1, 2. (a) Rosai ḇeḇese ro Saksi-Saksi Yahwe ma agama ḇesena? (b) Rosai nari kofarkor ro artikel ine ma artikel ḇeuser ya?

SAKSI-SAKSI YAHWE sifuken ker si, ”Mansei manfarkin mkoḇesi?” Snonkaku imḇe sfawi snar agama oso nya manfarkin snon ḇaido bin. Ḇape, kuker marisen kokofen ḇesi snar Manfarkin nkoḇedi ima snonkaku ḇenapesḇa risyaḇa. Manfarkin nkoḇedi isoine Yesus Kristus! Isouser Yahwe I ḇe Manfarkin ma Kma ḇyedi.—Matius 23:10.

² Kirine, raryur ro snon nasya kako sap siḇe ”manfamyan ḇeḇesyowi ma ḇefawi nananem” siso ḇefarkin Allah kawasa ḇyesi ro supswan. (Matius 24:45) Ḇape, Yahwe iso ḇefarkin ko ro Romawa Ḇyedi ke? Nari kawos roi rikyor ḇefrur fa kokyar faro roi nane. Kakuḇae, Yahwe ḇyuk snonkaku fa sfarkin kawasa ḇyesya, ḇape nari kofarkor Yahwe iso ḇefarkin kaku si ro fafisu iwara isof ro kirine.—Yesaya 58:11.

3. Rosai ḇefnoḇek Moses i fa fyarkin er Israel sya?

³ Allah ḇyuk rur ḇesren ḇe faker ḇyesya. Allah kyinfir Moses fa fyarkin er Israel sya. Rosai ḇefnoḇek Moses i fa ifrur fararur ḇefandun kaku ine? Snaro Yahwe ḇyuk ḇe  Moses i ”rur ḇesren Ḇyeja”. (Wasya Yesaya 63:11-14.) Inja, kakuya ḇefarkin Yahwe kawasa Ḇyesya iso Yahwe I, snar rur Ḇyeja iso ḇefnoḇek Moses i. 

4. Rosai ḇefasnaḇair Moses ismai Allah rur ḇyedi? (Mam sonin ro randak artikel ine.)

⁴ Snonkaku bisa smam Moses isma Allah rur ḇyeja ke? Imbo! Snar ismai rur ḇesren ro Yahwe I, inja Moses ifrur mujisat ma ikofenḇair Allah snonsnon ḇyeja ḇe Firaun, manpapoik Masir ḇesambraḇ ani. (Keluaran 7:1-3) Rur ḇesren ifrur Moses i fa ḇyemanfarkin ḇefrurpyum ma ḇekaḇaḇaḇ. Iḇesebur manpapoik ḇerarmomen ma ḇefabri mankun ro sup ḇeba ḇesena! (Keluaran 5:2, 6-9) Nane nfasnaḇair, Yahwe kyinfir Moses kwar fa ḇyemanfarkin ḇe kawasa Ḇyesya.

5. Mansei wer Yahwe ḇyuk rur ḇesren fa sfarkin kawasa Ḇyesya?

⁵ Snonkaku ḇese sisya Yahwe ḇyuk rur ḇesren fa sakfarkin kawasa ḇyesya ke? Refo ikofen, ”Nun romawa ḇyedi Yosua i, ifo kuker rur fawawi nanem.” (Ulangan 34:9) ”Yahwe rur ḇyedi ryama faro Gideon i.” (Hakim-Hakim 6:34) Ma, ”Yahwe rur ḇyedi fyararur ro Daud i.” (1 Samuel 16:13) Snon anskoine skokyar faro Allah rur ḇyedi inja bisa skofrur rosai monda jadi fa skofrur ro mankun sko ḇa. (Yosua 11:16, 17; Hakim-Hakim 7:7, 22; 1 Samuel 17:37, 50) Ine fasnaiḇair, Yahwe papoik ḇyeja nafnoḇek si fa sifrur roi ḇeba syadina. Inja, Yahwe iso ḇesyus fa ḇesma sanandik.

6. Sai ḇefnai fa Allah imarisen kawasa ḇyesya sesyowi manfarkin Israel sya?

⁶ Er Israel smam kaku snar Moses, Yosua, Gideon, ma Daud sismai Allah rur ḇesren ḇyedi. Iḇyekada rariso mamam er ansya? Iḇyeya, sḇesyowi Allah faker ḇyesine. Rofyor sawos nabor Moses i, Yahwe ifuken, ”Isof ro fafisu risai nari er ansine sesyowi ayaḇa?” (Bilangan 14:2, 11) Inja, Yahwe kyinfir snon ansya fa sfarkin kawasa Ḇyesya. Rofyor kawasa ansya sisouser snon ansine ido, kakuya sisouser Manfarkin sedi, Yahwe I. 

7. Rariso malaikat sya sifnoḇek Moses i?

⁷ Malaikat sya sifnoḇek Allah faker ḇyesya. (Wasya Ibrani 1:7, 14.) Allah ḇyuk malaikat fa fyarkin Moses i. Randak ya, malaikat oso ’fyasna mankundi kwar faroi ro manuk’ ma ḇyuk fararur ḇe i fa fyasparḇur er Israel sya ma fyarkin si. (Farfyar ro manwawansya 7:35) Ḇesuru ya, Allah ḇyuk sasoser ḇe Moses i roro malaikat fa fyarkor er Israel sya. (Galatia 3:19) Ḇekyor ya, Yahwe ikofen ḇe i, ”Wun kawasa ansi ḇe moḇ yakofenḇair ḇe au kwar ani. Nari yawan malaikat yedi fa fyarkin mko.” (Keluaran 32:34) Refo ikofenḇair ḇa er Israel smam malaikat  ani ke roḇa. Ḇape moḇ Moses fyarkin ma ḇyuk farkarkorna, nasnaibos snar malaikat sya siso ḇefnoḇek i. 

8. Rariso malaikat sya sifnoḇek Yosua ma Hizkia su?

⁸ Malaikat sifnoḇek mansei yawer? Refo ikofenbadir ”manfarkin ro raryur Yahwe sordade Ḇyesi”, isoine malaikat oso, ifnoḇek Yosua i fa ikafyo er Kanaan sya ro mamamun ya. (Yosua 5:13-15; 6:2, 21) Osower ido, rofyor Raja Hizkia fyarkin Allah kawasa ḇyesya, sordade ḇeba Asiria sḇuk wos makakak nari simkok Yerusalem. Ro roḇ oser, ”Yahwe malaikat ḇyedi syae ma myun snonkaku ri syaran utin oser samfur diwar seser dirim”.—2 Raja-Raja 19:35.

9. Allah faker ḇyesya sinapes ḇa rariryano, rosai fandun fa snonkaku Israel sifrurna?

⁹ Malaikat sima sinapes. Ḇape, snon sifnoḇek ansya sima roḇa. Raris, fafisu oso Moses ḇyesyowi Yahwe ḇa. (Bilangan 20:12) Yosua dor akurfasna ro Yahwe I ḇa fyor snonkaku Gideon siḇe sifrur ḇaḇeasas kuker i. (Yosua 9:14, 15) Fafisu oso Hizkia ikako darareri. (2 Tawarikh 32:25, 26) Snon ansine sinapes ḇa rariryano, fandun fa snonkaku Israel sisouser si. Er ansi sfawi Yahwe ifnoḇek snon ansya roro malaikat Ḇyesi. Ine fyasnaḇair snar Yahwe iso ḇefarkin kawasa Ḇyesya.

10. Rosai ḇefasnaḇair snar Allah Wos Ḇyena fyarkin Moses i?

¹⁰ Allah Wos Ḇyena fyarkin faker Ḇyesya. Ro Refo, Sasoser neḇebuk ḇe er Israel ma sfawi naḇe ”Sasoser Moses”. (1 Raja-Raja 2:3) Ḇape, Refo fyasnabos snar Yahwe iso ḇebuk Sasoser ḇe Israel sya. Moses ikako fandun fa isouserna. (2 Tawarikh 34:14) Raris, Yahwe fyasnaḇair ḇe i kwar rariso ifrur tabernakel ya, ”Moses ifrurna imnis rosai Yahwe iwan faro i na. Ifrurmnis kaku rarirya”.—Keluaran 40:1-16.

11, 12. (a) Rosai fandun fa Yosua ma raja-raja ḇepoik Allah kawasa ḇyesya sifrurna? (b) Rariso Allah Wos Ḇyena fyarkin snon ansine fa sḇe manfarkin?

¹¹ Rofyor ḇyemanfarkin, Yosua nya bar kermkun monda ro Allah Wos Ḇyena. Ramnai, Yahwe ḇyuk parenta ḇe i, ”Fandun fa wawasya kuker sne ḇerun ro ras ma roḇ, insama ḇefnder awer fa wafrur roi nakam ḇeḇefas kwar ro donna.” (Yosua 1:8) Ḇarpurya, raja ḇeḇepoik faro Allah kawasa ḇyesya fandun kaku siwasya Sasoser ine ras ḇe ras, sfas kaḇerna, ma sisouser ’wos sasoser nanekam ma farkankin nakam kuker sifrurna’.—Wasya Ulangan 17:18-20.

¹² Rariso Allah Wos Ḇyena fyarkin snon ansine fa sḇemanfarkin? Komamepen Raja Yosia i. Fyor Sasoser Moses sisrowna, Yosia manfasfas ḇyedi iwasya pyan ḇe Raja. * ”Rofyor raja imnaf ḇeri syap sasoser ani, pyansawek sansun ḇyedi.” Allah Wos Ḇyena nadif Yosia ifa imerdawdiwer amfyainir ḇero sup ani ma ifrur munara Paskah ḇeba kaku ro sarisa er ansya. (2 Raja-Raja 22:11; 23:1-23) Yosia ma manfarkin ḇesouser ḇesesya sisouser Allah Wos Ḇyena inja simarisen sifadwer akurfasna sḇuk kwar ḇe Allah kawasa ḇyesi. Bon ya, kawasa ansi sisouser Yahwe I.

13. Rosai ḇeḇese ro manfarkin Allah kawasa ḇyesya ma manfarkin er ḇesesya?

 ¹³ Manfarkin er ḇesesya sisma farkankin roro fawawi kermkun snonkaku sya. Raris manfarkin er Kanaan sya ma kawasa ḇyesya sifrur roi ḇeḇarḇor nabore, raris fararur farbuk kuker kina sesya, snon kuker snon ḇaido bin kuker bin, ma aiwan sya. Sisyom faro amfyainir kako ma romawa sesya sḇuk siḇe farsarser ro farsamsyom sena. (Imamat 18:6, 21-25) Osower ido, sasoser saranden faro manfarkin Babilon ma Masir naḇyeḇa kaku, siḇesebur kuker Allah kawasa Ḇyesya. (Bilangan 19:13) Ḇape, Allah kawasa Ḇyesya na smam snar manfarkin ḇesouser seja simarisen insa farsamsyom sena nasren pdef. Manfarkin sine kako simarisen sisren ro baken sena ma sebinkwanbur fararur farbuk ḇeḇyeḇa na. Nane nfasnaḇair Yahwe iso ḇefarkin si.

14. Sai ḇefnai fa Yahwe ḇyuk samamyai ḇe manfarkin ḇeḇeso ḇefarkin kawasa Ḇyesya?

¹⁴ Raja-raja ḇefarkin Allah kawasa ḇyesya sikam siso Allah akurfasna Ḇyenaḇa. Raja-raja ḇesoasuser ḇa ansi simewer sisouser Allah ma simewer siso farkankin ro rur ḇesren, malaikat ḇyesi ma Wos Ḇyena. Ro fafisu ḇeḇeso, Yahwe ḇyuk samamyai ḇaido fyadwer manfarkin ḇeradirya. (1 Samuel 13:13, 14) Ro ras ḇarpurya, Yahwe kyanow manfarkin oso ḇemnis kaku.

15. (a) Rariso nabi sya sfasnaḇair nari manfarkin ḇenapes oso isya? (b) Mansei manfarkin ḇenapes ani?

¹⁵ Ro taun syaran ri syaran, Yahwe ḇyeasas nari kyanow manfarkin ḇenapes faro kawasa Ḇyesya. Ine nasnaibos rofyor Moses dawos ḇe snonkaku Israel sya, ”Nabi oso rofandu mko, rofandu naek srar mkobansi, raris aya, nari ḇyeḇebawes faro mko roro Yahwe I, Allah mkoḇedi—faro i fandun fa mkonafi—.” (Ulangan 18:15) Yesaya ikako ikofen snar Mankun ine nari ḇye ”manfarkin ma mananir sarar”. (Yesaya 55:4) Daniel ikako fyas kuker Mesias nari ḇye ”Manfarkin”. (Daniel 9:25) Ma ḇarpur ya, Yesus mankundi dap iḇe ”Manfarkin” Allah kawasa Ḇyesi. (Wasya Matius 23:10.) Yesus manfamyan ḇyesya simarisen siso i ma sikyar snar Yahwe iso ḇekinfir i. (Yohanes 6:68, 69) Sai ḇefnai fa sikyar Yesus Kristus iso Yahwe kyinfir fa ḇefarkin kawasa Ḇyesya?

16. Rosai ḇefasnaḇair snar Yesus isma rur ḇesren?

¹⁶ Yesus ismai rur ḇesren. Fyor Yesus ḇyebaptis, Yohanes Ḇeḇebaptis myam ”nanki ḇyas, ma Rurḇesren ya isaḇu ro i imnis manjawa”. Ma fyoro ḇa, ”rur ya fyarkin Yesus ḇe sup ḇeursḇa”. (Markus 1:10-12) Ro fararmyan ḇyena ro supswan, Allah ḇyuk ḇe Yesus i rur ḇesren ḇyeja inja Yesus bisa ḇyuk farkarkor ma ifrur mujisat. (Farfyar 10:38) Osower ido, rur ḇesren ifnoḇek Yesus fa fyasnaḇair saswar, raryaḇ, ma kakyar ḇesambraḇ kaku.  (Yohanes 15:9; Ibrani 12:2) Bardibur manfarkin ḇesesya, fasasna nabor nasya ḇefasnaḇair Yesus nya Allah rur ḇesren ḇyedi. Nane nfasnaḇair Yahwe iso ḇekinfir Yesus i ḇe Manfarkin.

17. Rariso malaikat sifnoḇek Yesus i?

¹⁷ Malaikat sifnoḇek Yesus i. Fyor Yesus ḇyebaptis ramnai, ”malaikat-malaikat srama fa suf farmyan Yesus”. (Matius 4:11) Ro roḇ imar ḇaim, ”malaikat oso ro nanki fyasnai faro Yesus ma ḇyuk samambraḇ faroi”. (Lukas 22:43) Yesus ikyar snar Yahwe nari iwan malaikat fa ifnoḇek i fyor fyandun farfnoḇek.—Matius 26:53.

18, 19. Rariso Allah Wos Ḇyena fyarkin Yesus kankenem ma farkarkor ḇyena?

¹⁸ Allah Wos Ḇyena fyarkin Yesus i. Yesus imarisen Allah Wos Ḇyena fyarkin iro randak fararmyam ḇyena isof marmar ḇyeja ro ai kandera. Iba syadiwer ro swaf imbe imar ya, dap kaḇer bardadi kuker Mesias i. (Matius 4:4; 27:46; Lukas 23:46) Ḇape, manfarkin agama ro fafisu ya siḇesebur kuker Yesus i. Smamkyof Allah Wos Ḇyena fyor roi anna namnisḇa kuker farkarkor sena. Yesus dap kaḇer Allah Wos Ḇyena fyor dawos kuker si, ”Er ine som Aya kuker sḇardip monda, Mḇoi sisnesna kada nbinkwan bur Aya. Fromo monda kakyar ma nadi sena faro Aya, snar farkarkor ssḇuk farkor na sasoser snonkaku monda.” (Matius 15:7-9) Yahwe nari kyinfir ḇa snon ḇesouser Wos Ḇyenaḇa fa sfarkin kawasa Ḇyesi.

¹⁹ Yesus i kako ḇyuk Allah Wos Ḇyena rofyor ḇyuk farkarkor. Fyor manfarkin agama sya sifrowes i kuker fakfuken,  kyarem si kuker pengalaman ḇaido kakara mankun ḇyenaḇa. Mḇoi ḇyuk kankarem ro Allah Wos Ḇyena. (Matius 22:33-40) Osower ido, Yesus bisa ifrur snonkaku smanen i kuker fyawar kankenem ḇyedi ro nanki ḇaido kuker Yahwe braur Ḇyena. Ḇape, imarisen kaku Allah Wos Ḇyena, inja imarisen fyarkor Wos anna ḇe snonkaku ḇesesya. Ma, ”ḇyas swaruser sena, isof sifawi wos Refoya”.—Lukas 24:32, 45.

20. (a) Rariso Yesus ḇyesyowi Yahwe I? (b) Rosai ḇeḇese ro Yesus ma Herodes Agripa I rari suḇena?

²⁰ Snonkaku ḇerower Yesus sya simarisen kaku faro nyan ḇyuk farkarkor ya. Ḇape, Yesus ḇyuk sanandik ḇe Guru ḇyedi besya kwar, isoine Yahwe I. (Lukas 4:22) Rofyor snon ḇenana oso imbe isandik Yesus kuker ikofen, ”Mankorari ḇeḇye,” Yesus fyasna sne ḇerun pdef ma ikofen, ”Snaro wor ayaḇe ḇeḇye? Oso ro fandu snonkaku iḇye syadi Allah ḇa, Allah demir.” (Markus 10:17, 18) Ḇape, Herodes Agripa I iso ḇepoik ro Yudea ro swaf taun riwar wer. Ima nya rari ḇeḇesebur kuker Yesus i. Ras oso, ifrur munara ḇeba kaku ma syansun sansun ḇaḇesasoser ḇekakur ma ḇepduk. Rofyor snonkaku smam ma srower dawos ya, sibras, ”Ine Allah mkaren ḇyedi ma mkaren snonkaku ḇa!” Herodes imarisen sisandiki. Ḇarpurya rosai ḇejadi ya? ”Ro fafisu aniḇeri malaikat oso ḇyaserbosi snar ḇyesyowi Allah ḇa. Inja karom sya sani isof imar.” (Farfyar 12:21-23) Ine kyurfasna, Herodes ima manfarkin Yahwe kyinfir risyaḇa. Iḇeseḇur kuker Yesus i, fyasnaḇair snar ima Allah kyinfir dirya. Ḇyesyowi Yahwe ḇe Manfarkin Ḇeba syadi ro kawasa Ḇyesi.

21. Rosai nari kofarkor ro artikel ḇeuser ya?

²¹ Yesus nari ḇye Manfarkin ro swaf taun ḇeḇeso mondaḇa. Fyor ḇyeḇebawes kaḇer, Yesus ikofen ḇe manfamyan ḇyesya, ”Papoik nakam ro boiyaswa ma supswan ine neḇeḇuk kwar maro Aya.” Ramnai ikofenwer, ”Aya ine nari yarous mko besya kwar isof awar ḇepupes.” (Matius 28:18-20) Ḇape, rariso Yesus na fyarkin Allah kawasa ḇyesya ro supswan fyor isya ro nanki ma komam i ḇa? Mansei nari Yahwe kyinfir ḇe faker Yesus ḇyedi ro supswan? Ma rariso snonkaku Kristen sya smambir faker Allah ḇyesine? Kankarem ḇyena nasya ro artikel ḇeuser ya.