Papua Nugini. Suma sufur pyum kaku aya. Fafisu ani yaḇe umur 18 ma sufarkor aya fa yamambir pyum Yahwe I. Inja yafarkor Refoya ḇeri. Yakyar inema kakaku rirya. Ḇarpur mura aya ma Winston nufakawin, ma numbran kenem ḇeḇabo ro fararmyan nuḇena ḇe Yahwe I. Nusmai samswen nabor rariryano, nuḇe syowi kaku inkin nusrow kwar anine.

Naek Winston, fawar ḇe inko rariso randak ya musun ro fararur ḇaḇeḇaryas ine rai.

Fyor nufakawin ramnai, Yahwe ḇyuk ḇe aya ’fafisu nabor’ ro fararur ḇepyum syadi. (1 Kor. 16:9) Fafisu ḇerandak ya ryama ro Jack Porter, ḇefarmyan ḇe pengawas wilayah. (Kirine fyarmyan ḇe anggota Panitia Cabang ro kantor cabang Australasia kuker aya.) Jack ma swari, Roslyn, sukofen fa nuḇemerintis. Inja nuḇemerintis taun ririm. Fafisu yaḇeumur 29, nusmai fararur ḇe pengawas wilayah ro Kepulauan Pasifik Selatan ma fafisu anya kantor cabang Fiji iso ḇeḇeawasi sinya. Nusmai fararur ro myos Samoa Amerika, Samoa, Kiribati, Nauru, Niue, Tokelau, Tonga, Tuvalu, ma Vanuatu.

Snonkaku ḇeḇarek ro myos-myos sya fyorno ido siwarki Saksi Yahwe sya. Inja fafisu nkawos ḇe snonkaku sya ido fandun fa numam mnis roi nuyawos ma nufrur na. (Mat. 10:16) Sidang ḇero diwasya naek srar koḇesya sibor ḇa, inja samswen ḇenu fa nusmai moḇ fa nuḇarek roroya. Nuyor ḇe snonkaku ḇero mnu ansine insama nuḇarekus si, sima Saksi Yahwe si sya ḇa. Ḇape sifrurpyum kaku nu, ma simarisen fa nubarkus si.

Wamarisen kaku fararur penerjemahan, rosai ḇefnai ya?

Ro sup Tonga naek srar koḇesya sismai risalah riḇeḇeso ro wos Tonga, oser ro wos ḇero Polinesia. Fyor sifarkor snonkaku sya sepake syap Kebenaran yang Membimbing kepada Hidup yang Kekal ro wos Inggris. Inja rofafisu penatua sya siso farkarkor faro penatua ro minggu rifyak, naek rikyor ḇeyawos wos Tonga ḇefawi mnis wos Inggris ḇa rariryano seterjemahkan syap Kebenaran ani ḇe wos Tonga. Pam ḇyeketik terjemahan senane ma fyarem na ḇe kantor cabang Amerika Serikat fa secetak na. Seterjemahkan na minggu riwar. Ma terjemahan senane napyum mankunḇa, ḇape nefainda kaku fafisu sfarkor kakaku ine ḇe snonkaku ḇeyawos wos Tonga sya. Numa nufararur ro penerjemahan ya ḇa, ḇape numarisen nuḇuk fafnoḇek ḇe si. Iso ḇefnai fa numam pyum fararur penerjemahan ine.

Srar Pam, rosai ḇeḇese rofyor barek ro myos ma ro Australia?

Iḇese kaku! Ro myos ido rosarek sya sarek ko, dares ya dos kaku, sup ya ipnunek, kapai sya sibore, ma fyorno ido roḇean no mnis ḇa. Ma osower ido roi ḇepyum ro moḇ ine iso mandira na fyor nkoḇur ro  ḇaḇeḇaryas ya, bisa nkomnaiwas ma nkokain ro rum nuḇeja sap na ḇe fale ro wos Samoa ḇo numam ḇe soren naiwanda. Rum nanema rum adat ro snonkaku Polinesia sya, samfur na kuker abris ma sepen na ḇa. Fyor paik isnai komam nin ro srai na, ma paik ya sonar ḇyena nasnai ro masen ya bori. Fafisu numam na ḇeri nunadi ma nukarauser roi ḇepyum na, inja nukara ker samswen nusmai na ḇa.

Numarisen kaku romamkun sya. Snaro sima sikamambrif ma simarisen kako fa sifawi nabor, syadi wer fyor smam snonkaku ḇekif pyoper sya. Fafisu nuraḇe Niue, romamkun oso isfu burbur ḇero Winston bramin ḇyeja ma ikofen, ”Yamarisen pik ḇero bramin Bedine.” Ikofen radine snaro dakmam ḇaim bramin ḇena burbur ḇepyoper ma ifawi moḇsa sap na raya ḇa!

Fyor numam snonkaku ḇena roi noḇa sya nuswar marsir si ḇa. Moḇ sḇarek rona nasnai pyum kaku ḇape smam faduru pararei sena ḇa ma sismai mnis war ḇesren ḇa kako. Ḇape naek srar koḇesine sebiasa ro moḇ anya kwar. Seaski snar bisa sḇarek kayam kuker kina sesya, bisa siso fananjur kayam, ma bisa sisyom sisandik Yahwe I. Snar numam kenem ḇepyum sena, inja numarisen nuyakfrur radirya ma ipyan ḇenu fa nufrur roi ḇefandun syadi.

Srar Pam, fyorno ido pos war ro mankundaw ma fasos anan muḇena ro moḇ ḇebabo. Moḇsa wafrur na rai?

Yakofen kasumasa ḇe kamami snaro fyarkor aya fa yafrur fararur ḇero rum na. Fyarkor aya moḇsa yakankun ro for na rai, ma rariso yafasos kumpan yesya rai. Ras oso nuraḇe Kiribati, nuḇarek ro rum oso ma rum ani samfur i kuker aḇris ma rum ya dori srir karui mawai na, ma sepen na kuker anem. Imbe yakankun ido, yaḇai der oso ma yaksaris kafisor ani ramnai yun kapis na fa yakfrur for ani. Imboi imbe yapos war ido yapos kayam kuker awin-awin ḇero diansya. Papos sena sifrur na kuker ai ḇekwan oso meter risuru ma munya sfes kaḇrai, ma sfes ember oso ro kaḇrai ani. Ramnai sfadadwer spos war ani. Yakara ipyan monda. Ḇape fafisu yapos war ido, jadi fa war nsun ro ember ani ḇa, inja simbrif aya ramnai bin oso ro sko pyos pyan war na ḇe aya. Snonkaku ḇero diansya sifrur pyum ma sifnoḇek ker aya.

Mumarisen mufarmyan ro moḇ ḇemyos na. Bisa mufawar farfyar ḇepyum muḇena ḇe inko ke?

Winston: Nukenem mnis adat sena ine ipyan ḇe nu ḇa. Raris, fyor sor nufa nunan ido, naek srar sine roḇeyan sikun na srir nakam ro meja ya. Nufawi ḇanja nuyan pres roḇeyan anna kam inja sakan ḇa! Ḇape faḇye mura insape nufawi, mura sor nufa nunan wer ido nuyanpres na ḇa. Nufrur radine rariryano naek srar sine simsor nu ḇa. Imboi, ro swaf paik riwomen nurama ḇe si simarisen kaku. Ro moḇ ani nyerer nuiso Saksi Yahwe ḇerama ro moḇ ḇesena, imboi naek srar sine kam sima ḇero moḇ diyansiri.

Rarama nuḇedi kako dun mamam ḇepyum faro kawasa ḇero moḇ ani. Snonkaku sya soḇerada naek srar ḇerodiansya siso ḇeḇawes agama ine. Ḇape fafisu smam rarama nuḇedi ḇe snonkaku ḇero ḇondi, sikandor ma sifawi naek srar koḇesine sisya ro moḇ nakam ro supswan ḇesiper.

Pam: Yaswarepen pengalaman oso yaiso fafisu nuro Kiribati. Rodiwa Sidang oser monda ma naek srar sya sakbor ḇa. Penatua oser monda, iso Itinikai Matera. Ifararur nabor kaku ḇe inko. Ro ras oso ryama ro moḇ nuḇarek roya. Dun inaḇen oso ma iser mankokor pnor oser monda ro inaḇen ani. Ma ikofen ḇe nu, ”Yaḇuk ine ḇe mu.” Fafisu ani mankokor pnor sine samswen kaku ro moḇ ani. Frurpyum ro penatua ine nafur fa numarisen ra imbe nukanes.

 Srar Pam, fafisu wafadores ma snembri ikfis, rariso bisa swambraḇ kaḇer?

Ro taun 1973 yafadores fafisu nufarmyan ro Pasifik Selatan. Fafisu ya nuyun snemuk fa nukaḇer ḇe Australia. Ḇape, paik rifyak ramnai sneri ikfis. Winston ḇyesneso kaku snaro roma ḇyedine. Ḇape rosai nuḇaḇir ine faḇaḇye mura nukara mankenem na ḇa snaro nuwasya Menara Pengawal 15 April 2009. Ro artikel ”Pertanyaan Pembaca”, judul ḇyeja ”Apakah ada harapan kebangkitan bagi bayi yang meninggal dalam kandungan ibunya?” Rodia insape nufawi fandun fa nurir nakam ḇe Yahwe I, snaro iso ḇefawi roi ḇepyum nakam. Ro kirine na ḇyuk sneprei ḇe ko ro samswen kosmai na ma ro fafisu iyama nari iwan Rumkun Ḇyedi ’kyakok Setan fararur ḇyena.’ (1 Yoh. 3:8) Nuḇesyowi syadi ”inkin” ḇaido fakamamam ḇeba ḇe Yahwe kawasa Ḇyedi! Kakaku ya ḇyuk saneraro ḇepyum ro fafisu iyama.

Nukara ker samswen nusmai ine ḇa, imboi nuḇe merintis kaḇer. Nufarmyan ro Betel Australia ro paik ri ḇeḇeso ramnai nufarmyan wer ḇe pengawas wilayah. Ramnai nufarmyan ro moḇ ḇemnuna ro New South Wales ma Sydney swaf ya taun ri fyak, ma ro taun 1981 sor nu fa nufarmyan ro kantor cabang Australia isof ro kirine.

Naek Wiston, pengalaman wasmai ro Sup ḇeḇemyos ro Pasifik Selatan nun fainda ḇe Au ro kirine ḇe anggota Panitia Cabang Australia ke?

Imbo, nefainda kaku. Ḇeoser ya, ro Australia myamwarek fararur ro ḇaḇeḇaryas ro Amerika Samoa ma Samoa. Ḇarpur mura kantor cabang Selandia Baru neoser kuker Australia. Inja kirine, wilayah cabang Australia yaiso Australia, Amerika Samoa, Samoa, Kepulauan Cook, Selandia Baru, Niue, Timor-Leste, Tokelau, ma Tonga. Fyor yafarmyan ḇe wakil cabang yaraḇe moḇ nane kam kwar. Pengalaman yasmai na fyor yafarmyan kayam kuker naek srar sya ḇefasnai soasuser ḇero myos ansi nun fainda kaku ḇe aya ro kantor cabang.

Ro pengalaman nusmai nane, bisa nukofen snonkaku ḇeba sya monda ḇa ḇesewar Allah I. Imboi roma babo sya kako simarisen sismai ”inkin ḇeḇemaeja kaku” ine rofyor ono ro kina sesya simewer na. (2 Raj. 5:2, 3; 2 Taw. 34:1-3) Yahwe Allah ḇesaswar imarisen insama ido kokame, sinan ma ḇebabo sya sismai kankenem fyoro ya!

Fafisu aya kuker Pam nusewar Allah isyadi ro 50 taun aniwara, nufawi mnis roi nusewar ine na dun nu ḇe moḇ risai. Kakaku Karajan ine naiso inkin ḇeḇemaeja kaku ya! Nukofen kaku insama nukram inkin anine imnis samambraḇ nuḇena!