1, 2. (a) Rosai ḇefnai fa kofarkor farari ḇepyum ro Nuh, Daniel, ma Ayub na nsambraḇser ko? (b) Rosai ḇeḇejadi rofyor Yehezkiel fyas wos ro Yehezkiel 14:14?

AUSYA wasma samswen snar wadufe, nwa kumpan ḇa, ḇaido sewayam Au ke? Fyorno ido ḇaḇir wararyaḇ fa wafarmyan ḇe Yahwe I ḇa ke? Ḇaḇir radirya ido, farari ḇepyum ro Nuh, Daniel ma Ayub sko nari nasambraḇser Au. Snon anskoine skonapesḇa ma skosma samswen ḇemnis raris ko ro baboine. Ma, fyorno ido skosmai roi ḇemun ro kankenem skoḇena. Ḇape skosouser pdef ḇe Yahwe I, ma Yahwe myam sko ḇe farari ḇepyum ro kakyar ma soasuserya.​—Wasya Yehezkiel 14:12-14.

² Yehezkiel fyas wos ḇeḇe mnuk tema ine ro Babilonia  taun 612 SM. * (Mam fasfas kasun ro sop.) (Yehezkiel 1:1; 8:1) Fyas wos nane kawan ḇa fyor simkok Yerusalem ro taun 607. Snonkaku ḇero Yerusalem ḇeḇeso monda ḇesma fasaspar snar sifasna kakyar ma soasuser raris Nuh, Daniel, ma Ayub sko. (Yehezkiel 9:1-5) Sisoine Yeremia, Barukh, Ebed-melekh, ma Rakhab.

3. Rosai nari kofarkor ro artikel ine?

³ Rarirya kako ro baboine, snonkaku Yahwe myam ḇe snonkaku ḇesoasuser raris Nuh, Daniel, ma Ayub siso nari ḇesma slamat rofyor dunya ḇeḇarḇor ine neḇepyos. (Fasasna faro Yohanes [Wahyu] 7:9, 14) Mkorama kofarkor rosai ḇefnai fa Yahwe kyur snon rikior anskoine fa sḇe farari ḇepyum faro mansei ḇefrur roi ḇeḇye ro ḇarpon Ḇyeja. Nari kofarkor (1) samswen rosai monda skosmana (2) rariso kofarari kakyar ma soasuser skoḇena.

4, 5. Rosai monda samswen Nuh ismana, ma rosai ḇefnai fa farari ḇyedi ipyum kaku?

⁴ Samswen rosai monda Nuh ismana? Ro fafisu Nuh kpu up ḇyedi Henokh ikenem ya, snonkaku sya siḇarḇor kaku. Sikofen ”wos anonef” faro Yahwe I. (Yudas 14, 15) Supswan ifo kuker ḇaḇeḇarḇor. Ro fafisu Nuh ḇyedi, ”dunya ifo kuker mamamun”. Malaikat ḇeḇarḇor sya sado ḇe supswan, sifadwer siḇe ḇaken snonkaku insama sifarḇuk kuker bin ḇero supswansya. Ma sna romawa ḇerarmomen ma ḇeḇarḇor kaku. (Kejadian 6:2-4, 11, 12) Ḇape snonkakusya bisa smam Nuh ima iḇese ro si. Refo ikofen, ”Nuh isma kyaremso ro Yahwe mamam Ḇyeja.” Nuh imnis snonkaku ḇero ris ḇyesya ḇa, ima ifrur roi ḇeḇye. ”Nuh imbran kuker Allah ḇenapes.”​—Kejadian 6:8, 9.

⁵ Rosai kofarkor ro mnuk anna kuker Nuh i? Randakya, kwarapan fafisu ḇekwan kaku Nuh ifarmyan kuker soasuser ḇe Yahwe I rofandu dunya ḇeḇarḇor fyor Faḇruḇ ḇeba ryama ḇaim. Ine fafisu taun ri 70 ḇaido 80 mondaḇa ḇape taun ri 600 syadi! (Kejadian 7:11) Ḇesuruya, koswarepen fafisuya sidang osoḇaḇeri isya ḇefnoḇeki ma ḇesambraḇseri imnis raris ko ro baboine. Syadiwer ḇedar ḇyesya sisaramper i ḇa. *—Mam fasfas kasun ro sop.

6. Rariso Nuh fyasnaḇair snar ḇyeḇri kaku?

⁶ Nuh kyara ḇaḇeri ikenem ḇe snonkaku ḇefrurpyum ima namnis kwar. Kuker ḇri ikofenḇair kakyar ḇyeja faro Yahwe I ḇe snonkaku ḇesesya. Refo dap i ḇe ”manḇaryas napnapes”. (2 Petrus 2:5) Manwawan Paulus ikofen Nuh ima, ’snar kakyar ḇyeja ḇyuk samamyai faro supswan’. (Ibrani 11:7, NW) Snonkaku sya skoryae i ma sisewar fa sidwarek fararur ḇyena. Iba syadiwer sawos wos makakak faro i snar imbe smuni. Ḇape Nuh imkak siḇa. (Amsal 29:25) Snar ikyar faro Yahwe, inja Yahwe ḇyuk ḇaḇeḇri faro i. Ro kirine kako Yahwe ḇyuk ḇaḇeḇri ḇeradirya faro manfamyan ḇesouser Ḇyesyakam.

7. Samswen rosai monda Nuh ismana rofyor ḇyawes wai ḇeba ya?

 ⁷ Nuh nya kakakyar faro Yahwe taun ri 500 syadi rofyor Yahwe iwan ifa ḇyawes wai ḇeba. Wai ḇeba ani nari ḇyukifaspar snonkaku ḇeḇeso sya ma aiwan ro Faḇruḇ ḇeba ya. (Kejadian 5:32; 6:14) Ifrur wai ḇeba ine napyan ḇe i ḇa. Ma ifawi kaku snonkaku sya nari skoryae i, inja kankenem ḇyeja nari syamswen syadi. Ḇape Nuh ikyar ma isouser faro Yahwe I. Ifrur nakame imnis rosai Allah ikofenna.​—Kejadian 6:22.

8. Rariso Nuh ikyar faro Yahwe I roro fandandun kina ḇyesi?

⁸ Nuh isma samswen ḇesenawer, fandun fa isewar anan faro kina ḇyesya. Rofyor Faḇruḇ ḇeba ya ryama ḇaim snonkakusya sfararur marbak fa sifrur yaf ma sikaker. I kako dakfararure. (Kejadian 5:28, 29) Ḇape, sasewar nanan faro kina ḇyesi nafrur imkakwarek syadi ḇa. Fararmyan ḇyena faro Yahwe iso roi ḇefandun syadi ro kankenem ḇyedi. Nuh ifararur marḇak fa ifrur wai ḇeba ro swaf tahun ri 40 ḇaido 50 rariryano ḇyefnder Yahwe I ḇa. Ro fafisu Faḇruḇ ḇeba ya imnai Nuh ifarmyan kaker ḇe Yahwe I ro swaf taun ri 350. (Kejadian 9:28) Nuh ima farari ḇepyum ro kakyar ma soasuser!

9, 10. (a) Rariso na kofarari Nuh kakyar ma soasuser ḇyedi rai? (b) Rosai wakyar ya rofyor wasouser kwar Allah sasoser Ḇyedi?

⁹ Rariso na kofarari Nuh kakyar ma soasuser ḇyedi rai? Nyan ya isoine kuker kawoswarek moḇ Yahwe myam roi ḇenapes ya rai, koso setan nyan ḇyena ḇa, kosewar Yahwe I ḇepon ro kankenem koḇena. (Matius 6:33; Yohanes 15:19) Snar kofrur roi nane, inja dunya ine imarisen ko ḇa. Imnis raris, snar kosouser Allah sasoser Ḇyena kuker seks ma farḇakḇuk, inja snonkaku sya sawos famfnom ko ro mediana. (Wasya Maleakhi 3:17, 18.) Raris Nuh i, komkak snonkaku sya ḇa. Komkak Yahwe ido nari koḇesyowi ma komewer kofrur roi imarisen ḇa na. Kofawi Yahwe I monda ḇebuk kankenem fyoro ḇeko.​—Lukas 12:4, 5. 

¹⁰ Wafuken mankundaw, ’Rofyor snonkaku sya skoryae ḇaido sekritik aya ido, na yafrur roi ḇeḇye ro ḇarpon Allah I pdef ke? Na yakyar Yahwe fyasos fandandun kina yesi rofafisu ḇesamswen ke?’ Rofyor wakyar ma wasouser faro Yahwe raris Nuh i, nari Yahwe myamfaduru Au.​—Filipi 4:6, 7. 

11. Samswen ḇeba rosai Daniel ma bati rikior ḇyeskoya skosmai ro Babilon? (Mam sonin ro randak artikel ine.)

¹¹ Samswen rosai monda Daniel ismana? Daniel ikenem ḇe women ro Babilon, kota oso ḇefo kuker ibadat ḇekaku ḇa ma amfyainir. Snonkaku ḇero diansya sfafayaf snonkaku Yahudi sya ma skoryae si ma Allah seja Yahwe I. (Mazmur 137:1, 3) Roi nane nafrurduf Daniel ma snonkaku Yahudi ḇese ḇero diwansya sne sena! Osower ido, snonkaku ansya nari smam Daniel ma bati rikior ḇyeskoya, Hanania, Misyael, ma Azaria nari skosma farkarkor fa skofararur faro raja Babilon i. Sḇuk ḇesi roḇean faro raja ma roḇean Yahwe imewer kawasa Ḇyesya sanna. Ḇape Daniel imewer ”ifrur mamas ḇaken ḇyeja kuker roḇean ḇeyankir raja ḇyena.”​—Daniel 1:5-8, 14-17.

12. (a) Daniel ima snonkaku ḇemnis rariso? (b) Rariso Yahwe myam Daniel i rai?

 ¹² Daniel isma samswen ḇesenawer, imbude randakya myamna ḇe roi ḇesamswen ḇa. Snar ḇyekir syadi, inja raja ḇyuk fararur ḇepyum kaku ḇe i. (Daniel 1:19, 20) Ḇape, Daniel darareri ḇa ḇaido kyara wos ḇyena iso ḇepyum syadiya. Fyasna sne ḇerun pdef ma kyara ḇaḇeri isyadi ro si. Ikofen, Yahwe iso ḇefnoḇeki fa nya roi ḇepyum syadi. (Daniel 2:30) Kwarapan kada: Yahwe dap Daniel i kuker Nuh ma Ayub ḇe farari ḇepyum fa koso si. Ro fafisuya, Nuh ma Ayub sufarmyan ḇe Yahwe I kwar ro kankenem suḇena ḇesiper, ḇape Daniel ḇyeromawa babo kaker. Yahwe ikyar kaku faro Daniel i! Ma kaku rarirya snar Daniel ikyar ma isouser faro Allah ro kankenem ḇyedi ḇesiper. Fafisu Daniel ḇyeumur fanam taun ri 100, Allah malaikat Ḇyeja ikofen wos ḇepyum ine ḇe i, ’Daniel auma snonkaku Allah iswar kaku.’​—Daniel 10:11.

13. Rosai ḇefnai fa Yahwe ifnoḇek Daniel i fa isma fararur ḇepyum?

¹³ Snar Yahwe isaramper Daniel i, inja ḇyesnonkaku ḇeḇefandun ro Babilon ramnai ro Media Persia wer. (Daniel 1:21; 6:1, 2) Imbude Yahwe ifnoḇek Daniel i fa isma fararur ḇepyum ani insama ifnoḇek Allah kawasa Ḇyesya raris rosai Yusuf ifrur ro Masir, Ester ma Mordekai roi sufrur ro Persia. * (Mam fasfas kasun ro sop.) (Daniel 2:48) Kwarapan kada Yehezkiel ma snonkaku Yahudi ḇesesya sneḇaḇir sena rofyor smam rariso Yahwe ḇyuk Daniel i fa ifnoḇek si. Ine na nsambraḇser si kaku!

14, 15. (a) Rariso fafisu koḇenane namnis kuker Daniel Fafisu ḇyena? (b) Rariso sinan mkoya mkun farkarkor ro Daniel sinan ḇyansuya rai?

¹⁴ Rariso na kofarari Daniel kakyar ma soasuser ḇyedi rai? Kokenem ro dunya ḇefo kuker amoralitas ma ibadat ḇekaku ḇa. Babilon ḇeba isoine imperium ro agama ḇekakuḇa ro dunya ḇesiper dawyae snonkaku ḇeborsya kwar, Refo dap siḇe ’moḇ faro setansya ma rur ḇemabak’. (Fasasna 18:2) Ḇape koma komnis mandaman ro dunya ine. Iso ḇefnai fa snonkaku sya smam koḇese ro si,  inja skoryae ko. (Markus 13:13) Ḇape raris Daniel i, komarisen kofanam syadi ḇe Allah koḇedi Yahwe I. Rofyor kofasna sne ḇerun, kokyar faro Yahwe, ma kosouser I ido nari iswar ko kako.​—Hagai 2:7.

¹⁵ Sinan sya bisa sun farkarkor ḇepyum kaku ro Daniel sinan ḇyesuya. Rofafisu Daniel ibaba kaker, skoḇarek ro Yehuda. Kawasa ḇero diansya siḇarḇor kaku, ḇape ro Daniel kenem ḇyedi iswar Yahwe ḇesya kwar. Ine snaro sinan ḇyansuya suiso ḇefarkor i kuker Yahwe nyan Ḇyena. (Amsal 22:6) Snonsnon ro Daniel i kako nfasnaḇair ”Allah iso Mankara yedi”. Ine kyurfasna sinan ḇyansuya suswar Yahwe I. (Daniel 1:6) Inja sinan mkoya, imḇe mkofarkor romawa mkoḇesi ido mkokaḇaḇaḇ faro si. Mkosusu awer. (Efesus 6:4) Mkoḇenadi kuker si. Mkoḇenadi faro si. Farkarkor ḇepyum mkosewar faro romawa mkoḇesi, Yahwe nari ḇyebarakas kaku mko.​—Mazmur 37:5.

16, 17. Samswen rosai monda Ayub isma ro kankenem ḇyeja?

¹⁶ Samswen rosai monda Ayub ismana? Ayub kankenem ḇyeja nefararwe. Randakya, ima ”snonkaku ḇekayan syadi ro fandu kawasa ro bar Wamuren sya”. (Ayub 1:3, BIMK) Ayub ima nya arasai nabor kaku, snonkaku ḇebor sya sifawikam i ma sesyowi syadi i. (Ayub 29:7-16) Ḇape, Ayub kyara ḇaḇeri ipyum syadi ro ḇesesya ḇaido kyara fyandun Allah I ḇa. Kofawi roi ine snar Yahwe dor i ḇe ”manfamyan yedi” ma ikofen Ayub ima, ”Snon oso ḇenapes ma sne ḇyedi isren, nya makakak faro Allah ma ḇyinkwanbur roi ḇeḇarḇor na.”​—Ayub 1:8.

¹⁷ Kankenem Ayub ḇyedi nefararwe fasaw kaku. Isma royoḇaḇeri ma ine nafnai fa ḇyekandera fafayaḇa isof kyara ipyum syadi ya imar mura. Baboine kofawi kwar Setan iso ḇefnai kandera nabor Ayub ismana. Setan ikofen Ayub ifarmyan ḇe Yahwe ima snaro syewar fandun mankun ḇyena monda. (Wasya Ayub 1:9, 10.) Yahwe isma safsof ḇeḇyeḇa kaku, ma inema roi ḇefarfnak ḇa. Rosai nari Yahwe ifrur faro Setan i fa fyasnai ima manḇeankarkar ḇeḇarḇor kaku? Ḇyuk swaf faro Ayub i fa fyasnaḇair soasuser ḇyeja faro Allah ma fyasnaḇair ifarmyan ḇe I snar saswar ya.

18. (a) Rosai ḇepyum ro Ayub i? (b) Roi risai kofarkor ro Yahwe I kuker rariso myam Ayub fafisu ḇyena rai?

¹⁸ Setan ifrowes Ayub i ker kuker nyan ḇeḇyeḇa kaku ma ifrur insama Ayub kyara roi ḇemun ḇekuri na ndrama ro Allah I. (Ayub 1:13-21) Ramnai snon rikior ḇekofen skoma bati ḇyedi sawos wos ḇefrur fa Ayub ḇyesanekar. Soḇe Ayub ima iḇarḇor kaku inja Allah ḇyuk samamyai ḇe i. (Ayub 2:11; 22:1, 5-10) Roi nane nkur Ayub raryano, isouser pdef faro Yahwe I. Kakuḇae, fyorno ido ikofen roi ḇekakuḇa. (Ayub 6:1-3) Ḇape, Yahwe ifawi Ayub ikofen rarirya snaro ḇyekandera fafayaḇa. Setan ikyaren ma kyoryae ker Ayub i raryano, ipok ibur Yahwe I ḇa. Roi ḇeḇyeḇa Ayub isma nane namnai, Yahwe ḇyuk rarwan risuru syadi ro rosai isma ḇeponna ma ikenem taun ri 140 wer. (Yakobus 5:11) Ro fafisuya, Ayub duffarmyan Yahwe kuker sne ḇesiper. Rariso kofawina rai?  Snaro mnuk tema ro Yehezkiel 14:14 ḇyeḇefas taun utin naiwara rofyor Ayub imar kwar.

19, 20. (a) Rariso na kofarari Ayub kakyar ma soasuser ḇyedi rai? (b) Rariso kofasnai sawarwar faro ḇesesya raris Yahwe I?

¹⁹ Rariso na kofarari Ayub kakyar ma soasuser ḇyedi rai? Rosai monda kosma ro kankenem koḇena, komarisen kofakapon Yahwe I ro kankenem koḇena. Komarisen kokyar faro I ma kosouser I kuker sne ḇesiper. Kakuya, kona alasan nabor syadi ro Ayub fa kofasna soasuser koḇena. Kokarapan rosai kofawi ro kirine na. Kofawi nabor kuker Setan fafrowes ḇyena ma nyan ifrowes snonkaku sya. (2 Korintus 2:11) Ro Refoya, iba syadiwer ro syap Ayub kofawi rosai ḇefnai fa Yahwe ḇyuk swaf faro ḇaḇekandera kosmana. Roro Daniel ḇardadi ḇyena, kofawi Karajan Allah iso ḇaḇesasoser Yesus Kristus ḇyepoik ya. (Daniel 7:13, 14) Ma kofawi Karajan ine nari ḇyepoik ro supswan ḇesiper ma ipyos ḇaḇekandera nakam.

²⁰ Ayub farfyar ḇyedine nfarkor ko rariso kofasnai sawarwar faro naek srar ḇesma kandera sya. Imnis raris Ayub i, imbude sawos roi ḇekakuḇa. (Pengkhotbah 7:7) Ḇape, kokara sasar awer si ḇaido kokofen sisya sifrur roi ḇeḇyeḇa. Ḇape, fandun fa kofawi samswen rosai sismana. Kofrur rarirya ido, kofarari Yahwe I, Kma ḇefo kuker sawarwar.​—Mazmur 103:8.

21. Rariso wos ro 1 Petrus 5:10 nḇuk swarapepen ḇeko faro rosai Nuh, Daniel ma Ayub skosmana?

²¹ Nuh, Daniel ma Ayub skokenem ro fafisu ḇeḇeseyae ma rosai skosmana kako neḇese. Ḇape, skokame skofarmku pdef ro samswen skosmana. Farfyar sena nḇuk swarapepen ḇeko faro rosai manwawan Petrus ikofenna, ”Allah knam ro saswar-fakamaman nakam, . . . nari fyasos ma isonem, ma ḇyuk samambraḇ ma syoser mko, rofyor mkosma kandera knik monda kwar.”​—1 Petrus 5:10.

22. Rosai na kofarkor ro artikel ḇeuserya?

²² Wos ḇero 1 Petrus 5:10 ndarirya faro Allah kawasa Ḇyesya ro baboine. Yahwe ḇyuk kakyar ḇeko snar nari ifrur manfamyan Ḇyesya sores nako ma sisambraḇ. Kokame komarisen Yahwe ifrur fa kosambraḇ ma komarisen kores nako pdef fa kosouser faro I. Iso ḇefnai fa komarisen kofarari kakyar ma soasuser ro Nuh, Daniel ma Ayub. Ro artikel ḇeuserya, nari kofarkor snon anskoine skosouser faro Yahwe I snaro skomambir kaku I. Kakuya, bisa ”sifawi mnis roi nakam” imarisen sifrurna. (Amsal 28:5) Ma ko kako bisa kakfrur rarirya.