DIANA ḇyekandera ro swaf taun riḇeḇeso ḇarpur ine ma ḇyeumur taun ri 80 syadi kwar. Swari ismai dafduf Alzheimer (dafduf farander) ma ḇyarek ro panti jompo, mura imar. Romawa risuru ḇyesuya suyakmar kwar, ma mankundi syewar fa myam dafduf kanker ḇyeja. Mboi, rofyor Diana ryama iso fananjur ma dakḇaryas, naek srar sya smam ḇoi iryaḇ kaker.

John ifarmyan ḇe pengawas keliling ro swaf taun ri 43 kwar. Kyara ḇe fararur ḇesena ḇa kukro imarisen kaku faro fararur ḇyenane. Imbape, muniwara imnai ro fararmyan ḇyenane kukro myamwarek karyer ḇyedi ḇeduf ya. Fyor naek srar ḇemambir John i sisrow i ro munara kebaktian, smam mboi isnai ḇese ḇaḇeri. Iryaḇ kaker.

Moḇsariso Diana ma John susmai raryaḇ rai? Moḇsariso snonkaku oso ḇyekandera ḇo iryaḇ pdef rai? Moḇsa na snonkaku oso ryir fararur imarisen kaku kwar mboi ḇyeaski monda rai? Refo ikofenḇair roi ḇefnai ya. Doḇe, ”Snonkaku ḇenapes nari siryaḇ snar Yahwe I”. (Mazmur 64:10) Mboi, insama kofawi pyum wos nane, fandun fa kofawi rosai nari ḇeḇuk raryaḇ ḇekain fyoro ma rosai ḇeḇuk raryaḇ ḇekain fyoro ḇa.

Roi riḇeḇeso rya nafrur doryaḇ. Rupa ra, imbeswa insape imbe sufarḇuk babo. Ḇaido snonkaku oso insape imbe dakna romawa oroḇaido oso insape daksmai fararur babo ro fararmyan ḇe Yahwe I. Roi nane kam nafrur doryaḇ kukro nakam ndramuma ro Yahwe I. Iso ḇefrur randak farḇakḇuk ya, ḇyuk samambraḇ fa kona romawa, ma ḇyuk fararur ro organisasi Ḇyedi ḇe ko.​—Kejadian 2:18, 22; Mazmur 127:3; 1 Timotius 3:1.

Mboi, roi nane nbuk raryaḇ ḇekain fyoro ḇa. Faḇye kaku, imbeswa ḇefarḇuk kwar sya, sino sifrar sibur siswasi oroḇaido oso imar. (Yehezkiel 24:18; Hosea 3:1) Romawa sya sisouser faro Allah ma sinan sesya ḇa, ma ḇeḇyeḇa wer iso sino sisasyar si ro sidang. Rupa ra Samuel roma ḇyesi, sima sfarmyan ḇe Yahwe I kuker nyan ḇepyum ḇa. Ma snar  sasar Daud ifrur faro Bat-syeba i, nafnai fa kina ḇyesi sismai kandera nabor. (1 Samuel 8:1-3; 2 Samuel 12:11) Roi beradine kam nun raryaḇ oḇa mboi nafnai saneso ma kandera nabor.

Rarirya kako, fafisu ono na jadi fa kuf fararur fararmyan ḇe Yahwe pdef ḇa kukro koduf marḇak ḇaido komamwarek karyer koḇesi ḇeduf sya. Oroḇaido fararwei isya ro Yahwe organisasi Ḇyedi. Naek srar ḇerir fararur fararmyan sena kwar soḇe smander kaku faro raryaḇ sismai ro fafisu sfarmyan anya.

Kofawi snai kwar raryaḇ ḇeramuma ro roi anna nakain fyoro ḇa. Inja, kosmai samswen mboi na bisa koryaḇ pdef ke? Imboḇae, kukro Samuel i, Daud i, ma ḇesesya sismai samswen mboi raryaḇ sena napromes ḇa.

Yesus fyawi rosaiso raryaḇ ḇekaku ani. Refo ikofenḇair ḇe ko snar Yesus ’iryaḇ ro [Yahwe] ḇarpon Ḇyedi swaf nakam’ rofyor dado ḇe supswan ine ḇaime. (Amsal 8:30) Mboi, rofyor ryo supswan ine kwar, fafisu ono ismai samswen ḇemarḇak kaku. Imbape, Yesus iryaḇ pdef fa ifrur Kmari imarisen. (Yohanes 4:34) Mboi, moḇsa ḇyerai rofyor fanam imbe imar ya? Refo doḇe, ”Ḇyefandun ḇa imar ro [ai kandera] imnis roi oso ḇefrur mamyai. Iswarepen monda marisen nari ḇyaḇir ro ḇarpurya.” (Ibrani 12:2) Inja, na kun farkarkor nabor ro roi risuru Yesus ikofen ḇekur raryaḇ ḇekaku ya.

Swaf oso, manfamyan ri 70 skaḇer ḇe Yesus i fyor simnai ro fararur ḇaḇeḇaryas ya. Siryaḇ fafayaḇa kukro sifrur roi nayafa kam, isyadi wer siyaw rur ḇemaḇak sya. Mboi, Yesus ikofen yoḇ si, ”Mkoryaḇ awer snar rur ḇemaḇak ansi skunem faro mko, mboi mkoryaḇ snar snonsnon mkoḇena neḇefas epen ro syap ḇero boiyaswaya.” (Lukas 10:1-9, 17, 20) Imbo, Yahwe marisen Ḇyena fyandun syadi ma nun raryaḇ ḇeba syadi ro fararur rosai monda.

Ro swaf ḇese, rofyor Yesus fyarkor kawasa ḇebor, bin Yahudi oso imarisen kaku faro Yesus farkarkor ḇyena, inja ikofen ḇo doḇe  nari Yesus snari ḇyeaski bose snar nya i ḇe romawa ḇyedi. Mboi, Yesus kyarem i, ”Askiya siso ḇemnaf Allah wos ḇyena ma ḇeḇeuserna.” (Lukas 11:27, 28) Komanen romawa koḇesi ido nari nafrur fa koḇeaski. Mboi, roi ḇeḇuk raryaḇ ḇekain fyoro iso kosouser faro Yahwe I ma kona wis ḇepyum kuker I. 

Roi ḇefrur fa koryaḇ kaku iso komam Yahwe imarisen faro ko. Isyadi wer, rofyor samswen na nkur ko, na dun raryaḇ ine bur ko ḇa. Ḇekaku ya, fyor farawrowes nkur ko mboi kosusu ḇa, nari raryaḇ koḇena nsambraḇ syadi wer. (Roma 5:3-5) Yahwe ḇyuk kako rur ḇesren ḇe ko insama kokyar faro I, kukro kakyar iso roi oser ro bon rur ḇesren ya. (Galatia 5:22) Nane nafrur ko fa kofawi rosai ḇefnai fa Mazmur 64:10 doḇe, ”Snonkaku ḇenapes nari siryaḇ snar Yahwe I”.

Roi nane nfasnai kako roi ḇefrur fa Diana ma John suryaḇ monda rofyor susmai samswen. Diana doḇe, ”Raris roma mkun sinan ḇyesuya sukadaunwarek i, Yahwe kyadaunwarek aya.” Ikofen wer, ”Yamam mboi Yahwe ḇyebarakas aya kuker ifrur fa yakir yaḇaryas pdef kuker marisen.” Rosai ḇefnoḇek John i fa iryaḇ pdef ma imyaren kaker ro fararur ḇesren fyor ryir fararur pengawas ḇyeja? Doḇe, ”Ro taun 1998, yasmai fararur fa yaḇuk farkarkor ro Sekolah Pelatihan Pelayanan. Ine nafrur fa yamyaren syadi fa yafarkor ro mankundaya.” Doḇe napyan syadi ḇe i ma swari fa sufrur fararwei kukro sumarisen faro fararur rosai monda Yahwe ḇyuk faro su na. Ikofen wer, ”Nufafko ro fararur nuḇenane ḇaḇeri.”

Fawar nabor ro naek srar sya naisya nfasnai snar wos ḇero Mazmur 64:10 nkaku ḇeri. Rupa ra, imbeswa oso sufarmyan ro swaf taun ri 30 syadi ro Betel Amerika Serikat. Ḇarpur muma, susmai fararur fa sufarmyan ḇe perintis istimewa. Suyoḇe, ”Kobur roi komarisen kaku na ido nari koḇesneso ḇae, mboi koḇesneso isof fyoro awer”. Rofyor suraro fararur ḇebabo suḇena kwar, suḇaryas kayam warpu naek srar sya. Sukofen kako radine, ”Nuḇenadi ḇo nuyap roi kasun na kako. Fyor numam Yahwe kyarem nadi nuḇena, nusambraḇ ma nuryaḇ kaku. Fyor nufyafer kwar ro sidang, manḇaryas sino sakḇe perintis randak, ma nusmai barakas isoine snonkaku risuru sufarkor pyum Refo ya.”

Kakuḇae, na koryaḇ ro fafisu nakam ḇa. Fafisu ono kosmai roi ḇefnai fa koḇesneso. Mboi, Yahwe ḇyuk kakyar ḇe ko ro wos ḇero Mazmur 64:10. Rofyor koḇesanekar, kokyar rosai monda ḇekur ko mboi kosouser pdef ido, ’nari koryaḇ snar Yahwe I’. Bisa kokara mura kako fafisu Yahwe asas Ḇyena kuker ”farsyos ḇebabo ma supswan ḇebabo” ndarirya kaku. Snonkaku syakam nari sinapes ma nari ’simarisen ma siryaḇ isof fyoro’ kukro Yahwe marisen Ḇyena kam ndarirya kwar.​—Yesaya 65:17, 18.

Kwarapan roi nane kada. Nari koduf ḇaḇeri ma kosambraḇ kaku fyor kokḇok ro arwo na. Roi ḇefrur fa koḇesneso ro fafisu naiwara, nari nafrur sneso ko ḇa kwar. Yahwe ḇyeasas ḇo doḇe ’roi ḇebor ḇero fafisu naiwara nari koswarepen na werḇa, ḇaido nsae ro kosnesna werḇa’. Nari kosrow kaḇer kuker snonkaku koswar kaku ḇemar kwar sya ma koḇaḇir raris inai ḇeumur taun ri 12 Yesus ḇyawes ani sinan ḇyedi. Fafisu ya, ”Kawasa ḇero diya nansya kam sikandor fafaya ḇa.” (Markus 5:42) Raposa, nari snonkaku syakam ro supswan ine ḇesiper sinapes kaku ma ”siryaḇ snar Yahwe I” isof fyoro-fyoro.