”Yafawi Mboi Nari Diḇri”
”Naek koḇani denef kwar, ḇape yara fa yaḇani ro anenef ḇyedi.”—YOHANES 11:11.
DOYA: 129, 154
1. Lazarus imar kwar raryano, rosai Marta ikyar ya? (Mam sonin ro randak artikel ine.)
MARTA ima Yesus bati ma manfamyan ḇyediri. Sneriso kaku snar srar ḇyedi Lazarus imar. Roi oso isya ḇeyun sneprei ḇe i ke? Imbo. Yesus ḇyeasas faro i, ”Srar bani nari diḇeri.” Kakuḇae, wos anna nfadwer saneso ḇyenakam ḇa. Ḇape, Marta ikyar rosai Yesus ikofenna, ma ikofen ḇo doḇe, ”Yafawi mboi nari diḇri rofyor ḇemarsya siḇersi ro ras fawarya.” (Yohanes 11:20-24) Marta ikyar Lazarus nari ikḇawes kaḇer ro fafisu iyama. Ḇape, fyoro ḇa ramnai, Yesus ifrur mujisat. Ro ras ani ḇeri ḇyawes Lazarus i.
2. Rosai ḇefnai fa komarisen kokyar raris Marta i?
2 Kofawi Yesus ḇaido Kmari suḇawes snonkaku ḇemar kwar sya ro kirine ḇeri ḇa. Ḇape raris Marta i, na kokyar ro fafisu iyama snonkaku koswar sya nari sikḇawes kaḇer ke? Imbude swa koḇedi, awin, kamam, apus ḇaido romawa koswar kaku simarbur ko kwar. Komewer kowaf kawan wer fa kofor si, kofarfyar kuker si, ma kombrif kayam
kuker si. Na komarisen kaku imnis Marta i, kuker kakyar kokofen, ’Yafawi snonkaku yaswar sya nari sikenemwer.’ Ḇape, fandun fa kokara rosai ḇefnai fa kokyar ya.3, 4. Farfyar rosai imbude Marta ryower ya, ma rariso roi ine nsambraḇser kakyar ḇyedi?
3 Marta ḇyarek fanam ro Yerusalem. Inja, imbude myam ḇa Yesus byawes kaḇer romawa ro kabom oso ḇeḇarek fanam kota Nain ro Galilea. Ḇape, imbude ryower farfyar ani. Osower ido, Marta i kako ryower kwar Yesus ḇyawes kaḇer Yairus inaikir ḇyedi. Snonkaku ḇero Yairus rum ḇyedi sikam ”sifawi romawa ani imar kwar”. Ḇape, Yesus duf bramin ḇyeja ma ikofen, ”Ne, romawa wakḇok!” Ma, fafisuya ḇeri ikḇoke. (Lukas 7:11-17; 8:41, 42, 49-55) Marta ma Maria sufawi Yesus bisa ḇyuk pararei faro snonkaku ḇeduf sya. Inja, sukyar rofyor Yesus isya rodiwa rofyor Lazarus imar ḇaim ido, nari isya ma ikenem kaker. Imḇape, kirine Lazarus imar kwar. Inja, rosai Marta ikyar ya? Marta doḇe Lazarus nari ikḇawes ’ro ras ḇepupes ya’, isoine ro fafisu iyama. Rosai ḇefnai fa ikyar kaku ya? Ma rosai ḇefnai fa kokyar ro fafisu iyama aḇiḇer ya isya inja bisa kosrow kuker snonkaku koswar sya?
4 Sano ḇepyum ḇeḇeso nasya ḇefrur kokyar faro aḇiḇer ya. Sano anane nari kofarkorna. Isyadiwer, nari kosrow roi oso kokara ḇepon ḇaimna ro Allah Wos Ḇyena. Kakyar koḇena fa kosrow kaḇer kuker snonkaku koswar sya nari nasambraḇ syadi.
FARFYAR ḆEBUK SANERARO!
5. Rosai ḇefnai Marta ikyar nari Lazarus ikḇawes kaḇer?
5 Marta ikofen ḇa, ’Imburo nari ikḇawes’ kaḇer. Mboi, doḇe, ’Yafawi nari ikḇawes.’ Rosai ḇefnai fa Marta ikyar kaku? Snar ifawi fawar kuker aḇiḇer ro fafisu iwara. Imbude fyarkor kako na ro rum ḇaido ro rum nadi rofyor ibaba kaker. Kirine, komam farfyar rikior kuker aḇiḇer ḇeḇefas ro Refoya.
6. Mujisat rosai Marta ifawi kakuna?
6 Aḇiḇer ḇerandak isya rofyor Allah ḇyuk papoik ḇe Elia i fa ifrur mujisat. Ro bar wambrur Israel, ro kota Zarefat ḇero Fenisia, kabom ḇesabarar oso fyasna snemura ḇe Elia i. Bon ya, Yahwe ifrur mujisat faro i. Tepung ma mani ro kabom ani rum ḇyeja nari nabro ḇa, inja i kuker romawa ḇyeja bisa sukenem pdef. (1 Raja-Raja 17:8-16) Ḇarpurya, romawa ḇyeja iduf ma imar. Ḇape, Elia ifnoḇeki. Pyan ro romawa ani bo ḇyenadi ḇe Yahwe I, ”Allah yedi, wafrur romawa ine fa ikenem kaḇer wer.” Allah ryower Elia nadi ḇyeja, ma romawa ani ikenem kaḇer! Iso kaḇakḇok ḇerandak ḇeḇefas ro Refoya. (Wasya 1 Raja-Raja 17:17-24.) Kakuḇae, Marta ifawi farfyar ḇefrur kanandor ani.
7, 8. (a) Rosai Elisa ifrur ya fa ḇyuk sneprei ḇe awin oso ḇefafardun? b) Mujisat Elisa ifrurna nfasnaḇair rosai ro Allah I?
7 Aḇiḇer ḇesuru ḇeḇefas ro Refo isoine aḇiḇer Nabi Elisa ifrurna. Ro kota Syunem, bin Israel oso ḇeḇarek rodia dakna romawa ḇa. Bin ani fyasna 2 Raja-Raja 4:8-31.
snemura kako ḇe Elisa i, inja Yahwe ḇyuk romawa snon ḇe i ma swari ḇeḇemansar kwar. Ḇape taun ḇeḇeso ramnai, romawa ani imar. Snari sneriso fafayaḇa. Ḇyefafardun kaku, inja imbran binkwan isof kilometer ri 30 fa isrow Elisa i ro Urekbon Karmel. Elisa iwan manfamyan ḇyedi Gehazi ḇe Syunem ḇepon fa ḇyawes kaḇer romawa ḇemar ani. Ḇape, Gehazi jadi fa ḇyawes kaḇer romawa ani ḇa. Ḇarpurya, Elisa ma bin ani susabu ro rum ḇyedi.—Allah fyasnaḇair snar syambraḇ fa ḇyawes kaḇer snonkaku ḇemar sya
8 Elisa syun ḇe rum srir romawa ani ma ḇyenadi. Yahwe kyarem Elisa nadi ḇyedi ma kuker mujisat ḇyawes kaḇer romawa ani. Rofyor snari myam romawa ḇyedi ikenem wer imarisen fafayaḇa! (Wasya 2 Raja-Raja 4:32-37.) Imbude iswarepen wos ḇero Hana nadi ḇyedi. Hana jadi fa nya romawa ḇa isof Yahwe ḇyuk romawa snon oso ḇe i ḇenirḇe Samuel. Ma, Hana isandik Yahwe I snar Allah iso ”ḇeyun murḇaḇ be Kubir, ma ḇebuk aḇiḇer.” (1 Samuel 2:6) Ro kaḇakḇok romawa snon Syunem ine, Allah fyasnaḇair snar syambraḇ fa ḇyawes kaḇer snonkaku ḇemar sya.
9. Fawarḇair aḇiḇer ḇeḇekior ḇeḇefas ro Refoya.
9 Farfyar ḇese ḇeyun kanandor ḇeḇejadi rofyor Elisa imar kwar. Ifarmyan ḇe nabi taun ri 50 syadi kwar. Ramnai ”ḇyekandera dafduf ḇarpur mura ḇeyun marmar ḇe i”. Fafisu ḇeḇeso ramnai, ḇedawer yaiso Elisa kor ḇyena monda. Ras oso, snonkaku Israel ḇeḇeso, imbe sikram snon oso. Fyoro ḇa ido, smam perampok sya srama. Sḇensewar fa sifrar fasaw, inja sisawen snon ḇemar ani ḇe Elisa kubir ḇyedi. Refo ikofen, ”Fafisu snon ani baken ḇyedi nakyaren Elisa kor ḇyena ido, ikenem kaḇer wer ma dores ḇeri.” (2 Raja-Raja 13:14, 20, 21) Farfyar annane nafrur Marta ikyar snar Allah nya samambraḇ fa ikafyo marmarya. Farfyar annane kako nḇuk kakakyar ḇe ko snar Allah nya papoik ḇeba kaku, ma oso ḇaḇeri ḇemnis raris I.
AḆIḆER RO FAFISU MANWAWANSYA
10. Rosai Petrus ifrur faro imbesrar Kristen oso ḇemar kwar ani?
10 Syap-Syap Yunani Kristen naser kako farfyar kuker aḇiḇer Allah manfamyan ḇesouser Ḇyesya sifrurna. Kofarkor kwar aḇiḇer Yesus ifrur kwarna ro kota Nain ma ro Yairus rum ḇyedi. Swaf ḇeḇeso ramnai, manwawan Petrus ifrur Dorkas ḇeḇeyap ḇe Tabita, ikenem kaḇer. Petrus isun ḇe moḇ Tabita ḇyarek roya. Ramnai, ḇyenadi ma ikofen, ’Tabita, wakḇoke!’ Tabita ikenem kaḇer, ma Petrus fyasnai faro snonkaku Kristen ḇese ro moḇ ani snar ”bin ani ikenem” kwar. Rosai ḇeḇejadi ine, nafrur snonkaku Kisah 9:36-42.
ḇebor ro kota ani ’sikyar faro [Tuan]’. Manfamyan babo sine sifawar ankankinem ḇeḇye ḇe snonkaku ḇesesya kuker Yesus i ma Yahwe samambraḇ Ḇyedi fa ikḇawes snonkaku ḇemar kwar sya.—11. Rosai Lukas ikofen kuker roi ḇeḇejadi faro snonkbor ani? Ma rariso farfyar ani nadif snonkaku ḇesesya?
11 Snonkaku sino sisya ḇemam ro mankunsi aḇiḇer ḇesenawer. Ras oso, Manwawan Paulus isya ro fananjur sifrur ro sim ḇero bo ro Troas, kirine ḇero bar wambarek Turki. Paulus isya dun faya isof romfawru. Snonkbor oso snori Eutikhus kyain ro koḇkir ya fa ryower Paulus faya ḇyeja. Ḇape snonkbor ani ipok anenef ya ḇa, inja isapi ro sim ḇoryas syos ḇeḇekior ḇesop. Imbude Lukas iso snonkaku ḇerafa ḇemam Eutikhus i. Snar ima dokter rirya, inja ifawi snonkbor ani ḇyepar monda ḇa ma ḇyaḇir royoḇa, ḇape romawa ani imar kwar! Inja Paulus isabu rarḇaḇ. Doḇerepen Euthikus ḇo dawrepeni ma ifrur snonkaku syakam sikandor kuker doḇe, ”Ikenem.” Mujisat ine nadif kaku snonkaku ḇemam sya. ”Sisnesna naprei kam” snar sifawi snonkbor ani ryo kwar, ḇape kirine ikenem wer.—Kisah 20:7-12.
SANERARO ḆEKAKU YA
12, 13. Rofyor kofarkor kwar farfyar ḇeḇeso kuker kaḇakḇok, imbude rosai kofuken ya?
12 Farfyar kuker aḇiḇer kowawos kwar nane fandun fa nafrur kokyar raris Marta i. Na kokyar snar Allah koḇedi, Manḇebuk Kankenem ḇeko na ḇyawes kaḇer snonkaku ḇemar kwar sya. Rofyor aḇiḇerya ḇyejadi, Allah manfamyan Ḇyesya sisya rodia raris Elia, Yesus, ḇaido Petrus. Ma, sisya kako rofyor Yahwe ifrur mujisat. Inja, rariso kuker snonkaku ḇemar ro fafisu mujisat ḇemnis radirya sifrurna werḇa? Na Allah manfamyan ḇesouser
Ḇyesya sikyar nari Allah ḇyawes snonkaku ḇemar kwar ro fafisu iyama ke? Na kokyar raris Marta i rofyor ikofen, ’Yafawi nari ikḇawes ro ras ḇepupes ya’? Rosai ḇefnai fa ikyar aḇiḇer ro fafisu iyama nasya, ma rosai ḇefnai fa ko kako kokyarna?13 Allah manfamyan ḇesouser Ḇyesya ro fafisu iwara sifawi aḇiḇer ya isya ro fafisu iyama. Ine nefasnaḇadir ro farfyar ḇeḇefas ro Allah Wos Ḇyena. Mkorama komam farfyar nane.
14. Rosai kofarkor ro Abraham i kuker aḇiḇer ya?
14 Kwarapan Yahwe parenta Ḇyedi faro Abraham i. Isak ima romawa Abraham iwaf kaku dirya. Ḇape, Yahwe doḇe, ”Wun romawa bani, romawa bonjos waswar kaku, Isak i, muraḇe sup Moria. Ma rodiwa farser i ḇe farsarser ḇeḇerap.” (Kejadian 22:2) Kakara Bedi ido, rofyor Abraham ryower parenta ani, rariso sneḇaḇir ḇyedi? Yahwe ḇyeasas roro up Abraham, er syakam nari sisma barakas. (Kejadian 13:14-16; 18:18; Roma 4:17, 18) Yahwe I kako doḇe barakas ani nari ”ndramuma roro Isak i”. (Kejadian 21:12) Ḇape, rariso wos anna ndarirya rofyor Abraham fyarser romawa ḇyedi? Allah iwan Paulus fa fyasnaḇair snar Abraham ikyar Allah nya samambraḇ fa ḇyawes kaḇer Isak i. (Wasya Ibrani 11:17-19.) Ḇape, Refoya ikofenḇair ḇa Abraham kyara Isak nari ikḇawes ḇeri, ro oras ḇeḇeso, ras oser, ḇaido ro minggu swaf oser. Abraham ifawi ḇa fafisu risaiso nari romawa ḇyedi ikḇawes ya. Ḇape, ikyar kaku Yahwe nari ḇyawes kaḇer Isak i.
15. Kakakyar rosai Ayub ismana?
15 Ayub ifawi kako aḇiḇer nari isya ro fafisu iyama. Ifawi rofyor aiknam oso ḇyeḇeroḇen ido, aiknam ani bisa isurwer ma ḇyeaiknam ḇebabo. Imḇape, snonkaku sya simnis Ayub 14:7-12; 19:25-27) Rofyor snonkaku oso imar ido, na ifrur fa ikenem wer ro mankundi ḇa. (2 Samuel 12:23; Mazmur 89:48) Ḇape, Allah ima syambraḇ fa ḇyawes kaḇer snonkaku ḇemar kwar sya. Inja, Ayub ikyar kaku Yahwe nari iswarepeni. (Wasya Ayub 14:13-15.) Ayub ifawi ḇa fafisu risai nari isma kaḇakḇok ya. Ḇape, Ayub ikyar Manḇebuk Kankenem syambraḇ ma iswarepeni fa ḇyawes kaḇeri.
radirya ḇa. (16. Wos sneprei rosai malaikat ikofenḇair ḇe Daniel i?
16 Kwarapan, snon ḇesouser ḇesewer, isoine Daniel i. Ro kankenem ḇyedi ḇesiper, isouser faro Yahwe I ḇesya kwar, ma Yahwe isaramperi. Ro ras oso, malaikat dap Daniel i ḇe ’snonkaku Allah iswar kaku’ ma ikofen ḇe Daniel i ”Iḇye kada wasma aski. Swambraḇser Au”.—Daniel 9:22, 23; 10:11, 18, 19.
17, 18. Asas rosai Yahwe ḇyuk ḇe Daniel i?
17 Rofyor Daniel umur ḇyeja fanam ḇe taun ri 100 ma fynam imar kwar, imbude kyara rosai nari ḇeḇejadi kuker i rofyor imar kwar. Daniel ikyar nari ikenem wer ke? Imbo! Ro papupes syap Daniel, kowasya rosai Allah ḇyeasas faro i na, ”Daniel, wasouser pdef isof pupes. Nari wakmnaisu.” (Daniel 12:13) Daniel ifawi marmar ima imnis raris anenef monda ma ”fararur ḇaido aw ḇaido fawawi ḇaido fawawinanem noḇa ro Kubir yadori”, moḇ nari ryayoḇ na. (Pengkhotbah 9:10) Ḇape, ine papupes ro kankenem Daniel ḇyedi ḇa. Yahwe ḇyuk ḇe Daniel i asas ḇepyum kaku ro fafisu iyama.
18 Yahwe malaikat Ḇyedi ikofen faro i, ”Nari ḇeḇeḇawes kaḇer fa wasma bar Bedi ro fafisu ya.” Daniel ifawi mnis ḇa fafisu risai wos anna na ndarirya. Roi ifawi ya nari imar ma ifrur roi osoḇaḇeri. Ḇape, rofyor Daniel ryower asas ine, ”Nari ḇeḇeḇawes kaḇer fa waksma bar Bedi,” ifawi na isma aḇiḇer ro fafisu iyama. Ine nari nḇejadi fyoro kaku rofyor imar kwar, ”ro fafisu ya”. Ḇaido, ro Jerusalem Bible, ”Nari ḇeḇeḇawes kaḇer fa wasma bar bedi ro ras papupes ya.”
Raris Marta i, na kokyar snar aḇiḇer nari ndarirya kaku (Mam paragraf 19, 20)
19, 20. (a) Rosai ḇefesepen kuker farfyar kowawos kwar anna ma Marta kakyar ḇyedi? (b) Rosai na kofarkor ro artikel ḇerama ya?
19 Kakuḇae, Marta nya sano ḇepyum kaku fa ikyar snar srar ḇyani, Lazarus i nari ’ikḇawes ro ras ḇepupes ya’. Yahwe asas Ḇyedi faro Daniel i ma Marta kakyar ḇyeja faro aḇiḇer ro fafisu iyama nḇuk kakakyar snar aḇiḇer ya nari ḇyejadi.
20 Kofarkor kwar kuker aḇiḇer ḇekaku ḇeḇejadi ro fafisu iwarana. Ine fyasnaḇair snar snonkaku ḇemar kwar sya nari sikenemwer. Ko kako kofarkor kwar snar Allah manfamyan ḇesoasuser Ḇyesya sikyar kako nari sisma aḇiḇer ro fafisu iyama. Imḇape, asas kuker kaḇakḇok ya nasya fyoro kwar. Inja, sano ḇepyum nasya ḇefrur kokyar faro asas anna ke? Nasya ido, ine nḇuk kakakyar ḇe ko fa kowaf aḇiḇer ro fafisu iyama. Ḇape, fafisu risai nari nḇendarirya? Nari kofarkor roi nane ro artikel ḇerama ya.