ROSAI ḇefnai kamami imsor kaku? Na yafawarna. Yaḇeaben ro 29 Juli 1929 ma yaḇa ro mnu ḇero provinsi Bulacan, Filipina. Ro kina nkobedi nkakna pipi naborḇa ma nkokenem syadadiḇa. Fafisu yabaḇaya, sordade Jepang smun Filipina, ma mamun perang ya ikpefe. Bape, snar mnu nkobani nakain binkwan, inja mamun ine ryampon ro mnu nkoḇeja ḇa. Nkakna radio ḇa, TV ḇa, ma koranḇa. Inja, nkorower snonkaku ḇesesi sfawar monda.

Yana naek rikyor ma srar rifyak. Fafisu yaḇe umur taun riwar, yabarkus apus su. Suḇe Katolik, fama Apus imarisen sfawar kuker agama ma dun syap rohani ro bati ḇyesi sḇukna. Yaswarepen Apus fyasna Refo ma syap-syap ro wos Tagalog, * (mam fas-fas kasun ro sop) ḇekofenbairo farkarkor ḇekakuḇa ro agama na. Yamarisen yawasya Refo, syadiya faro Injil rifyak anna. Inja yamarisen imbe yakso Yesus i.​—Yohanes 10:27.

Ro 1945, sordade Jepang sibur Filipina. Ro fafisu ani, sinan yeja dor fa yabur kaḇer ḇe rum. Apus imarisen inja yaḇur.

Ro Desember 1945, Saksi Yahwe ḇero kota Angat sya srama sḇaryas ro mnu nkoḇani. Saksi ḇesinan oso ryama ḇe rum ma ikofenḇadir rosai Refo ikofen kuker ”ras ḇepupesna”. (2 Timotius 3:1-5) Dor nkofa nkakso farkarkor Refo ro mnu ḇefanam inko. Sinan yedi imewer daksori, mboi yaramura ḇediwa. Indokada snonkaku ri 20 ḇerama si, ma riḇeso sifakfuken kuker Refoya.

Yafawi mankun roi sawosna ḇa, inja imbe yambran yabur. Ḇape fyor sidisen doya Karajan, yambran ḇa kukro dow yamarisen nairi.  Dasdisen ma nadi raposa, sor nkofa nkorama ro fananjur ḇero Angat ro ras Minggu ya.

Nkoryur ro Cruz rum skoḇeja fa nkofanjur rodia. Sino simbran swaf kilometer riwar insape simnai rodia. Indokada snonkaku ri 50 ḇefanjur rodia. Yamarisen kukro romamkun sya skarem fakfuken ḇesamswen ḇero Refoya. Yaso fananjur ras riḇeso ramnai, Damian Santos, perintis ḇeḇesinan kwar mboi fyor iwara dakḇe walikota, iwan aya fa yenef ro rum ḇyedi. Ro roḇya, nukain nuwawos Refoya.

Ro fafisuya, snonkaku bisa sebaptis ḇeri fyor sfawi knam farkarkor ro Refoya kwar. Inja yaso fananjur kali rifumo, mura naek srar sifuken aya ma ḇesesi, ”Imbe mkoḇebaptis ke?” Yakofen bo yoḇe, ”Imbo.” Yamarisen kaku yakḇe Kristus manfamyan ḇyedi. (Kolose 3:24) Ro 15 Februari 1946, aya ma naek oso sebaptis nuro warbeki ḇefanam rodia.

Yafawi snonkaku Kristen ḇeḇebaptis kwar na ḇyaryas pdef raris Yesus i. Kamami doḇe yababa mkun kaker ma yaḇe baptis kwar raryano na nafur yaḇe manbaryas ḇa. Yakofen bo yoḇe Allah imarisen insa koḇaryas ankankinem ḇeḇye kuker Karajan Allah. (Matius 24:14) Yakofen wer yaḇeasas faro Allah I kwar. Ro fafisu ani Kamami irmom aya kaku raris yafar ḇepon anya. Kamam imbe idwarek aya ro ḇaḇeḇaryasna. Iso ḇerandakya yabur roi ḇebor nakam, aroḇaido yun snemuk fa yuf farmyan faro Yahwe I.

Cruz ma kina ḇyesya skor ayafa yabarkus sko ro Angat. Sanun aya ma Nora i, inai kasun skoḇedi fa nuḇemerintis. Nuḇemerintis randak ro 1 November 1947. Yaḇemerintis ro Angat, mboi Nora ryo kota ḇese.

Yaḇemerintis taun risuru ramnai, Earl Stewart naek oso ro Betel, dawos faya ḇe snonkaku ri 500 ro moḇ ḇeḇe kawasa oser ro Angat. Dawos faya ani ro wos Inggris, ramnai yakofenḇadir faya knam ḇyena ro wos Tagalog. Iso ḇerandak ro faya ḇebor yaḇeterjemahkanna ro taun ḇe taun ine. Sa eḇedar fa yafrur roi anine? Yafarkor ro swaf taun rifik monda ḇesya mboi snar guru-guru ansine ras-rasna ido sawos wos Inggris. Ma publikasi koḇena kako ro wos Inggris snar wos Tagalog nabor ḇarya, inja yafarkor publikasi Inggris. Eḇedari bisa yafawi wos Inggris ma bisa yaḇeterjemahkan fayana.

 Naek Stewart ikofenḇadir ḇe sidang ḇero moḇya snar utusan injil nari siso kebaktian ro New York, AS. Ima kebaktian Pertambahan Teokratis taun 1950. Inja, Kantor Cabang fyandun oser ḇaido suru perintis fa sufararur ro Betel. Sor aya kako. Inja yabur roi ḇebor nakam wer, yabur naek srar sya ma moḇ yafawi kaku kwarna, fa yuf farmyan ro Betel.

Yasun ro Betel 19 Juni 1950. Fafisuya, Betel isya ro rum ḇekwar ḇeba ro moḇ ḇeḇe hektar oser ma aiknam ḇebor ḇeyores warekna. Indokada naek srar ri 12 ḇeḇefarbuk ḇaim ḇefararur ro Betel ani. Ro ras arwoya, yafararur ro dapur. Ma oras siw ido, yaḇe strika ro laundry. Arkokya, yafrur rarirya wer. Utusan injil skaḇer muma kwar ro kebaktian internasional raryano, yafararur ro Betel pdef. Fararur rosai riryakam yamarisen yafrurna. Yafasos majalah nafa sfarem, yamamo snonkaku fararyor sena, ma yamamwarek ro lobi.

Ro 1952, aya kuker naek riwonem ḇero Filipina sor nkofa nkakso Sekolah Gilead kelas ḇeḇe-20. Yamarisen bose! Ro Amerika, nkomam ma nkosmai roi ḇebabo. Kankenem ḇerodiwa naḇese kuker kankenem ro mnu yedi.

Imnis raris, nkoḇesewar fa nkakfarkor alat elektronik ma roieḇor nkomam ḇaimna. Cuaca ḇerodiwa nakḇese kako! Yakbok ro arwoya ma yamam randi ido roi nakam napyoper kame. Iso eḇerandak yakmam sor ḇe saljuna. Saljuna napyum ra. Imbape, yasyuf bose snar pananunekya iba kaku!

Yamarisen kaku yaso farkarkor ro Gilead, inja akurfasna sḇukna samswen ḇe ayaḇa. Naek ḇebuk farkarkor ro Gilead sima guru ḇepyum kaku sirya. Sfarkor inko nyan farkarkor ma kofrur riset narai. Farkarkorna nbuk samarawraw faro fasfesepen yena kuker Yahwe I.

Yaḇe lulus ramnai, yasmai tugas ḇe perintis istimewa ro Bronx, New York. Inja, yakso ro Kebaktian Masyarakat Dunia Baru sifrur iro Bronx paik Juli 1953. Ramnai yasmai tugas fa yakaḇer ḇe Filipina wer.

Kantor Cabang sḇuk fakamamar fa yaḇe pengawas wilayah. Yana swaf nabore fa yaso Yesus i, ḇeramura ḇe kota ma mnu ḇebinkwanna insa ifnoḇek Yahwe manfamyan Ḇyesi. (1 Petrus 2:21) Moḇ yeja naḇa ro Luzon tengah, myos ḇeba ḇero Filipina. Ine faro provinsi Bulacan, Nueva Ecija, Tarlac, ma  Zambales. Infa yaramura ḇe mnu ḇeḇeso, yambran nuk ro Urekbon Sierra Madre ḇeḇekaruina. Bus ma kereta nafrar ḇe mnu-mnu anna ḇa. Inja, yafuken sopir truk ani bisa yaso i ke ma na yakainro roebor dunna. Bisa yasona mboi na yakain pyum ḇa.

Sidang ḇebor yarama rona nbabo kaker ma nkasun. Inja, naek sya sikofen kasumasa nabore rofyor yafnoḇek si fa sfasos fananjur ma ḇaḇeḇaryas ya.

Barpurya, moḇ yasma tugasna ine faro moḇ Bicol nakame. Ro moḇya, raryur kasun sibor rodia. Perintis istimewa ḇero diwa sya sḇaryas ro moḇ ḇeḇeḇaryas ḇaim na. Ro rum oso, toilet ḇyena ima der ro saprop ma srir aisuru rofaduya fa karef rodia. Yaswarepen fafisu yaref ro aisuine bonsu, yarefkar bo yasapi rarbaḇ ro derya. Yaḇensren baken yena rawo nasren insape yafasos fa yanan ro arwoya!

Fafisu yuf farmyan ro moḇ ani, Nora ḇyeperintis istimewa ro Dumaguete City. Yawasen mura ro Nora i, ḇepon iwara nuḇemerintis kayam. Yara yasrow i. Ramnai, nufaramrem syap ram, ma ro 1956 nufarḇuk. Ḇarpur mura, nura numamfar sidang oso ro Myos Rapu Rapu ro swaf minggu oser. Nuyek urekbonna ma numbran swaf binkwan kaku. Ḇape, numarisen snar nufarmyan kayam ma nufnoḇek naek srar ansya.

Yaḇe pengawas wilayah indokada taun rifyak, ramnai sor nu ḇe kantor cabang. Nufararur rodiwa paik Januari 1960. Ro taun ḇe taun ro Betel, yafarkor nabor ro naek ḇesma fakamamar ḇeba sya ro organisasi Yahwe. Nora i kako imarisen fararur ro Betelna.

Yamarisen kaku fyor yamam snonkaku ḇeborsya sifaryam ḇe Yahwe I ro Filipina. Fafisu randak ro Betel, yaḇe snonkbor kaker ma yafarbuk ḇaim. Fafisu anya indokada 10.000 manbaryas ro Filipina. Kirine, nasyadi ro 200.000 manbaryas, ma utin syadi naek srar ḇefararur ro Betel sefakapon fararur ḇaḇeḇaryas.

Fyoro mura, nkofandun Betel ḇeba wer. Inja, Badan Pimpinan sor nkofa nkosewar moḇ fa nkoḇawes Kantor Cabang ḇebana. Aya kuker pengawas percetakan nuraḇe moḇ ḇefanam Betel. Ro moḇ ani kawasa Tionghoa sibor rodia. Nufuken si, imbe sḇoḇ saprop sena ke roḇa. Mboi simewer. Snon oso doḇe, ”Snonkaku Tionghoa syama sakboḇ ḇa, sikowes yamande.”

Ḇape ras oso, roi oso ḇefrur nkokandor. Tetangga nkoḇedi imbe dakbur ḇe Amerika. Inja, ifuken inko imbe nkokowes saprop ḇyedi ke. Mboi, tetangga ḇesesya imbe sakboḇ samprop sena kako, ma tetangga ani dembuk ḇesesya fa sakboḇna. Ma snon ḇeyoḇe, ”Snonkaku Tionghoa syama sakboḇ ḇa,” nkokowes saprop ro i kako. Kawanḇa ḇo, Kantor Cabang nya saprop rarwan dikyor naba syadi. Kaku inema Yahwe marisen Ḇyenairi.

Fafisu taun 1950, ayaiso ḇebabo syadi ro Betel. Mboi kirinema, aya kuker swa yeja nuiso ḇemansar binsar. Yafafko ḇaḇeri snar yaso Yesus i kwar ḇe moḇ risai iwan ayana. Sinan yedi iyaw aya, fama Yahwe ḇyuk ḇe aya kina ḇeba ḇeswar aya. Fararur rosai monda nufrurna, yakyar faro Yahwe I ḇyuk rosai nufandunna. Aya ma Nora i nukofen kasumasa faro Yahwe snar ḇyuk roi ḇeḇye ḇenu. Nudif kako snonkaku ḇesesya fa saksyom Yahwe I.​—Maleakhi 3:10.

Ḇepon iwara Yesus dor ḇeyor som oso, snori Matius Lewi fa iso i. Inja, Matius iso i ke? ”Iyori beri fa ibur roi ḇeḇor nakam, ma iso Yesus.” (Lukas 5:27, 28) Aya kako yabur roi ḇeḇor nakam fa yaso Yesus i. Yakyar ḇesesya kako bisa sakfrur radirya ma sisma barakas nabore.