Fafisu fanam imar ḇaim, rosai ḇefnai fa Yesus dap kaḇer wos ḇero Mazmur 22:1?

Yesus dap wos ḇero Matius 27:46 ma Markus 15:34, ”Allah Yedi, Allah Yedi, snaro Wabur Aya?” Inja, mazmur wos ḇyena ḇero Mazmur 22:1 kaku ndrarirya. Yesus dap wos anna snar fyafko ḇa ḇaido snar nya kakyar ḇa. Ḇoi ifawi kaku sai ḇefnai fa imar ya, ma ifrur na kuker marisen. (Mat. 16:21; 20:28) Ifawi kako fanam marmar ḇyedi, Yahwe na kyadaunwarek i ḇa. (Ayb. 1:10) Yahwe imnai kyadaun Yesus i, inja imar kuker nyan ḇeḇyeḇa kaku ḇoi bisa fyasnai isouser pdef.​—Mrk. 14:35, 36.

Inja, sai ḇefnai fa Yesus dap kaḇer wos ḇero Mazmur ine? Kofawi kaku ḇa, ḇoi mgorama komam roi na ḇeḇesyani. *

Ro wos dap nane, imbude Yesus imbe fyasnaibos snar Yahwe nari ḇye i ro manggundi ma ifnoḇek i ḇa. Yesus na ḇyak farsarser fasaspar ḇoi Yahwe na ifnoḇek i ḇa. Fandun fa imar insa ”ifawi marmari faro snonkakusya kam.”​—Ibr. 2:9.

Ro wos ḇeḇeso Yesus dap ro Mazmur ḇe-22, imbude imarisen insa snonggaku siswarepen wos ḇero mazmur ani ḇesiper. Ro fafisu Yesus ḇyedi, snonggaku Yahudi siswarepen nabor wos ḇero mazmur ine. Fyor srower mnuk oser ro mazmur, fyorno ido siswarepen wos ḇero mazmur ani kam. Roi ine iso imbe fyasnai fyor dap kaḇer Mazmur 22:1 ido, snonggaku Yahudi bisa siswarepen ḇardadi ḇebor ro mazmur ani ḇekur  ḇe sarisa ḇebor fyor Yesus imar ḇaim ma imar kwar anya. (Mz. 22:7, 8, 15, 16, 18, 24) Oso wer ido, bisa siswarepen mnuk ḇepupes ḇeḇeso ḇero Mazmur ḇe-22 ḇesandik Yahwe ma ḇefasnai I ḇe Raja ro supswan ḇesiper ine bori.​—Mz. 22:27-31.

Snar dap kaḇer Daud wos ḇyena, Yesus imbe fyasnai snar ima syasar ḇa. Ro Yesus marmar ḇyedi, semankara i kuker nanapes ḇa ma sikofen syasar kukro danonef Allah kwar. (Mat. 26:65, 66) Roi sifrur fa semankara i na fasaw kaku ro roḇ anya ma namnis ḇa kaku kuker sasoser sifrur fafisu anya. (Mat. 26:59; Mrk. 14:56-59) Inja, dap kaḇer Mazmur 22:1, Yesus rya ikofen, ”Allah Yedi, Allah Yedi, snaro Wabur Aya, yafrur sasar ḇa ḇesyabo?” Imbude, Yesus imarisen sifawi snar ifrur sasar ḇaḇeri ma ima daksmai samamyai ḇerarirya ḇaḇeri.

Yesus imarisen insama snonggaku siswarepen Daud, ḇefas mazmur ani, na dakḇe kandera kako, ḇoi ima nggurfasnai ḇa Yahwe imarisen faro i ḇa. Daud ḇyuk fakfuken ḇero Mazmur 22:1 anya snar nya kakyar ḇa ke? Oroḇa. Ḇyuk fakfuken anya ramnai, Daud doḇe ikyar kaku Yahwe na fyasparbur kawasa Ḇyesi, ma ḇyebarakas Daud i ker. (Mz. 22:23, 24, 27) Rarirya kako, Yesus, ”Rumkun Daud”, ḇyekandera ro ai kandera raryano, ima kyurfasnai ḇa Yahwe imarisen faro Yesus i ḇa.​—Mat. 21:9.

Imbude Yesus ḇyesneso snar Yahwe imnai kyadaunwarek i insa fyasnai ḇaḇesouser ḇyedi. Kofawi snar Yahwe imewer kaku Yesus ḇyekandera ma imardi. Imboi, Adam ma Eva susouser ḇa. Inja, Yesus ifrur sasar oḇa yo fandun fa ḇyekandera ma imar. Ifrur rarirya samaido kyarem Setan safsof ḇyedi ma ḇye farsarser fasaspar insa snonggaku saksmai kankenem ḇenapes Adam ifrur fa napromes anya. (Mrk. 8:31; 1 Ptr. 2:21-24) Inja, roi ifrur nane imbe ndarirya ido, ine randak kaku Yahwe imnai kyadaunwarek Yesus i.

Imbude Yesus imbe ifnoḇek manfamyan ḇyesi insa sifawi sai ḇefnai fa Yahwe ḇyuk Yesus i fa imar ro ai kandera ya. * Yesus ifawi marmar ḇyedi ḇe snonḇarḇor ro ai anya na nafrur snonggaku sibor skarkar. (1 Kor. 1:23) Manfamyan ḇyesi sifawi sai ḇefnai Yesus imar ya ido, na smam i ḇe snonḇarḇor ḇa, ḇoi smam i ḇe Manfaspar.​—Gal. 3:13, 14.

Kofawi ḇa roi ḇefnai Yesus dap kaḇer wos ḇero Mazmur 22:1, ifawi snar Yahwe marisen Ḇyena ndarirya ido, fandun fa imar. Fyoro ḇa fyor dap kaḇer wos ḇero mazmur anya, Yesus doḇe, ”Imnis kwar!” (Yoh. 19:30; Luk. 22:37) Kaku, Yahwe imnai kyadaunwarek Yesus fasaw monda insama Yesus ifrur fararur ḇyena ro supswan. Oso wer ido, ḇardadi ḇekur ḇe Yesus i nakam nari namnis raris ”fasfas syap Moses ma syap nabi-nabi ma syap mazmur”.​—Luk. 24:44.