Awin kyapar aya ro Quebec City, isoine moḇ snonkaku sya sawos wos Prancis ro Kanada, ro provinsi Quebec. Kamam snori Louis ma Awin i snori Zélia, suswar aya kaku ma sumamwarek aya. Mansar ima imamyai, mboi imarisen iwasya. Ayanido yamarisen yafasfas ma imbe yakḇe wartawan.

Fafisu yaḇeumur taun ri 12, mansar min fararur ḇyedi ḇenir ḇe Rodolphe Soucy warpu bati ḇyedi surama ḇe rum nkoḇeja. Suma Saksi Yahwe suiri. Ayama yakfawi pyum Saksi Yahwe sya ḇa, ma yakmarisen mankun faro agama ani ḇa. Mboi, yamanen si kukro simarisen ma skarem pyum fakfuken nkoḇena ro Refo. Kamam ma Awin su kako sukara radiri, inja nkomarisen fa nkakfarkor Refo.

Fafisu ani, yafarkor ro agama Katolik rumfarkor seja. Fafisu ono, yafawar roi yafarkor ro Saksi Yahwe sya faro bati ayesi ro rumfarkor. Mura, guru nkoḇesi sia sifawi roi ine, sima pastor siri. Oso dawosbos aya ro kelas barponi ḇo doḇe ayama yaḇembroḇ. Mboi, fyasnai ro Refo ḇa snar roi yafrur ine roi ḇesasar nairi. Roi ine nafrur fa yaḇoryae, mboi yasmai payamyum ro na. Yakofen ḇe sinan ayesuya imbe yasasyar ro farkarkor anya, ma su kako sumarisen.

Yafarkor Refo ya pdef, mboi yamkak fa yaḇaryas ro rum ḇe rum, inja nafnai fa yasur pyum ro rur ya ḇa. Fafisu anya, Gereja Katolik nya papoik ḇeba kaku ma idwarek marmar kaku fararur ḇaḇeḇaryas.  Manfarkin polotik ro Quebec ḇenir ḇe Maurice Duplessis, fyanam kaku kuker manfarkin Gereja sya. Iso ḇefnai fa snonkaku ḇeso Duplessis sya, sanonef Saksi Yahwe ma sisewar kaku fa smun si. Inja, fandun fa Saksi Yahwe sya seḇri kaku fyor sḇaryas.

Ḇefnoḇek aya fa yamkak ḇa iso naek John Rae, dakmnai ro farkarkor Gilead kelas ḇeḇe siw. John ima naek ḇekir ro fararur ḇaḇeḇaryas. Ima imyaren asuser, nya sne ḇerun, ma napyan fa kofanam i. Ima dakkawosbos ḇeri wos anun ḇe aya ḇa, mboi yafarkor ro nyan ḇepyum fyasnai na. Naek John ifawi pyum wos Prancis ḇa, inja yaso ker i fa nura nuḇaryas ma yafnoḇek i ro rosai fyandun na. Ḇaḇebati nuḇena nafnoḇek aya fa yun snemuk imbe yakḇe Saksi Yahwe kako. Indokada taun risamfur kwar fyor yasrow randak Saksi Yahwe sya, ro tanggal 26 Mei 1951 insape yun snemuk fa yakḇebaptis.

Perintis ḇero sidang kasun nkoḇedi ro Quebec City, imbesrar sya siso ḇebor syadi. Snar yamam kenem ḇepyum sena, ine nafnoḇek aya fa yakḇe perintis kako. Fafisu anya, nkoḇaryas ro rum ḇe rum mboi nkoḇuk syap na ḇa. Nkoḇaryas kuker Refo monda. Iso ḇefnai fa fandun kaku nkofarkor pyum Refo ya insama nkokir syadi ro ḇaḇeḇaryas. Ḇape, snonkaku ḇebor sya simewer siwasya Refo fyor manfarkin Gereja Katolik sikyar na ḇa.

Ro taun 1952 ya, yafarḇuk kuker imbesrar ḇesoasuser ḇenir ḇe Simone Patry. Ima ḇyarek ro Quebec City kako. Mura, nubur Quebec ma nuḇarek ro Montreal, ma taun oser mura kyapar inai nuḇedi Lise. Yamnai ro fararur perintis fafisu fanam nuḇe nufarḇak ya, mboi numam pyum insama kenem nuḇena nadwarek mankenem nu ḇa. Rarirya, nkona swaf fa nkoḇeoser fa nkakfnoḇek sidang ya.

Taun risamfur ḇyenande kwar mura, yakara fa yaksun ro fararur ro oras nakam ine wer. Ro 1962, yaso ro Sekolah Pelayanan Kerajaan faro penatua ro Betel Kanada swaf paik rioser. Ro diwa, yaḇarek kayam ro sim oser fnoḇek naek oso ḇenir ḇe Camille Ouellette. Yamanen kaku naek ine kukro nya romawa riḇeso, ḇesyaḇo iryaḇ kaku ro fararur ḇesren. Fafisu yaro Quebec anya, yamam rya naek srar ḇena romawa sya jadi fa sisun ro fararur oras nakam ḇa kukro  smamwarek romawa sesi. Ḇape, yamam Camille ima ifrur nakame. Danun ḇe aya fa yakara swaf yasmai kaker na. Paik ḇeḇeso mura, yakyar bisa yakaḇer ro fararur oras nakam ine wer. Sia soḇe snemuk yun anna rya namnis ḇa kero, mboi yabe perintis pdef. Yakyar Yahwe na ḇyebarakas roi yafrur fa yaḇuk nabor syadi ro fararmyan.

Ro taun 1964, siwan aya ma Simone fa nura nufarmyan ḇe perintis istimewa ro Quebec City, ima mnu marin nuḇedirya. Nufarmyan ro diwa swaf taun ḇeḇeso. Ro fafisu anya, sidwarek mankun fararur ḇaḇeḇaryas ine wer ḇa, mboi sia simarisen ḇa kaker.

Fafisu oso, ro ras Sabtu arwo, polisi oso fyor aya ro kota kasun ḇefanam ro Quebec City ḇenir ḇe Sainte-Marie. Dun aya ḇe kantor polisi ma sisun aya ro bui kukro yana surat ijin ḇa boi yaḇaryas ro rum ḇe rum. Mura sun aya ḇe mankara oso ḇenir ḇe Baillargeon, snon ine moḇ isnai raya nafrur makak snonkaku sya. Ifuken aya ḇo doḇe mansei na ḇeyawoswarek ayandi. Yap snonsnon Glen How, * ima pengacara faro Saksi Yahwe sifawi kaku diri. Mura imkak ḇo doḇe, ”Sye, i wer e!” Ro fafisu ani, sifawi kaku naek Glen How ima pengacara sikyar kaku fa ḇeyawoswarek Saksi Yahwe sya. Fyoro ḇa mura, pengadilan sikofenḇair ḇo soḇe yasasar ḇa.

Snonkaku ḇebor ḇero Quebec sya simarisen faro fararur ḇaḇeḇaryas ine ḇa, inja samswen fa nkofrur fananjur. Sidang nkoḇedi iba ḇa, inja nkofanjur monda ro garasi ḇekwar ḇepnunek kaku. Ro fafisu sup ya ipnunek kaku, naek srar sya sun mani fa sḇukifrur for fa sikdapen. Nkofrur fananjur ḇaime, na nkokainyar for anya ḇo nkodapen ma nkofarfyar fawar ḇesambraḇser nko resari.

Yamarisen kaku yamam fararur ḇaḇeḇaryas isur pyum ro swaf taun ḇe taun. Ro fafisu ani, sidang kasun ḇeḇeso monda ḇero Quebec City, ro sup Côte-Nord, ma Yensiser Gaspé. Mboi baboine, moḇ anya sirwas na fa nesuru kwar, ma naek srar sifrur fananjur ro Balai Karajan ḇepyum kaku.

Siwan aya ma swa yedi fa nufarmyan ro fararur wilayah ro taun 1970 ya. Mura ro taun 1973, skur aya fa yafarmyan ḇe pengawas distrik. Ro swaf anya, yafarkor nabor ro naek ḇekir syadi sya raris naek Laurier Saumur * ma David Splane. * Ro fafisu anya, sufarmyan ro fararur keliling kako. Fyor munara kebaktian ya imnai, naek David nuyawawos moḇsa nuḇuk farkarkor rai. Yaswarepen ras oso naek David doḇe, ”Léonce e, yamarisen faro faya ḇepupes beja rawo.  Napyum ra. Mboi, bisa warwas na ḇe faya rikyor in.” Kaku ḇeri, yafawi yasun farkarkor nabor kaku ro faya ayeja. Fandun fa yafarkor moḇsa yawos faya ḇekwan awer.

Pengawas distrik fararur sena oser ya iso sisambraḇser pengawas wilayah sya. Mboi, manḇaryas ḇebor ḇero Quebec sya sifawi pyum aya kwar. Inja, fafisu yarama ro moḇ sena, simarisen fa sḇaryas kayam fnoḇek aya. Yamarisen yaḇaryas kuker si, ḇesyandari yamamfar pyum pengawas wilayah ḇa. Fafisu oso, pengawas wilayah ḇesawarwar ḇyuk swarapepen ḇe aya ḇo doḇe, ”Naek, ipyum kwar kukro wamarisen wafararur kayam fnoḇek naek srar sya, mboi ḇefnder awer in, rwama ine fa mamfar aya. Aya kako yakfandun wos samarawraw ḇae!” Swarapepen ḇepyum ani nafnoḇek aya fa yana kakara ḇemnis.

Ro taun 1976, yakara ḇaḇeri ḇo Simone, swa yedi yaswar kaku ine, iduf marḇak kaku rawo imarbur aya. Ima swa ḇepyum kaku kukro imarisen ḇyuk kenem ḇyedi faro snonkaku ḇesesya ma iswar Yahwe I. Roi ḇefrur fa yaḇesaneso ker ḇa iso yamyaren ro fararur ḇaḇeḇaryas. Yakofen kasumasa faro Yahwe I kukro ifnoḇek aya ro fafisu ḇesamswen anya. Ḇarpur mura, yafarḇuk kuker Carolyn Elliott i wer. Ima ifarmyan ḇe perintis ḇeyawos wos Inggris ḇerama ḇe Quebec fa ifarmyan ro moḇ ḇefandun syadi manḇaryas. Carolyn ima ifrur pyum ma iswar snonkaku ḇesesya, myam snonkaku ḇemamyai ma ḇero mankunsi kako. Ifnoḇek aya ro swaf nufarmyan ro fararur keliling ine.

Ro paik Januari taun 1978, sor aya fa yaḇuk farkarkor ro kelas ḇerandak ro Sekolah Dinas Perintis. Yamkak kaku kukro yakso farkarkor ḇeradine ḇaime, ma yakmam syap faro farkarkor anya ḇaime. Inema roi ḇebabo faro aya ma ḇefarkor sya. Yakofen kasumasa kukro ḇeso farkarkor ine iso perintis ḇefarmyan fyoro kwar. Inja, yafarkor nabor ro naek srar ḇeso farkarkor ine sya!

 Mura, ro taun 1978 kako, Munara Kebaktian Internasional ”Iman yang Berkemenangan” sifrur na ro Stadion Olimpiade Montreal. Ima munara ḇeba kaku sifrur ro Quebec. Ḇeyakso sya barbor seja sisyadi ro 80.000. Mura, siwan aya fa yafnoḇek Departemen Layanan Berita. Yawos kuker wartawan ḇebor. Yamarisen kaku kukro sfas roi ḇepyum ḇekur kebaktian ani. Sifakfuken inko oras ri 20 ro televisi ma ro radio na. Sisasyar roi nabor kaku ḇekur munara kebaktian ani. Inema kesaksian ḇepyum kaku!

Yaḇebaptis raposa, yafarmyan ro moḇ ḇeyawos wos Prancis ro Quebec. Mboi, ro taun 1996 roi ḇefadwer kaku naisya. Sor aya fa yafarmyan ḇe pengawas distrik ro sidang-sidang ḇeyawos wos Inggris ro Toronto. Ḇape, yakara ayama yasyus fa yuf fararur ine ḇa. Yamkak yun faya kukro yafawi yawos pyum wos Inggris ḇa. Inja, fandun fa yaḇenadi ḇesya kwar ma yakyar kaku ḇe Yahwe I.

Fafisu anya yaḇoryae kaku, mboi yamarisen kaku kukro bisa yafarmyan ro Toronto swaf taun risuru. Carolyn ifnoḇek ker aya fa yawos wos Inggris. Naek srar sya kako sifnoḇek ma sisambraḇser ker aya. Inja, nuna bati ḇebabo sya siḇore.

Yafasos munara kebaktian ma ḇesena raposa, yaḇaryas ro rum ḇe rum ro swaf oras rioser ro ras Jumat mandira. Imbude sino skara, ’Meser munara kebaktian ḇyerak kwar, inja rosai ḇefnai fa yaḇaryas wer?’ Mboi, ayama yasrow ḇemarisen sya ido, yaryaḇ kaku. Isof ras ine, yamarisen kaker rofyor yabur ro ḇaḇeḇaryas.

Ro taun 1998 ya, siwan Carolyn nu fa nufarmyan ḇe perintis istimewa ro Montreal. Ro swaf kawan kwar, yasmai fararur fa yafasos fararur ḇaḇeḇaryas sfasos ḇese ma yafararur fnoḇek media massa fa sna kakara ḇepyum faro Saksi Yahwe sya. Carolyn numarisen kukro bisa nuḇaryas ḇe mandaman ḇebur ḇe sup Kanada sya, simarisen sakfawi Refo ya.

Yaswarepen kaḇer fafisu yaḇebaptis ḇe Saksi Yahwe ro swaf taun ri 68 naiwara, yakara ima barakas ḇeba nairi. Yamarisen kaku kukro yaryaḇ ro ḇaḇeḇaryas ma yafnoḇek snonkaku sya fa sifawi kakaku ya kwar. Inai yedi, Lise ma swari sufaduru romawa suḇesya fa siba kwar mura, suyaksun ro fararur perintis biasa. Yamarisen kaku wer kukro yamam Lise iryaḇ pdef ro fararmyan, ma naek sibor sfasnai nyan ḇepyum ma sḇuk wos anun ḇepyum ḇe aya. Nane kam nafrur fa yafanam syadi ma yafarmyan ḇe Yahwe I. Mankundaya yamam fandun kaku fa kokyar Yahwe ḇyuk rur ḇesren Ḇyedi. Naiso ḇefnoḇek ko fa kofrur fararur Yahwe ḇyuk ḇe ko na. (Mz. 51:11) Yakofen kasumasa pdef ḇe Yahwe I kukro ḇyuk syowi ḇeba fa yasandik snonsnon Ḇyedi!​—Mz. 54:6.