1-2. Rosai kofarkor ro Angelito fawawar ḇyedi?

SINAN ḇesuya Saksi Yahwe suirya ke? Rarirya ido, waswarepen naḇye snar sufanam kuker Yahwe kyurfasnai ḇa na wakfanam kuker I kako. Sinan koḇesya sfarmyan ḇe Allah ke roḇa, ko oser-ser fandun fa kona wis ḇaido ḇaḇebati kuker Yahwe I.

² Kokarapan fawawar ro naek oso snori Angelito. Kina ḇyesikam Saksi Yahwe siri. Imbape, fyor ḇye romawa babo kaker, ḇyaḇir ima fyanam kuf kuker Allah I ḇa. Ikofen kaku, ”Ayama yafarmyan ḇe Yahwe snar yasowanan kina yesi monda.” Ḇape, Angelito dun snemuk fa iwasya myaren Refo ma kyarauserna. Ḇyenadi faswef faro Yahwe I kako. Rosai bon ya? Angelito doḇe, ”Yafawi nyan oser monda infa yafanam syadi kuker Kma koḇedi, Yahwe, isoine yaḇesewar kaku fa yamambir I.” Angelito fawar ḇyedine nun fakfuken: Rosai ḇeḇese ro kofawi Yahwe ma komambir pyum I? Ma rosai fandun fa kofrur ya insama komambir pyum Yahwe I?

3. Rosai ḇeḇese ro kofawi Yahwe ma komambir pyum I?

³ Imbude na kokara ḇo koḇo kofawi Yahwe I kwar snar kofawi snonsnon Ḇyedi ḇaido roi ḇeḇeso ikofen ma ifrur na. Ḇape, insama komambir pyum Yahwe, fandun fa kofrur roi ḇesena wer. Fandun fa koḇuk swaf fa kofarkor ḇekur Yahwe ma rari ḇepyum Ḇyena. Rarirya ido, na kofawi roi ḇeḇefnai Yahwe ikofen ḇaido ifrur roi oso.  Nane nafnoḇek kofa kofawi na Yahwe imarisen faro rosai kokara ḇaido kofrur na ke roḇa. Fyor kofawi rosai Yahwe imarisen fa kofrur na ido, fandun fa kofrur na beri.

4. Rofyor kokarauser fawar ḇekur snonkaku ḇenapes ḇa sfas ro Refo sya, rosai na kokyar ya?

⁴ Snonkaku ono sisya skoryae ko snar kokinfir fa kofarmyan ḇe Yahwe. Ma fafisu koryur randak kuker Yahwe kawasa Ḇyesi, spampum ko syadi wer. Ḇape, kokyar kaku faro Yahwe ido, nari ipok ibur koḇa. Kayaryar koḇenane nḇe knam ro ḇaḇebati ḇekain fyoro kuker I. Kaku ke na bisa komambir pyum Yahwe I? Imbo! Refo fyasnaiḇair snonkaku ḇenapes ḇa kako bisa sḇebati kuker Allah. Imnis raris Moses ma Raja Daud su. Nari kawos nyan ḇepyum suḇena, ma kokarem fakfuken risuru suine: Moḇsa sumambir Allah I rai? Ma farkarkor rosai kun ro fawar suḇena?

5. Rosai Moses kyinfir fa ifrur ya?

⁵ Moses kyinfir fa fyarmyan ḇe Allah. Fafisu ḇyeumur taun ri 40, Moses kyinfir fa dakso warpu Allah kawasa Ḇyesi, snonkaku Israel sya. Moses imewer sap i ḇe ’romawa ro imboki wairek Masir’. (Ibr. 11:24) Imarisen ryir nasan ḇekaki anya. Moses ifawi Firaun na imsor i fafayaḇa snar kyinfir fa ibriwarek snonkaku Israel, ḇeḇewomen ro Masir. Ro fafisu ani, Firaun ima raja ḇepoik kaku ma snonkaku Masir sya smam i ḇe dewa. Inja, rosai Moses ifrur na nfasnai ikyar kaku faro Yahwe. Kayaryar ḇyenane nḇe knam ro ḇaḇebati ḇyedi kuker Yahwe fa kyain pdef ro rasras kankenem Moses ḇyedi.​—Ams. 3:5.

6. Rosai kofarkor ro Moses i?

⁶ Rosai farkarkor ya ḇe ko? Raris Moses, kokame fandun fa kofrur snemuk: Kokinfir fa kofarmyan ḇe Allah ma kakso warpu kawasa Ḇyesi ke? Insama kofarmyan ḇe Allah, na fandun fa kobur roi ono. Oroḇaido snonkaku ḇemambir Yahwe I ḇa sya na sembroḇ ko. Ḇape, kokyar faro Kma koḇedi ro nanki ido, kofawi kaku nari ifnoḇek ko!

7-8. Rosai Moses fyarkor pdef fa ifawi na?

⁷ Moses fyarkor pdef fa ifawi Yahwe rari Ḇyena ma ifrur marisen Ḇyedi. Rofyor Yahwe dor Moses i fa dun er Israel fa sisaebur Masir, rya imkak kero ma ikofen ker ḇe Yahwe ima nya samambraḇ oḇa. Yahwe kyarem Moses i kuker fyasnai sawarwar Ḇyena faro i. Yahwe ifawi mnis moḇsa Moses ḇyabir raya ma ifnoḇek i. (Kel. 4:10-16) Bon ya, Moses imkak ḇa fa ḇyaryas anun samamyai ḇerama ro Allah faro Firaun. Mura Moses myam papoik ḇeba kaku ro Yahwe rofyor fyaspar snonkaku Israel sya mboi myunbos Firaun fnoḇek sordade ḇyesi ro Soren Ḇerik.​—Kel. 14:26-31; Mz. 136:15.

⁸ Moses dun er Israel fa sisaebur Masir raposa, sisasurem ker kuker roi nabor. Ḇape, Moses myam Yahwe ḇyekaḇaḇaḇ kaku faro er imkei si kwar ro ḇaḇewomen ani. (Mz. 78:40-43) Moses myam kako Yahwe fyasnai sne ḇerun kaku snaro imarisen fyadwer snemuk Ḇyedi fyor Moses dor kaku faro I.​—Kel. 32:9-14.

9. Rosai Ibrani 11:27 ikofen ya ḇefasnaiḇair Moses ḇyebati fanam kuker Allah YahweI?

⁹ Fafisu er Israel sisaebur Masir  ramnai, Moses nya ḇaḇebati ḇefanam syadi kuker Yahwe I. Rya myam kwar Kmari ḇero nanki. (Wasya Ibrani 11:27.) Refo fyasnaiḇair Moses fyanam kaku kuker Yahwe. Refo doḇe, ”Yahwe dawos beri kuker Moses i, imnis ra snonkaku oso dawos kuker bati ḇyedi.”​—Kel. 33:11.

10. Insama komambir pyum Yahwe I, rosai fandun fa kofrur ya?

¹⁰ Rosai farkarkor ya ḇeko? Insama komambir pyum Yahwe I, fandun fa kofarkor rari ḇepyum Ḇyena ma kofrur marisen Ḇyedi kako. Baboine, Yahwe imarisen insama ”snonkakusya kam sisma koreri ma sifawi ro ḇaḇenapnapesya”. (1 Tim. 2:3, 4) Inja, nyan oser kofrur Allah marisen Ḇyena iso kofarkor snonkaku sya fa sifawi Yahwe I.

11. Rofyor kofarkor snonkaku ḇesesya ḇekur Yahwe I, rariso nane nafnoḇek ko fa komambir pyum I?

¹¹ Fafisu ono, na komambir pyum Yahwe rofyor kofarkor snonkaku ḇesesya ḇekur Yahwe I. Imnis raris, fyor Yahwe fyarkin ko fa kosrow snonkaku ḇena sne ḇenapes sya, na komam ro mankunko Yahwe ima isawarwar kaku. (Yoh. 6:44; Kis. 13:48) Fafisu ḇefarkor Refo sya sfadwer kenem ḇeḇyeḇa sena ma sifasnai kenem ḇepyum ido, komam papoik ro Wos Refo fyararur ro si. (Kol. 3:9, 10) Ma komam Allah kaḇaḇaḇ Ḇyedi fyor ḇyuk swaf ker ḇe snonkaku ḇebor sya fa sfarkor Refo ma sismai fasaspar.​—Rm. 10:13-15.

12. Ro Keluaran 33:13, rosai Moses dor ro Yahwe, ma rosai ḇefnai ya?

¹² Moses ḇyesyowi ḇaḇebati ḇyedi kuker Yahwe. Yahwe ḇye Moses i fa ifrur mujisat ḇeba kaku, iso ḇefnai fa Moses myambir kaku Yahwe. Rarirya mboi, Moses dor fafnoḇek ro Yahwe kuker sne ḇerun insama myambir pyum I syadi wer. (Wasya Keluaran 33:13.) Fyor ya, Moses umur ḇyeja taun ri 80 kwar. Ḇape ifawi fandun kaker fa fyarkor nabor kuker Kma ḇesaswar ḇyedi ḇero nanki.

13. Nyan oser rosai ḇefasnaiḇair koḇesyowi ḇaḇebati koḇena kuker Allah I?

¹³ Rosai farkarkor ya ḇe ko? Kofarmyan ḇe Yahwe fyoro kwar ke roḇa, fandun fa koḇesyowi ḇaḇebati koḇena kuker I. Rariso na kofasnaiḇair koḇesyowi ḇaḇebati koḇena kuker Allah I? Nyan oser ya iso koḇenadi.

14. Rosai ḇefnai fandun fa kawos ḇe Yahwe ḇesya kwar ro nadi?

¹⁴ Komarisen koḇebati fanam kuker snonkaku oso ido, fandun fa kawos ker kuker i. Rarirya kako, komarisen kakḇebati fanam kuker Allah ido, kawos ḇe Yahwe ḇesya kwar ro nadi. Komai awer fa kokofenḇair rosai kokara ma koḇaḇir na. (Ef. 6:18) Krista, ḇeḇarek ro Turki, ikofen, ”Fyor yakofen roi yaḇaḇir na ro nadi ma yamam Yahwe ifnoḇek aya ido, nafrur fa yaswar ma yakyar syadi faro I. Fafisu yamam moḇsa Yahwe kyarem nadi ayena rai nafnoḇek aya kwar fa yamam Yahwe ḇe Kma ma Bati yedi.”

15. Rosai Yahwe ikofen ḇekur Daud i?

¹⁵ Rofyor Raja Daud ḇyeḇeaḇen ya, sinan ḇyesuya ma snonkaku ḇero ris ḇyedi sima sisyom ḇe Yahwe. Ḇape, Daud isowanan kina ḇyesya monda ḇa. Daud syewar kaku fa ḇyebati kuker Yahwe, ma  Yahwe iswar kaku i. Yahwe mankundi ikofen Daud ima ”snon oso ḇefrur sneprei [Allah]”. (Kis. 13:22) Moḇsa Daud ḇyebati fanam kaku kuker Yahwe I rai?

16. Rosai Daud fyarkor ḇekur Yahwe fafisu myam ḇraur Ḇyena?

¹⁶ Daud fyarkor ḇekur Yahwe ro ḇraur Ḇyena. Rofyor Daud byabo kaker, ḇyuk oras ḇyena fa fyarandows kmari domba ḇyesi ro maper na. Imbude ro swaf anya iwasenkara Yahwe ḇraur Ḇyena. Imnis raris, ro roḇ ya Daud myam mura ḇe farsyos iyaswa ḇo myam mak sibor sisya monda ḇa, mboi Daud dakfawi mnis kaku Allah, Manḇefrur mak ansi, rari-rari Ḇyena. Daud sneri idif i fa fyas, ”Nanki fyarḇair Allah fababa Ḇyena; Farsyos ḇyaryas ḇraur ḇramin Ḇyena.” (Mz. 19:1, 2) Oso wer, fafisu Daud iwasenkara moḇsa Yahwe ifrur snonkaku kuker nyan ḇepyum kaku, Daud ḇyaḇir Allah ima ifawinanem kaku. (Mz. 139:14) Rofyor Daud iwasenkara Allah ḇraur Ḇyenakam, ḇyaḇir ima ifawi royoḇaḇeri ro ḇarpon Yahwe.​—Mz. 139:6.

17. Rosai kofarkor rofyor kowasenkara Allah ḇraur Ḇyena?

¹⁷ Rosai farkarkor ya ḇe ko? Swewar fa wamarisen faro Allah ḇraur Ḇyena. Buk oras bena fa mamepen ma manen kaku supswan ḇepduk Yahwe ifrur ine. Ro rasras na, mampan Allah ḇraur Ḇyena raris rokaker na, aiwan, ma snonkaku sya. Kwarapan rosai wafarkor ro si. Rarirya, ras ḇe ras na wafanam syadi ḇe Kma ḇesaswar koḇedi. (Rm. 1:20) Ras nenande mura, na ḇaḇir saswar bena faro Yahwe nasambraḇ syadi.

18. Imnis ḇefas ro Mazmur 18, rosai Daud ifawi kaku na?

¹⁸ Daud ifawi kaku Yahwe ifnoḇek i. Imnis raris, fyor myamwarek kmari domba ḇyesi insama singa ma beruang smun si awer, ifawi na syambraḇ fa myun aiwan ḇeyan ḇepek suine snar farfnoḇek ro Yahwe. Fafisu ikafyo Goliat, sordade ḇeba mantar ani, Daud myam snai kaku Yahwe isya fyarkin i. (1 Sam. 17:37) Ma fafisu ifrarbur Raja Saul ḇemsori anya, Daud ikofen kaku Yahwe iso ḇefaspar i kwar. (Mz. 18, superskripsi) Daud nya sne ḇekaki ido, na kyara ifrur roi anna kam snar samambraḇ mankun ḇyedi. Ḇape, Daud nya sne ḇerun, inja ifawi kaku Yahwe ifnoḇek i ro kankenem ḇyedi.​—Mz. 138:6.

19. Rosai kofarkor ro Daud i?

¹⁹ Rosai farkarkor ya ḇe ko? Na kor ḇe Yahwe ro nadi monda ḇa. Fandun fa komam fafisu risai ma moḇsa Yahwe ifnoḇek ko raya. Kona sne ḇerun ido, nari kofawi kaku kosambraḇ ḇa fa kofrur roi nakam ro mankunko. Kofawi kako Yahwe na ifnoḇek ko fa kofrur rosai kosambraḇ fa kofrur na. Isaac, manbesrar oso ro Fiji ḇefarmyan ḇe Yahwe fyoro kwar, ḇyaḇir kaku roi ine. Doḇe, ”Fafisu yaswarepen mura ḇe rasras naiwara fyor yafarkor randak Refo isof ro kirine, yamam kwar moḇsa Yahwe ifnoḇek aya raya. Ine nafrur fa yafanam syadi kuker Yahwe I.”

20. Rosai ḇefrur Daud i fa fyanam syadi kuker Yahwe, ma rosai kofarkor ro Daud i?

²⁰ Daud iso mnis Yahwe rari Ḇyena. Yahwe ifrur ko ma ḇyuk samambraḇ ḇeko fa koso mnis rari-rari Ḇyena. (Kej. 1:26) Kosewar fa komambir Yahwe rari  Ḇyena ido, na napyan syadi ḇe ko fa kakfasnai na kako. Daud myambir pyum Yahwe, inja jadi fa daksfasnai Yahwe sawarwar Ḇyena rofyor ifnoḇek ḇesesya. Fafisu oso Daud ifrur sasar Bat-syeba ma ifrur aw insama Bat-syeba swari ḇyeḇemun, inema sasar ro ḇarpon Yahwe. Ḇape, Yahwe fyasnai sawarwar ma ḇyuk ampun faro Daud i. (2 Sam. 11:1-4, 15) Fafisu ḇyeraja ro Israel, kawasa ḇyesi siswar faro Daud i snar fyanam syadi kuker Yahwe. Osower ido, Yahwe ḇye Daud i fa fyasnai nyan ḇepyum faro raja-raja ḇese ḇero Israel fa sisona.​—1 Raj. 15:11; 2 Raj. 14:1-3.

21. Imnis ḇekofen ro Efesus 4:24 ma 5:1, kosewar fa koso mnis Allah rari Ḇyena ido rosai fainda ya?

²¹ Rosai farkarkor ya ḇe ko? Fandun fa ’koso asuser Allah’. Kofrur na ido, nari kosmai fainda ma nafnoḇek ko fa komambir pyum Yahwe syadi wer. Oso wer ido, kakfasnaiḇair koinema Allah romawa Ḇyesiko.​—Wasya Efesus 4:24; 5:1.

22-23. Kofrur rosai kofarkor kwar ḇekur Yahwe ido, barakas rosai kosmai na?

²² Insanja kawos kwar ro farkarkor ine, Yahwe fyasnai rari Ḇyena ḇeko roro ḇraur Ḇyena ma Wos Refo. Syap ḇepyum ine iser fawar ro Allah manfamyan Ḇyesi ḇefasnai kenem ḇepyum fa kosona, raris Moses ma Daud su. Yahwe ifrur ḇar Ḇyedi kwar. Inja, fandun fa kofrur ḇar koḇena kuker kofarkor nabor syadi ḇekur Yahwe I.

²³ Na kopok komnai fa kofarkor ḇekur Yahwe I ḇa. (Pkh. 3:11) Ḇape, ḇefandun syadi ya iso barbor ro fawawi koḇena ḇekur Yahwe ḇa, mboi rosai kofawi kwar kofrur kakuna. Kofrur rarirya ma kosewar fa komambir pyum Kma ḇesaswar koḇedi ido, nari fyanam syadi faro ko pdef. (Yak. 4:8) Roro Refo, Yahwe ḇyuk kakakyar ḇe ko, snonkaku ḇesewar fa ḇemambir pyum I sya nari ipok ibur si ḇa.