1. Rosai na wafrur insama ḇebati fanam kuker snonkaku oso?

WAMARISEN wakḇebati fanam kuker snonkaku oso ido, fandun kaku fa buk swaf Bena insama kwainus i. Fawar ḇe i roi ḇaḇir ma kwara na ido, na insape muḇebati. Ḇape, imbe kakḇebati kuker Yesus i ima roḇepyan risyaḇa. Rosai ḇefnai ya?

2. Roi oser rosai ḇedwarek ko fa koḇebati kuker Yesus i?

² Roi oser ḇedwarek ko fa koḇebati kuker Yesus iso snar komam kaku Yesus i ḇaim. Snonkaku Kristen ḇebor ḇero abad randak sya kako sakmam kaku Yesus i ḇaim. Rarirya mboi, Manwawan Petrus doḇe, ”Mko mam ḇeponi ḇaim, ḇape mkoswar i. Knikine mko mam i ḇaimo ḇape mkokyar faro i.” (1 Ptr. 1:8) Inja, komam kaku Yesus i ḇaimo, bisa kakḇebati fanam kuker i.

3. Roi ḇesuru rosai ḇedwarek ko fa koḇebati kuker Yesus i?

³ Roi ḇesuru ḇedwarek ko iso jadi fa kawos ḇeri yoḇ Yesus i ḇa. Rofyor koḇenadi, kawos ḇeri ḇe Yahwe I. Kakuḇae, na koḇenadi ro snonsnon Yesus, mboi kawos ḇeri yoḇ i ḇa. Yesus mankundi imewer koḇenadi ḇe i. Kukro? Ifawi nadi ima samsyom nairi, ma Yahwe derer monda isyus fa ismai samsyom. (Mat. 4:10) Rarirya mboi, bisa kofasnai saswar faro Yesus i ḇae.

4. Roi ḇekyor rosai ḇedwarek ko fa koḇebati kuker Yesus i, ma rosai na kawos ro farkarkor ine?

 ⁴ Roi ḇekyor ḇedwarek ko wer iso snar Yesus ikenem ro nanki. Inja, na jadi fa kokainus i ḇa. Koḇarek fanam kuker Yesus i ḇa, mboi bisa komambir kaku i. Na komam roi rifyak ḇefnoḇek ko fa koḇebati kuker Yesus ma rariso kofaduru ḇaḇebati ine. Ḇepon ya, rwama kawos roi ḇefnai kaku fa koḇebati fanam kuker Yesus i.

5. Rosai ḇefnai kaku fa koḇebati kuker Yesus i? (Mam kako kotak ” Koḇebati kuker Yesus Ido Na Kakḇebati kuker Yahwe I” ma ” Mamam Ḇemnis Ḇekur Yesus I.”)

⁵ Komarisen koḇebati fanam kuker Yahwe ido, fandun fa koḇebati kuker Yesus i kako. Kukro? Kokarapan roi risuru suine. Ḇepon ya, Yesus ikofen faro manfamyan ḇyesi ḇo doḇe, ”Mami mankundi iswar mko, snar mkoswar aya kwar.” (Yoh. 16:27) Ikofen kako, ”Snonkaku oso ḇaḇeri ḇerama faro Mami, rofyor imbranuk ro ayaḇa.” (Yoh. 14:6) Koḇebati kuker Yesus i ḇa ido, na jadi fa koḇebati fanam kuker Yahwe I ḇa. Ine imnis ra imbe kosun mundum ḇe aidoram oso, mboi kosun roro kedwa ya ḇa. Yesus dap wos sarḇer ḇemnis rofyor ikofen ima ’kedwa ḇe domba-domba sya’. (Yoh. 10:7) Ḇesuru ya, Yesus fyasnai mnis kaku Kmari rari Ḇyena. Ikofen faro manfamyan ḇyesi radine, ”Mansei ḇemam aya kwar ido, myam Kmaya kwar kako.” (Yoh. 14:9) Inja, nyan ḇepon kaku fa komambir Yahwe iso kofarkor ro Yesus kankenem ḇyena. Kofarkor nabor ro Yesus ido, na koswar kaku i. Ma koswar  kaku Yesus ido, nari koswar syadi Kmari kako.

6. Rosai wer ḇefnai fandun fa koḇebati kuker Yesus i? Fasnaiḇair na.

⁶ Fandun fa koḇebati kuker Yesus insama nadi koḇena neḇekarem. Ine kyurfasnai ro papupes nadi koḇena, na kap ”snonsnon Yesus” monda ḇa. Fandun kako fa kofawi pyum nyan Yahwe kyarem nadi koḇena roro Yesus i. Yesus ikofenḇair faro manfamyan ḇyesi ḇo doḇe, ”Rosai mkor kuker snonsnon ayedi, nari yafrur na faro mko.” (Yoh. 14:13) Yahwe iso monda ḇerower ma ḇekarem nadi koḇena, mboi ḇyuk papoik ḇe Yesus i kwar fa ifrur na. (Mat. 28:18) Inja, Yahwe kyarem nadi koḇena ḇaim, na myam koisya kofrur Yesus anun ḇyena kwar ke roḇa. Imnis raris, Yesus ikofen ḇo doḇe, ”Snar rofyor mkopyos snonkaku sasar sena, Kma mkoḇedi ro boiyaswa Dakpyos sasar mkoḇena kako. Ḇape rofyor mkopyos sasar snonkaku ḇa, Kma mkoḇedi kako Ipok dakpyos sasar mkoḇena ḇa.” (Mat. 6:14, 15) Inja, fandun fa kofrur pyum snonkaku ḇesesya, raris moḇ Yahwe ma Yesus sufrur pyum ko raya!

7. Mansei na ḇesmai payamyum ro farsarser fasaspar ro Yesus marmar ḇyedi?

⁷ Snonkaku ḇebati fanam kuker Yesus si monda nari ḇesmai payamyum ro farsarser fasaspar ḇyedi. Kofawi na ro? Yesus doḇe nari ’ḇyuk kankenem ḇyedi faro bati ḇyesi’. (Yoh. 15:13) Snon ma bin ḇefarmyan faro Yahwe sisya sikenem ro fafisu Yesus ryama ḇe supswan ine ḇaim. Raris Abraham, Sara, Moses, ma Rakhab. Nari sismai kaḇakḇok, ma si kako fandun fa sfarkor nabor ḇekur Yesus insama sakswar i. Rarirya, nari sakḇebati kuker Yesus i ma saksmai kankenem fyoro.​—Yoh. 17:3; Kis. 24:15; Ibr. 11:8-12, 24-26, 31.

8-9. Imnis ḇekofen ro Yohanes 15:4, 5, rosai na kofrur snar koḇebati kuker Yesus i, ma rosai ḇefnai fa koḇeoser pdef kuker Yesus i?

⁸ Komarisen kofararur kayam fnoḇek Yesus fa koḇaryas abar Karajan ḇe snonkaku ḇese ma kofarkor si. Fyor Yesus ryo supswan ine, dakfarkor snonkaku sya. Fafisu Yesus kyaḇer ḇe nanki, ḇyebukor sidang Kristen ma fyarkin ko pdef fa koḇaryas ma koḇuk farkarkor snonkaku sya. Myamepen ma ḇyesyowi roi kofrur kaku na fa kofnoḇek snonkaku ḇebor syadi insama smambir i ma Kmari. Kakuḇae, kosambraḇ fa kofrur fararur ine kukro Yahwe ma Yesus sufnoḇek ko.​—Wasya Yohanes 15:4, 5.

⁹ Refo fyarkor ko imbe kofrur Yahwe imarisen ido, fandun fa koswar Yesus i ḇesya kwar. Inja, rwama kawos roi rifyak na kofrur insama koḇebati kuker Yesus i.

10. Roi oser rosai na kofrur kaku insama koḇebati kuker Yesus i?

¹⁰ (1) Komambir pyum Yesus i. Kofrur na kuker kowasya syap Injil rifyak, isoine syap Matius, Markus, Lukas, ma Yohanes. Sfasḇair moḇsa Yesus ifrur pyum kaku snonkaku sya. Kowasenkara fawar kankenem ro Yesus kada, nari nafrur fa koswar ma koḇesyowi Yesus i. Kokarapan, ima Tuan faro manfamyan ḇyesi mboi ifrur si raris women ḇa. Imbape, ikofenḇair ḇe si roi kyara ma ḇyaḇir na. (Yoh. 15:15) Fafisu sesneso, Yesus dakḇesneso fnoḇek si. (Yoh. 11:32-36)  Ḇembroḇ Yesus i sya kako smam ro mankunsi snonkaku ḇerower i sya sakḇebati kuker i. (Mat. 11:19) Komarisen kakso Yesus nyan ḇyena kuker kofrur pyum snonkaku ḇese. Rarirya ido, na ḇaḇebati koḇena kuker si napyum syadi, koḇeaski syadi, koswar ma koḇesyowi syadi Yesus i wer.

11. Roi ḇesuru rosai na kofrur insama koḇebati kuker Yesus i, rosai ḇefnai fa ine fyandun kaku?

¹¹ (2) Koso Yesus nyan kakara ma kenem ḇyena. Kofawi ma koso pyum Yesus nyan kakara ḇyena ido, na koḇebati fanam syadi kuker i. (1 Kor. 2:16) Moḇsa na koso Yesus i rai? Kokarapan roi oser ine. Yesus kyara ḇepon nyan ifnoḇek snonkaku ḇesesya ḇardibur kyara marisen mankun ḇyedi. (Mat. 20:28; Rm. 15:1-3) Snar kyara radirya, fyandun mankundi ḇa ma imarisen ḇyuk ampun. Rofyor ono sisya skara sasar i, fyafayaf fasawsaw ḇa. (Yoh. 1:46, 47) Yesus nya kakara ḇesasar faro snonkaku sya ḇa snar sasar sifrur ro fafisu naiwara. (1 Tim. 1:12-14) Yesus doḇe, ”Snonkakusya kam nari sifawi mboi manfamyan ayesi mko, rofyor mko swar yae mko kada.” (Yoh. 13:35) Ipyum fa wafuken ro mankundaw, ”Yaso Yesus nyan ḇyena kwar kuker yasewar kaku fa yakain pyum kuker naek srar sya ke?”

12. Roi ḇekyor rosai na kofrur insama koḇebati kuker Yesus i, ma moḇsa kofrur na rai?

¹² (3) Kosaramper Yesus naek ḇyesi ḇesmai ramrem sya. Yesus myam roi kofrur fa kosaramper naek ḇyesi ima imnis ra kofrur na ḇe Yesus mankundi. (Mat. 25:34-40) Nyan ḇepon kaku kosaramper snonkaku ḇesmai ramrem ansi iso kaksowarpu fa koḇaryas anun Karajan ma koḇuk farkarkor faro snonkaku sya. Inema fararur Yesus iwan ḇe manfamyan ḇyesi fa sifrur na. (Mat. 28:19, 20; Kis. 10:42) Baboine, Yesus naek ḇyesi bisa sifrur fararur ḇaḇeḇaryas ro supswan ḇesiper ine kukro fafnoḇek ro ’domba ḇese’. (Yoh. 10:16) Waksun ro ’domba ḇese’ ido, oras buk faro fararur ine fyasnaiḇair saswar Bena faro Kristus naek ḇyesi ma Yesus mankundi.

13. Rariso na koso Yesus anun ḇyena ro Lukas 16:9 ya?

¹³ Koḇebati faro Yahwe ma Yesus su kako kuker koḇuk kumpan koḇena fa koḇukisaramper fararur sumam kaku na. (Wasya Lukas 16:9.) Imnis raris, koḇuk kumpan fa nesaramper fararur ro supswan ḇesiper, isoine fararur ḇaḇeḇaryas ro moḇ ḇeḇinkwan kaku, ḇaḇawes, ma fadaduru Balai Karajan ma aidoram ḇesena, ma sḇukifnoḇek ḇesmai rim ḇeba sya. Koḇuk kumpan kako fa kofamfon fandun ro sidang koḇedi ma koḇukifnoḇek ḇefandun sya. (Ams. 19:17) Inja, nyan nabor naisya fa kosaramper Yesus naek ḇyesi.

14. Ro Efesus 4:15, 16, roi ḇefyak rosai na kofrur insama koḇebati kuker Yesus i?

¹⁴ (4) Koso roi sfasos ro sidang Kristen yadori. Na koḇebati fanam syadi kuker ḇebukor ro sidang Kristen, isoine Yesus i, rofyor kofararur kayam fnoḇek naek ḇesmai ramrem ḇefarkin ko kuker saswar ya. (Wasya Efesus 4:15, 16.) Raris ro baboine, kosewar fa koḇuk pyum Balai Karajan koḇena kam. Iso ḇefnai fa sidang ḇeḇeso sḇe si fa seḇeryur kuker sidang ḇese ma moḇ sḇaryas ro na sfadwer na kwar. Inja, organisasi na sisasyar kumpam nabor ḇa. Ḇape, ine nafnai  fa manḇaryas ḇeḇeso fandun fa siso fararwei nane. Manḇaryas ansi imbude sifarmyan ro sidang oso ro swaf taun ḇe taun kwar ma sfanam kuker naek srar ro diwa. Mboi kirine sor si fa sfarmyan ro sidang ḇese. Rofyor Yesus myam manfamyan ḇyesine siso pyum fasasos nane ido, na imarisen kaku!

15. Ro ras ḇarpon iyama, moḇsa ḇaḇebati koḇena kuker Yesus i fyanam syadi wer?

¹⁵ Snonkaku ḇesmai ramrem kuker rur ḇesren sya, nari sakḇepoik fnoḇek Yesus ro Allah Karajan Ḇyedi. Inja nari sakkenem kayam fnoḇek Yesus i, smam i, sawos kuker i, ma sḇebati kuker i isof fyoro. (Yoh. 14:2, 3) Ḇena saneraro fa sikenem ro supswan sya kako nari Yesus iswar ma myamepen si. Smam kaku Yesus i ḇa, mboi nari sḇebati fanam syadi kuker Yesus i kukro Yahwe ma Yesus suḇe si fa sikenem fyoro.​—Yes. 9:6, 7.

16. Snar koḇebati kuker Yesus i, barakas rosai nari kosmai ya?

¹⁶ Rofyor koḇebati kuker Yesus i, na kosmai barakas nabor. Imnis raris, kirine Yesus isaramper ko ma kakḇaḇir saswar ḇyeja faro ko. Ro ras naiwama kona swaf fa kokenem fyoro. Oso wer ido, ḇaḇebati koḇena kuker Yesus i nafnoḇek ko fa kofanam syadi kuker Kmari, Yahwe I. Kona syowi ḇeba kaku fa sap ko ḇe Yesus bati ḇyesi!