1, 2. Rariso Tony fawar ḇyeja fyasnaiḇair snonkaku oso bisa fyadwer kenem ḇyedi?

TONY ima roma awak diri. Dakfarkor ro SMA kwar, mboi imyaren fyarkor ḇa. Kyara monda fa isasyar ro rumfarkor ḇyedi mura. Ro papupes minggu ya, Tony ryaḇe bioskop ḇaido ifnak kayamyam fnoḇek bati ḇyesya. Ifrur roi ḇeḇarḇor ḇa ḇaido ikun ker narkoḇa ḇa, mboi iḇoryae ro kenem ḇyedi. Ikyar mankun ḇa Allah ima isya. Ras oso, Tony isrow kuker Saksi Yahwe risuru ma ikofenḇair ḇe su roi ikyar anya. Suḇuk syap risuru ḇe i isoine Benarkah Kehidupan Diciptakan? ma Asal Mula Kehidupan—Lima Pertanyaan yang Patut Direnungkan.

² Mura susrow kaḇer Tony i wer, mboi fyadwer ḇeri kakara ḇyena kwar. Iwasya syap ansuya rarwan nabor kwar rawo nkarapraper ma imbe namuk kwar. Tony ikofen ḇe Saksi sya, ”Yakyar Allah ima isya kaku.” Dakfarkor Refo, ma fawawas fyadwer mamam ḇyena ḇekur kankenem ine. Randak ya, Tony dakfarkor mnis ro rumfarkor ya ḇa. Mboi, fyor fyarkor Refo mura, ḇye murid ḇepyum kaku oso ro rumfarkor ḇyedi! Iḇye syadi, kepala sekolah ḇyani myanen  kaku i. Ikofen ḇe Tony radine, ”Fadwer kaku kenem Beja kwar ma wasmai nilei-nilei ḇepyum. Ine snar wafarkor kuker Saksi Yahwe sya ke?” Tony doḇe ryariri ma irwas rosai ifawi kwar na ḇe kepala sekolah ḇyani. Imnai ro SMA kwar ma kirine dakfarmyan ḇe perintis biasa ma hamba pelayanan. Tony imarisen kaku snar kirine nya Yahwe I ḇe Kma ḇesaswar!​—Mazmur 68:5.

3. Anun rosai Yahwe ḇyuk ḇe roma inai babo sya?

³ Tony fawar ḇyena neswarapepen ḇe ko snar Yahwe ima iswar kaku roma inai babo sya. Imarisen wasmai payamyum ma marasrisen ro kenem Bedi. Inja, danun ḇe Au fa ”waswarepen Manḇefrur bedi Ḇekaki Syadi ro fafisu wababo kaker” ine. (Pengkhotbah 12:1) Ine na napyan ḇa, mboi ine roi swambraḇ fa wafrur na. Kuker Allah fafnoḇek Ḇyedi, na wasmai payamyum ro kankenem rofyor wababo kaker ma fafisu waba kwar. Insama kofawi mnis roi ine, nari kawos rosai ḇefnoḇek snonkaku Israel sya fa sisun ḇe Sup Ḇaḇeasas ma rosai ḇeḇuk samambraḇ ḇe Daud i fa myun Goliat ḇebamantar ani.

4, 5. Farkarkor rosai kun ro nyan snonkaku Israel skafyo Kanaan ma ro nyan Daud myun Goliat i? (Mam sonin ro randak artikel ine.)

⁴ Rofyor snonkaku Israel kero wer siḇe sisun ḇe Sup Ḇaḇeasas ya, akurfasnai rosai Yahwe ḇyuk faro si na? Ikofen ḇe si fa sakḇe sordade ḇepyum ḇaido ḇekir syadi ro mamamun ya ke? Oroḇa! (Ulangan 28:1, 2) Mboi, ikofen ḇe si fa sisouser ma sikyar faro I. (Yosua 1:7-9) Snonkaku sya smam ananun ine rya namnis ḇa kero. Mboi, inema ananun ḇepyum kaku faro snonkaku Israel sya. Yahwe ifnoḇek ker kawasa Ḇyesi fa skafyo snonkaku Kanaan sya. (Yosua 24:11-13) Sfandun kakyar fa sisouser faro Allah, mboi kakyar nun ḇe payamyum ḇesya kwar. Roi nane nkaku ro fafisu naiwara, ro fafisu ine rarirya kako.

⁵ Goliat iso snon mambri dirya. Kakaki ḇyena indokada meter rikyor, ma dun romamun ḇefrur makakak. (1 Samuel 17:4-7) Mboi, Daud ima dun monda ali-ali ma ikyar faro Allah. Snonkaku ḇena kakyar noḇa na kyara Daud ima ifawi royoḇa snar imbe myamunmun kuker Goliat i! Imbape, ḇekaku ya Goliat iso ḇefawi royoḇa.​—1 Samuel 17:48-51.

6. Rosai nari kawos ro farkarkor ine?

⁶ Ro farkarkor ḇepon ya, kawos kwar roi rifyak ḇefrur fa koḇeaski syadi ma kosmai payamyum ro kankenem. Kofawi fandun fa kofaduru ḇaḇebati koḇena kuker Yahwe I, koḇebati kuker snonkaku ḇeswar I, kofrur aw ḇepyum, ma koḇesyowi ḇaḇemkei Allah ḇyuk ḇe ko na. Ro farkarkor ine, nari kawos moḇsa kosmai fainda nabor syadi wer ro kofrur roi rifyak nane. Rarirya, nari kawos wos farkin ḇeḇeso ḇero Mazmur 16 ya.

7. (a) Snonkaku ḇena Allah karkara Ḇyena kyur ḇe snonkaku ḇemnis rariso? (b) Rosaiso Daud ”ḇar” ḇyedi ya, ma bon rosai ismai na?

⁷ Snonkaku ḇena Allah karkara Ḇyena ima ikyar faro Allah ma syewar fa myam roi nakam raris Allah mamam Ḇyena. Imarisen Yahwe fyarkin i ro kankenem ḇyedi ma dun snemuk fa isouser I. (1 Korintus 2:12, 13) Daud ḇyuk farari  ḇepyum ro snonkaku ḇena Allah karkara Ḇyena. Idisen, ”Fararmyan faro Yahwe iso ḇar ayedi.” (Mazmur 16:5) Daud ikofen kasumasa faro ”ḇar” ḇyedi, iso fararmyan faro Allah ma ḇaḇebati ḇefanam kuker I. Daud syewar kako fadadiren ro I. (Mazmur 16:1) Bon ya? Doḇe, ”Yaryaḇ kaku.” Ḇaḇebati ḇefanam kuker Yahwe iso monda ḇefrur fa Daud iryaḇ kaku!​—Wasya Mazmur 16:9, 11.

8. Roi risai monda na ḇefrur fa kosmai marasrisen kaku ro kankenem ine?

⁸ Snonkaku ḇesewar pipi ḇaido marasrisen monda, na sipok sismai raryaḇ ḇeba raris Daud i ḇa. (1 Timotius 6:9, 10) Mambesrar oso ro Kanada doḇe, ”Payamyum kosmai na, ndramuma ro rosai kona ro kenem koḇena ḇa, mboi ndramaker rosai koḇuk faro Manḇeḇuk roi nayafa kam ḇe ko, Allah Yahwe I.” (Yakobus 1:17) Wakyar faro Yahwe ma wafarmyan ḇe I ido, nari kenem Bena nefainda kaku ma wasmai marasrisen. Inja, rosai na wafrur ya insama kakyar Bena nako? Fandun fa buk oras Bena faro Yahwe I kuker wawasya Wos Ḇyena, mam pyum braur ḇepyum ifrur kwar na, ma kwarauser rari ḇepyum Ḇyena, raris saswar Ḇyena maro au.​—Roma 1:20; 5:8.

9. Moḇsa ḇe Allah Wos Ḇyena fa nfara kenem Bedi rai?

⁹ Fyorno ido, raris Kma ḇesawarwar, Allah fyasnai saswar Ḇyedi faro ko kuker isonek ko. Daud ḇyesyowi wos sonek ḇeradine ma doḇe, ”Nari yasandik Yahwe I, ḇeḇuk ananun ḇe aya. Ro roḇ kako swaruser ḇedo kaku ayedi isonek aya.” (Mazmur 16:7) Daud iwasenuser Allah karkara Ḇyena ma syewar fa nya na. Ḇye Allah karkara Ḇyena fa nfara kenem ḇyedi, isoine nfadwer kenem ḇyedi fa dakḇe snonkaku ḇepyum syadi. Wakfrur raris Daud ido, nari saswar Bena faro Allah ma marisen fa wafrur marisen Ḇyena naba syadi wer, ma wakḇe snonkaku Kristen ḇemas kaku. Imbesrar oso snori Christin ikofen ḇo doḇe fyor fyarkor kaku ma iwasenuser rosai iwasya na, ḇyaḇir Yahwe fyas roi anna faro i derer!

10. Raris kofarkor ro Yesaya 26:3, fainda rosai wasmai snar nwa Allah karkara Ḇyena?

¹⁰ Nwa Allah karkara Ḇyena ido, nari mam dunya ine ma fafisu iwama raris moḇ Allah myam na rai. Nanema fawawi ḇeba kaku Yahwe ḇyuk ḇe Au nairi. Rosai ḇefnai ya? Imarisen wafawi roi ḇefandun kaku ro kankenem, wafrur snemuk ḇepyum, ma mam muraḇe ras ḇarpon iyama kuker makak ḇa! (Wasya Yesaya 26:3.) Naek oso ḇeḇarek ro Amerika Serikat snori Joshua, ikofen ḇo doḇe fyor kofanam pdef kuker Yahwe ido, na kofawi roi risai ḇeḇefandun na ma ḇeḇefandun ḇa na.

11. Rariso Daud kyinfir bati ḇyesya rai?

¹¹ Wasya Mazmur 16:3. Daud ifawi moḇsa ismai bati ḇepyum sya rai. Kyinfir bati ḇeswar Yahwe I, ma ine nun marisen ḇeba kaku ḇe i. Dapḇair bati ḇyesi ḇe ”snonkaku ḇesren” kukro sisewar fa sisouser Yahwe farkankin Ḇyena faro kenem ḇepyum ya. Manḇefas mazmur ḇese wer dakḇaḇir rarirya kako. Fyas ḇo doḇe, ”Yaḇebati kuker snonkaku syakam ḇesyowi Au ma ḇeso farkankin Bena.” (Mazmur 119:63) Raris kawos kwar ro farkarkor ḇepon ya, na bisa waksmai kako bati ḇepyum ḇeswar ma ḇesouser faro Yahwe I. Kakuḇae, na ḇebati  kuker snonkaku ḇena umur ḇemnis Au monda ḇa.

12. Rosai ḇefnai fa Daud ma Yonatan suḇebati pyum kaku?

¹² Daud kyinfir bati ḇena umur ḇemnis kuker i monda ḇa. Wakfawi Daud bati oso ḇefanam kuker i snonsnon ḇyedi ke? Imbude na waswarepen Yonatan i. Ro Refo, Daud ma Yonatan ḇaḇebati suḇenama farfyar ro ḇaḇebati ḇepyum kaku nairi. Mboi wafawi, Yonatan umur ḇyeja isyadi taun ri 30 ro Daud i. Rosai ḇefrur fa suḇebati pyum? Snar ḇaḇebati suḇena neknam ro kakyar faro Allah. Su kako suḇesyowiyae su ma sumarisen faro rari ḇepyum oser-oser nya na. Raris, sukam sufasnai ḇaḇebri fafisu sumamunmun kuker Allah mbroḇ Ḇyesi.​—1 Samuel 13:3; 14:13; 17:48-50; 18:1.

13. Rosai kofrur ya insama kona bati sibor? Fasnai fawar oser.

¹³ Raris Daud ma Yonatan su, na kona marasrisen ḇeba kaku rofyor koḇebati kuker snonkaku ḇeswar ma ḇekyar faro Yahwe I sya. Kiera, ḇefarmyan ro swaf taun ḇe taun kwar doḇe, ”Yaḇebati kuker naek srar ḇero supswan ḇesiper, ḇeramaker kenem ma er ḇesisyeyae.” Wakfrur rarirya ido, nari mam ro mankundaw rariso Refo ma rur ḇesren nafrur fa wakḇe kina oser ro supswan ḇesiper ḇesyom faro Yahwe I.

14. (a) Rariso na kofrur aw ḇepyum ḇeyun marasrisen ro kenem ine? (b) Rosai roma babo ḇeḇeso sikofen ḇekur aw sena?

¹⁴ Wasya Mazmur 16:8. Daud mankundi myam fararmyan ḇe Allah ḇe roi ḇefandun kaku. Rofyor wafrur aw Bena ḇe ḇarpon, wakfrur ra Daud i kada, ma kwarapan rosai Yahwe imarisen na. Rarirya, na waksmai marasrisen ro kenem Bedi. Mambesrar oso snori Steven, doḇe, ”Rofyor yafrur aw ma yasewar fa yasmai na kwar, na yamarisen kaku. Yaryaḇ kako kukro yafrur roi ono fa napyum syadi wer.” Mambesrar ḇebabo oso ḇero Jerman, kirine ifarmyan ro sup ḇese, doḇe, ”Fafisu nari yaḇemansar kwar ma yakain yakara kenem yedine, yamewer yakara rosai yafrur nakam  yafrur na faro mankundaya ḇardi monda.” Wakḇaḇir rarirya ke? Irya ido, buk samambraḇ ma ḇaḇekir Bena fa wasandik Allah ma wafnoḇek snonkaku ḇesesya. (Galatia 6:10) Wafrur aw Bena fa wuffarmyan ḇe Yahwe, mura ḇenadi wor Yahwe I fa ifnoḇek Au insama wasmai na. Wakyar kaku Yahwe na imarisen kyarem nadi Bena!​—1 Yohanes 3:22; 5:14, 15.

15. Mankundaw ido rosai monda imbe wafrur ro ras ḇarpon iyama? (Mam kotak ”Roi Ḇepyum Ḇeḇeso Bisa Kwara fa Wafrur Na.”)

¹⁵ Rosai monda imbe wafrur ro ras ḇarpon iyama? Wakmarisen fa buk kankarem ro fananjur kuker wos ḇesasyar ro snembri ke? Ḇaido wafrur aw fa wafarmyan ḇe perintis oroḇaido ro Betel ke? Oso wer ido, farkor wos ḇese insama wakḇaryas ḇe snonkaku ḇebor syadi wer. Naek oso ḇefarmyan ro oras nakam ḇenir ḇe Barak, doḇe, ”Fyor yakḇok ro arwo na, yafawi roi imbe yafrur na iso yaḇuk samambraḇ ayena kam faro Yahwe I. Fararur osero ḇaḇeri ifrur fa yasmai marasrisen ḇeradine.”

16. Rariso Daud myam Yahwe sasoser ma farkankin Ḇyena rai, ma rosai ḇefnai ya?

¹⁶ Wasya Mazmur 16:2, 4. Raris kofarkor kwar ro farkarkor ḇepon ya, rofyor kokenem imnis Allah sasoser ma farkankin Ḇyena ido, na komkei kaku. Kofarkor fa koswar roi ḇepyum ma kayin roi ḇeḇyeḇa na. (Amos 5:15) Ro fasfas ḇekaku ya, Daud kyurfasnai Yahwe iso Knam ro roi ḇepyum nakam. Daud syewar fa iso Allah nyan Ḇyena ma iswar rosai Yahwe imarisen na. Mboi, fyarkor kako fa dayin rosai Allah ikofen ḇe roi ḇeḇyeḇa na. Oser ya iso samsyom amfyanir, isoine samsyom faro snonkaku ḇaido roi oso ḇardibur Yahwe I. Samsyom amfyanir nafnai fa smam snonkaku seroi noḇa ma sḇuk sanandik faro snonkaku ḇaido roi oso.​—Yesaya 2:8, 9; Fasasna 4:11.

17, 18. (a) Rosai Daud ikofen ḇekur bon ḇeḇyeḇa ro samsyom ḇekaku ḇa na? (b) Rosai ḇefrur fa snonkaku ḇebor ro baboine ”sisma kandera nabor”?

¹⁷ Ro awar Refo naiwara, sifrur fararur farḇuk ro samsyom ḇekaku ḇa na. (Hosea 4:13, 14) Kawasa sibor simarisen faro samsyom ḇekaku ḇa anine snar simarisen sifrur fararur farḇuk anna. Mboi, samsyom ḇeradine na nafrur fa seaski ke? Oroḇaḇeri! Daud ikofen ḇo doḇe snonkaku ḇesyom allah ḇekaku ḇa sya sismai ”kandera nabor kaku”. Ḇeḇyeḇa syadi, snonkaku ansine sḇuk romawa sesya ḇe farsarser faro allah ḇekaku ḇa sya! (Yesaya 57:5) Yahwe dayin kaku roi ḇeḇarḇor sifrur nane. (Yeremia 7:31) Wakenem ro fafisu anya ido, na wakofen kasumasa kaku snar sinan Bansuya susyom ḇe Yahwe I!

¹⁸ Ro agama ḇekaku ḇa ḇero baboine, komam kada simarisen faro fararur farḇuk na, ro snon kuker snon ma bin kuker bin kako. Kenem ḇeradine nafrur fa snonkaku sya skara sisya simkei, mboi ḇekaku ya ”sisma kandera nabor”. (1 Korintus 6:18, 19) Wakmam roi ine kako ke? Inja, roma inai babo mkoya, mkorower Kma mkoḇedi ro nanki! Mkomam ro mankun mko snar ipyum kaku fa mkosouser faro Allah. Mkokarapan bon ḇeḇyeḇa ro fararur farḇuk na. Nari mkofawi kaku marasrisen ḇekain fyoro ḇa imnis ra bon ḇeḇyeḇa mkosmai na ḇa. (Galatia  6:8) Joshua ḇeyap ḇepon kwar ani, doḇe, ”Moḇsa koḇuk ḇaḇemkei koḇena ndrama ro mankunko, mboi koḇuk sasar na ido, na kopok kosmai marasrisen oḇa.”

19, 20. Barakas rosai nari roma inai babo sya sismai na snar sikyar ma sisouser faro Yahwe I?

¹⁹ Yesus ikofen, ”Kaku ḇeri rofyor mkokin nako wos ayena, rarirya mkoḇe manfamyan kaku ḇe aya, ma nari mkofawi napnapesya ma napnapesya nari ḇyuk ḇaḇemkei faro mko.” (Yohanes 8:31, 32) Kokofen kasumasa faro Yahwe kukro ḇyuk fawawi ḇe ko ma komkei ro agama ḇekaku ḇa ma farkarkor sena. Ro fafisu iwama, kowaf fa kosmai ”ḇaḇemkei fnoḇek Allah romawa ḇyesi ro baba siḇe sismaya”. (Roma 8:21) Iba syadi ro kirine, na waksmai kermkun ḇaḇemkei anna rofyor waso Kristus farkarkor ḇyena. Inja, nari wafawi kakaku ya, kuker wafarkor na monda ḇa mboi wasouser na kako!

²⁰ Roma inai babo mkoya, mkoḇesyowi ḇaḇemkei Allah ḇyuk ḇe mko na. Mkoḇuk ḇaḇemkei anna kuker fawawinanem. Rarirya ido, na nafnoḇek mko ro kirine fa mkofrur snemuk ḇeyun roi ḇepyum ḇe mko ro ras ḇarpon iyama. Naek ḇebabo oso doḇe, ”Koḇuk ḇaḇemkei koḇena kuker fawawinanem ro kirine ido, na kofawinanem fafisu fandun fa kofrur snemuk faro roi ḇefandun kaku, rupa ra kokinfir fararur na ḇaido imbe kofarḇuk ke roḇa.”

21. Rariso na wasmai ’kankenem ḇekaku’ ya rai?

²¹ Ro fafisu fanam ḇe papupes dunya ine, rosai snonkaku sya skara ḇe roi ḇepyum na nakain fyoro ḇa. Snonkaku osoḇaḇeri ḇefawi rosai na ḇekur si ro meserdi. (Yakobus 4:13, 14) Inja, roi ḇepyum fandun fa mkokinfir ya iso roi nari ḇeyun mko ḇe ’kankenem ḇekaku’ ya. Isoine kankenem fyoro ro Allah dunya babo Ḇyedi. (1 Timotius 6:19) Yahwe ipok idif manserirya monda ḇa insama sifarmyan ḇe I. Snonkaku oser-oser mankun skinfir. Inja, mkofanam ḇe Yahwe I ro ras nakam insama mkoḇebati kuker I. Mkoḇesyowi roi ḇepyum Yahwe ḇyuk ḇe mko kwar na. (Mazmur 103:5) Mkokyar kaku Yahwe nari ḇyuk raryaḇ ma aski ḇeba kaku ḇekain fyoro-fyoro!​—Mazmur 16:11.