Fakfuken ro Ḇewasya
Alat kontrasepsi ḇero binsya kapar sena (IUD) bisa snonkaku Kristen sakḇe pake nake?
Roro roi ine imbeswa ḇeḇe Kristen fandun fa suyun snemuk ḇekyaren sne user suḇenaḇa. Inja, fandun kaku sumam moḇsa IUD (sap kako nabe KB spiral) fyararur raya ma sukara mnis farkankin ḇero Refo ḇekofenḇair kuker roi ine.
Yahwe ḇyuk parenta ḇe Adam ma Eva su ma ḇarpur yawer faro Nuh ma kina ḇyansi, ”Mukapar romawa ma kpu isof sibor syadi.” (Kejadian 1:28; 9:1) Refo ikofenḇair ḇa snar snonkaku Kristen fandun siso sasoser ine. Inja, imbeswa suiso ḇekinfir ro mankunsu imbe suna romawa ke roḇa ma suyun snemuk fa suna romawa rifis. Sumewer suna romawa ido, bisa sukinfir alat kontrasepsi rosai imbe supakena. Rosai fandun kaku fa sukara mnisna?
Snonkaku Kristen fandun fa skara mnis resari farkankin ḇekofenḇair kuker roi ine. Inja, nari sisoḇa nyan rosai monda ḇefesepen kuker aborsi. Aborsi ima imnis kuker komun kapira nari ḇeḇeaḇen ya. Aborsi ima imnisḇa kuker rosai Refo ikofen snar kankenem snonkaku ima nḇemaeja kaku. (Keluaran 20:13; 21:22, 23; Mazmur 139:16; Yeremia 1:5) Rariso kuker IUD?
The Watchtower 15 Mei 1979 (ram ḇeḇe 30-31) dawos kuker roi ine. Ro fafisuya, IUD sepakena neḇefrur ro plastik. Alat ine sisun mundum naḇe bin oso kapar ḇyedi insama fyardoresḇa. Artikel ani kako ikofen osoḇaḇeri ḇefawi rariso IUD fyararur rai. Ilmuwan sya sikofen, IUD ine idwarek sperma ya, inja sel telur ine ḇyeoser kuker sperma ḇa. Sel telur ine ḇyebon ḇa ido, nari kankenem ya isyaḇa.
Ḇape, bukti ḇeḇeso kyurfasna snar sel telur fyorno ido ḇyeoser kuker sperma. Sel telur ani bisa isur ro tuba Fallopi (isof bin ani fyardores ro kaparya bandi) ḇaido ro bondum snekapar ḇyedi. Ḇape, rofyor sel ani syun ḇe snekaparya, IUD bisa idwarek sel ani pyof ro kaparya. Inja ine nari nafrur sel ani syae. Ine namnis kuker aborsi. Artikel ani ikofen snonkaku Kristen ”fandun fa skara mnis roi nari ḇefnaiya ma skara Refo mamam ḇyeja snar kankenem ima isren”.—Mazmur 36:9.
Ḇape rofyor artikel ani sḇensaena ro 1979, ḇebabo nasya ro medis ma fawawi dunya ine.
Kirine, jenis IUD risuru nasya. Ḇerandakya, IUD ḇeser tembaga. Ine nabor sepakena ro Amerika Serikat ro taun 1988. Ḇesuruya, IUD ḇefrursae hormon. Ine sḇoḇna ro taun 2001. Rariso kofawi alat risuru suine sufararurya?
Tembaga: Imnis raris IUD sifawi kwarna, IUD tembaga ine nafrur fa sperma samswen fa syun ḇe snekapar inja samswen fa ḇyeoser kuker sel telur. Osower ido, tembaga ine imnis raris roi ḇemamur ḇeyun marmar faro sperma. * (Mam fas-fas kasun ro sop.) IUD ine kako bisa ifrur fa kapar ya isrepek.
Hormon: Moḇ fyararurya imnis kuker moḇ IUD fyararurna, ḇape IUD ine ifrursae hormon ḇero kapar ya, ḇemnis kuker hormon ḇero pil KB. Faro bin ḇeḇeso sya, * (Mam fas-fas kasun ro sop.) Mamas [lendir] ḇero mulut rahim (serviks) ine kako nari nakpor syadi, inja sperma jadi fa syun ro vagina ḇe kapar ya ḇa.
IUD ine nafrur baken sena namnai fa nafrursae sel telur (ovulasi). Rofyor sel telur nasya ḇa ido, nari romawa isur ro kapar ḇyediḇa. IUD ine kako nafrur kaparya isrepek.Imnis raris ḇeḇeyap kwarna, IUD suru suine sufrur kapar ya isrepek. Inja, rofyor bin oso ifrursae sel telur ramnai sel ani ḇyeoser kuker sperma ma nsun ḇe kapar ya ido, na jadi fa pyom ro kapar ḇyedi ḇa. Ine nari nafnai fa romawa ḇyedi syae. Ḇape, ilmuwan sya soḇe, roi ḇeradine nḇejadi kali oser monda, ma ine nari ḇeḇejadiḇa rofyor bin oso dinem pil KB.
Inja, na kokofenḇa tembaga ma hormon bisa sudwarek sel telur ḇyeoser kuker sperma. Ḇape, imnis raris kowawos kwarna, penelitian fyasnaḇair IUD risuru suine bisa sudwarek sel telur ḇyeoser kuker sperma, inja na bin oso jadi fa fyardores ḇa.
Imbeswa Kristen ḇemarisen ḇepake IUD ine fandun fa suwawos kuker dokter fa susewar IUD ḇemnis rariso ḇero moḇ suḇedi, fainda ma samswen nari binswa ya ismana. Imbeswa suine supok suyor fafnoḇek ro snonkaku ḇese ḇaido dokter syaḇa, fa sifrurpyan snemuk faro mankunsu. (Roma 14:12; Galatia 6:4, 5) Inema snemuk mankun suḇena dirya. Fandun fa sufrur snemuk ḇeyun marisen faro Allah ma ḇekyaren sneuser suḇena ḇa.—Mam kako 1 Timotius 1:18, 19; 2 Timotius 1:3.
^ par. 8 Syap panduan ro Layanan Kesehatan Nasional Inggris ikofen, ”Faro IUD ḇeser nabor tembaga, fainda ḇyeja nasyadi 99 persen. Ine kyurfasna, taun ḇe taun 1 ro fandu bin ri 100 ḇepake IUD ine bisa fyardores. Tembaga ḇero dorina kermkun ido, fainda ro IUD kako nari napyum ḇa.”
^ par. 9 Snar IUD hormon ifrur kapar ya isrepek, inja na dokter ḇyuk saran IUD ine faro bin ḇesma mamas nabor, imbude fyarḇuk kwar ke roḇa.