1. Rosai ḇefnai fa ḇaḇebaptis ima nyan kankenem ḇefandun kaku? (Mam sonin ro randak artikel ine.)

RO TAUN ḇe taun ḇefarkor Refo syaran ma syaran sebaptis. Ḇebor ro fandu si siso romawa babo isoine snonkbor ma binkbor ḇaido ḇebaḇa kaker sya. Imbude sima sro napnapes rofyor sibaḇaya. Au kako oso rofandu si ke? Rarirya ido, wafrur roi ḇepyum syadi kwar. Snonkaku Kristen fandun fa sebaptis. Ḇaḇebaptis ima nefandun kaku insama sisma fasaspar ma sikenem fyoro.​—Matius 28:19, 20; 1 Petrus 3:21.

2. Rosai ḇefnai fa wamkak awer fa buk farsamsyom Bedi faro Yahwe I?

² Rofyor ḇebaptis kwar, barakas ḇepyum nabor nasya ndrama ro Yahwe I nari wasmana. Ḇape, nwa fakamamar ḇesewer. Rosai rirya? Rofyor ras ḇebaptis ya, naek ḇeyun faya ḇaḇebaptis nari ḇyuk fakfuken ine, ”Ḇeknam ro farsarser  Yesus Kristus ḇyeja, wambror kaku kwar ro sasar Bena ma buk kankenem Bedi faro Yahwe fa wafrur marisen Ḇyedi ke?” Ma, kwarem ”Imbo”. Ḇeasas fa waswar Yahwe I ma swewar I ḇepon ro kankenem Bedi. Na wafafko snar wafrur kwar asas ḇefandun kaku ani ke? Oroḇaḇeri! Nari wafafko ḇaḇeri faro snemuk wafrurna fa buk kankenem Bedi faro Yahwe I. Snonkaku ḇefawi ḇaim Yahwe sya, kakuya sikenem ro papoik Setan. Ibiris iswar si ḇaḇeri ma Au kako. Imarisen wasma kankenem fyoro ḇa snaro waso marisen ḇyedi ma pampum Yahwe I.

3. Rofyor buk farsamsyom Bedi kwar, barakas rosai monda Yahwe ḇyuk ḇe Au ya?

³ Kwarapan barakas nari wasmana rofyor buk farsamsyom Bedi ḇe Yahwe I ma ḇebaptis. Buk kankenem Bedi faro Yahwe I kwar. Inja, kuker kakakyar na wakofen, ”Yahwe isya ro bar yedi; yapok yamkak ḇa. Rosai na snonkaku sifrur faro aya?” (Mazmur 118:6) Wawaira Allah ma wafawi imarisen faro rosai wafrurna ima fakamaman ḇeba kaku.

4, 5. (a) Rosai ḇefnai fa farsamsyom ima fakamamar koḇena oser-oser? (b) Rosai snonkaku Kristen syakam sismana?

⁴ Wasowanan awer kakyar ro sinan Bedi. Barkus sinan Bedi raryano, nwa fakamamar faro ḇaḇebati Bedi kuker Yahwe I. Roi ine fandun fa waswarepen pdefna. Rosai ḇefnai ya? Snar kofawi ḇa rosai farawrowes ro kakyar koḇedi kosma ro fafisu iyama. Imnis raris, imbude ḇebaptis rofyor ḇesnonkbor ḇaido inkbor ḇaim. Ḇape rofyor waba kwar, imbude nwa marasrisen ma samswen ḇeḇeseyae. Inai inkbor oso doḇe, ”Rofyor kobaba ya, kofafko ḇaḇeri snar kosma kue ulang tahun ro rumfarkor ḇa snar koma Saksi Yahwe. Ḇape taun ḇeḇeso ramnai, rofyor marisen farḇuk koḇena nasambraḇ kaku, fandun fa kokyar kosouser faro Yahwe ima nun fainda ḇesya kwar.”

⁵ Romawa babo monda ḇa ḇesma roi ḇedwarek ḇebor. Si ḇebaptis rofyor siba kwar kako sisma fafrowes ro kakyar sena skara ḇaḇerina, imnis raris samswen ro farḇakḇuk sena, dafduf, ḇaido fararur sena. Ḇape, kobabo ḇaido koḇesinan kwar, kokame fandun fa kosouser faro Yahwe ro fafisu sariryakam.​—Yakobus 1:12-14.

6. (a) Rosai fandun fa waswarepen kuker farsamsyom Bedi? (b) Rosai na wafarkor ro Filipi 4:11-13?

⁶ Insama kosouser pdef, koswarepen asas kofrur faro Allah Bena Papoik, infa kofarmyan ḇe I pdef iba syadiwer rofyor bati ḇaido sinan koḇesya sifarmyan ḇe I werḇa. (Mazmur 27:10) Rosai monda wasma ya, waḇefnder awer fa wor fafnoḇek ro Yahwe insama wafrur asas Bedi faro I.​—Wasya Filipi 4:11-13.

7. Rosai knam ro wos sasewar kankenem ”kuker makakak ma araryof”?

⁷ Yahwe imarisen insama koḇebati kuker I. Ḇape, nefandun sasewar koḇena insama kofaduru ḇaḇebati koḇena syambraḇ syadi ma kosma fasaspar. Ro Filipi 2:12 ikofen, ”Mko fararur faswef ro sasewar [kankenem] mkoḇena kuker  makakak ma araryof.” Fandun fa kowasenkara nyan rariso insama kofanam syadi kuker Yahwe I ma kosouser ḇe I ro fafisu sariryakam. Kokyar awer faro mankunko kuker kokara na kofrur sasar ḇa. Koswarepen, Saksi Yahwe ḇeḇeso ḇefyoro kwar ro napnapes si kako bisa sisapi ro sasarya. Inja, rosai na wafrurya insama wasma fasaspar ya?

8. Imnis rariso fakarkor Refo ḇepyum ya? Rosai ḇefnai fa ima ḇyefandun?

⁸ Infa koḇebati kuker Yahwe, fandun fa korower I ma kowawos kuker I. Nyan ḇerandak fa korower Yahwe iso kuker kofarkor Refoya. Ine kako kuker kowasya ma kowasenkara Allah Wos Ḇyena ma publikasi koḇena. Ḇape, kofarkor Refo namnis raris koso ujian ro rumfarkor ḇa. Farkarkor Refo ine raris komarandan fa kosewar roi oso. Kosewar ma kosrow roi ḇebabo kuker Yahwe I. Bon ya, bisa kofanam ḇe Allah, ma I kako fyanam ḇe ko.​—Yakobus 4:8.

9. Publikasi rosai monda ḇefnoḇek farkarkor Refo Bedi?

⁹ Yahwe Organisasi Ḇyedi fyasos publikasi ḇebor insama nafnoḇek Au fa wafarkor Refo. Imnis raris, seri ”Menggali Isi Alkitab” ro bar ”Anak Muda” ro jw.org bisa nafnoḇek Au fa wafrur ro kankenem Bedi farkarkor wasma ro fawar ḇero Refo. Osower ido, ro jw.org syap ”Rosai Refo Fyarkor  Ḇeko?” nasya. Bisa nafnoḇek Au fa swambraḇser kakyar Bedi ma fyasnaḇair kakyar faro snonkaku ḇesesya. Saran ḇesena kako na wasrow na ro artikel ”Kaum Muda Bertanya . . . Bagaimana Aku Bisa Menikmati Pembacaan Alkitab?” ro Sedarlah! April 2009. Wafarkor ma wawasenkara nefandun kaku insama wasma fasaspar.​—Wasya Mazmur 119:105.

10. Rosai ḇefnai fa fandun kaku snonkaku Kristen sḇenadi?

¹⁰ Korower Yahwe I kuker kofarkor Refoya, ma kawos ḇe I ro nadi ya. Kokara awer nadi ima roi kofrur ro ras-ras na ḇaido imnis raris aryawin ḇaido ”jimat” ḇeyun barakas. Rofyor koḇenadi, kawos ḇeri kuker Manḇedaw koḇedi. Yahwe imarisen ryower ko! (Wasya Filipi 4:6.) Inja, rosai monda makakwarek Bedi, ”Buk ḇaḇekandera bedi faro Yahwe I.” (Mazmur 55:22) Naek srar syaran ma syaran sya sḇaḇir fainda ro ananun Refo ani. Inja, nadi ima ḇyefandun kaku faro Au!

11. Rosai ḇefnai fa komarisen kokofen kasumasa pdef faro Yahwe I?

¹¹ Ḇape, rofyor koḇenadi, fandun fa kor Yahwe fafnoḇek Ḇyedi monda ḇa. Refo ḇyuk swarapepen ḇeko fa, ’Kokofen kasumasa.’ (Kolose 3:15) Fyorno ido, komkakwarek syadi samswen kosmana isof koḇefnder roi ḇepyum kosmana kwar. Inja, ras ḇe ras kwarapan roi rikior wamarisen kakuna, ramnai wakofen kasumasa ḇe Yahwe faro roi anna. Abigail, fyor ḇyebinkbor kaker ma ḇyebaptis fyor ḇyeumur taun ri 12, doḇe, ”Yahwe iso monda ḇesyus fa isma sanandik ro ko. Inja, fandun fa kokofen kasumasa ḇe I faro roi ḇepyum kosma ro I na kwar.” Fyorno ido, Abigail kyara swarapepen ryower kwarna, ”Rofyor meser kokḇok ma komarisen kokofen kasumasa ḇe Yahwe faro rasine ido, nari rosai monda kosma wer ro meser ya?” * (Mam fas-fas kasun ro sop.)

12, 13. (a) Fawar rariso ḇaḇir ro mankundaw Yahwe ima ḇyenaḇye. (b) Rosai ḇefnai fa fandun kaku wawasenkarana?

¹² Yahwe ifnoḇek Raja Daud rofyor isma samswen ḇebor. Inja ro rosai ismana, Daud bisa ikofen, ”Ḇaḇir ma mam kada snar Yahwe ima ḇyenaḇye; snonkaku ḇefadiren faro I sisma aski.” (Mazmur 34:8) Ro mnuk ine, kofarkor fandun fa koḇaḇir ro mankunko Yahwe sawarwar Ḇyedi. Rofyor wawasya Refo ma publikasi, waso ro fananjur, na wafarkor rariso Yahwe ifnoḇek snonkaku ḇese fa sisouser pdef. Ḇape, insama ḇaḇebati Bedi kuker Yahwe syambraḇ pdef ido, fandun fa ḇaḇir ro mankundaw Yahwe fafnoḇek  Ḇyedi. Fainda rosai wasma ro kankenem Bedi ḇefnai fa ḇaḇir Yahwe ima ḇyenaḇye?

¹³ Snonkaku Kristen oser-oser sḇaḇir kwar Yahwe sawarwar Ḇyena kuker nyan oso ḇepyum kaku. Dor ko oser-oser fa kofanam ḇe I ma Rumkun Ḇyedi. Yesus doḇe, ”Snonkaku oso ḇaḇeri nari ryama faro aya, rofyor Mami ḇewan aya duni maro aya.” (Yohanes 6:44) Wemir waḇaḇir Yahwe iso ḇeyun Au ḇe napnapes ya ke? Ḇaido kwara, ’Yahwe iso ḇeyun sinan yedi ḇe napnapes ma ayama yasowanan monda si ke’? Waswarepen, rofyor buk farsamsyom Bedi ḇe Yahwe ma ḇebaptis kwar, nwa ḇaḇebati ḇepyum kaku kuker Yahwe I. Refo ikofen ḇe ko, ”Snonkaku ḇeswar kaku Allah sya, Allah ifawi si.” (1 Korintus 8:3) Ḇesyowi kako swaf Yahwe ḇyuk ḇe Au kwar fa waksun ro organisasi Ḇyedi.

14, 15. Rosai ḇefnai fa fawar kakyar Bedi ḇe snonkaku ḇesesya na nafnoḇek kakyar Bedi syambraḇ syadi?

¹⁴ Au kako ḇaḇir Yahwe ḇaḇenaḇye Ḇyedi rofyor ifnoḇek Au fa wamkak ḇa fyor wakofenḇadir kakyar Bedi faro snonkaku ḇesesya, ro ḇaḇeḇaryas ḇaido ro rumfarkor. Ḇaryas ḇe bati Bedi ro rumfarkor ima napyan ḇa. Imbude nari wamkak faro rosai nari sikofen ḇe Au. Imbude Au kako wamkak rofyor fasnaḇair kakyar Bedi ro ḇarpon snonkaku ḇebor sya. Inja, rosai nari ḇefnoḇek Au ya?

¹⁵ Kwarapan rosai ḇefnai fa wakyar faro kakyar Bedi. Rofyor panduan belajar ro jw.org nasya ro wos Bedi ido, wafarkorna. Panduan belajar ine bisa nafnoḇek Au fa kwara kakyar Bedi, rosai ḇefnai fa wakyar ya, ma rariso fasnaḇairna ḇe snonkaku ḇese. Rofyor wakyar kakuna ma wafrur fasasos ḇepyum, nari wamarisen fawar mansei Yahwe I ḇe ḇesesya.​—Yeremia 20:8, 9.

16. Rosai bisa wafrurya insama wafawar kakyar Bedi kuker bri?

¹⁶ Rofyor wafrur fasasos ḇepyum kwar ido, imbude wamkak kaker fa wakofenḇair kakyar Bedi. Imbesrar oso ḇeḇeumur taun ri 18, ḇeḇebaptis fyor ḇyeumur taun ri 13, fyawar bo doḇe, ”Yafawi rosai yakyar na, ḇape samswen ḇe aya fa yawosna.” Inja, ḇyensewar fa fyawar kakyar ḇyedi kuker mayaryaren ma fyor isya kuker bati ḇyesya. Ikofenwer, ”Bati ro kelas yesi bisa sifawar rosai monda sifrurna. Aya kako bisa yakfrur radirya. Inja, yafawar fafyai monda rofyor nkowawos. Imnis ra, yakofen ’Mandoḇindi yaḇuk farkarkor Refo, ma . . .’ Ramnai, Yafawawar wer. Rosai yafawarna kuker Refoḇa. Ḇape, bati yesya simarisen sifawi rosai monda yafrurya rofyor yaḇuk farkarkor Refo. Inja, fyorno ido  sifuken kuker roi ani. Yaḇepake nyan ine ker ido, napyan fa yaḇuk kesaksian. Bon ya, yaryaḇ ḇesya kwar!”

17. Saran rosaiwer bisa wafrurya insama wafawar kakyar Bedi kuker bri?

¹⁷ Rofyor snonkaku ḇesesya sḇaḇir snar kofandun ma koḇesyowi sido, nari napyan ḇe si kako fa sḇesyowi ko ma kakyar koḇena. Olivia, ḇeḇeumur 17 ma ḇebaptis ro swaf taun riḇeso naiwara ikofen, ”Fyor iwara, yamkak sor aya ker ḇe fanatik rofyor yafawar ma yap Refo ro awawos nkoḇena.” Ḇape, kakara ḇyena nfadwer. Ḇardibur imkak syadi faro roi anna, kyara, ”Romawa babo ḇebor sya sifawi royoḇaḇeri kuker Saksi Yahwe sya. Imbude sifawi Saksi sya ro ko monda. Inja, nyan fa koḇuk kesaksian bisa nfadwer kakara sena kuker Saksi sya. Fyor komai, komkak ḇaido samswen fa kofawar kakyar koḇena ido, na smam komai koḇe Saksi Yahwe. Imbude na simarisenḇa kuker Saksi koine. Ḇape, rofyor kofawar kakyar koḇena kuker mayaryaren ma makakḇa imnis raris kawos ro ras-ras faro si ido, nari sḇesyowi ko.”

18. Rosai monda na wafrurya faro sasewar kankenem Bedi ya?

¹⁸ Inja, wafararur faswef ro sasewar kankenem Bedi ima fakamamar ḇeba kaku. Rarirya, fandun fa wawasya Refo ma wawasenkara Allah Wos Ḇyena, ḇenadi ḇe Yahwe, ma wawasenkara barakas ḇebor Yahwe ḇyuk ḇe Au kwarna. Wafrurna ido, na wamarisen kaku snar wakḇe bati kuker Yahwe I. Bon ya, na wamkak ḇa fa fawar kakyar Bedi ḇe snonkaku sya.​—Wasya Mazmur 73:28.

19. Rosai ḇefnai fa wafararur faswef ro sasewar kankenem Bedi nari nefromo ḇa?

¹⁹ Yesus ikofen, ”Mansei ḇemarisen ḇeso aya, fyamyun mankundi, ḇoi ḇyar [ai kandera] ḇyedi ma iso aya.” (Matius 16:24) Imboḇae, infa koso Yesus ido, snonkaku Kristen oser-oser fandun fa ḇyuk farsamsyom ḇe Yahwe ma ḇyebaptis. Ḇape, ineiso randak ro kankenem ḇepyum kaku. Ma ro fafisu iyama, nari kosma kankenem fyoro ro dunya babo Allah Ḇyedi. Inja, wafararur faswef ro sasewar kankenem mankun Bedi!