1-2. (a) Munara rosai snonkaku ḇebor sifrur ya? (Mam kotak ” Rosaiso Taun Yobel ya”) (b) Imnis ḇefas ro Lukas 4:16-19, rosai Yesus ikofen ya?

RO SUP ḇeḇeso, kawasa ḇero diansya sifrur taun ḇeḇe 50 faro munara ḇefandun oso. Munara ḇeradine sor kako ḇe taun Yobel. Sifrur munara ani ro swaf ras oser, minggu oser, ḇaido ro swaf kawan syadi wer. Ḇape sifrur munara ani fa imnai raposa, snonkaku sya fasaw kaku fa sḇefnderna.

² Snonkaku Israel ḇepon siwara kako sifrur munara ḇeba kaku ro taun ḇeḇe 50. Munara ine sor i ḇe taun Yobel. Taun Yobel ḇepon iwara dun ḇaḇemkei faro snonkaku Israel ḇesouser sya. Rosai ḇefnai fandun fa kofarkor ro taun Yobel ani? Snaro iswarepen ko roi ḇepyum Yahwe fyasos ḇe ko kwar. Roi anya ḇyuk ḇaḇemkei ḇekain fyoro, ma baboine kosmai fainda ro i kwar. Yesus dawosḇair ḇaḇemkei ine kwar.​—Wasya Lukas 4:16-19.

3. Imnis ḇekofen ro Imamat 25:8-12, moḇsa snonkaku Israel sismai fainda ro taun Yobel ya rai?

³ Insama napyan fa kofawi rosai knam ro Yesus wos ḇyena, na kawos ḇepon taun Yobel Allah fyasos ḇe kawasa Ḇyesi ro fyor iwara. Yahwe iwan snonkaku Israel sya, ”Taun ḇeḇe 50 anya isren kaku, ma fandun fa mkokofenḇadir ḇaḇemkei faro kawasa kam ḇero sup ani. Ima taun Yobel faro mko, inja fandun fa mko oser-oser mkokaḇer ḇe saprop mkoḇena ma kina mkoḇedi.” (Wasya Imamat 25:8-12.) Ro farkarkor ḇepon ya, kawos kwar Ras Mananai snonkaku Israel sifrur ro minggu nakam nḇuk fainda faro si. Imbape, moḇsa sismai fainda ro taun Yobel ya rai? Kokarapan, snonkaku Israel oso ḇyenyaki  rawo ḇyoḇ saprop ḇyedi fa ḇyukibak nyaki ḇyena. Ro fafisu taun Yobel, na ismai kaḇer saprop ḇyena wer. Inja, snonkaku ani ’kyaḇer ḇe saprop’ ḇyeja, ma bisa ḇyuk na ḇe waris faro romawa ḇyesi. Ḇaido, snon oso snar samswen ismai ya ḇyoḇ romawa ḇyedi oso ḇaido mankundi ḇe women fa ḇyukibak nyaki ḇyena. Ro fafisu taun Yoḇel, women anya kyaḇer ḇe ’kina ḇyedi’. Rarirya, snonkaku osoḇa ḇye women pdef! Fasasos ine fyasnai Yahwe iswar kaku kawasa Ḇyesi.

4-5. Rosai ḇefnai fandun fa ko ro baboine kofarkor ro taun Yobel ya?

⁴ Rosai fainda ḇese sismai ro taun Yobel ya? Yahwe ikofen, ”Na mkopok mkoḇesaḇarar ḇa, snar Yahwe nari ḇyeḇarakas kaku mko ro sup Allah mkoḇedi Yahwe ḇyuk maro mko kwar fa mkonai ḇe waris.” (Ul. 15:4) Ine iḇesebur kaku ro roi komam ro baboine! Fyorno ido snonkaku ḇenana sya sḇenana syadi ma ḇesaḇarar sya sesaḇarar syadi wer.

⁵ Snonkaku Kristen koine, koma kosouser Sasoser Moses wer ḇa. Ine kyurfasnai koso werḇa taun Yoḇel ḇeser sasoser ḇaḇemkei women sya, ḇepyos nyaki, ma ḇeḇuk kaḇer saprop faro kina bena kaku ya. (Rm. 7:4; 10:4; Ef. 2:15) Imbape, fandun kaku ḇe kofa kofarkor ro taun Yobel ani. Rosai ḇefnai ya? Snar iswarepen ko faro rosai Yahwe ifrur kwar infa komkei ro sasar ya.

6. Snonkaku syakam sfandun kaku ḇaḇemkei ro rosai?

⁶ Kokame kofandun kaku ḇaḇemkei ya snar koḇewomen faro sasar, iso ḇaḇewomen ḇeḇyeḇa kaku. Iso ḇefnai fa na koḇemansar binsar, kodafduf, ma komar. Sibor smambos roi ine fyor smam simkasna ro kansinai ḇaido sra ḇe dokter snar sidufe. Fafisu kofrur sasar na koḇesanekar kako. Manwawan Paulus ikofen kaku ’sasoser sasarya iyaḇek i’. Ikofen wer, ”Aya ine snonkaku ḇeroë! Mansei nari ḇemarisen ḇefaspar ayabur baken  ine ḇeyun aya faro marmarya?”​—Rm. 7:23-25.

7. Rosai Nabi Yesaya ikofen ḇepon kwar ḇekur ḇaḇemkei ya?

⁷ Kokofen kasumasa kaku, snar Allah fyasos nyan ḇe kofa kofasparbur, ḇaido komkeibur sasar i. Syadi ro taun ri 700 fyor Yesus ryama ḇe supswan ḇaim, Nabi Yesaya ikofen ḇepon kwar ḇekur ḇaḇemkei ḇeba ro ras naiwama. Inema ipyum syadi ro ḇaḇemkei snonkaku Israel sismai ro fafisu taun Yobel. Nabi Yesaya fyas, ”Rur ḇesren isya ryous aya, snar Yahwe ryem aya kwar fa yaḇaryas ankankinem ḇeḇye faro snonkaku bena sne ḇemayar sya. Iwan aya kwar yaparekepen ḇeḇe sneḇekar sya, infa yakofenḇair ḇaḇemkei faro women sya.” (Yes. 61:1) Ḇardadi ine kyur ḇe mansei?

8. Ḇardadi ḇero syap Yesaya kyur ḇe mansei?

⁸ Ḇardadi ḇefandun ḇekur ḇaḇemkei anya ndarirya rofyor Yesus irandak fararmyan ḇyedi. Fafisu ryaḇe rum nadi ḇero sup marin ḇyedi, Nazaret, Yesus iwasya ḇardadi ro syap Yesaya faro snonkaku Yahudi ḇefanjur sya. ”Rur Manseren isya ryows aya, snar ikada ryem aya kwar, insa yaḇaryas Ankankinem Ḇeḇye faro snonkaku ḇesaḇarar; ma iwan aya kwar fa yaḇaryas ḇaḇemkei faro snonkaku ḇeḇemanfyansya, ma mamam faro ḇeprafsya, ma ḇaḇemkei faro snonkaku sewayamsya insa yaḇaryas wampasi wambarek Manseren ḇaḇenaḇye ḇyena ḇerama kwar.” Yesus kyur wos nane ḇe mankundi. (Luk. 4:16-19) Moḇsa Yesus ifrur ḇardadi ani fa imnis?

9. Snonkaku ḇebor ḇero Yesus fafisu ḇyedi sikyar nari simkei ro rosai?

⁹ Ro Yesus fafisu ḇyedi, snonkaku sya sismai ḇaḇemkei raris ḇardadi Yesaya, Yesus iwasya kwar anya. Yesus fyasnaibos ro ine fyor ikofen, ”Ro ras ine mnuk mkomnaf ine imnis.” (Luk. 4:21) Ḇebor ḇerower sya imbude sikyar na simkeibur ḇaḇepapoik Roma. Yesus manfamyan ḇyesi kako rya sna kakara ḇeradirya. Snar ḇarpur mura, suru ro si suyoḇe, ”Mboi ro randakya nkokyar iso nari ḇerama fa ḇefaspar er Israel.” (Luk. 24:13, 21) Kofawi ḇaḇepapoik Roma sḇepoik kuker rarmomen, ḇape Yesus ipok idif manfamyan ḇyesi fa spampum si ḇa. Ḇesyaḇo, iwan si fa ’sḇuk faro Kaisar rosai Kaisar dor ro si’. (Mat. 22:21) Inja,  moḇsa Yesus imkei snonkaku ḇero fafisu ya rai?

10. Yesus imkei snonkaku sya ro rosai?

¹⁰ Allah Rumkun Ḇyedi ryama fa ifnoḇek snonkaku sya fa sismai ḇaḇemkei ro nyan risuru. Ḇepon ya, Yesus imkei si buro farkarkor ḇekakuḇa ḇeramuma ro manfarkin agama sya. Sidif snonkaku Yahudi ḇebor sya fa siso rari snonkaku ma kakakyar ḇesasar na. (Mat. 5:31-37; 15:1-11) Snonkaku ḇeyoḇe sifnoḇek ḇesesya fa sfarmyan ḇe Allah, mankunsi sifrur rariryaḇa, simnis ra ’sipraf’. Snar sisampum Mesias ma roi ḇekaku Yesus fyarkorna, jadi fa sifawi Allah I ḇa. ’Sipraf’ pdef ma sro sasar ḇepok neḇepyos ḇa. (Yoh. 9:1, 14-16, 35-41) Ro rosai Yesus fyarkorna ma kenem ḇepyum ḇyedi, fyasnai ḇe snonkaku bena sne ḇerun sya moḇsa simkei ro farkarkor ḇekakuḇa na rai.​—Mrk. 1:22; 2:23–3:5.

11. Rosai nyan ḇesuru Yesus ḇyuk ḇaḇemkei ya?

¹¹ Ḇesuru ya, Yesus ifrur snonkaku sya fa simkei ro ḇaḇewomen faro sasar ya. Snar Yesus ḇyuk kankenem ḇyedi kwar ḇe farsarser, Allah na ḇyuk ampun faro snonkaku ḇekyar faro farsarser Yesus ḇyuk na ma ḇefasnai kakyar sena ro rosai sifrur na. (Ibr. 10:12-18) Yesus ikofen, ”Rofyor Rumkunya ḇyuk ḇaḇemkei faro mko, kaku ḇeri nari mkoḇe mkei.” (Yoh. 8:36) Ḇaḇemkei anya iba syadi ro ḇaḇemkei snonkaku Israel sismai ro fafisu taun Yobel! Imnis raris, fafisu taun Yobel simkei snon oso kwar ro ḇaḇewomen mboi imbude nari ḇyewomen wer, roḇaido ḇarpurya nari imar.

12. Mansei ḇesmai ḇepon ḇaḇemkei Yesus ikofenḇadir kwar anya?

¹² Ro ras Pentakosta 33 Masehi, Yahwe ryem kuker rur ḇesren manwawan, snon ma bin ḇesoasuser sya. Ikanow si fa sḇe romawa Ḇyesi, rarirya nari sek ḇe nanki fa sḇepoik kayam fnoḇek Yesus. (Rm. 8:2, 15-17) Siso ḇesmai ḇepon ḇaḇemkei Yesus ikofenḇadir ro rum nadi ḇero Nazaret anya. Snon ma bin ansine seḇewomen wer ḇa faro farkarkor ḇekakuḇa ḇeramuma ro manfarkin agama Yahudi ma rari snonkaku ḇeḇesebur Refo ya. Allah myam si kako simkei kwar ro sasar ḇeyun ḇe marmar i. Ḇaḇemkei Yahwe fyasosna imbran randak ro fafisu ryem Yesus manfamyan ḇyesi ro 33 Masehi ma nari imnai ro pupes Ḇaḇepapoik Taun Syaran Oser Yesus ḇyedi. Roi ḇepyum rosai nari naisya ro fafisu anya?

13-14. Ḇesmai ramrem sya monda ḇa, mboi mansei wer na ḇesmai ḇaḇemkei Yesus ikofenḇadir kwar anya?

¹³ Ro fafisu koḇedine, snonkaku riyuta bena sne ḇenapes ḇeramaker er syakam sima ’domba ḇese’ sirya. (Yoh. 10:16) Allah kyinfir si ḇa fa sḇepoik ro nanki fnoḇek Yesus. Imbape, Refo doḇe sismai saneraro fa sikenem fyoro ro supswan. Wakna saneraro ine kako ke?

¹⁴ Ro kirine kako, wasmai kwar roi ḇepyum raris snonkaku ḇesmai ramrem sya sismai na. Snar wakyar faro Yesus farsarser ḇyedi, bisa wor Yahwe fa ḇyuk ampun faro sasar bena. Inja, na wasmai Allah kyaremso Ḇyena ma ḇyuk aski ro sne ḇe Au. (Ef. 1:7; Why. 7:14, 15) Kwarapan kako barakas wasmai snar wamkei ro farkarkor ḇekakuḇa na. Yesus ikofen, ”Nari mkofawi napnapesya ma napnapesya nari ḇyuk ḇaḇemkei faro mko.” (Yoh. 8:32) Komarisen kaku fa kosmai ḇaḇemkei ḇeradine!

15. Fyoro werḇa ḇaḇemkei ma barakas rosai na kosmai ya?

¹⁵ Wakyar kaku, nari wasmai ḇaḇemkei ḇeba syadi ya. Fyoro werḇa, Yesus nari kyakok pres agama ḇekakuḇa ma ḇaḇesasoser ḇepyum ḇana. Allah nari kyadaunwarek ’raryur ḇeba’ ro snonkaku  ḇefarmyan faro I sya, mura ḇye sifa sismai barakas ro firdaus ro supswan. (Why. 7:9, 14) Snonkaku ḇebor ḇemar kwar sya nari sikḇok. Siḇekinfir fa sfarmyan ḇe Yahwe na sipok siduf, sḇe mansar binsar, ḇaido simar werḇa.​—Farfyar 24:15.

16. Ḇaḇemkei ḇeba syadi rosai nari snonkaku sya sismai ya?

¹⁶ Ro fafisu Ḇaḇepapoik Taun Syaran Oser, Yesus ma ḇepoik fnoḇek i sya nari sifnoḇek snonkaku sya fa sismai ḇaken ḇeprei ma sna wis ḇepyum kaku kuker Allah. Kawasa Israel ḇepon siwara sismai ḇaḇemkei fafisu taun Yobel. Rarirya kako snonkaku sya nari sismai ḇaḇemkei ḇeba syadi ro fafisu Ḇaḇepapoik Taun Syaran Oser. Inja, ḇefarmyan ḇe Yahwe kuker soasuser syakam nari sḇe snonkaku ḇenapes kaku ma sna sasar oḇa.

17. Ro Yesaya 65:21-23, rosai nari Allah kawasa Ḇyesi sismai ro ras-ras naiwama? (Mam sonin ḇero ḇarpon.)

¹⁷ Wasya Yesaya 65:21-23. Mnuk anane naser ḇardadi ḇekur kankenem ro supswan ro ras-ras naiwama. Siya soḇe ro firdaus snonkaku sya na sikain monda ḇo sifrur royoḇa. Ḇape, rariryaḇa snar Refo ikofenḇair Allah kawasa Ḇyesi nari sifrur fararur ḇepyum kaku ma simarisen faro roi sifrur na. Sisouser pdef ḇe Yahwe isof ro pupes Taun Syaran Oser ido, snonsnon sena nari neḇefasepen kaku ro ’syap kankenem ya’. Nari sismai ”ḇaḇemkei fnoḇek Allah romawa ḇyesi ro baba siḇe sismaya”.​—Rm. 8:21.

18. Rosai ḇefnai kokyar nari kosmai aski ro ras naiwama?

¹⁸ Yahwe fyasos mnis insama ro Ḇaḇepapoik Taun Syaran Oser, kawasa Ḇyesi sna oras fa sifararur ma simnaisu, raris ifrur kwar faro snonkaku Israel ḇepon siwara. Ras anyama swaf fa kofarmyan ḇe Allah. Ro baboine fararmyan ḇe Allah nefandun kaku insama kona aski, ma ro dunya babo nari kona swaf fa kofrur na. Kakuḇae, snonkaku ḇesoasuser syakam nari simarisen kaku ro fafisu Ḇaḇepapoik Taun Syaran Oser, snar kokame kona fararur ḇeyun marisen ma kokame na kofarmyan ḇe Allah.