Ro fawar ḇero Ulangan 22:25-27, nasnai kaku snon ani ifrur sasar kwar. Inja sasoser anya imbe fyasnaiḇair ḇa snon ani syasar ke roḇa. Ḇape, fandun ro sasoser ani iso imbe fyasnai kaku binkbor ani ima syasar ḇa. Komam mnuk-mnuk ḇefesepen kuker mnuk naine.

Mnuk-mnuk ḇepon nefawarḇair snon oso ”ro kota” denfus binkbor oso sapsasori kwar. Snar binkbor ani sapsasori kwar faro snon oso, smam binkbor ani fyakawin kwar. Inja, snon ani ifrur zina kwar. Rariso kuker binkbor anya? ”Fafisu ryo kota ani dar naba fa dor fafnoḇek ḇa.” Binkbor ani dar naba kada, snonkaku sya na srower ma sifnoḇek i. Ḇape, ifrur na ḇa inja dakfrur zina kako. Rarirya, smam sufrur sasar kwar.​—Ul. 22:23, 24.

Ulangan 22:25-27 nfasnai fafisu ḇeḇese: ”Ḇape rofyor snon ani isrow bin oso ro maper, bin ḇeyapsasori kwar faro snon oso, mura snon ani kuker rarmomen idif ma iraroi ido, fandun fa mkomun snon ani fa imar. Ḇape mkofrur roi oso ḇe bin ani awer, snar ifrur sasar ḇa ḇefrur i fa isyus ismai samamyai marmar ya. Parkara ine imnis kuker fafisu snonkaku oso myun min ḇyedi fa imar. Snon ani isrowi ro maper ma bin ani dar naba dor fafnobek kwar mboi ono ḇefnoḇek i ḇa.”

Ro fafisu ḇeradine, mankara sya sun kakara oser snar bin ani ”dar naba dor fafnoḇek kwar mboi ono ḇefnobek i ḇa”. Inja smam ifrur zina ḇa. Ḇape, snon anya smam ifrur zina snar ”kuker rarmomen idif ma iraroi”, bin sapsasori kwar ani.

Inja, fandun ḇepon ro sasoser ani iso infa fyasnaiḇair binkbor anya syasar ḇa, mboi sasoser ani dapḇair kako snon ani syasar snar ḇyeraro binkbor ani kwar ma ifrur zina. Kokyar kaku ro fafisu ḇeradine mankara sya nari ”sikukeḇ kuker kakaku” imnis akurfasna ḇesnaibos Yahwe ḇyuk ker na.​—Ul. 13:14; 17:4; Kel. 20:14.