1. Fakamamar rosai Yahwe ḇyuk ḇe sinan sya?

YAHWE ifrur snon ma bin ḇerandak, ma Ḇyesu fa suḇe imbeswa. Yahwe ḇyuk ḇe su marasrisen fa suna romawa. Iso ḇefnai fa Refo ikofen, ”Romawa sya siso bok ḇeramuma ro Yahwe.” (Mz. 127:3, catatan kaki) Rosai knam ro wos nane? Wasenpan bati bedi nya pipi sibor ma dor Au fa mamwarek pyan pipi ḇyesine. Moḇsa na ḇaḇir rai? Kakuḇae na wamarisen snar ikyar Au. Ḇape, ḇeḇirḇar na mamwarek pyum pipi ḇyesi ke roḇa. Yahwe, Bati ḇepyum syadi koḇedi, ḇyuk kako roi oso ḇe sinan sya fa smamwarek na, ma inema roi ḇemaeja syadi ro pipi. Yahwe ḇyuk fakamamar ḇe si fa smamwarek pyum romawa sesi insama sismai payamyum.

2. Fakfuken risai na kawos ya?

² Mansei na ḇefrur snemuk ḇe imbeswa oso na suna romawa ke roḇa ḇaido fafisu risai suḇe suna romawa? Ma rosai na sinan sya sifrur ya insama romawa sesi sikenem kuker payamyum? Kokarapan wos farkin ḇeḇeso ro Refo na ḇefnoḇek imbeswa Kristen sya fa sun snemuk kuker fawawinanem.

3. (a) Mansei na ḇefrur snemuk ḇe imbeswa oso fa suna romawa ke roḇa? (b) Wos farkin ḇero Refo rosai fandun fa kina ma bati suḇesi siswarepen na?

³ Ro er ḇeḇeso, sidif imbeswa ḇefarḇuk babo fa suna romawa fasaw. Imbude dafdif anane ndramuma ro kina suḇesi ma snonkaku ḇesesya. Jethro, * manbesrar oso ro  Asia, doḇe, ”Ro sidang, naek srar bena romawa sya sidif bena romawa ḇa sya fa sakna romawa fasaw.” Jefri, manbesrar ḇeraker Asia kako ikofen, ”Sino sisya sikofen ḇe imbeswa bena romawa ḇa, ’Muna romawa ḇa ido, mansei na ḇemamfaduru mu rofyor muḇesinan kwar.’” Ḇape, imbeswa oser-oser na ḇekinfir imbe suna romawa ke roḇa. Iso snemuk ma fakamamar suḇenairi. (Gal. 6:5) Kakuḇae, bati ma kina sesya na simarisen insama imbeswa ḇefarḇuk babo ansuya sukenem payamyum. Imbape, sikame fandun fa siswarepen imbeswa suiso na ḇefrur snemuk imbe suna romawa ke roḇa.​—1 Tes. 4:11.

4-5. (a) Rosai roi risuru fandun fa imbeswa ḇekinfir fa suna romawa suyawos ḇepon na? (b) Swaf ḇepyum risai na suyawos ḇekur roi anine? Fasnaiḇair pan.

⁴ Imbeswa ḇekinfir fa suna romawa fandun fa suyawawos fakfuken risuru ḇefandun kaku suine: Oser ya, fafisu risai sumarisen fa suyakna romawa? Ḇesuruya, na suna romawa rifis? Swaf ḇepyum risai na suyawos ḇekur roi anine? Ma rosai ḇefnai fa roi risuru suine sufandun kaku?

⁵ Fyorno ido, snon ma bin ḇekara fa ḇefarḇuk na suyawos ḇepon roi ine fyor sufakawin ḇaime. Rosai ḇefnai ya? Snar fandun fa suna karkara oser faro roi ine. Fandun kako fa sukara sufasos kwar fa suyuf fakamamar anna ke. Ḇeḇefarḇuk babo ḇeḇeso sya sun snemuk fa siwaf taun oser ke suru insape sakna romawa, snar sifawi sḇe kma ma sna ḇemamwarek romawa syama nun oras ma samambraḇ sena. Inja, skara sna romawa fasaw ḇa insama sismai swaf kaker fa sikenem ḇeḇe imbeswa resari ma sfanam syadi.​—Ef. 5:33.

6. Snar kokenem ro fafisu ḇesamswen na, rosai imbeswa ḇeḇeso skinfir ya?

⁶ Snonkaku Kristen ḇesesya skinfir fa siso nyan ro Nuh romawa ḇyeskoya ma skoswasi. Imbeswa anskoine skona romawa fasaw ḇa. (Kej. 6:18; 9:18, 19; 10:1; 2 Ptr. 2:5) Yesus ḇyukimnis fafisu koḇedine kuker ”awar Nuh”, ma komam ido koisya kokenem ro ”ras ḇepupesna” ḇefo kuker kandera nabor. (Mat. 24:37; 2 Tim. 3:1) Iso ḇefnai fa, imbeswa ḇeḇeso skinfir fa sakna romawa fasaw ḇa insama sḇuk oras sena fa sifrur nabor syadi ro fararmyan ḇe Yahwe.

7. Rariso wos farkin ḇero Lukas 14:28, 29 ma Amsal 21:5 na nafnoḇek imbeswa oso?

 ⁷ Fafisu imbeswa suyun snemuk na suna romawa ke roḇa ma na suna romawa rifis, fandun fa ’suyawof fasasos kumpan’. (Wasya Lukas 14:28, 29.) Sinan ḇefaduru romawa sesi fyoro kwar, sifawi sifandun kumpan monda ḇa fa smam pyum romawa sya isof siba. Ḇape sifandun kako oras ma samambraḇ. Iso ḇefnai fa, ipyum ya ḇeḇe imbeswa sya skarauser fakfuken nane: ’Fandun fa nuna fararur fa nufamfom fandun ro rasrasna ke? Nuna wos oser ḇekur roi nufandun kaku ro rasrasna ke? Nufararur ido, mansei na ḇemamwarek romawa nuḇesi? Mansei numarisen na ḇeawyae kaku romawa nuḇesi kakara ma kankenem sena?’ Rofyor imbeswa suyawos asuser fakfuken nane ido, susomnis wos ḇero Amsal 21:5.​—Wasya.

8. Samswen rosai na imbeswa Kristen susmai na, ma snonswa ḇesaswar rosai nari ifrur ya?

⁸ Sna ma kma fandun fa suḇuk oras ma samambraḇ suḇena faro romawa suḇesi. Rosai ḇefnai ya? Snaro romawa imarisen insama sinan ḇyesuya suswar i, ma inema roi fandun fa ismai nairi. Inja, imbeswa oso sukinfir fa sukapar fasawsaw romawa suḇesi ido, imbude samswen ḇe su fa sumam mnis fandun sena. Imbeswa ono bena romawa ḇeḇeso ḇebaḇa kaker soḇe siḇoryae rosai siḇe sikofen ma sifrur na. Sna oso na imor kaku ma ḇruri iduf ker. Nafnai jadi fa fyarkor, ḇyenadi, ma ḇyaryas mnis ḇa. Ro fananjur kako samswen fa ḇyuk swaruser ḇyena faro roi sawos ro diwa, inja ismai fainda noḇa. Kakuḇae, snonswa ḇesaswar nari syewar fa ifnoḇek swari fa fyarus romawa suḇedi, iḇye ro rum ke ḇaido ro fananjur ya. Imnis raris, snonswa oso na ifnoḇek swari fa ifrur fararur ro rum na. Syewar kaku fa ifrur pdef Nadi ro Kina insama kina ḇyesi kam sismai fainda ya. Ma kma Kristen oso nari ḇyaryas pdef fnoḇek kina ḇyesi.

9-10. Rosai fandun fa sinan sya sifrur fa sifnoḇek romawa sesi?

⁹ Moḇsa sinan sya sifnoḇek romawa sesi fa siswar Yahwe I rai? Moḇsa sikadaunwarek romawa sesi ro awyae ḇeḇyeḇa ro dunya ine rai? Komampan roi ḇeḇeso na sinan sya sifrur ya.

¹⁰ Ḇenadi wor Yahwe fafnoḇek Ḇyedi. Manoah swarisu suiso Simson sinan ḇyesuirya. Fafisu Manoah ifawi nari suna  romawa oso, dor Yahwe fyarkin su insama sufaduru pyum romawa suḇedi.

11. Rariso sinan ḇeḇeso siso mnis Manoah nyan ḇyena, neḇeyap ro Hakim-Hakim 13:8?

¹¹ Nihad ma Alma, ḇeraker Bosnia ma Herzegovina, susomnis Manoah nyan ḇyena. Sukofenḇair, ”Raris Manoah i, nuyor ḇe Yahwe fa fyarkor nu moḇsariso nuḇe sinan ḇepyum rai. Ma Yahwe kyarem nadi nuḇena ro nyan ḇebor, roro Refo, syap ma vidio, fananjur, ma kebaktian.”​—Wasya Hakim-Hakim 13:8.

12. Rosai nyan ḇepyum Maria ma Yusuf sufasnai ḇe romawa suḇesi?

¹² Fasnai nyan ḇepyum ḇe romawa besi. Rofyor wafarkor romawa besi, roi wakofen na nefandun. Ḇape, roi wafrurna nefandun syadi fa nfarkin kankenem sena. Kokyar kaku, Yusuf ma Maria su sufasnai nyan ḇepyum faro romawa suḇesya, Yesus i kako. Osower ido, Yusuf danun kina ḇyesi fa sesyowi ḇaḇesamsyom faro Yahwe. (Ul. 4:9, 10) Sasoser osoḇa ro Taurat ḇekofen fandun fa Yusuf dun kina ḇyesi fa sra ḇe Yerusalem fa sifrur munara Paskah ro taun nakam. Ḇape, Yusuf ifrur na pdef. (Luk. 2:41, 42) Ro Yusuf fafisu ḇyedi, kma ono sisya skara marandan ḇeradine nun fararur nabor, nafnak oras, ma nefandun kumpan sibore. Ḇape, Yusuf ima ḇyesyowi kaku ḇaḇesamsyom faro Yahwe, ma fyarkor romawa ḇyesi fa sakḇesyowi na kako. Maria kako ifawi pyum wos ḇero Refo na. Kaku beri, ro rosai ikofen ma ifrur na, fyarkor romawa ḇyesi fa siswar Allah Wos Ḇyena.

13. Rariso imbeswa oso suso Yusuf ma Maria nyan suḇena?

¹³ Nihad ma Alma, ḇeḇeyap kwar anya, sumarisen suso Yusuf ma Maria nyan suḇena. Rariso nane nafnoḇek su fa sufarkor romawa suḇedi fa iswar ma ifarmyan ḇe Allah? Suyoḇe, ”Ro nyan nukenem raya, nusewar fa nufasnaiḇair ḇe romawa nuḇedi, nkokenem imnis Yahwe farkankin Ḇyena nama napyum syadi.” Nihad ikofen wer, ”Komarisen romawa koḇesi siswar Yahwe ido, ko iso ḇepon ḇefasnai koswar I.”

14. Rosai ḇefnai fandun fa sinan sya sifawi romawa sesi sḇebati kuker mansei?

¹⁴ Wafnoḇek romawa bedi fa kyinfir bati ḇepyum. Kma ma sna fandun fa sufawi romawa suḇedi ḇyebati kuker mansei ma rosai sifrur na. Ine kyurfasnai sinan sya fandun fa sifawi romawa sesi sawawos kuker mansei roro HP ḇaido media sosial na. Snonkaku sḇebati kuker sya na sawyae swaruser ma kenem sena.​—1 Kor. 15:33.

15. Rosai sinan sya sfarkor ro Jessie i?

¹⁵ Sinan sya sifawi mnis komputer, HP, ḇaido tablet naḇa ido, rosai na sifrur ya? Jessie, kma oso ro Filipina doḇe, ”Nufawi mnis HP ḇaido tablet yaḇa. Ḇape, nufarkor pdef romawa nuḇesi fa sifawi roi ḇeḇyeḇa ro HP ḇaido tablet na.” Jessie ifawi mnis ifnak HP ḇaido tablet na ḇa, mboi idwarek romawa ḇyesi ḇa fa sḇuk na. Ikofen, ”Yakofen ḇe si insama sḇuk HP ḇaido tablet sena fa sḇukifarkor wos ḇebabo, sifrur fasasos faro fananjur, ma siwasya Refo ro ras-ras na.” Sinan disau ido, wawos kuker romawa besi roi ḇero jw.org^® ro ḇar ”Anak Muda” ḇeser ananun ḇepyum ḇekur faramrem anun ḇaido sonin ro Internet ke? Mkomam kam ma mkawawos kwar ke vidio Oras Ḇena Nabro fa Wafnak HP Monda Ke? ma  Buk Jejaring Sosial kuker Fawawinanem? * Roi nane na nafnoḇek kaku romawa besi fa sifawi nyan sḇuk pyum HP ḇaido tablet na.​—Ams. 13:20.

16. Rosai sinan ḇebor sya sifrur ya, ma rosai fainda ya?

¹⁶ Sinan ḇebor sya sḇuk swaf ḇe romawa sesi fa sḇebati kuker snonkaku ḇefasnai nyan ḇepyum ro fararmyan ḇe Allah sya. Imnis raris, Dani ma Bella, imbeswa ḇero Pantai Gading. Fyorno ido suyor pengawas wilayah fa suḇarekus si. Dani doḇe, ”Ine nun fainda bepyum ḇe romawa nuḇedi. Dakḇe perintis ma kirine ifarmyan ḇe pengawas wilayah pengganti.” Sinan Au ido, bisa wafnoḇek romawa bedi fa ismai fainda ro ḇaḇebati ḇeradine ke?

17-18. Fafisu risai fandun fa sinan sya sfarkor romawa sesi?

¹⁷ Farkor romawa besi rofyor sibaḇa kaker. Sinan sya sfarkor romawa sesi fyor sibaḇa kaker ido, na nun bon ḇepyum kaku. (Ams. 22:6) Imnis ra Timotius i, ḇefrur marandan kayam kuker Manwawan Paulus. Timotius snari, Eunike, ma kpuri Lois sufarkor pyum i ’rofyor ibaḇaya’.​—2 Tim. 1:5; 3:15.

¹⁸ Imbeswa oso ḇero Pantai Gading, John ma Paula, sufnoḇek kwar romawa riwonem suḇesi fa siswar ma sfarmyan ḇe Yahwe. Rosai ḇefnoḇek su ya? Suso mnis Eunike ma Lois nyan suḇena. Suyoḇe, ”Fafisu romawa nuḇesi sḇeḇeaḇen mura ido nufarkor beri Allah Wos Ḇyena faro si insama sikram na ro sisnesna.”​—Ul. 6:6, 7.

19. Rosai knam ro kofarkor Allah Wos Ḇyena fa nsun ro romawa koḇesya sisnesna?

¹⁹ Rosai knam ro ’farkor’ Yahwe Wos Ḇyena fa nsun ro romawa ḇesya sisnesna? Ro Ulangan 6:7, wos Ibrani sefarawena ḇe ’farkor’ kyurfasnai ḇe ’kofarkor ma koswarepenser si kuker kap kaḇerna ker’. Insama sinan sya bisa sifrur na, fandun fa sḇuk oras sena ḇesya kwar kuker romawa sesi. Fyorno ido, sinan sya sfafayaf snar sfarkor kaḇer roi ḇemnis ḇe romawa  sesi ker. Ḇape, sinan sya bisa smam inema swaf ḇepyum fa sifnoḇek romawa sesi fa sakfawi Allah Wos Ḇyena ma sisouser na.

20. Fasnaiḇair pan rariso wos ḇero Mazmur 127:4 nafnoḇek sinan sya fa sfaduru romawa sesi.

²⁰ Mambir pyum romawa besi. Mazmur 127 ḇyukimnis romawa sya kuker ikoi. (Wasya Mazmur 127:4.) Roi sḇukifrur ikoi ma baba ḇyeja imnis kam ḇa. Rarirya kako, romawa sya simnis kam ḇa. Inja, sinan sya fandun fa sisewar nyan fa sfarkor romawa sesi oser-oser. Imbeswa ḇero baboine ḇeraker Israel, ḇefaduru romawa suḇesuya fa suba kwar ma sufarmyan ḇe Yahwe, sukofenḇair ḇe ko rosai ḇefnoḇek su kwar: ”Nuḇuk farkarkor Refo kuker romawa nuḇesi oser-oser.” Kakuḇae, ḇeḇukor ro kina iso ḇeyun snemuk fandun fa ḇyuk farkarkor Refo faro romawa ḇyesi oser-oser ke roḇa?

21. Fafnoḇek rosai Yahwe ḇyuk ḇe sinan sya?

²¹ Fyorno ido, samswen ḇe sinan sya fa sfarkor romawa sesi. Ḇape, romawa sya siso fakamaman ro Yahwe sirya, inja Yahwe isya ḇesya kwar fa ifnoḇek sinan sya. Imarisen ryower ma kyarem nadi sena roro Refo, syap ma vidio organisasi fyasos kwar, ma kako fawar ḇepyum ma ananun ro naek srar ḇeḇe sinan fyoro kwar ro sidang.

22. Rosai roi ḇeḇeso ḇemaeja kaku sinan sya sḇuk ḇe romawa sesi?

²² Ono sisya soḇe fadaduru romawa ima fararur ḇembran ro swaf taun ri 20. Ḇape kaku ya, sinan syama na sḇe sinan pdef. Na sḇuk ḇe romawa sesi roi ḇeḇeso ḇemaeja kaku, raris sawarwar, oras, ma farkarkor ḇeknam ro Refo. Romawa oser-oser na sfasnai sesyowi faro roi sinan sḇuk anya ke roḇa. Imbape, naek srar ḇebor bena sinan ḇeswar Yahwe, sḇaḇir rosai Anna imbesrar ro Asia, roi ḇyaḇirna. Ikofen, ”Fyor yaswarepen mura ḇe fafisu sinan ayesuya sufarkor aya, yakofen kasumasa kaku snar sufarkin ma sufarkor aya kwar fa yaswar Yahwe I. Suḇuk kankenem ḇe aya monda ḇa, mboi suḇuk kankenem ḇepyum kaku ḇe ayandi.” (Ams. 23:24, 25) Imbo, naek srar syaran ma syaran sakḇaḇir rarirya kako.