Faḇye, fafisu yaḇeumur indokada taun ri 13 ya, yaḇaḇir yafanam Yahwe I wer ḇa. Bati ro rumfarkor ayesi rya sifrur rosai monda simarisen na ma oso idwarek siḇa, ma nafrur yamarisen faro si ḇa ḇaido yaḇeiri. Yamam rya sinan ayesuya aturan sufrurna ma farkankin Refo na rya nadwarek manggenem. Kofarmyan ḇe Yahwe ima rya nmarbak ra. Yakyar Yahwe ima isya, ḇape yafanam kuker I ḇa.

Insamaido yaḇe binbaryas ḇeḇeaktif ḇa awer, inja fyorno ido yaḇaryas kaker. Ḇape yaḇaryas rariryano, yakfrur fasasos ḇa. Inja yawos ḇe snonggaku sya ido yakmom rosai imbe yakofen i. Nafrur fa, yakna kunjungan kembali ḇa ḇaido yakna farkarkor Refo ḇa, ma yaryaḇ wer ḇa. Mura yamarisen manggun ḇaḇeḇaryas ine ḇa. Nanoido yakara ḇo yoḇe, ’Moḇsa sifrur naro minggu ḇe minggu, paik ḇe paik fa simarisen sḇaryas ro ras nakam rai?’

Fafisu yaḇe umur taun ri 17, imbe yakenemso mnis marisen yena. Inja, yabur ḇe  Australia. Sinan ayesuya suḇe sneso ma sumgakwarek fyor yabur rum ya, ḇape sukara na yafarmyan faro Yahwe I pdef.

Kakuya, ro Australia yasambraḇ ḇa kaku ro rur ayena. Yaso fananjur manggun wer ḇa, ma yaḇebati kuker roma babo ḇekenem mnis ḇa sya. Rupa ra aya, sakso fananjur kaker, fama sfarandinem ma sakso ker acara ro bar ḇaido kelab malam. Ro fafisu ya, imbe yakmarisen faro rosai dunya ine ḇyuk na, ḇape yamewer yabur napnapes ya kako. Yafrur rarirya ḇoi, yana aski ma marisen noḇa.

Taun risuru mura, yasrow kuker imbesrar oso ḇenir Tamara. Roi dakkara ro binggundi ḇa, imboi roi ifrurna nafrur yakara kaḇero kenem yena ro fafisu ani. Fafisu anya, yaḇarkus kuker imbesrar rifyak ḇefarbuk ḇaime. Nggor pengawas wilayah ma swari, Tamara i, fa suḇarkus inggo minggu swaf oser. Fyor swari myam fandandun ḇero sidang na ido, Tamara dakso ḇa. Inja, nggokain nggofarfyar ḇo nggombrif kayame. Yamarisen rawo. Tamara ima bin ḇemarisen ḇefnakus inggo ma imarisen kofarfyare. Yamanen Tamara i kukro bin ḇesibuk ro fararmyan ya ḇoi, imarisen ifnak kuker inggo.

Tamara ima bin ḇeraryaḇ dirya. Yamam saswar ḇyena faro napnapes ma raryaḇ ḇyena ro ḇaḇebaryas ya nasnai kaku. Ḇyuk roi ḇepyum kaku faro Yahwe ma ismai aski, ḇoi ayama yana aski noba kukro yaḇaryas kuf ḇa ma yafrur roi nabor ḇa. Rari ḇepyum ma raryaḇ ḇyena ine nadif aya. Kenem ḇyena nafrur yakara kaḇer wos ḇero Refo ḇefasnai snar Yahwe imarisen kuffarmyan I ”kuker aski marisen”.​—Mz. 100:2.

Imbe yakraryaḇ imnis Tamara i, ḇoi musti yafrur fararwe nabore. Mbarya taun rikyor mura, yafrur fararwe ḇeḇeso. Yafrur fasasos wer fyor yaḇaryas ḇaim, ma swaf ḇeḇeso na yaḇemerintis ekstra. Yababir yaknon ma  yamkak ḇa fyor yaḇaryas. Ma fyor yaḇepake ker Refoya, yana marisen ro fararmyan ayena. Fyoro wer ḇa, yaḇeperintis ekstra pdef.

Yaḇebati kako kuker naek srar ḇebabo ma ḇesinan sya. Simarisen faro fararmyan ma sisewar ḇepon Yahwe ro kenem sena. Snar nyan ḇepyum sena ine, nafrur yakara mura ro roi ḇefandun syadi ro kenem ayena. Yawasya Refo ro ras ḇe ras. Fawawas mura, yamarisen yaḇaryas ma yun snemuk fa yakḇe perintis biasa. Mura, yasmai aski marisen wer ma yafanam kuker naek srar ro sidang sya.

Taun oser ramnai, yasrow Alex i, mambesrar ḇefrur pyum ma ḇeswar kaku Yahwe ma fararmyan ya. Dakḇe hamba pelayanan ma dakbe merintis swaf taun ri wonem kwar. Dakḇemerintis indokada swaf paik ri war ro Malawi kako. Nyan ḇepyum ro misionaris rodiwa sya sidif i fa syewar ḇepon Yahwe I ro kenem ḇyena.

Nufarḇuk ro taun 2003. Ramnai, nufarmyan pdef ro fararur ro oras nakam ḇaido dinas sepenuh waktu. Aya ma Alex nusmai barakas nabor ro Yehuwa I, ma nusmai pengalaman ḇepyum nabore.

Ro taun 2009, nusmai undangan fa nufarmyan ḇe misionaris ro Timor-Leste, negara kasun oso ḇekain fanam Indonesia. Nukandor, numarisen, mboi nuḇebirbar ḇaido numgak kako. Paik dirim ya, nuro Dili kwar, isoine ibukota Timor-Leste.

Kenem nuḇena ro diwa naḇese kaku kuker fafisu nuḇarek ro Australia ani. Nufrur fararwe wer faro kebudayaan, wos, roḇean, ma moḇ ḇebabo. Fafisu nubaryas, fyorno ido nusrow kuker ḇesabarar sya, sia sna kuf fawawi noḇa, ma sfandun siḇa. Mamamun  ḇaido perang ifnai ḇo, snonggaku ḇebor sya baken sena neparpar ma siswarepen kaker roi ani ro kenem sena. *

Yamarisen kaku yaḇaryas ro diwa! Imnis raris, ras oso yasrow kuker Maria *, inai ine ḇyeumur taun ri 13. Taun ḇeḇeso aniwara, snari ryoe. Binggundi isrow kmari ker ḇa. Imnis romawa ḇeumur imnis kuker i sya, dakna roi ḇepyum ro kenem ḇyeja ḇa. Ras oso, kyanes ḇo fyawar rosai ḇero sneridori. Ḇape, yafawi ḇaḇeri rosai ikofenna snar yafawi mangguno wos ḇyena ḇaim. Mbarya, yaḇenadi yor Yahwe ifnoḇek aya insamaido bisa yaknoḇek Maria i. Mura, yawasya mnuk-mnuk ḇesambraḇser i. Ḇarpur mura, napnapes ya fyadwer rari, moḇ syansun i rai, ma Maria kenem ḇesiper ḇyena. Kirine, ḇyebaptis kwar ma dakfnoḇek ḇesesya fa sakfarkor Refoya. Inja, Maria nya kina rohani ḇeba kaku ma ḇyabir siswari.

Yahwe ḇyebarakas kaku ḇaḇebaryas ro Timor-Leste. Taun samfur ḇarpur ine manbaryas ḇebabo insape sebaptis rariryano, ḇebor sya sbe perintis, hamba pelayanan, ma penatua. Sia sfararur ro kantor penerjemahan fa seterjemahkan anan rur ḇe wos manggun sena. Yamarisen kaku fyor yarower sidisen ro fananjur ya, yamam simbrif awum, ma yamam sisur ro rur ya.

Imbo kenem nuḇena naḇese kuker roḇepondina, ḇape yamarisen kaku ma yana aski. Inoido, nuyek oto ḇefyos snonggaku sya. Sun ikan garam ma wei ro pasar. Nukako fyorno ido nubuk farkarkor Refo ro rum ḇefyos ma ḇesam. Lantei ḇyena ro saprop, ma mankokor sya simbran mura muma. Rarirya boi, kenem yena napyum kaku!

Yawasen kaḇero fafisu nayafa ido, yakofen kasumasa faro rosai sinan ayesuya sufrur faro ayana. Suḇesewar kaku fa sufarkor aya Yahwe perenta Ḇyena ma sufnoḇek aya, syadiwer wis ayena kuker Yahwe syambraḇ ḇa fyor yaḇe inai ingbor kaker. Yamam ro binggundaya snar wos ḇero Amsal 22:6 nkaku ḇeri. Awin ma Kamam su sumarisen ma sumanen aya snar aya ma Alex nuyuffarmyan kame faro Yahwe. Ro 2016, yaso Alex ro fararur ḇyedi ḇe pengawas wilayah. Nufarmyan ro wilayah cabang Australasia.

Imbo ḇepondima yamarisen yaḇaryas ḇa, ḇape fafisu ine yamarisen yaḇaryas! Insape yafawi rosai rirya wer ḇekur kenem koḇena ḇoi, na kosmai raryaḇ kaku fyor kuffarmyan Allah kuker sne ḇesiper. Iso yamam ro binggundaya. Yafarmyan ḇe Yahwe fnoḇek Alex ro swaf taun ri 18 inema fafisu ḇeyun aski kaku ro kenem yena. Kirine, yafawi wos knam ḇero ḇefas Mazmur Daud faro Yahwe, ”Mansei riryakam ḇesewar fadadiren ro Au nari siraryaḇ. Nari sibras kuker marisen. . . . Ma snonggaku ḇeswar faro snonsnon Bedi nari iryaḇ snar Au.”​—Mz. 5:11.