Sinan Mkoya—Mkofnoḇek Romawa Mkoḇesya fa ’Sifawinanem ma Sisma Fasaspar ya’
”Rofyor wabaḇaya mambir kwar Refo ḇeḇuk fawawinanem faro aw ma ḇefarkin aw faro fasaspar ya.”—2 TIMOTIUS 3:15.
DOYA: 130, 88
1, 2. Rofyor romawa oso imarisen ḇyuk farsamsyom ḇyedi ma ḇyebaptis, rosai ḇefnai fa sinan sino sisya sḇirḇar?
SNONKAKU syaran ma syaran ḇefarkor Refo sisya sḇuk farsamsyom mankun sena ḇe Yahwe I, ma sebaptis. Ḇebor ro fandu si sima romawa babo ḇefarkor Refo rofyor sibaḇa ya. Skinfir nyan kankenem ḇepyum syadi kwar. (Mazmur 1:1-3) Mkoḇe sinan Kristen ido, imbude mkowaf fafisu romawa mkoḇesya sḇebaptis.—Mam kako 3 Yohanes 4.
2 Ḇape, imbude mkoḇeḇirḇar snar mkomam romawa babo ḇeḇebaptis kwar sya, sikyar werḇa faro nyan kankenem ḇepyum sena isoine sḇe Saksi Yahwe. Iba syadiwer sino sisya sisaebur napnapes ḇaido Organisasi ya. Inja, imbude mkoḇeḇirḇar rofyor roma ḇaido inaikir mkoḇesya sifarmyan ḇe Yahwe ido, na fyoro mura sfadwer kankenem sena ma siswar Yahwe I ḇa. Imbude romawa Ḇedi imnis snonkaku Kristen ḇeḇeso ro abad randak ḇero kota Efesus. Yesus ikofen, ”Saswar ḇepon mkobani maro aya isyaḇa Wahyu 2:4) Rosai na mkofrurna insama romawa mkoḇesya siswar pdef Yahwe I ma ’sisur ma sisma askiya’? (1 Petrus 2:2) Mkorama kofarkor farari ḇepyum ro Timotius i.
kwar.” (”MAMBIR KWAR REFO”
3. (a) Rariso Timotius ḇyesnonkaku Kristen rai, ma rosai ḇefasnaḇair snar ifrur rosai ifarkorna? (b) Roi rikior rosai Paulus ikofenbos ḇe Timotius i?
3 Manwawan Paulus ryama randak ḇe Listra taun 47 M. Ro fafisuya Timotius ḇyesnonkbor kaker ma isya fyarkor Yesus farkarkor ḇyena. I kako ifrur rosai ifarkor kwarna. Taun risuru ramnai, iso Paulus ro marandan ḇyena. Ro swaf taun ri 16 ramnai, Paulus fyas ḇe Timotius i, ”Wuf faswef ro ḇaḇenapnapes wasma kwar ma wakyar ani, ma waswarepen ḇesyakwar snonkaku ḇefarkorna kwar faro aw. Waswarepen kako mboi rofyor wabaḇaya mambir kwar Refo [Syap-Syap Ibrani] ḇeḇuk fawawinanem faro aw ma ḇefarkin aw faro koreri snar kakyar faro Yesus Kristus.” (2 Timotius 3:14, 15) Ro mnuk nane, Paulus ikofen ḇe Timotius i (1) myambir Refoya, (2) ikyar faro farkarkor sfarkor ḇe i na, ma (3) ifawinanem ma isma fasaspar snar ikyar faro Kristus Yesus i.
Romamkun sya kako bisa sfarkor tokoh-tokoh ma fawar ḇero Refo
4. Roi risai monda sinan mkoya mkobuk fa mkoḇukifarkor romamkun mkoḇesya? (Mam sonin ro randak artikel ine.)
4 Sinan Kristen mkoya, na mkomarisen insama romawa mkoḇesya smambir Refoya, kirine kofawi naḇe Syap-Syap Ibrani ma Yunani. Iba syadiwer, romamkun sya kako bisa sfarkor tokoh-tokoh ma fawar ḇero Refoya. Organisasi Yahwe fyasos kwar syap, majalah, ma vidio bisa sinan sya sḇuki fnoḇek romawa sesya. Roi risai monda naisya kwar ro wos mkoḇena? Insama romawa mkoḇesya sfanam ḇe Yahwe ido, fandun fa smambir kaku Refoya.
WAKYAR KAKU FARO FARKARKOR WASMANA
5. (a) Rosai knam ro wos ’ikyar faro farkarkor sfarkor ḇe i na’ (b) Rosai ḇefasnaḇair Timotius ikyar kuker Yesus rofyor sḇuk farkarkor ḇe i?
5 Ḇape, mkofarkor romawa mkoḇesya kuker tokoh-tokoh ma fawar ro Refo, nama namnis ḇaim. Mkoswarepen, Timotius ikyar faro farkarkor sfarkor ḇe i na. Ro wos Yunani, Paulus wos ḇyedine kyurfasna ”kakakyar ḇekaku ḇaido kokyar roi oso ima isya”. Timotius myambir kwar Syap-Syap Ibrani ”rofyor ibabaya”. Ḇarpur mura, ikyar Yesus ima Mesias. Kakyar ḇyedi syambraḇ syadi, ma ḇarpurya ḇyebaptis ramnai ifarmyan ḇe utusan injil fnoḇek Paulus i.
6. Rosai na mkofrur ya insama mkofnoḇek kakyar ro romawa mkoḇesya faro Allah Wos Ḇyena?
6 Rosai nari mkofrur ya insama romawa mkoḇesya sna kakyar raris Timotius i ma si kako nari ’sikyar kaku faro farkarkor sismana’? Randak ya, fandun fa mkokaḇaḇaḇ. Kakyar ḇesambraḇ Roma 12:1.) Roi nabor nasya bisa mkofrurna fa mkosambraḇser kakyar ro romawa mkoḇesya, iba syadiwer rofyor sna fakfuken nabore. Mkorama komam farfyar ro kma oso ma kun farkarkor ya ḇeko.
ima ryama ḇeriḇa. Ma, imbude mkokyar faro roi oso kwar raryano, mkokara awer romawa mkoḇesya na sikyar ḇeri faro roi mkokyarna. Romawa sya fandun fa sfasnaḇair ’samambraḇ ro kakara sedi’ insama sikyar faro Refoya. (Wasya7, 8. (a) Rariso kma Kristen oso ḇyekaḇaḇaḇ rofyor fyarkor inai ḇyedi? (b) Fafisu risai fandun fa mkokaḇaḇaḇ faro romawa mkoḇesya?
7 Thomas nya inai oso ḇeḇeumur taun ri 11. Inai ani ifukenker, ”Imbude Yahwe daw kankenem ro supswan ine roro evolusi ke?” ḇaido ”Rosai ḇefnai fa kofnoḇek kawasa syaḇa, raris koso pemilu, insama kankenem koḇena napyum syadiwer?” Fyorno ido, Thomas ḇyekaḇaḇaḇ kaku insama ikofen ḇeriḇa rosai fandun fa inai ḇyedi ikyar ya. Ifawi snonkaku oso na ikyar faro napnapes snar sikofen ḇe i ḇa rosai ḇekaku ya, ḇape snar myam ro mankundi bukti ḇefasnaḇair napnapes anna.
8 Thomas i kako fandun fa ḇyekaḇaḇaḇ rofyor fyarkor inai ḇyedi. Kakuḇae, snonkaku Kristen syakam fandun fa sekaḇaḇaḇ. (Kolose 3:12) Thomas ifawi kaku, insama iḇawes kakyar inai ḇyedi fandun fa syewar oras nabor fa ifnoḇeki. Fandun fa syewar nyan fa fyarkor Refo kuker inai ḇyedi. I kako fandun fa ifnoḇek inai ḇyedi fa iwasenkara roi ifarkor ro Refona. Thomas doḇe, ”Roi ḇefandun kaku ḇe Aya ma swa yedi iso, numarisen fa nufawi inai nuḇedi ikyar kaku faro rosai fyarkor kwarna ma fyawi kwar ke roḇa. Syadiwer faro roi ḇefandun kaku na. Numarisen rofyor ḇyuk fakfuken ḇe nu. Ḇape, ryower monda roi oso ma ifukenḇa ido, yaḇeḇirḇar kaku.”
Insa mkofnoḇek romawa mkoḇesya sikyar faro Allah Wos Ḇyena ido, fandun fa mkokaḇaḇaḇ
9. Rosai wer bisa mkofrur ya fa mkofnoḇek romawa mkoḇesya fa sikyar faro Allah Wos Ḇyena?
9 Rofyor sinan sya sekaḇaḇaḇ fyor sfarkor romawa sesya ido, ḇarpur mura romawa sya na sifawi kaku ”aḇaḇamya, kawanwanya, kakakiya ma swafya” napnapes ḇero Refo. (Efesus 3:18) Farkarkor mkoḇukfarkor romawa mkoḇesya fandun fa namnis kuker umur ma fawawi sena. Rofyor kakyar sena sambraḇ, nari napyan ḇesi fa sawos warek kakyar sena ro ḇarpon snonkaku sya, ma bati ro rumfarkor sena kako. (1 Petrus 3:15) Imnis raris, romawa mkoḇesya bisa sfasnaḇair ro Refo kuker snonkaku ḇemar sya moḇsa na sḇerai? Rosai Refo fyasnaḇairna nsun ro swaruser sena ke? * (Mam fas-fas kasun ro sop.) Mkoswarepen, insa mkofnoḇek romawa mkoḇesya sikyar faro Allah Wos Ḇyena ido, fandun fa mkokaḇaḇaḇ. Ḇape, rosai mkoḇesewarna, na nefromo ḇa.—Ulangan 6:6, 7.
Farari ḇepyum mkoḇena nefandun kaku insama nafnoḇek romawa mkoḇesya fa sikyar syadi
10. Roi ḇefandun rosai na ḇefnoḇek romawa sya fa sikyar syadi?
10 Farari ḇepyum mkoḇena nefandun kaku insama nafnoḇek romawa mkoḇesya fa sikyar syadi. Stephanie bena inai rikior doḇe, ”Rofyor inai yesya skobaḇa kaker, yafuken mankundaya, ’Yafawar ḇe sko ke rosai ḇefnai fa yakyar Yahwe ima isya, ima iswar ko, ma farkankin Ḇyena nkaku? Inai yeskoya skomamḇir snar yaswar Yahwe I kaku ke?’ Mankundaya yakyar ḇa ido, na rariso yaḇuk kakakyar ḇe romawa yesi rai?”
WAFAWINANEM INSAMA WASMA FASASPAR YA
11, 12. Snonkaku ḇefawinanem na imnis rariso, ma rosai ḇefnai fa ine neḇemam ro umur ḇyeja ḇa?
11 Kofarkor kwar snar Timotius (1) myambir kaku Syap Ḇesren (2) ikyar faro kakyar ḇyedi. Ḇape, Paulus ikofen syap ḇesren na nafnoḇek Timotius ifa ifawinanem ma isma fasaspar. Rosai knam ro wos ḇyanine?
12 Pemahaman Alkitab, Jilid 1, fyasnaḇair snonkaku ḇefawinanem sna ”samambraḇ fa sḇuk fawawi sena ma kakara sena kuker nyan ḇepyum kaku fa sifrur mnis kaḇer samswen sismana, seḇinkwan ḇur roi ḇemun, sisewar rosai simarisenna ḇaido sanun snonkaku ḇesesya ro sifrur roi anna. Fawawinanem iḇesebur kuker fawawiḇa”. Refo ikofen ”fawawiḇa neḇefes ro romawa oso sne ḇyedi”. (Amsal 22:15) Inja, fawawinanem fyasnaḇair ḇyesnonkaku ḇemas kwar ro rurya. Snonkaku oso ḇemas ro rurya snar ḇyesyowi ma imarisen isouser Yahwe I. Ine neḇemam ro umur ḇyeja ḇa.—Wasya Mazmur 111:10.
13. Rariso romawa sya sfasnaḇair sifawinanem?
13 Romawa babo ḇemas kwar ro rurya na sebirbar ḇa ma wamya dun si mura muma ḇa ro marasrisen sena ḇaido romawa babo ḇesesya saw ninyan siḇa. (Efesus 4:14) Ḇape, ”samambraḇ ro swaruser” sena nafnoḇek si fa ”sifawi smambir kwar roi ḇeḇye ma roi ḇeḇarḇor”. (Ibrani 5:14) Inja, na sun snemuk ḇepyum rofyor sinan sesya ḇaido snonkaku ḇese srodia ḇa. (Filipi 2:12) Rari fawawinanem ine nefandun kaku insama sisma fasaspar. (Wasya Amsal 24:14.) Rosai nari mkofrurya insama mkofnoḇek romawa mkoḇesya fa sifawinanem? Romawa na smam kaku mkoso farkankin ḇero Refoya. Mkofasnaḇair kaku na roro wos ma roi mkofrurna.—Roma 2:21-23.
Rosai ḇefnai fa sinan sya siḇesewar fa sifnoḇek romawa sesya rofyor sibaḇa kaker ya? (Mam paragraf 14-18)
14, 15. (a) Rofyor romawa babo oso imarisen ḇyebaptis ido, rosai fandun fa kyarana? (b) Rariso sinan mkoya, mkofnoḇek romawa mkoḇesya fa siwasenkara ḇarakas sismaina snar sisouser Allah farkankin Ḇyena.
14 Ḇape, insama mkofnoḇek kakyar Yesaya 48:17, 18.
romawa mkoḇesya fa nasur pdef ido, na mkokofen mondaḇa roi ḇesasar ma ḇekakuna. Ḇape, mko kako fandun fa mkofnoḇek si fa skara fakfuken ḇemnis radine, ’Rosai ḇefnai fa Refo idwarek ko fa kofrur roi komam ḇe roi ḇeyun marisen ma ḇepyum? Rosai ḇefasnaiḇair snar farkankin ḇero Refo nun fainda ḇesyakwar?’—15 Rofyor romawa mkoḇesya simarisen seḇaptis ido, mkofnoḇek si fa skara mnis kaku fakamamar sismana rofyor sebaptis kwar. Rariso sneḇaḇir ḇyedi faro fakamamar ani? Rosai monda fainda ya? Rosai monda samswen ya? Rosai ḇefasnaḇair snar fainda ya iḇa syadibur ro samswen ḇyena? (Markus 10:29, 30) Fakfuken nanekam fandun fa skara mnis kaku rofyor sebaptis ḇaim. Mkofnoḇek romawa mkoḇesya fa siwasenkara ḇarakas nari sismana rofyor sisouser ma bon ḇeḇyeḇa sismana rofyor sisouserḇa. Rarya ido, imḇude nari sikyar siso farkankin ro Refo ima nun fainda ḇesya kwar faro si.—Ulangan 30:19, 20.
FAFISU ROMAWA BABO ḆEBAPTIS KWAR ḆYEḆIRḆAR
16. Rosai fandun fa sinan sya sifrurna rofyor romawa sesya seḇirḇar?
16 Rosai bisa mkofrurya rofyor romawa mkoḇedi ḇeḇebaptis kwar ḇyeḇirḇar? Imnis raris, romawa ani imarisen faro Mazmur 73:1-3, 12, 13) Rosai mkofrur faro i na nfasnaḇair romawa ani imarisen fyarmyan pdef ḇe Yahwe I ke roḇa. Romawa mkoḇesya sibaba ḇaido siḇa kwar, mkorakrok awer snar roi nane. Ḇape, mkofrur ifa ḇyaḇir mkoswari ma mkomarisen mkofnoḇeki.
rosai ḇero dunya ine. Ḇaido, imbude ḇyeḇirḇar iso farkankin ro Refo ine nyan kankenem ḇepyum ke roḇa. (17, 18. Rariso sinan sya sifnoḇek romawa sesya rofyor seḇirḇar?
17 Romawa babo oso ḇeḇebaptis kwar ḇyuk farsamsyom mankun ḇyedi ḇe Yahwe I. Ine asas ifrur fa fyasnaḇair isewar ḇepon Yahwe I ro kankenem ḇyena. (Wasya Markus 12:30.) Yahwe myam farsamsyom ani ḇe asas ḇefandun kaku. Ko kako fandun fa kakfrur rarirya. (Pengkhotbah 5:4, 5) Mkoḇuk swarapepen ḇe romawa mkoḇesya kuker roi nane. Ḇape randakya, mkowasya ma mkofarkor resari roi organisasi fyasos kwarna faro sinan sya. Ramnai, ro fafisu ḇemnis ma kuker nyan ḇepyum, mkokofenḇair ḇe romawa mkoḇesya snar snemuk dun fa ifur farsamsyom ḇyedi ma ḇyebaptis ine roi ḇefandun kaku snar nari nun barakas ḇeba ḇe i.
18 Wos anun nasya naḇor nefainda kaku faro sinan sya. Imnis raris, syap Pertanyaan Kaum Muda—Jawaban Yang Praktis, Jilid 1, ro ḇar apendiks ”Pertanyaan Orang Tua” ikofen, ”Mkokara sasar awer romawa mkoḇesya spampum Agama mkoḇena kwar, snar imbude sisma samswen ḇesena.” Osower ido, bati ro rumfarkor ḇyeja skoryae i ma i kako ḇyaḇir demire ḇaido myam romawa babo Kristen ḇesesya sisur ro rurya ḇape ima roḇa. Ḇar ani kako ikofen, ”Kakuḇae roi ḇeradirya ḇefesepen kuker Agama yaḇa. Ima fafisu ḇefur romawa sya sḇaḇir samswen syadi fa sifasnaḇair kakyar sena—iḇa syadiwer ro kirine.” Ramnai, bar ani ḇyuk saran ḇeḇeso faro sinan Kristen sya fa sifnoḇek romawa sesya rofyor seḇirḇar.
19. Rariso sinan sya sifnoḇek romawa sesya fa ”sifawinanem ma sisma fasaspar”?
19 Sinan Kristen sna fakamamar ḇeḇefandun kaku, isoine sifnoḇek romawa sesya kuker ’farkarkor ma ananun [Yahwe]’. (Efesus 6:4) Imnis kofarkor kwarna, ine kyurfasna sinansya fandun fa sfarkor Refo ḇe romawa sesya ma sifnoḇek si insama sikyar faro roi anna. Rofyor kakyar sena nsambraḇ syadi, na mankun siso ḇeyun snemuk fa sḇuk farsamsyom sena faro Yahwe ma sḇuk roi ḇepyum syadi faro I. Iḇye kada, Refoya, Yahwe rur ḇesren Ḇyedi, ma sasewar mkoḇena nafnoḇek romawa mkoḇesya fa ”sifawinanem ma sisma fasaspar ya”.
^ par. 9 Syap panduan belajar ”Apa yang Sebenarnya Alkitab Ajarkan?” ine ḇyefainda kaku fa nafnoḇek romawa ma ḇeba sya fa sifawi ma sfasnaḇair farkarkor ro Refo. Syap ine nasya ro jw.org ma nasya ro wos ḇebor. Swewar ro bar AJARAN ALKITAB> BANTUAN UNTUK BELAJAR ALKITAB.