SNONKAKU syakam simarisen sisma aski ma raryaḇ. Ḇape ras ras ḇepupes ine nafo kuker ”kandera nabor”. (2 Timotius 3:1) Snonkaku sya sisma raryaḇ werḇa snaro sifrurmnis siḇa, siduf, sisma fararur werḇa, ḇaido snonkaku siswar sya simarḇur si. Ḇesesya wer sisma raryaḇ werḇa snaro roi oso ḇefrur fa seḇirḇar ma sesneso. Allah manfamyan Ḇyesya kako bisa siryaḇ werḇa snaro sisma kandera ḇefrur fa sesanekar. Inja, rofyor wararyaḇ werba ido, rosai na wafrurya?

Insama kosmai kankaremya, nari kowawos resari raryaḇ ido rosairirya ma rariso snonkaku ḇeḇeso sya sisma raryaḇ ḇesya kwar rofyor sisma samswen ḇemarḇak. Ramnai, nari komam rariso koryaḇ syadiwer.

Raryaḇ ima kofasnai komḇrif ma komarisen monda ḇa. Kokarapan roi ine, snonkaku ḇemser sya nari simḇrif ma simarisen, ḇape na kawanḇa. Snaro simser ḇa kwar ido sefasis monda kukro siswarepen wer samswen sena. Inja, inema raryaḇ risyaḇa.​—Amsal 14:13.

Raryaḇ ine kyurfasna komarisen fafayaḇa snaro kosmai roi ḇepyum. Koraryaḇ ine kyurfasna kosmai aski ma marisen ḇesya kwar ro fafisu ḇepyum ma ḇebyeḇa. (1 Tesalonika 1:6) Imbude sino ḇefrur komsore raryano nari koraryaḇ pdef. Imnis raris, manwawansya sewayam si snar sḇaryas ankankinem ḇeḇye ḇekur Yesus i. Ḇape, Manwawan ”ansi sibur kankain ani kuker raryaḇ ḇeba, snar skara kwar sikako sakḇe kandera ma san anonef snar snonsnon Yesus”. (Farfyar 5:41) Sefafko ḇa rofyor smunsi ḇape siryaḇ kaku snaro bisa sisouser faro Allah I.

Raryaḇ ima ndramuma ro mankundi ḇa ḇaido kosmaina kwar rofyor saḇen ko. Rosai ḇefnai ya? Snaro raryaḇ ima bon ro Allah papoik ḇesren Ḇyedi. Allah papoik ḇesren Ḇyedi nafnoḇek ko fa kofaduru ’kenem ḇebabo’ isoine raryaḇ. (Efesus 4:24; Galatia 5:22) Rofyor koraryaḇ ido nari kosambraḇ ro samswen kosmana.

Kandera nabor komam ro supswan ine nama Yahwe marisen Ḇyena ḇa. Ḇape Yahwe ima iryaḇ pdef. Refoya ikofen, ”Samambraḇ ma raryaḇ naisya ro kankain Ḇyena.” (1 Tawarikh 16:27) Osower ido, Yahwe iryaḇ kaku fyor myan manfamyan Ḇyesya sifrur roi ḇepyum.​—Amsal 27:11.

Bisa kofarari Yahwe I kuker koraryaḇ pdef rofyor komam roi ḇeḇejadina namnis kuker marisen koḇena ḇa. Koḇirḇar awer, ḇape komam monda faro roi ḇepyum bisa kofrur ro kirine ma kuker kaḇaḇaḇ kowaf roi ḇepyum syadiwer ro fafisu iyama. *—Mam fasfas kasun ro sop.

 Farari ḇepyum nabor nasya ro Refo ḇefawar kuker snonkaku ḇefasna raryaḇ pdef fafisu sisma samswen nabore ro kenem sena. Oserya iso Abraham i. Rofyor snonkaku sya sifrur susa i ma kerokada imar raryano, Abraham iryaḇ pdef. (Kejadian 12:10-20; 14:8-16; 16:4, 5; 20:1-18; 21:8, 9) Rosai ḇefnai ya? Snaro kyaraker kankenem nari ismaina ro dunya babo ro baḇ papoik Mesias i. (Kejadian 22:15-18; Ibrani 11:10) Yesus doḇe, ”Abraham kma mkoḇedi nari iryaḇ kaku snaro nari myam raramuma yedi.” (Yohanes 8:56) Ko kako bisa kakfarari Abraham i kuker kokarauser raryaḇ nari kosmai ro fafisu iyama.​—Roma 8:21.

Paulus ma silas su kako suraryaḇ pdef rofyor susma samswen. Imnis raris, fyor sfor su ma susmai ro bui ”suḇenadi ma sudisen dow sanandik faro Allah”. (Farfyar 16:23-25) Sufarmku pdef snaro suwasen ḇe Allah asas Ḇyena ro fafisu iyama. Ine nafnoḇek su fa suraryaḇ. Bisa kakfarari Paulus ma Silas su kuker kowasenkara barakas nari kosmaina rofyor kofarmyan ḇe Allah kuker soasuser.​—Filipi 1:12-14.

Kirine naek srar sino sisya ḇefasna raryaḇ pdef rofyor rim ḇeba nkur si. Imnis raris, ro November 2013, Wamdoḇer Super Haiyan imkok rum ri 1.000 ro naek srar ḇero Filipina sya. Oser yaiso Naek George rum ḇyedi ḇero kota Tacloban. Ikofen ḇo doḇe, ”Nkosma susa snaro rim ḇeba ya, ḇape naek srar sya sesneso pdef ḇa mboi siryaḇ pdef. Moḇsa imḇe yakofenwer fafisuya nkoryaḇ kaku.” Rofyor kowasen mura ro rosai Yahwe ifrur ḇekona, nari kokofen kasumasa faro I ma koryaḇ pdef ro fafisu ḇesamswen kosmana. Rosai wer Yahwe ḇyuk ḇeko ḇefrur koryaḇ pdef?

Rofyor kona fasfesepen ḇefanam kuker Yahwe nari nafrur koraryaḇ kaku. Kofawi Yahwe iso Raja Ḇepoik ro Supswan ma Farsyos ḇeba ine. Iso Kma, Allah, ma Bati koḇedi!​—Mazmur 71:17, 18.

Koraryaḇ snaro Yahwe ḇyuk kankenem ḇeko ma iso ḇefnai fa kosandik I. (Pengkhotbah 3:12, 13) Snaro Yahwe iso ḇeyun ko fa kofanam ḇe I, inja bisa kofawi marisen Ḇyedi faro ko ma rariso kokenem raya. (Kolose 1:9, 10) Ḇape snonkaku ḇeḇorsya sifawimnis ḇa rosai imḇe sifrur ro kankenem sena. Inja Paulus fyas, ”’Faro snonkaku ḇeswar Allah, Allah fyasos roi ono kwar snonkakusya smam roḇa simnaf ḇaim ro snonkaku, ma nek ḇaim ro snonkaku sisnesna.’ Ḇape Allah fyasna na kwar maḇe ko, kuker Rur ḇyedi.” (1 Korintus 2:9, 10) Kuker kofawimnis Yahwe marisen Ḇyena ma saneraro ḇyuk ḇeko na nari nun raryaḇ kaku.

Yahwe ifrur roi nabor kaku kwar ḇeko. Ifrur fa sasar koḇenakam neḇepyos. (1 Yohanes 2:12) Yahwe ḇyuk ḇeko saneraro ro dunya babo, ḇefanam kwar. (Roma 12:12) Iba syadiwer ro baboine, Yahwe ḇyuk ḇeko bati ḇebor ḇefnoḇek kofa kosyom faro I. (Mazmur 133:1) I kako kyadaunwarek ko ro Setan ma hantu-hantu ḇyesya. (Mazmur 91:11) Rofyor kowasenkara rosai Yahwe ḇyuk ḇeko nari koraryaḇ syadiwer.​—Filipi 4:4.

Rariso snonkaku Kristen ḇeraryaḇ ḇyaḇir iryaḇ syadiwer? Yesus doḇe, ”Roi ḇeḇor nane kam yakofen na faro mko, insa raryaḇ ayena naisya ro mkosnemna ma marisen mkoḇena namnis.” (Yohanes 15:11) Mnuk ine fyasnaḇair bisa koraryaḇ syadiwer. Raryaḇ koḇena imnis for. Insama for ya isak naba ido, korir aimun ker ro forya. Koswarepen roi ḇefnoḇek ko fa koryaḇ syadiwer yaiso Allah rur ḇesren Ḇyedi. Insama koryaḇ syadiwer fandun fa kor rur ḇesren ro nadiya. Ko kako fandun fa kowasenkara  wos ḇero Refo snaro rur ḇesren iso ḇefarkin manfasfas Refo ansya.​—Mazmur 1:1, 2; Lukas 11:13.

Roi ḇesewer ḇefrur fa koraryaḇ yaiso komyaren pdef ro fararur ḇeyun marisen faro Yahwe I. (Mazmur 35:27; 112:1) Rosai ḇefnai ya? Refoya ikofen ifrur ko fa, ”Komkak faro Allah ḇekaku ma komḇranser parenta Ḇyena, snaro iso fakamamar snonkaku syakam.” (Pengkhotbah 12:13) Yahwe daw ko fa kofrur marisen Ḇyena. Rofyor kofarmyan ḇe Yahwe nari koraryaḇ syadiwer ro kankenem koḇena. *—Mam fasfas kasun ro sop.

Rofyor koraryaḇ syadiwer, nari kosmai fainda nabore. Imnis raris, Yahwe nari imarisen rofyor kofarmyan ḇe I pdef ro fafisu kosma samswen. (Ulangan 16:15; 1 Tesalonika 5:16-18) Snaro kosmai raryaḇ ḇekaku, nari kopok kokara arasai nama roi ḇefandun syadi ro kankenem koḇena. Ḇape, nari komarisen syadi koḇuk roi nakam kosmaina faro fandandun Karajan Allah. (Matius 13:44) Ma rofyor komam barakas ḇepyum ḇerama ro Yahwe snar rosai koḇensewarna, nari koraryaḇ syadiwer. Osower ido, nari kosma kakara ḇepyum kuker mankun ko ma na kofnoḇek snonkaku ḇesesya fa siraryaḇ syadiwer.​—Farfyar 20:35; Filipi 1:3-5.

Rofyor koraryaḇ syadiwer ido, nari kodafduf fasaw ḇa. Refoya ikofen, ”Sne ḇemarisen nḇuk pararei faro baken.” (Amsal 17:22) Peneliti oso ḇefarkor ro bidang kesehatan ro Universitas Nebraska Amerika Serikat, ikofen wos ḇemnis kuker rosai Refoya ikofenna. Doḇe, ”Rofyor wararyaḇ ma wamarisen faro rosai wasmana kwar ro fafisu ine, nari ro fafisu iyama wakenem kuker payamyum ma wadafduf ḇa.”

Inja, kokenem ro fafisu ḇesamswen raryano, bisa kosmai raryaḇ rofyor kosmai rur ḇesren ro nadi ya, kofarkor pdef ma kowasenkara Allah wos Ḇyena Refoya. Ko kako nari koraryaḇ kuker kowasenkara rosai Yahwe ḇyuk ḇeko ro fafisu ine, rofyor kofarari kakyar snonkaku ḇesesya ma kofrur Allah marisen Ḇyena nari koḇaḇir rosai Mazmur 64:10 ikofenna: ”Snonkaku ḇenapes nari siraryaḇ snaro Yahwe I ma sisewar kadaun ro I.”