1-2. Sarḇer rosai ḇefnoḇek ko fa kofawi wos ḇero 1 Petrus 2:21 ya?

KWARAPAN mgosya mgombran ro supyadori. Moḇ mgora rona ine, mgakfawi naḇaime ma mgombran sasar ido bisa mgoḇor. Mboi ḇembran ro ḇarpon mgoya ḇaido manfarkin ani ima fyawinepen nyan nakame. Fafisu imbrane, nari moḇ imbran rona ḇaido wewur ḇyena nasya ro saprop na. Fyoro ḇa ido, iswara imbran ḇepon mgo kwar ma mgomam i ḇa! Ḇape manggundaw wamgak ḇa. Au ma bati bansya nari mgoḇesewar fa mgofanam ḇeyun mgo ani!

² Snonggaku Kristen ḇekaku, simnis rarirya, simbran ro supyadori isoine dunya ḇeḇarḇor ine. Kokofen kasumasa nabor naba snar Yahwe ḇyuk Manfarkin ḇenapes isoine roma ḇyani, Yesus Kristus i, inja bisa kakso wewur ḇyena. (1 Ptr. 2:21) Raris syap oso ḇeser referensi Alkitab doḇe, fyor fyasepen mnuk ḇero 1 Petrus 2:21, Manwawan Petrus ḇyukimnis Yesus kuker manfarkin oso. Raris manfarkin ḇembran ḇo wewur ḇyena nasya, Yesus ikako ḇyuko nyan ḇaido wewur, insama kaksona. Mgorama kawos fakfuken rikyor anskoine: Rosai knam ro koso Yesus wewur ḇyena? Rosai ḇefnai fa koso Yesus wewur ḇyena? Ma moḇsai na kofrur na rai?

3. Rosai knam ro koso snonggaku oso wewur ḇyena?

³ Rosai knam ro koso snonggaku oso wewur ḇyena? Ro Refo dori, wos ”marandan” ma ”wesi ḇaido siwesna” nfasnaiḇairo kankenem ro snonggaku oso. (Kej. 6:9; Ams. 4:26) Nyan snonggaku oso fyasnai na ine imniso wewur fyor isya imbrane. Inja koso wewur ro snonggaku oso ine  nfasnaiḇair koso nyan ḇyena ḇaido kokenem imnis i.

4. Rosai knam ro koso Yesus wewur ḇyena?

⁴ Rosai knam ro koso Yesus wewur ḇyena? Knam ḇyediso koso Yesus nyan ḇyena. Mnuk ḇero tema ro farkarkor iyasne, Petrus ikofenfasnai nyan ḇepyum Yesus ḇyena fyor ḇyekandera ya. Ḇape nyan ḇese nasya nabor fa bisa kun ro Yesus i. (1 Ptr. 2:18-25) Kakuḇeri, Yesus fyasnai nyan ḇe ko ro kankenem ḇyena kam isoine roi ifrur ma ikofen na.

5. Konapes ḇa raryano moḇsa na kakso Yesus nyan ḇyena rai? Fasnaiḇair na.

⁵ Snar koinema snonggaku ḇenapes ḇa siko, inja bisa kakso Yesus nyan ḇyena ke? Imbo! Petrus danun ḇekofa kosomnis Yesus wewur ḇyena, boi ikofen ḇa konapes ndiso. Inja, konapes ḇa rariryano, bisa kakso Yesus wewur ḇyena kuker koḇesewar kaku fa kosomnis i. Kofrur rarya ido, na kofasnai rosai manwawan Yohanes ikofen ine: ”Kankenem ḇyedi imnis raris Yesus.”​—1 Yoh. 2:6.

6-7. Rosai ḇefnai fa koso Yesus wewur ḇyena ido nari kofanam syadi faro Yahwe I?

⁶ Koso Yesus wewur ḇyena ido, nari nafrur kofanam syadi Yahwe I. Snaro? Roi ḇepon ya, snar ro kankenem ḇyedi Yesus ifrur Allah imarisen ḇesya kwar. (Yoh. 8:29) Kuker koso Yesus wewur ḇyena ido, nari kofrur Yahwe imarisen. Ma bisa kokyar snar Kma kobedi ro nanggi nari fyanam faro snonggaku ḇesewar fa ḇebati ḇyedi.​—Yak. 4:8.

⁷ Ḇesuru ya, Yesus isomnis kaku Kmari ḇenapes. Naiso eḇedari Yesus ikofen radine: ”Mansei ḇemam aya kwar ido, myam Kmaya kwar kako.” (Yoh. 14:9)  Bisa kakso Yesus rari ma moḇ ifrurpyum snonggaku sya rai imnis ra, sneri iswar kufo snon ḇeduf pado oso, iswar bin ḇeduf marḇak oso, ma iswar snonggaku ḇesmai susa snar snonggaku siswar sya simarbursi. Koso Yesus nyan ḇyena ido, nfasnai koso Yahwe I kako. (Mrk. 1:40, 41; 5:25-34; Yoh. 11:33-35) Koso Yahwe pdef ido, nari kofanam syadi kuker I.

8. Fasnaiḇair rosai ḇefnai fa koso Yesus wewur ḇyena ido, nari nafnoḇek ko fa kokafyo supswan ya?

⁸ Koso Yesus wewur ḇyena ido, na roi ḇero dunya ine nawyae koḇa. Ro roḇ papupes fyor imar ḇaime, Yesus ikofen ḇo doḇe, ”Yakafyo supswan ine kwar.” (Yoh. 16:33) Yesus maksud ḇyediso pyampyum kakara, marisen, ma fararur ḇeḇyeḇa snonggaku sya sifrur ro dunya ine. Yesus ḇyefnder ro roi ḇefnai fa dado ḇe supswan ine ḇa, isoine fyasren Yahwe snonsnon ḇesren Ḇyedi. Ko ido rarso? Ro supswan ine, roi nabor nasya bisa nawyae ko. Ḇoi kakfrur mnis raris Yesus i, komam monda roi ḇefandun na iso kofrur Yahwe marisen Ḇyena. Kofrur na ido, ko kako nari ’kokafyo’ supswan.​—1 Yoh. 5:5.

9. Rosai nari kofrur kaku ya insama koro nyan ḇeyun koḇe kankenem ya?

⁹ Koso Yesus wewur ḇyena ido, na kosmai kankenem ḇekain fyoro ya. Ras oso, snon kayan oso ifuken Yesus i doḇo rosai na dakfrur ya insamaido daksmai kankenem fyoro ya, Yesus kyarem i ḇo doḇe, ”Rwamuma ma waso Aya.” (Mat. 19:16-21) Rofyor dawos kuker snonggaku Yahudi ḇeḇeso ḇekyar ḇa ima Mesias rirya, Yesus doḇe, ”Domba-domba ayesi . . . siso aya. Ma yaḇuk kankenem ḇekain fyoro farosi.” (Yoh. 10:24-29) Nikodemus, snon oso ro Kankain Karkara Agama ḇemarisen fa ḇefawi nabor Yesus farkarkor ḇyena, Yesus doḇe ’snonggaku ḇekyar faro i sya’ nari ’sismai kankenem ḇekain fyoro.’ (Yoh. 3:16) Kokyar faro Yesus kuker kombranser rosai fyarkorna ma koso nyan ḇepyum ḇyena. Kofrur na ido, na kosya ro nyan ḇeyun koḇe kankenem fyoro ya.​—Mat. 7:14.

10. Rosai fandun fa kofrur ya insama komambir Yesus kuker pyum? (Yohanes 17:3)

¹⁰ Imbe koso Yesus wewur ḇyena kuker mnis kaku ido, fandun fa komambir i. (Wasya Yohanes 17:3.) ’Komambir Yesus’ ima kofarkor rari-rari ḇyena, nyan kakara ḇyena, ma farkankin dakso na. Koro napnapes ine fyoro kwar ke fyoro ḇaim, na koḇesewar kaku fa ’komambir’ Yahwe ma Roma Ḇyedi.

11. Syap Injil rifyak naser rosai?

 ¹¹ Insama komambir Roma Ḇyedi, kuker sawarwar Yahwe ḇyuk injil rifyak ro Refoya. Ro Injil rifyak ani naser sarisa kankenem ma Yesus fararmyan ḇyena. Fasfas ani ikofenḇair ḇe ko rosai Yesus ikofenna, roi ifrurna, ma rosai Yesus ḇyabirna. Imbe kokofen ido, injil rifyak ani nakofenbair wewur ḇaido nyan ro Yesus i. Kowasya kam na ido, bisa kokarauser Yesus nyan ḇyena. (Ibr. 12:3) Inja kuker kofarkor Injil anine, nari komambir pyum Yesus i kaku. Bon ḇyena iso, bisa koso kaku wewur ḇyena.

12. Fainda ḇebor rosai na kosmai ro ya Injil rifyak ya?

¹² Insamaido kosmai fainda ḇebor ro syap Injil rifyak ya, na kowasya monda na ḇa. Imboi, fandun kaku koḇesewar fa kofarkor myaren na ma kokarauser kakuna. (Mam kako ro Yosua 1:8, catatan kaki.) Mgorama kawos nyan disuru bisa ḇefnoḇek ko fa kokarauser syap Injil rifyak ani ma kakfrur rosai kowasya kwar na.

13. Moḇsai wawasen kara mura ro farfyar wawasya ro Injil na?

¹³ Ḇepon ya, wawasen kara farfyar ḇero Injil rifyak ani. Wawasen kara manggundaw wakro farfyar ani, ma wawasen kara rosai mam na, warower na, ma ḇaḇir na. Insama bisa wafrur roi ani, wafrur riset kuker ḇepake publikasi ḇero Yahwe organisasi Ḇyedi. Rofyor wawasya na, mamuser farfyar ḇyena, isoine roi ḇeḇejadi ḇaim ma ḇejadi kwar na. Swewar nabor wer ḇekur snonggaku ma moḇ ḇero fawar ani. Mam wer fasfas Injil ḇesena ḇekur farfyar wafarkor ani. Fyorno ido ḇefas Injil ḇesena sikofenḇair fawar ḇepyum oso ḇese ro ḇefas Injil ḇese na.

14-15. Rosai na kofrur kaku ya insama kombranser rosai kofarkor ro fasfas Injil na?

¹⁴ Ḇesuruya, kwarauser farfyar ḇero Injil na faro kenem manggun bena. Fandun  fa wafrur roi ani insama bisa wambranser na ro kenem bedi faro rosai farkor kwarna. (Yoh. 13:17) Inja, fafisu farkor farfyar ḇero Injil kwar ido, kwarapan roi anane: ’Ro farfyar anane, farkarkor rosai na yambranser naro kenem ayena? Rariso yabuk farfyar ani fa yabukifnoḇek snonggaku ḇesesya?’ Kwara manseiso na wafnoḇek ya. Ramnai ro fafisu ḇemnis ma kuker nyan ḇepyum, fawar na faro snonggaku ani kuker farkarkor wasmai kwar na.

¹⁵ Mgorama kawos wer fawar ḇekur kabom ḇesaḇarar oso Yesus myam ro bait ya. Nari kofarkor fawar ani kuker koḇepake nyan risuru kofarkor kwar ani.

16. Wawasya Markus 12:41, ramnai fawaro rosai wawasen ro farfyar ani.

¹⁶ Wawasenkara farfyar ḇyena. (Wasya Markus 12:41.) Wawasen pan rosai ḇejadi na. Ro fafisu ya tanggal 11 Nisan taun 33 M, ras ḇeḇeso fyor Yesus imar ḇaim. Ro ras ani, Yesus ḇyepake oras nabor fa ḇyuk farkor ro bait. Ḇoi ismai samswen ro manfarkin agama sya. Ḇeḇeso ro si rodiso Yesus ismai papoik roya. Manfarkin agama ḇeḇeso sya sbuk fakfuken ḇesamswen na fa sbuki frowes i. (Mrk. 11:27-33; 12:13-34) Mura Yesus imbran bar bese ḇero bait na. Rodia Yesus bisa myamo burua farsarser, inja imbude isya ro Bubes Bar Bin sya. Kyon rodia ma fyair mura ro snonggaku ḇerir pipi sena. Imbude, Yesus ryowerbiro rakrok pipi ḇaido uang logam srir ro burua ani.

17. Fawarbair roi ḇekur bin kabom oso ḇeḇefas ro Markus 12:42.

¹⁷ Wawasya Markus 12:42. Ro oras ḇeḇeso mura, Yesus myam, ”bin kabom ḇesaḇarar oso.” (Luk. 21:2) Bin kabom ani komam kada dakna pipi nabor ḇa fa ḇyukikoḇes roi fyandun ro ras-ras na. Fama, imarisen fa dakrir pipi ro bait. Imbran fanam burua farsarser oser ḇo dakrir fasis remis risuru. Imbude mgaren pipi ani ndrok naḇaḇa. Yesus fyawi snar bin ani ryir remis risuru, isoine pipi sen ḇekasun ro fafisu ya. Pipi dakrir ani nasrow fa kyowes manesu oso, iso man sbob fa san na ma ḇena ḇaḇyak ḇekaki ḇa.

18. Raris Markus 12:43, 44 ikofen ya, rosai Yesus ikofen faro bin kabom ani farsarser ḇyedi?

¹⁸ Wawasya Markus 12:43, 44. Yesus myanen bin kabom ani. Dor manfamyan ḇyesi, ramnai kyur ḇe kabom ani ḇo doḇe, ”Bin kabom ḇesaḇarar ine ḇyuk sibor syadi ro kawasa ḇerir pipi ro burua farsarser ine.” Ramnai ikofen wer, ”Snar si kam ssḇuk ro kayan sena, ḇape kabom ine ma ḇyuk ro ḇaḇe saḇarar ḇyedi, nana ma an ḇyena kam.” Rofyor bin kabom ani ryir pipi ḇyena kam ro ras ani, na ikyar kaku faro Yahwe I. Ikyar nari Yahwe ḇyuk fandandun ras-ras ḇyena.​—Mz. 26:3.

19. Rosai kofarkor ro Yesus wos ḇyena faro bin kabom ḇesabar ani?

¹⁹ Wambranser rosai farkor ro farfyar ani faro kenem bedi. Kwara pan roi ine: ’Rosai yafarkor ro Yesus wos ḇyena kuker bin kabom ḇesabarar ani?’ Kwarapan bin kabom ani keadaan ḇyena. Na kyara fa ḇyuk nabor ḇe Yahwe I. Fama, ipok ifrur roi ani ḇa; ḇyesewar kaku fa ḇyuk roi ḇepyum faro Yahwe I. Ma Yesus fyawi farsarser ro bin kabom ani nesyowi kaku faro Kmari. Ro fawar anine, kofarkor roi oser ḇefandun na: Yahwe imarisen fyor koḇuk roi ḇepyum faro I, isoine kenem ma fararmyan koḇena kuker sne ḇesiper. (Mat. 22:37; Kol. 3:23) Imbo, Yahwe imarisen  fyor myam koḇesewar fa kofarmyan yoḇ I! Ine faro oras ma samambraḇ koḇena faro kobuki syom I, imnis raris kuker koḇaryas ma koso fananjur.

20. Rariso wambranser rosai wafarkor kwarna ro fawar bin kabor ani? Buk conto pan.

²⁰ Rariso bisa wambranser rosai wafarkor ro bin kabom ani? Kwarapan imbude sia sfandun samambraḇ ro au kukro fararmyan sena kako nesyowi faro Yahwe. Imnis raris, imbude fawi imbesrar ḇesinan oso, ḇoi byaryas nabor imnis ro ḇepondi na ḇa snar idafdufe. Imbude roi ani nafrur fa byabir ḇyeḇefandun manggun werḇa. Ḇaido, imbude fawi naek oso ḇeduf dafduf ḇeprei fasauḇa. Imbude ḇyesanekar snar iso fananjur ker ḇa. Wafawi naek srar sisya simnis rarirya ido, buk wos ḇeyun doryaḇ. (Ef. 4:29) Wakofenḇair ḇe si rosai wafarkor ro fawar bin kabom ḇesabarar ani, ine bisa nasambraḇser si. Wafrur rarya ido, bisa wafrur sifa sikyar snar Yahwe imarisen snar sḇuk roi ḇepyum faro I kwar. (Ams. 15:23; 1 Tes. 5:11) Roi sbukna naba ke kasun ke, fandun fa wamanen snonggaku ḇebuk kuker sne ḇesiper faro Yahwe sya. Wafrur na ido, ine nfasnai waso Yesus wewur ḇyena kuker pyum.

21. Kawos kwar farkarkor ine inja rosai imbe wakfrur ya?

²¹ Komarisen kaku snar bisa kofarkor roi nabor ro Yesus I roro Injil rifyak ya. Rarirya, bisa koso wewur ḇyena kuker mnis. Rofyor kofarkor ro manggun ko ḇaido kofrur nadi ro Kina, ḇesewar fa wafarkor Injil rifyak anane. Koswarepen snar imbe kosmai fainda ḇebor ro farkarkor ani, fandun fa kowasen kara fawar kowasya anna ma kombranser rosai kofarkor kwar na ro kenem koḇena. Osower ido, koso rosai Yesus ifrurna, fandun fa komnaf rosai ikofenna. Ro farkarkor ḇerama ya, nari kawos rosai bisa kofarkor ro Yesus wos ḇepupes ḇyena fyor imar ḇaim.