1, 2. Rosai Naek oso kyarana ma rosai ifrurna?

FYOR Robert byabo kaker ḇyebaptis kwar, mboi napnapes nsun kaku ro sneri ḇa. Ikofen, ”Snonkaku smam roḇandi ido soḇo yafarmku kwar. Yafrur sasar ḇa, yaso ker fananjur ya, ma yakḇe merintis ekstra ro paik riḇeso. Nanekam ndarya monda ro ras ḇe ras. Mankundaya ido, yaḇaḇir yamnis mankun ḇaime.”

² Rofyor Robert fyarḇuk kwar sape fyawi mankundi imnis ḇaime. Fyorno ido, swarisu sufakfukenyae su kuker Refoya. Swari kyarem fawi fakfuken ḇyena snar ifawi kaku Refoya, mboi Robert mankundi kyarem fawi swari fakfuken ḇyena ḇa, inja imai. Ikofen ḇo doḇe, ”Ayama yafawi royoḇa. Inja yakara ’imbe yafnoḇek swa yeja fa daksmai kyaremso ro Allah ido, fandun fa yafrur roi oso.’” Ikofenwer, ”Inja yafarkor kaku Refoya wer, ma yafarkorna ras ḇe ras. Fyoro mura ido, yafawi kaku Refoya, ma ḇepyum syadiya yaḇebati fanam kuker Yahwe I.”

3. (a) Farkarkor rosai kun ro Robert farfyar ḇyedine? (b) Fakfuken rosai monda nari kowawosna?

³ Ko kako kun farkarkor ro Robert farfyar ḇyedine.  Imburo kofawi farkarkor ro Refo mboi nabor ḇa, koso fananjur ker, ma komyaren fa koḇaryas. Ḇape, roi kofrur nane na nafnoḇek ko ḇeriḇa fa kona kakara raris Allah kakara Ḇyena. Imbude kofrur roi ḇepyum fa kosmai kyaremso ro Allah I. Ḇape, rofyor komam mankunko ma roi ḇesasar nasya kaker ro ko ido, fandun fa komamuserna resari. (Filipi 3:16) Ro artikel ine, nari kowawos fakfuken ḇefandun rikior: (1) Rariso kofawi kosmai Yahwe kyaremso Ḇyena? (2) Rosai na kofrurya insama kofawi Allah marisen Ḇyena? (3) Rariso kona kakara ḇefrur marisen Allah I ro kankenem koḇena ras ḇe ras?

4. Mansei monda na ḇeso anun ḇero Efesus 4:23, 24?

⁴ Fafisu iwara rofyor kofarkor randak Refoya, kofrur fararwei nabor ro kankenem koḇena. Ḇape, koḇebaptis kwar ido kofandun fararwei nabor wer. Refo ikofen bo doḇe, ”Kakara ḇeḇor mkoḇena nbabo” pdef. (Efesus 4:23, 24) Osower ido, kofandun fararwei ker snar konapes ḇa. Kofarmyan ḇe Yahwe taun utin ma utin kwar raryano, wis koḇena faro Yahwe fandun fa nasambraḇ pdef.​—Filipi 3:12, 13.

5. Fakfuken rosai na kokarauserna fa kofawi koso Allah farkankin Ḇyena kwar ke roḇa?

⁵ Faro ḇeḇesinan sya ḇaido romawa babo sya, kokame fandun komambir pyum kaku ko. Kwara fakfuken nane: ’Fafisu ine yaso Allah farkankin Ḇyena kwar ke? Kenem yedine imnis raris Kristus i kwar ke? Moḇ yawos ma yafrurpyum ḇesesya nfasnaḇair yaso Allah farkankin Ḇyena kwar ke? Ro awawos yena, rosai kaku ḇero swaruser yena? Rariso kuker farkakor Refo mankun yedi, moḇ yasansun aya raya, ḇaido kakara yena rofyor sḇuk wos anun ḇe aya? Rofyor yasma fafrowes fa imbe yafrur sasar ido, rosai na yafrur ya? Yaḇe snonkaku Kristen ḇemas kwar ke?’ (Efesus 4:13) Kokarauser fakfuken nane ido, nari kofawi koso Allah farkankin Ḇyena kwar ke roḇa.

6. Rosai wer kofandunna insa kofawi koso Allah farkankin Ḇyena kwar ke roḇa?

⁶ Fyorno ido, kofandun snonkaku ḇesesya fa sifnoḇek ko. Smam kakara koḇena namnis kuker Yahwe kakara Ḇyena kwar ke roḇa. Manwawan Paulus doḇe, snonkaku ḇeso marisen ḇyena fyawiḇa snar kenem ḇyena nafrur Allah imarisen ḇa. Ḇape, snonkaku ḇeso Allah farkankin Ḇyena, fyawi Yahwe kakara Ḇyena ma rosai Allah imarisenḇana ro snonkaku ḇeso marisen sena. (1 Korintus 2:14-16; 3:1-3) Penatua ḇeso Allah farkankin Ḇyena raris Kristus i, na sifawi ḇeri  snar naek srar Kristen sino siso marisen mankun sena. Rarirya sifnoḇek siḇeri. Inja, penatua sibe sifnoḇek ko ido, nari komnaf si ma kofarwei kenem koḇena ke? Rarirya ido, kofasnai komarisen koso Allah farkankin Ḇyena ro ras ḇe ras.​—Pengkhotbah 7:5, 9.

7. Rariso kofawi snonkaku ḇeso Allah farkankin ḇyena iso snonkaku ḇena fawawi ro Refo monda ḇa?

⁷ Insama koso Allah farkankin Ḇyena ido, fawawi Refo koḇena kermkun monda awer. Raja Salomo fyawi nabor kuker Yahwe I, ma wos ḇepyum ḇebor ḇyena neḇefas ro Refo dori. Ḇape, ḇarpur mura ḇyinkwanbur Yahwe I ma isouser Yahwe werḇa. (1 Raja 4:29, 30; 11:4-6) Inja, rosai na kofrurna insama koso Allah farkankin Ḇyena? Fandun fa kosambraḇser kakyar koḇena. (Kolose 2:6, 7) Moḇsa kofrurna rai?

8, 9. (a) Rosai na ḇefnoḇek ko insama kakyar koḇena nadworen? (b) Rosai imbe kosma kakuna rofyor kofarkor ma kokarauserna? (Mam sonin ro randak artikel ine.)

⁸ Ro abad randak aniwara, Paulus danun faro snonkaku Kristen insama ’simbrar ro farkarkor ḇemnis’. (Ibrani 6:1) Moḇsa kofrur ine rai? Nyan oser isoine kofarkor syap Cara agar Tetap Dikasihi Allah. Syap ani na ifnoḇek ko fa kofawi moḇsa koso wos farkin ḇero Refo ro kankenem koḇena raya. Kofarkor syap ani fa ibro kwar ido, kun fawawi royo publikasi ḇesenawer insama kakyar koḇena nadworen. (Kolose 1:23) Kokarauser kaku rosai kofarkor kwarna ma kor Yahwe ifnoḇek ko fa kofrurna.

⁹ Rosai imbe kosma kakuna rofyor kofarkor ma kokarauserna? Roi imbe kosmana iso insama komarisen syadiwer fa kofrur Allah imarisen ma kosouser I. (Mazmur 40:8; 119:97) Osower ido, rofyor kofarkor ma kokarauserna, nari kosambraḇ fa kopampum rosai monda ḇefrur koso Allah farkankin Ḇyenaḇa.​—Titus 2:11, 12.

10. Rosai romawa babo sifrurna insama ḇaḇebati sena kuker Allah inako pdef?

¹⁰ Ḇe romawa babo kaker ido, rosai imbe wafrur fa wafnoḇek ro sidang?  Naek oser ḇefarmyan ro Betel, fyorno ido dawos ker ḇe romawa babo imbe ḇeḇebaptis ro munara kebaktian wilayah sya ma ifuken rosai imbe sifrur ro kankenem sena ya. Roro awawos sena, fyawi snar romawa babo ḇebor sya skara kwar rosai imbe sifrur ḇeḇarpon fa sifarmyan ḇe Yahwe I. Sino sakḇe merintis ḇaido sramura ḇe moḇ ḇena manbaryas ḇebor ḇa. Ḇape, romawa babo sino sifawi ḇaim rosai imbe sifrur ḇe ḇarponna. Ine kyurfasna sifawi rosai imbe sifrurna ḇake? Romawa babo risau ido, wafuken mankundaw, ”Sinan ayesu suiso ḇewan kaku aya fa yaso fananjur ma yabaryas ke? Ḇaido ḇaḇebati yedi kuker Allah syambraḇ kwar ke? Kokame, ḇeḇesinan kwar ḇaido romawa babo, fandun fa kofawi rosai imbe kofrurna insama ḇaḇebati koḇena kuker Allah inako pdef.​—Pengkhotbah 12:1, 13.

11. (a) Rosai kofrurna insama kofadwer fasaw ḇeri roi oso ḇemnis ḇaim na? (b) Na koso mansei nyan ḇyena?

¹¹ Rofyor kofawi roi oso namnis ḇaim ro ko ido, kofadwer fasaw ḇerina. Snar kofrurna ido na kosma kankenem, mboi kofrurna ḇa ido na komar. (Roma 8:6-8) Yahwe dor ko fa kofrurna namnis kaku ra I ḇa. Ḇyuk rur ḇesren Ḇyedi fa nafnoḇek ko. Ḇape, kono koḇensewar fa kofrurna. Naek John Barr, fafisu iwara ḇeḇeoser ro anggota Badan Pimpinan,  dawosḇair mnuk ḇero Lukas 13:24. Ikofen, ”Snonkaku ḇebor simewer sifarkor inja sisma royoḇaḇeri.” Fandun koso Yakub nyan ḇyena. Myamunmun kuker malaikat ma isusu ḇaḇeri isof isma barakas. (Kejadian 32:26-28) Farkarkor Refo ima nun marisen faro ko, ḇape kopok kokara awer snar farfyar ḇero dorina farfyar ḇepyum monda. Fandun kofrur kaku rosai kofarkor kwar ro Refoya.

12, 13. (a) Rosai na ḇefnoḇek ko fa koso ananun ḇero Roma 15:5 ya? (b) Rariso anun ma farari Petrus ḇyena nafnoḇek ko? (c) Rosai na kofrurna insama kofawi Allah marisen Ḇyena? (Mam kotak ” Nyan insama Kofawi Allah Marisen Ḇyena”.)

¹² Koḇesewar fa kofadwer kenem koḇena ido, rur ḇesren nari ifnoḇek ko fa kofadwer kakara koḇena. Fawawas mura, na kakna Kristus kakara ḇyena. (Roma 15:5) Rur ḇesren na ifnoḇek ko fa kosawen marisen ḇesasarna ma kona rari-rari ḇepyum ḇefrur Allah imarisenna. (Galatia 5:16, 22, 23) Rofyor komam fafisu ine kakara koḇena nasya monda ro pipi ma marasrisen ido, kofafko awer mboi koḇenadi kor fafnoḇek ro Yahwe fa kofrur roi ḇekakuna. (Lukas 11:13) Koswarepen Manwawan Petrus i. Baboiwara dakna kakara raris Kristus i ḇa. (Matius 16:22, 23; Lukas 22:34, 54-62; Galatia 2:11-14) Ḇape isusu ḇa, ma Yahwe ifnoḇeki. Fawawas mura kakara ḇyena namnis Kristus i. Inja, bisa kakfrur rarirya.

¹³ Manwawan Petrus ikofenḇair rari rosai monda na koḇensewar fa kakfasnaina. (Wasya 2 Petrus 1:5-8.) Imnis ra, koḇensewar fa komkuepen mankunko, kodworen, koswar naek srar koḇesya, ma rari ḇesenawer. Kofuken mankunko, ”Ro ras ḇe ras, rari rosai na yaḇesewar fa yafrurna insama yafawi Allah marisen Ḇyena?’

14. Kakna Kristus karkara ḇyena ido, rariso koso wos farkin ro Refo ras ḇe ras?

¹⁴ Kakna Kristus karkara ḇyena ido, kenem koḇena ro moḇ kofararurna, ro rumfarkor, moḇ kawos yoḇ snonkaku sya, ma wos snemuk kunna namnis raris Kristus i. Snar Allah fyarkin ko, inja na kofrur roi oso ḇa ḇefrur ḇaḇebati koḇena kuker Yahwe I namuk. Sino sifrowes ko ido, na kopampum ḇeri si snar kofawi Allah wos ḇefarkin Ḇyena. Inja imbe kun snemuk ido, kofuken mankunko resari, ’Rosai wos farkin ḇero Refo ḇeḇeḇairna? Faro Yesus ido, snemuk rosai na dun kakuna? Snemuk ḇeroso na Yahwe imarisen kakuya?’ Komarisen kokarana ras ḇe ras insama kona kakara ḇeradirya ker. Mkorama kowawos contoh riḇeso. Ro contoh oser-oser, nari komam wos ḇefarkin rosai ḇefnoḇek pyan ko fa kun snemuk ḇepyum.

15, 16. Kona kakara raris Kristus ido, rariso ine nafnoḇek ko rofyor kun snemuk fa (a) Kokinfir mansei na ḇe snonswa ḇaido binswa koḇesya? (b) Kokinfir bati?

¹⁵ Rofyor kokinfir snonswa ḇaido binswa. Wos ḇefarkin ḇyena nasya ro 2 Korintus 6:14, 15. (Wasya.) Manwawan Paulus ikofen snonkaku ḇeso Allah farkankin ḇyena siḇese kuker snonkaku ḇena kakara dunya inensya. Rariso wos ḇefarkin ine ifnoḇek ko fa kokinfir mansei na ḇe snonswa ḇaido binswa koḇesya?

 ¹⁶ Rofyor kokinfir bati. Wos ḇefarkin ḇyena nasya ro 1 Korintus 15:33. (Wasya.) Snonkaku ḇena kakara raris Kristus ido, na ḇyebati ḇa kukro snonkaku ḇefrur kakyar ḇyena nsambraḇ ḇa. Kwarapan rariso wos farkin ine bisa ḇepakena ro fafisu ḇesamswen. Imnis ra, rariso wos anna nafnoḇek Au rofyor ḇepake internet? Rariso wos anna nafnoḇek Au rofyor wafnak game kuker snonkaku wafawi ḇaim sya?

17-19. Kosma farkankin ro Allah ido, rariso na (a) kobinkwanbur rosai monda ḇefrur Allah imarisen ḇa? (b) fararmyan koḇena ḇe ḇarponna? (c) kokainpyum kuker snonkaku ḇesesya?

¹⁷ Roi nari ḇeḇewar kosmai Allah kyaremso ḇyena ḇa. Kosma swarapepen ḇefandun ro Ibrani 6:1. (Wasya.) Rosai monda ”roi ḇeḇefromo” na kobinkwanburna? Nanekam roi ḇebuk fainda ḇa ma ḇefrur Allah imarisen ḇa. Inja, na kofuken mankunko, ’Rosai yafrurna nun fainda ke roḇa? Yamarisen yakso bisnis ḇeradine ke? Rosai ḇefnai fa yaso warpu awer ro raryur ḇeḇesewar fa ḇebuk payamyum ma aski faro dunya ine?’

¹⁸ Rosai imbe kofrur ḇe ḇarponna. Ro Yesus faya ḇyedi ḇero Urek, ikofenḇair anun ḇepyum kuker rosai kofakapon syadi ro kankenem koḇena. (Matius 6:33) Snonkaku ḇesma farkankin ro Allah sya nari sefakapon Karajan Ḇyedi. Inja, kofuken mankunko, ’Yamnai ro farkarkor yena kwar ido, na yaksunwer ro farkarkor ḇekaki ke? Na yun farararur ine ke roḇa?’

¹⁹ Rofyor samswen nasya. Paulus anun ḇyena faro snonkaku Kristen ḇero Roma sya na nafnoḇek ko rofyor kokainpyum kuker snonkaku ḇesesya ḇa. (Roma 12:18) Snar koso Kristus nyan ḇyena, inja ’kosewar fa kokenem kuker aski faro snonkakusya kam’. Komasasor kuker snonkaku ḇesesya ido, rosai nari kofrurya? Samswen ḇeko fa korower snonkaku ḇese kakara sena ke? Ḇaido, snonkaku smambir koḇe snonkaku ḇeyun aski ke?​—Yakobus 3:18.

20. Rosai ḇefnai fa komarisen kosma Allah kyaremso Ḇyena?

²⁰ Roro contoh ḇebor annane, komam kada farkankin ḇero Refo nafnoḇek ko fa kofrur snemuk ḇepyum. Nfasnaḇair snar kosma farkankin ro Allah I. Kosma farkankin ro Allah ido, kankenem koḇena nafo kuker aski ma marisen. Robert, ḇeḇeyap ro randak artikel ine ikofen, ’Rofyor ḇaḇebati yena kuker Yahwe nsambraḇ, yaḇe kamam ma snonswa ḇepyum syadiwer. Yasmai marisen ma aski.” Koḇesewar fa kosma Allah kyaremso ḇyena ido, nari kosma barakas nabor kaku. Baboine kosma aski ma ro fafisu iyama nari kosma ”kankenem ḇekakuya”.​—1 Timotius 6:19.