1. Rosai monda fainda ro fasaspar ya?

FARSARSER fasaspar Yesus Kristus nafrur kosmai barakas nabore. Imnis raris, fasasos fasaspar ine ḇyuk ḇe Adam romawa ḇeswar napnapes ḇyesya nari ras oso sakḇe bar ro Allah kina ḇyesya. Barakas ḇesena iso nari kokenem fyoro kuker aski. Ḇape ḇefandun syadiya fasaspar ine ifrurmnis kaḇer samswen ḇebor ḇefandun kaku ro supswan ma farsyos.—Ibrani 1:8, 9.

2. (a) Roi ḇefandun kaku rosai Yesus ḇyenadina? (Mam sonin ro randak artikel ine.) (b) Rosai nari kawosna?

² Swaf taun risuru fyor Yesus imar ḇaim, fyarkor manfamyan ḇyesi fa sḇenadi radine, ”Kma nkobedi ro boiyaswa, Nkofasren Snomḇri kada, Ḇaḇesasoser Bedi ryama kada, Marisen bedi ryarirya kada ro supswan ine imnis ro boiyaswa.” (Matius 6:9, 10) Rosai fesepen ro fasaspar kuker fasasren Yahwe snonsnon Ḇyedi, Ḇaḇesasoser ḇaido Karajan Allah, ma marisen Allah Ḇyedi nḇendarirya? Mkorama kawosna.

3. Rosai ḇefasnaḇair ro Yahwe snonsnon Ḇyedi, ma rosai Setan ifrurya insa Yahwe snonsnon Ḇyedi naḇyeḇa?

³ Roi ḇerandak Yesus ḇyenadi iso insama Yahwe snonsnon Ḇyedi neḇefasren. Yahwe snonsnon Ḇyedi fasnaḇair roi nakam kuker Mankundi. Ima Mankun ḇepoik syadi, inapes, ma kyaku ro supswan ma farsyos inekam. Yesus ikako dap Yahwe I ḇe ”Mami ḇesren”. (Yohanes 17:11) Snar Yahwe isren, rosai ifrurnakam ma sasoser ifrurna nasren kako. Ḇape ro Yaf Eden, kuker ankarkar Setan ḇyuk fakfuken ḇefasnaḇair Allah iso ḇena hak fa ḇefrur rosai ḇepyum ma ḇeḇyeḇa faro snonkaku sya. Danonef Yahwe I ma ifrur Allah snonsnon Ḇyedi naḇyeḇa.—Kejadian 3:1-5.

4. Rariso Yesus fyasren Allah snonsnon Ḇyedi?

⁴ Yesus iswar kaku Yahwe I, inja ifrur rosai monda insama Allah snonsnon Ḇyedi neḇefasren. (Yohanes 17:25, 26) Rariso fyasnana? Roro kenem ma farkarkor ḇyena. Yesus ifnoḇek snonkaku ḇesesya fa smambir kaku rosai Allah dap kwar, ma dor ro snonkaku sya ima faro payamyum mankun sena. (Wasya Mazmur 40:8-10.) Iba syadiwer, rofyor Setan ifrur Yesus ḇyekandera ma imar, Yesus isouser pdef. Yesus fyasnaḇair snar snonkaku ḇenapes sya bisa sisouser Yahwe kuker sne ḇesiper.

5. Rosai fandun fa kofrurya insa kofasren Yahwe snonsnon Ḇyedi?

⁵ Ko kako bisa kofasnaḇair snar koswar Yahwe I ma snonsnon Ḇyeja roro kenem koḇena. Yahwe imarisen insama kosren. (Wasya 1 Petrus 1:15, 16.) Ine kyurfasnai kosyom ma kosouser I monda kuker sne ḇesiper. Kosmai samamyai raryano, koḇensewar kaku fa koso Yahwe parenta Ḇyena. Kuker rarirya kofasren snonsnon Ḇyeja. (Matius 5:14-16) Kofasnaḇair snar sasoser Ḇyena napyum ma Setan ima manḇeankarkar dirya. Kakuḇae, koinema snonkaku ḇenapesḇa ma fyorno ido kofrur sasar. Ḇape rofyor kofrur sasar, nari kombror ma koḇensewar kaku fa komnai kofrur rosai monda ḇefrur Yahwe snonsnon Ḇyedi naḇyeḇa.—Mazmur 79:9.

6. Koinema snonkaku ḇenapes ḇa, ḇape sai ḇefnai fa Yahwe myam konapes?

⁶ Snar Kristus fasaspar ḇyedi, Yahwe bisa ḇyuk ampun faro sasar snonkaku ḇekyar sya. Mansei monda ḇebuk farsamsyom faro I nari Imarisen isaser si. Snonkaku Kristen ḇesmai ramrem sya Yahwe myam sinapes kwar inja dap siḇe romawa Ḇyesya. ”Domba-domba ḇese” myam sinapes kako inja sḇenaḇye fa sḇebati kuker I. (Yohanes 10:16; Roma 5:1, 2; Yakobus 2:21-25) Snar fasaspar, kirine myam konapes ma kokako bisa kofasren Allah snonsnon Ḇyedi.

7. Barakas rosai monda na kosmai snar fasaspar ya?

⁷ Ro Yesus nadi ḇyeja, doḇe, ”Ḇaḇesasoser bedi ryama kada.” Rosai fesepen ro fasaspar kuker Karajan Allah? Karajan Allah iso ḇaḇesasoser oso. Ma ḇefarkin ḇaḇesasoser ine iso Yesus ma snonkaku ri 144.000 ḇeḇekinfir kwar. Seḇekinfir fa seḇebawes ḇe nanki snar fasaspar ya. (Fasasna 5:9, 10; 14:1) Nari sḇe raja ma imam fa sḇepoik faro supswan fnoḇek Yesus ro swaf taun syaran oser. Ro fafisu ya, Yahwe nari ḇyuk  Karajan ine fa fyadwer supswan ine ḇe firdaus ma ifrur snonkaku sya sinapes kaḇer wer. Yahwe manfamyan ḇyesya ro nanki ma supswan nari sḇe kina oser. (Fasasna 5:13; 20:6) Yesus nari myunpres Setan i ma ipyos roi ḇeḇyeḇa Setan ifrurna.—Kejadian 3:15.

8. (a) Rosai Yesus ifrurna insama manfamyan ḇyesi sifawi Karajaan Allah ine fandun kaku? (b) Rariso kosonem Karajan Allah?

⁸ Rariso Yesus ifnoḇek manfamyan ḇyesi fa sfawi Karajan Allah ine fandun kaku? Fyor Yesus ḇyebabtis kwar, Yesus ḇyaryas ḇeri ”Ankankinem Ḇeḇye ro Ḇaḇesasoser Allah” ro moḇ sarirya rya yoḇna. (Lukas 4:43) I kako ḇyuk parenta ḇe manfamyan ḇyesya fa sakḇe saksi ḇe i ”isof supswan pember ya”. (Farfyar ro manwawansya 1:6-8) Kirine, roro ḇaḇebaryas Karajaan, snonkaku bisa sfarkor kuker fasaspar ine ma sḇe kawasa ro Allah Karajan Ḇyedi. Kofasnaḇair snar kosonem Karajan ani kuker kofnoḇek snonkaku ḇena ramremsya fa kobaryas ankankinem ḇeḇye ine isof supswan ḇesiper.—Matius 24:14; 25:40.

9. Sai ḇefnai fa kokyar Yahwe nari ifrur marisen Ḇyena faro snonkaku sya?

⁹ Yesus ikofen wer, ”Marisen bedi ryarirya kada.” Rosai knam ro wos ine? Rosai Yahwe ikofen na nari ndarirya kako. (Yesaya 55:11) Ḇaḇembroḇ Setan napok nadwarek Yahwe Marisen Ḇyena ḇa. Rosai Yahwe Marisen Ḇyena faro supswan? Imarisen insama supswan ifo kuker romawa ḇemnis sya ro Adam ma Eva su. (Kejadian 1:28) Adam ma Eva sumar rofyor suna romawa baim ido, nari Yahwe marisen Ḇyena na ndarirya ḇa. Inja, Yahwe ḇyuk swaf ḇe romawa ma kpu suḇesya fa sikenem. Snar fasaspar ine nasya, snonkaku ḇekyar sya nari sḇe snonkaku ḇenapes ma sikenem fyoro. Yahwe iswar snonkaku sya imarisen insama kokame kokenem kuker aski. Nama marisen Ḇyena rirya.

10. Rosai fainda ro fasaspar faro snonkaku ḇemar kwar sya?

¹⁰ Rariso kuker snonkaku syaran ma syaran ḇemar kwar mḇoi smambir Yahwe I ḇaim? Yahwe imarisen insama sikenem. Inja snonkaku ḇemar nari sikenem kaḇer wer. Ine snar fasaspar ya. Rofyor sikbawes, nari sifarkor ro Yahwe I ma sikenem fyoro. (Farfyar 24:15) Ro Yahwe I, kankenem ya isya. Inja rofyor Yahwe ḇyawes kaḇer snonkaku ḇemar kwar sya, nari ḇye Kma faro si. (Mazmur 36:9) Ine namnis kuker Yesus nadi ḇyedi, ḇekofen ”Kma nkobedi ro boiyaswa”. (Matius. 6:9) Yahwe ḇyuk Yesus fararur ḇefandun kaku fa ḇyuk aḇiḇer ḇe snonkaku ḇemar sya. Yesus doḇe, ”Aya ine aḇiḇer ma kankenem.”—Yohanes 6:40, 44; 11:25.

11. Rosai Allah Marisen Ḇyena faro raryur ḇeba sya?

¹¹ Yesus dap wer, ”Mansei ḇeḇeuser Allah marisen ḇyena, sirya naek snon ma srar bin ma sna ayesi rya.” (Markus 3:35) Allah imarisen snonkaku ḇerama ro er, keret ma wos nakam saksyom I. Sap siḇe raryur ḇeba ro snonkaku ḇebor ma osoḇaḇeri na ḇekor barbor seja ḇa. Sikyar faro fasaspar ma simarisen siouser Allah I. Sisandik Allah ma sikofen, ”Korer koḇeja ryama ro Allah koḇedi, ḇekain ro karapesa  ḇaḇesasoser ḇyedi, ma ro Rumkun Domba ani.”—Fasasna 7:9, 10.

12. Roro Yesus nadi ḇyena, rosai kofarkor ro Yahwe Marisen Ḇyena faro snonkaku sya?

¹² Yahwe Marisen Ḇyena faro snonkaku nasnai ro Yesus nadi ḇyena. Oser ya, fandun fa kofrur roi ḇepyum fa kofasren Yahwe snonsnon Ḇyedi ma koḇesyowi I. (Yesaya 8:13) Farsarser fasaspar Yesus ḇyedi ḇyuk ḇaḇemkei ḇeko ma kosandik Yahwe snonsnon Ḇyedi kako. Snar, knam ro Yesus snori isoine ”Yahwe Iso Fasaspar”. Ḇesuru ya, roro Yahwe karajan Ḇyedi nari ḇyuk fainda ro fasaspar faro snonkaku ḇesouser sya. Ḇekyor ya, kokyar osoḇaḇeri na ḇedwarek Yahwe Marisen Ḇyena.—Mazmur 135:6; Yesaya 46:9, 10.

13. Sai ḇefnai fa komarisen koḇebaptis?

¹³ Nyan ḇefandun kaku kofasnaḇair snar koḇesyowi fasaspar yaiso, kuker koḇuk farsamsyom kankenem koḇena ḇesiper faro Yahwe I ma koḇebaptis. Kuker nyan ine, kofasnaḇair snar kokyar faro fasaspar ma ”Manseren iso ḇenakonya”. (Roma 14:8) Ḇaḇebaptis kako kyurfasnai kor ”sneuser ḇeḇye” faro Yahwe I. (1 Petrus 3:21) Yahwe ifrur asas ḇyena kuker ḇyuk fainda ro fasaspar ani faro ko. Ma, kokyar nari Yahwe ifrur asas ḇyenakam faro ko ndarirya ḇeri.—Roma 8:32.

14. Sai ḇefnai fa Yahwe dor ko fa koswar snonkaku ḇesesya?

¹⁴ Yahwe ifrur roi nakam snar saswar ḇeḇa Ḇyedi. Ma, imarisen insama ḇesyomi sya sifarari I ma siswaryae si. (1 Yohanes 4:8-11) Fyor koswar snonkaku ḇesesya, kofasnaḇair snar komarisen ’koḇe romawa-romawa faro Kma koḇedi ro boiyaswa’. (Matius 5:43-48) Sasoser ḇepon ma ḇeba syadi iso koswar Yahwe I ma ḇesuru ya koswar min koḇesi. (Matius 22:37-40) Nyan oser fa kofasnai saswar ḇe snonkaku ḇesesya, iso kobaryas ankankinem ḇeḇye karajan Allah faro si. Fyor koso Yahwe parenta Ḇyena fa koswar snonkaku ḇese, iḇa syadiwer naek srar koḇesi ido, saswar koḇena faro I nari ’namnis’.—1 Yohanes 4:12, 20

15. (a) Barakas rosai kirine kosmai ro Yahwe I? (b) Barakas rosai nari kosmai ro fafisu iwama?

¹⁵ Snar kokyar faro fasaspar, Yahwe ḇyuk kakakyar ḇeko snar sasar koḇena nari ”neḇepyos”. Nari ḇyuk ampun faro sasar koḇena kam. (Wasya Farfyar 3:19-21.) Raris kofarkor kwarna, snar fasaspar ine snonkaku ono sisya seḇekanow ḇe romawa-romawa Allah ro nanki. Sima snonkaku ḇena ramrem sya. (Roma 8:15-17) Dor kako ”domba-domba ḇese” fa sḇe kina Ḇyedi ro supswan. Fyor sḇe snonkaku ḇenapes kwar nari ujian ḇepupes nasya. Fyor sisouser ido, domba-domba ḇese nari Yahwe ikanow si ḇe romawa Ḇyesi kako. (Roma 8:20, 21; Fasasna 20:7-9) Yahwe nari iswar romawa Ḇyesikam. Fasaspar nari nun barakas isof fyoro. (Ibrani 9:12) ine iso roi ḇeḇye ma ḇemnis ḇerama ro Yahwe I, ma osoḇaḇeri na dunibur ko.

16. Rariso fasaspar ḇyuk ḇaḇemkei ḇeko?

¹⁶ Kombror ro sasar koḇena ido, Setan na idwarek koḇa ma nari kosun ro Yahwe kina ḇyedi. Yesus imar ’rarwan oser monda’. Kuker rarirya, fasaspar ani neḇeḇak kwar. (Ibrani 9:24-26) Komar snar Adam i, ḇape kokenem fyoro snar Yesus imarwarek ko. Fasaspar imkei ko bur dunya Setan ma makakak faro marmar ya.—Ibrani 2:14, 15.

17. Rariso sneḇaḇir Bedi snar wafawi Yahwe iswar Au, ma sai ḇefnai ya?

¹⁷ Asas Allah Ḇyedi nari ḇyendarirya. Imnis raris sasoser alam ifrur kwarna nari napok neḇefadwer ḇa, Yahwe I kako imnis kaker rarirya. Nari ifrur fa kofafko ḇa. (Maleakhi 3:6) Yahwe ḇyuk ḇeko kankenem monda ḇa, ḇape iswar ko kako. ”Ko ḇardi kofawi ma kokyar Allah saswar Ḇyedi maḇeko. Allah ikada isaswar.” (1 Yohanes 4:16) Allah nari ifrur asas Ḇyena ndarirya. Kerower supswan ine nari ḇyefirdaus ḇepduk kaku. Snonkaku ḇeḇarek ro diwa nari sifarari Yahwe I ma siswaryae si. Ro fafisu ya, manfamyan Allah Ḇyesi ro nanki ma supswan nari sikofen, ”Allah ḇesma sanandik, baba ma ḇefawinananem. Kokofen kasumasa nabor kaku faro Allah ma ḇaḇesyowi. I Allah ḇepoik ma ḇesambraḇ isof fyoro-fyoro! Amin.”—Wahyu 7:12.