1, 2. Fyor Yesus dek ḇe nanki kwar, rosai manwawan sya skarana?

MANWAWAN Yesus sya sores ro Bon Zaitun ma smam tuan ma bati sedi Yesus i, ḇyeḇekanow ḇe nanki, ramnai mandifna nakawef i. (Farfyar 1:9, 10) Yesus fyarkor si, ḇyuk raryaḇ ḇesi, ma fyarkin si ro swaf taun risuru kwar. Ḇape kirine isya werḇa. Rosai nari sifrurya?

² Fyor Yesus dek ḇe nanki ḇaim, Yesus ikofen ḇe manfamyan ḇyesya, ”Nari mkoḇesaksi ḇe aya ro Yerusalem ma sup Yudea ḇesiper, Samaria isof supswan pember ya.” (Farfyar 1:8) Rariso fararur ine bisa sifrurna? Yesus ḇyeasas ḇe sikwar snar nari rur ḇesren Allah ifnoḇek si. (Farfyar 1:5) Ḇape, mansei nari ḇefarkin si ma ḇefasos fararur ḇaḇebaryas ro supswan ḇesiper ine? Manwawan sya sifawi snar ro fafisu iwara ḇefarkin er Israel sya siso bar snon sya. Inja, skara bo sobe baboine Yahwe nari inankow manfarkin ḇebabo.

3. (a) Fyor Yesus dek ḇe nanki kwar, snemuk ḇefandun rosai manwawan sya sifrurna? (b) Fakfuken rosai monda nari kokarem ro artikel ine?

 ³ Fyor Yesus dek ḇe nanki kwar, manfamyan ḇyesya smam kaḇer Fas-Fas Ḇesrenna, sḇenadi sor farfnoḇek ro Allah I, fa skinfir Matias i ḇe manwawan ḇeḇe-12 fa fyadwer Yudas Iskariot i. (Farfyar 1:15-26) Sai ḇefnai fa kankinfir ine ḇyefandun kaku faro si ma faro Yahwe I? Snar manwawan sya sifawi fandun fa sḇe manwawan ri 12. * Yesus kyinfir ma fyarkor manwawan ḇyesya kwar fa sifrur fararur ḇefandun kaku faro Allah kawasa ḇyesya. Fararur rosai rirya? Rariso Yahwe ma Yesus sufasos si? Fasasos ḇemnis rariso nasya ro baboine? Ma, rariso ’kofanander awer manfarkin koḇesi’ ro fandu ko, ibasyadiwer ’manfamyan ḇeḇesyowi ma ḇefawi nananem’?—Ibrani 13:7; Matius 24:45.

4. Rosai fararur ro manwawan ma penatua ḇesesya ḇero Yerusalem?

⁴ Manwawan sya sfarkin randak sidang Kristen ro Pentakosta taun ri 33 M. Refoya ikofen snar ”Petrus iyori fnoḇek manwawan samfur seser oser ansi” ma ḇyuk farkarkor ḇenapes ḇeyun kankenem fyoro ḇe snonkaku ḇebor sya. (Farfyar 2:14, 15) Ḇebor ro si sḇe snonkaku Kristen. Ramnai snonkaku Kristen ḇebabo sine ”sikam si souser manwawan ansi farkarkor sena”. (Farfyar 2:42) Manwawan ansya sisma fakamamar kako fa smamfasos kumpan ro sidang. (Farfyar 4:34, 35) Sikako sfarkor Allah kawasa ḇyesya ma sḇenadi warek si. Sikofen, ”Insa mankun inko inkomam ker nadi ma afuffarmyan wos ya.” (Farfyar 6:4) Ma, sfarem snonkaku Kristen ḇemas kwar sya fa sḇaryas ankankinem ḇeḇye ro sup ḇe babo. (Farfyar 8:14, 15) Barpurya, penatua ḇesma ramrem ḇesesya skayam kuker manwawan sya fa sfarkin sidang. Sḇe badan pimpinan ḇebuk akurfasna ḇe sidang nakam.—Farfyar 15:2.

5, 6. (a) Rosai ḇefasnaḇair snar badan pimpinan sismai rur ḇesren? (Mam sonin ro randak artikel ine.) (b) Rosai ḇefasnaḇair snar malaikat sya sifnoḇek badan pimpinan? (c) Rosai ḇefasnaḇair Allah Wos ḇyena nfarkin badan pimpinan sya?

⁵ Snonkaku Kristen ro abad randak sifawi snar Yahwe iso ḇefarkin badan pimpinan sya roro Yesus. Sai ḇefnai sikyar faro roi ani? Ḇerandakya, badan pimpinan sisma rur ḇesren. (Yohanes 16:13) Kakuberi snonkaku Kristen ḇesma ramrem syakam sisma rur ḇesren. Ḇape rur ani ifnoḇek syadi manwawan sya ma penatua ro Yerusalem fa  sifrur pdef fararur sena ḇe pengawas. Raris, ro taun 49 M, rur ḇesren fyarkin badan pimpinan fa sifrur snemuk kuker sofuk ḇaido sunat. Ma sidang sisomnis akurfasna ani. Fainda ya, ”sisma samambraḇ ro kakyar, ma fyoromuma kawasa ḇekyar sya sibor syadi wer”. (Farfyar 16:4, 5) Ro syapram sifarem ḇe sidang-sidang kuker sofuk ine, bisa komam snar badan pimpinan sisma Allah rur ḇyeja ma sifasna saswar ma sna kakakyar.—Farfyar 15:11, 25-29; Galatia 5:22, 23.

⁶ Ḇesuru ya, malaikat sya sifnoḇek badan pimpinan sya. Imnis raris, malaikat oso dor Kornelius i fa syewar Manwawan Petrus i. Ramnai, Petrus fyawar ankankinem ḇeḇye ḇe Kornelius ma kina ḇyesi inja sḇesofuk ḇaim raryano sisma rur ḇesren ya. Kornelius, snonkaku Yahudi–ḇa ani, ḇyesnonkaku kristen randak ḇeḇesofuk ḇaim. Rofyor manwawan ma naek srar ḇesesya srower roi ine, sikyar snar ima Allah marisen ḇyena ma simarisen kako snonkaku Yahudi-ḇa ḇesofuk ḇaim sine sakro sidang Kristen. (Farfyar 11:13-18) Ro roi nane, bisa kofawi snar malaikat sya kako sifnoḇek fararur ḇaḇebaryas badan pimpinan sfarkinna. (Faryar 5:19, 20) Ḇekyor ya, Allah Wos Ḇyena fyarkin badan pimpinan sya. Sḇuk Fas-Fas Ḇesren fyor sun snemuk kuker farkarkor Kristen ma sifarkin sidang.—Farfyar 1:20-22; 15:15-20.

7. Rodiso kofawi Yesus iso ḇefarkin snonkaku Kristen ro abad randak sya?

⁷ Badan pimpinan siso ḇefarkin sidang na, ḇape sfawi snar Yesus Kristus iso Manfarkin sedi. Kaku rarirya ke? Manwawan Paulus ikofen snar Kristus iso ḇekanow snonkaku ḇeḇeso ḇe manwawan. Ikako ikofen snar Kristus isoine ”ḇeḇeḇruya”, ḇaido Manfarkin, Sidang. (Efesus 4:11, 15) Manfamyan sya sḇuk manwawan oser snonsnon ḇyejaḇa fa nḇe snonsnon ro raryur sena, ḇape kuker farkankin ro Allah sap siḇe snonkaku Kristen. (Farfyar 11:26) Paulus fyawi fandun fa iso farkarkor ḇeḇeknam ro Refo ḇerama ro manwawan sya ma snon ḇefarkin si. Rariryano, Paulus ikofen, ”Ḇape yamarisen insa mkofawi roi oser wer, isoine ḇeḇeḇru rofandu snonsya oser-oser [ine kako faro min oser-oser ro badan pimpinan sya] isoine Kristus; . . . ma ḇeḇeḇru ro Kristus isoine Allah.” (1 Korintus 11:2, 3) Ine fyasnabos, Yahwe kyinfir Yesus Kristus, Rumkun ḇyedi kwar, fa fyarkin sidang.

8, 9. Roi ḇefandun rosai monda Naek Russell ifrurna?

⁸ Rofyor 1870, Charles Taze Russell ma bati ḇeḇeso ḇyesya sḇensewar fa sisyom Allah kuker rosai Refo ikofenna ma sifnoḇek ḇesesya fa sakfrur radirya. Ine kako faro sirwas napnapes Refoya ro wos sariryakam, sifrur Lembaga Risalah Menara Pengawal Zion ro 1884, ma ḇe presiden iso Naek Russell i. * Fyarkor refo kuker aunos kaku ma fyor fyasnaḇair farkarkor gereja ḇeḇeknam ro Refoḇa imkak ḇa.  Raris, farkarkor Tritunggal ma farkarkor ḇekofenḇair rur ro snonkaku oso nari ikenem pdef fyor imar kwar. I kako fyarkor snar rarama Yesus ḇepurya nari neḇemamḇa, ma ”fafisu er ansi sedi” nari imnai ro 1914. (Lukas 21:24) Naek Russell ḇyuk oras, samambraḇ ma pipi ḇyena fa ḇyuk farkarkor napnapes ine ḇe snonkaku syakam. Roi nane nfasnai Yahwe ma Yesus sufnoḇek naek Russel ifa ḇye manfarkin ro fafisu ḇefandun kaku ro sarisa ine.

⁹ Naek Russell ifrur roi nanekam insama snonkaku smanen i ḇa. Ro 1896, fyas snar snon-snon ḇefarkin sine, ma ikako, simewer snonkaku sya smam syadi si ḇaido smanen si. Simewer sḇuk nasan ḇesi ma simewer snonsnon sena sḇuk ro raryur sariryakam. Doḇe, ”Ine fararur snonkaku risyaḇa.”

10. (a) Fafisu risai Yesus kyanow ’manfamyan ḇeḇesyowi ma ḇefawi nananem’? (b) Rariso badan pimpinan fawas ma fawas siḇese ro Lembaga Menara Pengawal?

¹⁰ Yesus ikanow ’manfamyan ḇeḇesyowi ma ḇefawi nananem’ ro 1919, taun rikyor ḇyenande rofyor naek Russell imar kwar. Rosai fainda ya? Insama manfamyan ḇyesya sisma ”nanan faro si ro fafisu ya”. (Matius 24:45) Iba syadiwer ro randak taun ani, naek ḇesma ramrem ro raryur kasun ḇero kantor pusat Brooklyn, New York, sfasos anan rur faro Yesus manfamyan ḇyesi. Wos ”badan pimpinan” syae randak ro publikasi koḇena fyor 1940. Ro fafisu ani, badan pimpinan sfanam kuker direktur ro Lembaga Alkitab ma Risalah Menara Pengawal. Ḇape ro 1971, sikofenḇair snar Badan Pimpinan siḇese ro Lembaga Menara Pengawal, bena fakamamar faro masalah hukum na. Fyor ya naek ḇesma ramrem ḇe direktur ro Lembaga ani ḇa bisa sḇe min ro Badan Pimpinan sya. Baboine, naek ḇena fakamamar rofandu ”domba-domba ḇese” sḇe direktur ro Lembaga ma badan-badan hukum ḇese Allah kawasa Ḇyesi sḇukna. Bon yaiso, Badan Pimpinan bisa smam monda faro farkarkor ma akurfasna ḇero Refoya. (Yohanes 10:16; Farfyar 6:4) Menara Pengawal 15 Juli 2013 ikofenḇair snar ’manfamyan ḇeḇesyowi ma ḇefawi nananem’ sima Badan Pimpinan ro raryur kasun naek ḇesma ramrem sya.

11. Rariso Badan Pimpinan sifrur snemuk raya?

¹¹ Badan Pimpinan sya sifrur rapat kali oser ro minggu oser fa sifrur snemuk ḇefandun kaku. Rapat ine sifrurna insama bisa sawos beri ma sna kakara oser. (Amsal 20:18) Min oso ro Badan Pimpinan na kyara isyadi ro ḇesesya ḇa. Inja ro taun ḇe taun, min skur fa ḇefarkin rapat ya nari neḇeseyae. (1 Petrus 5:1) Rarya kako kuker panitia riwonem Badan Pimpinan sya smawarekna. Naek ḇefarkin rapat panitia sine nari sifadwer si ro taun ḇe taun. Min ro  Badan Pimpinan sine skara ḇaḇeri siso ḇemanfarkin faro min sesya. Oser-oser rosi kako ’smamwarek snonkaku ḇyesi’, ḇesmai anan rur ro manfamyan ḇesouser sya ma siso akurfasna sena.

12. Fakfuken rosai nari kokarem na?

¹² Badan Pimpinan sismai ḇeri ḇa akurfasna ḇerama ro nanki, ma sikako snonkaku ḇenapesḇa. Sima bisa sifrur sasar fyor sikofenḇair Refoya ḇaido fyor sbuk akurfasna ro Organisasi. Raris, ro Indeks Publikasi Menara Pengawal, ro bar ”Pengertian yang Diperjelas”, ḇeser sasyos kuker fararwe ro fawawi koḇena faro farkarkor Refo ro taun 1870. Yesus ikofenḇa snar manfamyan ḇeḇesyowi [ḇesouser] ansine nari sḇuk anan rur ḇemnis kaku. Inja, rariso na kokarem fakfuken Yesus ḇyedine: ”Manfamyan mansei ḇeḇesyowi ma  ḇefawi nananem?” (Matius 24:45) Rosai ḇefasnaḇair Badan Pimpinan sima manfamyan ḇesouser? Mkorama kawos roi rikyor ḇefnoḇek kwar Badan Pimpinan ro fafisu manwawan sya.

13. Rosai ḇefasnaiḇair rur ḇesren ifnoḇek Badan Pimpinan sya?

¹³ Rur ḇesren nafnoḇek Badan Pimpinan. Rur ḇesren nafnoḇek Badan Pimpinan sya kwar fa sfawi kaku napnapes ro Refo randak sfawi mnis ḇaimna. Raris, komam ro sasyos ”Pengertian yang Diperjelas” ḇeḇeyap ḇepon kwar. Allah ifnoḇek siḇa ido, na sfawi mnis ḇa ma jadi ba fa sifasnaḇair ”Allah aw ḇyena ḇeyokef kako”! (Wasya 1 Korintus 2:10.) Badan Pimpinan skara raris Manwawan Paulus fyasya, ”Rarirya, rofyor nkoḇaryas roi ḇekur Allah, faro snonkaku ḇena Allah Rur ḇyedi, nkoḇaryas imnis kakara snonkakuḇa, mboi nkoso Allah Rur ḇyedi moḇ fyarkor raya.” (1 Korintus 2:13) Taun syaran ri syaran fyor 1919 ḇaim, farkarkor ḇekakuḇa nasya ro moḇ nakame ma akurfasna ḇesnaibos nasyaḇa. Inja, rariso fawawi Refo ro taun ani nasnai bos? Kakuya snar Allah ifnoḇek si kwar kuker rur ḇesren Ḇyeja!

14. Ro Fasasna 14:6, 7, rariso malaikat sya sifnoḇek Badan Pimpinan ma Allah kawasa ḇyesya ro baboine ya?

¹⁴ Malaikat sifnoḇek Badan Pimpinan sya. Badan Pimpinan sismai fakamamar ḇeba kaku fa sbuk akurfasna ḇe manbaryas yuta ri war syadi faro fararur ḇaḇebaryas ro supswan ḇesiper. Ma, fararur senaine nun bon kaku. Sai ḇefnai ya? Oserya iso snar farfnoḇek ro malaikat sya. (Wasya Fasasna 14:6, 7.) Contoh nabor nasya ḇefasnaḇair snar malaikat sifnoḇek manbaryas sya fa sisrow kuker snonkaku ḇenadi babo ḇeyor farfnoḇek ro Allah! * Fararur ḇaḇebaryas ma farkarkor ine nasur pdef, iba syadiwer ro moḇ sidwarek kaku fararur koḇena. Ine rarirya snar farfnoḇek ro malaikat sya.

15. Rosai ḇeḇese ro Badan Pimpinan kuker manfarkin gereja sya? Buk contoh.

¹⁵ Allah Wos Ḇyena fyarkin Badan Pimpinan. (Wasya Yohanes 17:17.) Kwara rosai ḇeḇejadi ro 1973. Menara Pengawal 1 Juni naser fakfuken ine, na ”snonkaku oso ḇekun tabaku kaker bisa ḇyebaptis ke roḇa”. Kankaremya roḇa, ine ḇyeknam ro farkankin Refoya. Manara Pengawal fyas kaḇer mnuk ḇeḇeso ḇefasnaḇair sai ḇefnai snonkaku ḇemewer ḇemnai ro tabaku na sepecat i. (1 Korintus 5:7; 2 Korintus 7:1) Majalah ani ikofen anun pakrek ine ryama ro snonkaku syaḇa, ḇape ”ḇerama ro Allah ḇeyawos roro Wos Ḇyena ḇeḇefas kwar”. Organisasi agama osoḇaḇeri ḇemnis radine. Sisouser kaku Allah Wos Ḇyena ido, nari min ḇeḇeso sesya sisambraḇ ḇa fa siso farkankin ani. Baboine, syap oso faro Agama ro Amerika Serikat fyas ḇo doḇe, ”Manfarkin agama Kristen sya fyorno ido sifadwer farkarkor sena insama namnis kuker kakyar ma kakara ḇero min sesya ma kawasa sya.” Ḇape, Badan Pimpinan simewer siso rosai snonkaku ḇebor simarisen na. Simarisen siso farkankin ro Allah wos  ḇyena. Ine nfasnaḇair Yahwe iso ḇefarkin kaku kawasa Ḇyesya ro baboine.

16. Nyan oser rosai insa kofanander awer Badan Pimpinan sya?

¹⁶ Wasya Ibrani 13:7. Refo dor kofa ’kofanander awer manfarkin koḇesi’. Nyan oserya iso kuker koḇenadi warek Badan Pimpinan sya. (Efesus 6:18) Sima sna fakamamar nabor kaku. Raris, sfasos anan rur, smamwarek fararur ḇaḇebaryas ro supswan ḇesiper, ma smamfasos farsarser kumpan sḇuk ḇe Organisasi ya. Inja, fandun kaku koḇenadi warek si ḇesyakwar!

17, 18. (a) Rariso nyan fa koso akurfasna ro Badan Pimpinan sya? (b) Sai ḇefnai fa ḇaḇebaryas kobena nesonem Badan Pimpinan ma Yesus?

¹⁷ Kokako bisa koswarepen Badan Pimpinan sya kuker kosomnis farkarkor ma akurfasna sena. Badan Pimpinan sbuk akurfasna roro publikasi, fananjur, ma kebaktian. Sikako skanow pengawas wilayah, ma pengawas wilayah sakanow penatua sya. Pengawas wilayah ma penatua sine siswarepen Badan Pinpinan sya kuker sisomnis kaku akurfasna sḇuk ḇe sina. Ma, kokam koḇesyowi Manfakin koḇedi, Yesus i, kuker kosouser snon ḇeḇekinfir kwar ansine.—Ibrani 13:17.

¹⁸ Nyan ḇese fa koswarepen Badan Pimpinan sya isoine kuker kofararur marbak ro ḇaḇebaryas. Ibrani 13:7 idif snonkaku Kristen sya fa sifarari kakyar ro manfarkin sine. Badan Pimpinan sfasnaḇair kakyar ḇeba kuker sibaryas ankankinem ḇeḇye kuker raryaḇ. Kosonem naek ansine ro fararur ḇefandun ine ke? Rarirya ido, nari komarisen rofyor Yesus ikofen, ”Kaku ḇeri roi ḇeḇor kam mkofrur faro oser ro fandu naek Ayesi ḇeḇenyawa ḇa sine, irya mkofrur kwar maḇe Aya.”—Matius 25:34-40.

19. Sai ḇefnai wun snemuk fa waso mnis Manfarkin koḇedi, Yesus i?

¹⁹ Yesus fyarkin manfamyan ḇyesya pdef fyor dek kaḇer ḇe nanki. (Matius 28:20) Rofyor isya ro supswan, ismai farfnoḇek nabore ro rur ḇesren, malaikat, ma Allah Wos Ḇyena fa fyarkin manfamyan ḇyesya. Inja, ikako nari ḇyuk farfnoḇek ḇemnis ḇe manfamyan ḇesouser ro baboine. Badan Pimpinan ”siso Rumkun Domba ani”, pdef Yesus i, ”ḇemoḇ rosai iḇeryayoḇ na”. (Fasasna 14:4) Inja, fyor kosomnis akurfasna Badan Pimpinan sya, kakuya koso Manfarkin koḇedi, isoine Yesus i. Kero wer, nari ḇyuk ḇeko kankenem fyoro ya. (Fasasna 7:14-17) Ma, nari osoḇaḇeri manfarkin snonkaku ḇebuk asas ḇerardirya!