”Mkokofen Kasumasa ro Roi Ḇeḇor Kam”
MANKUNDAW ḇaḇir Auma snonkaku ḇefawi ḇekofen kasumasa ḇesya kwar ke? Kokame fandun fa kokara fakfuken ine. Refoya ḇyardi ro fafisu koḇedine, snonkaku ḇebor sya ”sifawi sikofen kasumasa ḇa”. (2 Tim. 3:2) Imbude ras oso wasrow kwar kuker snonkaku ḇekara snonkaku ḇese fandun fa sifrur ḇaido sḇuk roi ono faro si. Snonkaku ḇeradine sya na skara fandun ḇa fa sikofen kasumasa faro roi sismaina. Kakuḇae, na wamewer wafanam kuker snonkaku ansi.
Ḇape, Yahwe kawasa Ḇyesiko koḇese snaro Refo ikofen ḇe ko fa ’kokofen kasumasa’. Fandun fa ’kokofen kasumasa ro roi ḇeḇor kam’. (Kol. 3:15; 1 Tes. 5:18) Kaku ya, kofawi kokofen kasumasa ḇesya kwar ido, nari kosmai fainda ḇeḇeso. Rosai rirya?
WAKOFEN KASUMASA NAFRUR FA ḆAḆIR SISWAR AU
Roi ḇepon ḇefrur fa komarisen kokofen kasumasa ḇesya kwar iso snar nafrur fa koḇaḇir siswar ko. Kwarapan: Rofyor snonkaku ḇese imarisen ifrur roi oso ḇe Au ido, ine kyurfasnai fyandun kaku Au ma kyara wasyus fa wasmai na. Ḇaḇir roi ine ma wakofen kasumasa ido, na kwara siswar Au. Rya iso Rut ḇyaḇirna fafisu Boaz fyasnai snemura ḇe i. Rut na ikofen kasumasa kaku faro ḇaḇenaḇye Boaz fyasnai ḇe i na, ma Rut na kyara siswar i. (Rut 2:10-13) Inja, kokofen kasumasa ḇesya kwar ido, nafrur fa koḇaḇir siswar kaku ko, ma snonkaku kokofen kasumasa yoḇ si nari sakmarisen kako.
Ḇepon kaku, fandun fa kokofen kasumasa faro Allah. Fyorno ido na ḇaḇir ro mankundaw Allah ḇyuk ḇesya kwar barakas rohani ma jasmani ḇebor syadi. (Ul. 8:17, 18; Kis. 14:17) Wawasenpan barakas Allah ḇyuk kwar ḇe Au ma snonkaku waswar sya. Kwara fafyai roi nane monda awer. Wawasenkara Allah ḇaḇesnemura Ḇyedi ido, nari waswar syadi I ma wakyar kaku ima iswar kaku ma ḇyesyowi Au.—1 Yoh. 4:9.
Kokarauser Allah snemura Ḇyedi ma barakas byukna monda ḇa, ḇape kokofen kasumasa faro Yahwe snar ḇaḇenaḇye Ḇyedi. (Mz. 100:4, 5) Siya soḇe ”kafkofen kasumasa nafrur snonkaku sya fa sḇeaski syadi”.
WAKOFEN KASUMASA NAFRUR FA WAFANAM SYADI KUKER ḆESESYA
Ḇeseya wer, kokofen kasumasa nasambraḇser ḇaḇebati koḇena kuker ḇesesya. Snonkaku koine komarisen sesyowi ko. (Rm. 16:3, 4) Osower ido, snonkaku ḇefawi ḇekofen kasumasa ḇesya kwar na imarisen syadi fa ifnoḇek ḇesesya. Sḇaḇir kwar ḇaḇenaḇye ro snonkaku ḇesesya ma nadif si fa sakfasnai na kako. Ma rofyor sifnoḇek snonkaku ḇesesya, na sḇeaski syadi. Yesus doḇe, ”Ipyum syadi ro koḇuk ya ro kosma ya.”—Kis. 20:35.
Robert Emmons, profesor ro University of California ifrur penelitian ḇekur snonkaku ḇekofen kasumasa. Ikofen, ”Insama bisa kokofen kasumasa, fandun fa kofawi kaku kofandun fafnoḇek ro snonkaku ḇese. Fafisu ono koḇuk, nono wer kosmai.” Kofawi kwar, insama kokenem kawan ma kona aski, kofandun snonkaku ḇesesya sisaramper ko ro roi ḇebor. Imnis raris, na sḇuk roḇean ḇe ko ḇaido smam ko fyor kodufe. (1 Kor. 12:21) Snonkaku ḇefawi ḇekofen kasumasa na ḇyesyowi rosai snonkaku ḇesesya sifrur yoḇ i na. Inja, Au ido wakofen kasumasa fafisu snonkaku ḇese sifrur roi oso ḇe Au ke?
WAKOFEN KASUMASA NAFRUR FA NWA KAKARA ḆEMNIS
Roi ḇesewer ḇefrur fa kokofen kasumasa isoine nafrur fa kona kakara ḇemnis mboi kakara ḇemnis ḇa naisyaḇa. Swaruser koḇena nya samambraḇ fa kyinfir. Samambraḇ nane nafrur fa bisa kokarauser roi ono ma kopampun roi ḇesena. Oroḇaido, nari komam monda faro roi ḇemnis na ma komewer faro roi ḇemnisḇa na. Komarisen kaku kokofen kasumasa ido, roi ḇeḇye nabor bisa komam na, ma nane nafrur fa kokofen kasumasa syadi wer. Kokarauser pdef roi ḇefrur fa kokofen kasumasa ido, nari napyan ḇe ko fa kofrur Paulus ananun ḇyedine: ”Mkoryaḇ ḇesya kwar snar Manseren!”—Flp. 4:4.
Kofawi kokofen kasumasa na nafnoḇek ko fa kopampum kakara ḇemnisḇa na. Fafisu kokofen kasumasa, na kopok kofafayaf ḇa, koḇesneso ḇaido komsor ḇa. Snonkaku ḇefawi ḇekofen kasumasa na siswar syadi pipi ma arasai na ḇa. Skara roi sismaina namnis kwar ma simewer sisewar nabor syadi wer.—Flp. 4:12.
WASWAREPEN BARAKAS WASMAI NA KAM!
Snonkaku Kristen koine, kofawi Setan imarisen ifrur fa koḇesanekar ma koḇesneso snar samswen ḇekur ko ro ras-ras ḇepupes ine. Na Setan imarisen kaku fyor kona kakara ḇesasar ma kosasurem. Kenem ḇeradine nafrur samswen ḇe ko fa koḇaryas ankankinem ḇeḇye. Imbape, kona Allah rur Ḇyedi ido na kofasnai kasumasa. Napyan ḇe ko fa kofasnai raryaḇ, iso ndramuma ro komam roi ḇepyum Allah ḇyuk ḇe kona ma kokyar faro Allah asas Ḇyena.—Gal. 5:22, 23.
Yahwe manfamyan Ḇyesi disau ido, na nwa kakara oser kuker roi kawos ḇekur kokofen kasumasa ine. Ḇape, imbude ḇaḇir napyan ḇa fa wafasnai na. Mboi ḇesanekar awer. Wakyar, nari nwa ma fasnai pdef rari ine. Nyan ya rariso? Ras ḇe ras, buk swaf fa kwarauser roi nari wakofen kasumasa faro na. Wafrur rarirya pdef ido, na wafawi wakofen kasumasa ḇesya kwar. Nari ḇeaski syadibur snonkaku ḇemam monda faro samswen sismai na. Kwarapan roi ḇepyum Allah ma snonkaku ḇese sifrur kwar ḇe Au na, ḇesambraḇser ma ḇeyun marisen ḇe Au. Iba syadi bisa fasepen na ro syap oso. Ras ḇe ras, fasepen roi risuru ḇaido kyor ḇefrur fa wakofen kasumasa ro ras ani.
Snonkaku ḇeḇeso ḇefarkor kaku roi ine soḇe ”kokofen kasumasa ḇesya kwar ido na nefadwer nyan kakara koḇena, ma na kona kakara ḇemnis ro kankenem koḇena”. Snonkaku ḇefawi ḇekofen kasumasa iso snonkaku bena aski kaku. Inja, waswarepen kada barakas wasmai na kam, wamarisen faro roi ḇebor kam wasmai na, ma wakofen kasumasa pdef. Mamkyof awer roi ḇepyum wasmai kwar na. Ḇape, ’kokofen kasumasa ḇe Yahwe, snar ima ifrur pyum’. Imbo, ’kokofen kasumasa ro roi ḇeḇor kam’.—1 Taw. 16:34; 1 Tes. 5:18.