1, 2. (a) Rosai Yahwe ikofenbadir ḇekona? (b) Asas rosai neḇefas ro Yesaya 46:10, 11 ma 55:11?

WOS ḇerandak ḇero Refo naser wos ḇepyan ḇape, naser wos ḇedo kaku, ”Ro randakya Allah ifrur supswan ma farsyos.” (Kejadian 1:1) Komam kermkun monda ro Yahwe braur ḇebor ḇyena ḇero farsyos ma supswan ma kofawi kermkun monda kuker kawanwan, sananai, ma gravitasi. (Pengkhotbah 3:11) Ḇape, Yahwe ikofenbadir ḇeko marisen Ḇyena faro supswan ma snonkaku sya. Ifrur snonkaku sya imnis kuker fanir Ḇyedi ma imarisen sismai aski ro supswan. (Kejadian 1:26) Nari sḇe romawa Ḇyedi ma ḇye Kma faro si.

² Ro fasal ḇeḇe kyor syap Kejadian, kofarkor kwar Yahwe marisen ḇyena nasmai roi ḇedwarek. (Kejadian 3:1-7) Ḇape, Yahwe bisa ifrurmnis kaḇer roi ḇedwarek ani. Osoḇaḇeri nari ḇedwarek I ḇa. (Yesaya 46:10, 11; 55:11) Na kokyar kaku Allah marisen ḇyena ro randak ya nari ḇyendarirya kaku ro fafisu dap kwarna!

3. (a) Farkarkor ḇefandun rosai ḇefnoḇek ko kwar fa kofawimnis farkarkor ḇero Refo? (b) Sai ḇefnai fa nari kawos farkarkor nane? (c) Fakfuken rosai nari kawosna?

 ³ Kofawi kwar Allah marisen Ḇyena faro supswan ma snonkaku sya, ma kako faro Yesus fararur ḇyedi ro Allah marisen Ḇyena. Nanekam kakaku ḇefandun ro Refoya, ine kofawina kwar fyor kofarkor randak Refoya. Kirine komarisen kofarkor snonkaku ḇesesya fa sakfawi farkarkor ḇefandun kaku nane. Kona swaf ḇepyum kaku fa kofrurna ro taun ine fyor kor snonkaku ḇesesya fa sakso ro Swarapepen Marmar Kristus. (Lukas 22:19, 20) Rofyor srama ro munara ḇefandun kaku ine ido, nari sfarkor nabor kuker Allah marisen ḇepyum kaku Ḇyena. Inja, kirine swaf ḇepyum kaku fa kokara fakfuken rosai monda na kokinfir fa kobuki dawos ḇe si insa simarisen srama ro munara ine. Ro artikel ine, nari kawos fakfuken rikyor: Rosai Allah marisen Ḇyena faro supswan ma snonkaku sya? Sai ḇefnai roi ḇedwarek nasya? Sai ḇefnai fa farsarser fasaspar Yesus ḇyedi iso nyan ḇesae insama Allah marisen Ḇyena ndarirya?

4. Rariso braur ”fyasnaḇair Allah baba ḇyedi”?

⁴ Yahwe iso Manḇedaw ḇekaki syadi. Rosai ifrurnakam napyum kaku. (Kejadian 1:31; Yeremia 10:12) Rosai kofarkor ro payamyum ma fasasos ḇemnis ro braur Ḇyenakam? Kofarkor kwar rosai Yahwe ifrurkamna ro roi ḇekasun isof ro roi ḇebana nefainda. Ramnai, kwarapan sel ḇepyum kaku ḇero baken snonkaku sya, kapira ḇeḇeaben babo ḇaido mam orisyun ḇepduk kaku, rariso sneḇaḇir bedi? Komanen kaku faro rosai Yahwe ifrurnakam snar Yahwe ḇyuk samambraḇ ḇeko fa koḇaḇir roi ḇepyum kakuna.—Wasya Mazmur 19:1; 104:24.

5. Rosai Yahwe ifrur insama braur ḇyenakam bisa sfararur kayam mnis kaku?

⁵ Yahwe fyasos mnis kaku braur ḇyenakam. Ifrur sasoser ro alam ma sasoser moral-na. Ifrur sasoser nanekam insama rosai monda ḇero supswan ma farsyos sifararur kayam mnis kaku. (Mazmur 19:7-9) Rosai ḇero farsyos ma supswan inekam sna moḇ ma fararur oser-oser. Imnis raris, sasoser gravitasi ine myamwarek atmosfer insa fyanam pdef ḇe supswan ya, ma fyara soren ma dadapna. Gravitasi noḇa ido, kankenem ḇero supswan ine nasyaḇa. Sasoser ḇyenakam Yahwe ifrurna insa roi ḇero farsyos ma supswan ine nambran pyum. Ine kyurfasnai Yahwe nya marisen faro supswan ma snonkaku sya. Rofyor kobaryas, bisa kofnoḇek snonkaku sya fa smambir kaku Manḇedaw roro supswan ma farsyos ḇepyum kaku ine.—Fasasna faro Yohanes (Wahyu) 4:11.

6, 7. Fakamaman ḇeḇeso rosai Yahwe ḇyuk ḇe Adam ma Eva su?

⁶ Yahwe imarisen insama snonkaku sya sikenem fyoro ro supswan. (Kejadian 1:28; Mazmur 37:29) Ima nya snemura. Ḇyuk ḇe Adam ma Eva su fakamaman nabor kaku. (Wasya Yakobus 1:17.) Yahwe ḇyuk ḇesu marisen  fa sukinfir ma samambraḇ fa suḇuki kara, sufasnai saswar, ma suna ḇaḇebati. Manḇedaw dawos ḇe Adam i ma ḇyuk parenta insa ifrur rosai ḇeḇye ya. Adam ikako fyarkor rariso fyaduru mankundi, aiwan sya ma moḇ ani. (Kejadian 2:15-17, 19, 20) Yahwe ḇyuk ḇe Adam ma Eva samambraḇ fa suḇaḇir, supan, sumam, surower, ma sunas roi ḇepyum ifrur ḇesuna. Ro roi nane, na susmai marasrisen ro rum ḇepyum suḇedi. Adam ma Eva suna kako fararur nabor ḇepyum nari sufrurna. Bisa sufarkor pdef ma susrow roi ḇebabo oso isof fyoro-fyoro.

⁷ Rosai Allah marisen ḇyena wer? Yahwe ḇyuk ḇe Adam ma Eva su fa suna romawa ḇemnis kaku. Ma romawa suḇesya sakna romawa wer isof supswan ine ifo kuker snonkaku sya. Yahwe imarisen insama sinan sya siswar romawa sesya, imnis raris iswar romawa ḇemnis kaku ḇyesuya Adam ma Eva su. Yahwe ḇyuk ḇe snonkaku sya supswan ma rosai ḇemaeja ma ḇepyum ḇero dorina. Supswan ine nari ḇyerum suḇedi isof fyoro-fyoro.—Mazmur 115:16.

8. Sai ḇefnai fa Allah ḇyuk sasoser ḇeḇefas ro Kejadian 2:16, 17 ḇe Adam ma Eva su?

⁸ Ḇape, roi ḇeḇejadi nakam nambran mnis kuker Yahwe marisen Ḇyena ḇa. Sai ḇefnai ya? Yahwe ḇyuk ḇe Adam ma Eva sasoser ḇepyan insama sufawi ḇaḇemkei suḇena nasyadiḇa. Ikofen, ”Bon ro aiknam ḇero yaf ine wan mura isof warbor. Ḇape kuker aiknam oso ḇefasnaḇair fawawi kuker roi ḇeḇye ma ḇeḇyeḇa, wan awer bon ḇyena, snar fafisu wanna nari wamar.” (Kejadian 2:16, 17) Sasoser ani napyan fa sufawina. Inema roi ḇe samswen ḇa fa susouserna snar roḇeyan ḇeyankir nabor nasya ro yaf ani.

9, 10. (a) Setan kyursof Yahwe ifrur rosai? (b) Snemuk rosai Adam ma Eva suyun na? (Mam sonin ro randak artikel ine)

⁹ Setan Ibiris ḇyuk ikak oso fa ifrowes Eva insama isouserḇa faro Kmari, Yahwe I. (Wasya Kejadian 3:1-5; Fasasna 12:9) Setan ifrur Eva ḇyeḇirḇar kuker ifuken sai ḇefnai fa snonkaku san awer ’bon ro aiknam ḇero yaf ani’. Ine imnis raris ikofen, ’jadi fa wafrur roi wamarisen wafrurna’. Ramnai ikofen wer ḇe Eva i, ”Kaku ḇeri nari wamarḇa.” Ine wos ankarkar rirya. Ḇyuk kakakyar ḇe Eva insama ryower awer Allah I. Setan doḇe, ”Allah ifawi ro ras wanna, nari mkamna nbase.” Setan ikofen Yahwe imewer suyan aibon ani, snar nari suna fawawi ḇekaki. Ramnai, Setan ḇyuk asas ḇekaku ḇa isoine, ”Nari wamnis Allah, wafawi roi ḇeḇye ma roi ḇeḇyeḇa.”

¹⁰ Adam ma Eva fandun fa suyun snemuk. Sumarisen susouser Allah ḇaido ikak ani ke? Ḇape kaku ya, sukinfir fa susouser Allah I ḇa. Supampum Yahwe I ḇe Kma suḇedi ma suwaira Setan i. Fafisu ya sukenem ro mankunsu, ma susma kadaun ro Yahwe wer ḇa.—Kejadian 3:6-13.

11. Sai ḇefnai fa Allah myam monda ḇa faro sasar Adam ma Eva sufrurna?

¹¹ Rofyor Adam ma Eva sufrur Allah parenta ḇyena werḇa, suḇe snonkaku  ḇenapes ḇa. Suḇe mbroḇ faro Allah snar dayin kaku ḇaḇeḇarḇorna. Yahwe ’mkasi nasren kaku fa myam roi ḇeḇyeḇana.’ (Habakuk 1:13) Yahwe myam monda faro sasar Adam ma Eva sufrurna ido, payamyum ro braur ḇyenakam nari sisma samswen ḇeba. Malaikat ma snonkaku sya imbude nari sḇeḇirḇar imbe sikyar faro Yahwe wos ḇyena ke roḇa. Ḇape, damk nako sasoser ḇyena ma ḇyeyuk naḇa. (Mazmur 119:142) Adam ma Eva suna kankinfir ro mankunsu raryano, supok sukandenbur roi ḇeḇyeḇa snar susouser Allah parenta ḇyenaḇa. Iso ḇefnai fa sumar ma sukaḇer wer ḇe saprop.—Kejadian 3:19.

12. Rosai Adam romawa ḇyesi sismana?

¹² Rofyor Adam ma Eva suyan aibon ani, Yahwe pyampum su inja suḇe Allah kina ḇyeja wer ḇa. Iyaw subur yaf Eden, ma sukaḇer ḇe diwa werḇa. (Kejadian 3:23, 24) Yahwe dor su fa sukamar snemuk suyunna. (Wasya Ulangan 32:4, 5.) Inja, jadi fa sufarari mnis kakuḇa Allah rari-rari ḇyena. Adam ma romawa ḇyesi kako sisma fafisu ḇepyum ḇeramaya ḇa. Roi ḇyukna iso ḇaḇenanapesḇa, sasar, ma marmar. (Roma 5:12) Adam ifrur romawa ḇyesi sisma swaf wer ḇa fa sikenem fyoro. Adam ma Eva na suna romawa ḇemnis kaku wer ḇa, ma romawa suḇesya kako na sakna romawa ḇemnis kaku ḇa. Setan ifrur Adam ma Eva sumbroḇ Allah I, ma ḇyensewar kaker fa daw ninyan snonkaku sya fa sakḇembroḇ Allah I.—Yohanes 8:44.

13. Rosai Yahwe imarisen faro snonkaku sya?

¹³ Yahwe iswar kaker snonkaku sya. Adam ma Eva subur I raryano, imarisen kaker snonkaku sya sna fasfesepen ḇepyum kuker I. Imewer osoḇaḇeri imar. (2 Petrus 3:9) Inja, Allah ifrur fasasos ḇeri insama snonkaku sya bisa sḇebati wer kuker I. Rariso ifrur roi nane ḇape iyuk sasoser ḇyena ḇa? Mkorama komame.

14. (a) Ro Yohanes 3:16, rosai Allah ifrurna insama snonkaku sya simkei ro sasar ma marmar? (b) Fakfuken rosai bisa kowawos kuker si?

¹⁴ Wasya Yohanes 3:16. Snonkaku ḇebor kor fa ḇerama ro Swarapepen ansi sifawimnis kaku mnuk ine. Ḇape, rariso farsarser fasaspar Yesus ḇyedi nḇuk kankenem fyoro ya? Kona swaf fa kofnoḇek snonkaku sya fa sifawimnis kankarem ro fakfuken ine rofyor kor si fa sakso ro Swarapepen ani, rofyor kosya kuker si ro munara ya, ma rofyor korama kaḇer ḇesi. Sifawimnis kuker farsarser ani ido, nari sifawi kaku snar Yahwe ima iswar fafaya snonkaku sya ma nya fawawi nanem. Ḇar ḇefandun  rosai kuker farsarser bisa kokofenḇair ḇe si?

15. Rosai ḇeḇese ro Adam ma Yesus su?

¹⁵ Yahwe ḇyuk snonkaku ḇenapes kaku fa ḇyuk kankenem ḇyedi ḇe fasaspar. Snonkaku ḇenapes kaku ine fandun fa isouser ḇe Yahwe I. Fandun fa ḇyuk kankenem ḇyedi faro snonkaku sya. (Roma 5:17-19) Yahwe iwan Yesus, braur ḇerandak ḇyedi ro nanki ḇe supswan. (Yohanes 1:14) Inja Yesus ḇyesnonkaku ḇenapes kaku raris Adam i. Iḇese kuker Adam i, Yesus ima isouser faro rosai Yahwe dornakam ro snonkaku ḇenapes sya. Isma farawrowes ḇemarḇak kaku raryano, isouser pdef ḇe Allah I.

16. Sai ḇefnai fa fasaspar ima fakamaman ḇemaeja kaku?

¹⁶ Snar Yesus ima snonkaku ḇenapes, inja marmar ḇyeja bisa nbuk fasaspar ḇe snonkaku sya ro sasar ma marmar. Rosai Yesus ifrur nane fandun fa Adam ifrurna kako. Yesus ima snonkaku ḇenapes kaku, ma isouser ḇe Yahwe I. (1 Timotius 2:6) Ḇyuk kankenem ḇyeja ḇeko, ma farsarser fasaspar ḇyuk nane nbuk swaf faro snon, bin, ma romawa sya insa sisma kankanem fyoroya. (Matius 20:28) Farsarser fasaspar Yesus ḇyedi iso nyan ḇesae insama Allah marisen Ḇyena ndarirya.—2 Korintus 1:19, 20.

17. Rosai fainda ro fasaspar ya?

¹⁷ Kuker ḇaḇyak ḇekaki Yahwe ḇyuk fasaspar ḇeko. (1 Petrus 1:19) Snar iswar kaku ko, inja ḇyuk Rumkun Ḇyeja fa imarwarek ko. (1 Yohanes 4:9, 10)  Inja rarirya, Yesus iso ḇe kma koḇedi, Adam i ḇa. (1 Korintus 15:45) Yesus ifrur roi nane insa kosma kankenem fyoro mondaḇa ḇape ras oso nari koḇe Allah kina ḇyesi wer. Roro fasaspar ya, snonkaku nari sḇe snonkaku ḇenapes ma Yahwe bisa dun si ḇe kina ḇyesi kuker iyuk sasoser makun ḇyena ḇa. Rofyor snonkaku ḇesouser faro Yahwe sḇe snonkaku ḇenapes, inema roi ḇeyun marisen ḇeba kaku! Inja, ḇekenem ro nanki ma supswan sya nari sḇekina oser. Kokam nari koḇe Allah romawa ḇyesi.—Roma 8:21.

18. Fafisu risai Yahwe nari ḇye ”roi ḇebor faro snonkaku oser-oser”?

¹⁸ Sinan ḇerandak koḇedi supampum Yahwe raryano, Yahwe iswar snonkaku sya pdef, ma ḇyuk fasaspar ḇeko. Koḇe snonkaku ḇenapes ḇa mboi Setan ipok idwarek koḇa fa kosouser ḇe Yahwe I. Roro fasaspar, Yahwe ifnoḇek ko fa koḇe snonkaku ḇenapes. Wawasen kada kankenem ro fafisu iyama rofyor snonkaku ”ḇemam rumkunya, ma ḇekyar faroi” nari sisma kankenem ḇekain fyoro. (Yohanes 6:40) Kma ḇena saswar ma ḇefawi nanem koḇedi nari ifrurmnis asas Ḇyena ndarirya ma ifnoḇek snonkaku fa sḇe snonkaku ḇenapes. Nari Yahwe ḇye ”roi ḇebor faro snonkaku oser-oser.”—1 Korintus 15:28, Kitab Suci Terjemahan Dunia Baru (NW).

19. (a) Koḇesyowi fasaspar ine ido, rosai nari kofrurya? (Mam kotak ” Mkorama Kosewar Pdef Ḇemarisen Ḇerower Sya.”) (b) Rosai nari kofarkor ro artikel ḇeuserya?

¹⁹ Koḇesyowi farsarser fasaspar ine ido, nari nadif ko fa kokofenbadir ḇe snonkaku ḇesesya kuker fakamaman ḇepyum kaku ine. Snonkaku fandun fa sifawi kakaku ro farsarser fasaspar ine, snar Yahwe kuker sawarwar ḇyuk swaf ḇe snonkaku syakam fa sikenem fyoro. Ḇape, fainda ḇebor nasya wer snar farsarser fasaspar ani. Nane nbuk kankarem faro safsof Setan kyur ḇe Allah I ro yaf Eden. Nari kawos roi nane ro artikel ḇeuserya.