1. Roi risai monda na ḇefnai fa komkakwarek, ma rosai na kokara ya?

FAFISU ono, Ausya wamkakwarek faro roi oso ke? * Imbude snembri iduf kukro roi snonkaku ḇese sikofen ma sifrur yoḇ Au na. Ḇaido wamkakwarek kukro roi wakofen ma wafrur kwar na. Raris, wafrur sasar kwar, ma ḇeḇirḇar na Yahwe ḇyuk ampun ḇe Au ke roḇa. Ḇeḇyeḇa syadi wer, snar wamkakwarek ker mura, kwara nwa kakyar oḇa kwar ma Auma snonkaku ḇeḇyeḇa disau. Ḇape, kaku rarirya ke?

2. Imnis fawar ro snonkaku rikyor ḇefas ro Refo ya, komkakwarek ido ima kona kakyar oḇa ke?

² Kwarapan fawar ro snonkaku rikyor ḇefas ro Refo ya. Hana iso nari ḇekapar nabi Samuel i, ima bin ḇena kakyar ḇesambraḇ. Mboi, imkakwarek kaku kukro oso ro kina ḇyedi ifrur pyum i ḇa. (1 Sam. 1:7) Manwawan Paulus kako nya kakyar ḇesambraḇ, mboi sneri ’imkakwarek kawasa Kristen kam’. (2 Kor. 11:28) Raja Daud i kako ikyar nako Yahwe iswar kaku i. (Kis. 13:22) Rarirya mboi, Daud ifrur sasar ḇefnai fa ḇyekandera kaku. (Mz. 38:4) Yahwe ḇyuk sneprei ḇe snonkaku anskoine. Rwama kawos farkarkor rosai kun ro fawar skoḇena.

3. Rosai ḇefnai fa na koḇesneso fyor snonkaku oso dawos famfnom ko?

³ Fafisu snonkaku ḇese sawos pyum ḇe ko ḇa ḇaido  sifrur pyum ko ḇa ido, na koḇesneso kaku. Ḇefrur roi ani iso bati ḇaido kina koḇedi oso ido, na koḇesneso syadi wer. Komkakwarek nari koḇebati fanam kuker i wer ḇa. Fyorno ido, snonkaku oso kyara ḇa ḇo dawos famfnom ko, mura kosnesna naduf kaku. (Ams. 12:18) Ḇaido ono wer, oso ifawi kwar roi dawos na nafrur fa kofafayaf ḇesyaḇo dawosbos ko. Imbesrar oso ismai samswen ḇeradine. Doḇe, ”Taun riḇeso naiwara, bati yakyar kaku, fyawar roi ḇekaku ḇa ḇekur aya ro media sosial na. Yafafko ma yakara ker na. Yaḇor rosai ḇefnai fa ifrur roi ḇeḇesyan na ḇe ayandi.” Bati ḇaido kina Bedi sifrur fa ḇesneso ido, bisa wun farkarkor nabor ro Hana i.

4. Samswen ḇemarḇak kaku rosai ḇekur Hana i?

⁴ Hana ismai samswen ḇemarḇak kaku ḇeḇeso. Fyarḇuk fyoro kwar, mboi pyansnasem ḇaido dakna romawa ḇa. (1 Sam. 1:2) Snonkaku Israel ḇebor sya soḇe bin ḇekapar romawa ḇa ima Allah ḇyebarakas i ḇa. Inja, Hana imai rawo. (Kej. 30:1, 2) Roi ḇefnai fa Hana ḇyesneso syadi wer iso swari dun bin oso ḇese, isoine Penina, ma bin ine kyapar romawa sibor ḇe swari. Penina dakmarisen faro Hana i ḇa, mura ’kyoryae ker Hana i ḇo ifrur i fa fyafayaf’. (1 Sam. 1:6) Randak ya, Hana ḇyaḇir iḇor iḇerari. Pyapum kwar ma ḇyesneso rawo kyain ”kyanes ma dan mnis ḇa”. (1 Sam. 1:7, 10) Moḇsa Hana ismai sneprei rai?

5. Rariso nadi nafnoḇek Hana i rai?

⁵ Hana ikofenḇair roi ḇyaḇir na ḇe Yahwe I ro nadi. Ḇyenadi raposa, ikofen ḇe Imam Ḇeba Eli roi ḇekur i na. Mura Imam Eli ikofen yoḇ Hana i ḇo doḇe, ”Wabur kuker payamyum. Iḇye kada Allah Israel ryower fararyor bena.” Wos ḇyenane nafrur fa Hana ”ibur ma danan, ma mkasi isnai saneso wer ḇa kwar”. (1 Sam. 1:17, 18) Nadi nafnoḇek Hana i fa iknon kaḇer.

6. Rosai kofarkor ro Hana i ma ro Filipi 4:6, 7 ḇekur nadi ya?

⁶ Na koknon kaḇer rofyor koḇenadi kor faro Yahwe I ḇesya kwar. Hana ḇyenadi ḇo dor ḇe Yahwe I ro swaf kawane. (1 Sam. 1:12) Rarirya kako, bisa kakḇenadi ḇo kor faro Yahwe I ro swaf kawan  fa kokofenḇair makakwarek, makak koḇena, ma raryar ḇa koḇena. Kopok kokara awer nadi koḇena fandun fa kawos mnis kaku na insama ndrok pyum kaku. Fafisu ono, koḇenadi kokofen sneso koḇena rawo kokanes. Rarirya mboi, Yahwe na ryower ko ker. Ipyum kako fa koswarepen Manwawan Paulus anun ḇyena ḇero Filipi 4:6, 7. (Wasya.) Paulus danun fa kokofen kasumasa ḇe Yahwe I ro nadi koḇena. Roi nabor naisya nafrur fa kokofen kasumasa ḇe Yahwe I. Imnis ra, na kokofen kasumasa faro kankenem ḇyuk ḇe ko kwar, ḇraur ḇepyum Ḇyena, sawarwar Ḇyena, ma saneraro ḇepyum fyasos ḇe ko kwar. Rosai wer na kofarkor ro Hana i?

7. Rosai Hana ma swari sufrur ker ya?

⁷ Hana ismai samswen nabor, mboi ifnoḇek swari fa sura ker ḇe moḇ fa sḇukisyom Yahwe I ro Syilo. (1 Sam. 1:1-5) Fafisu Hana ryo tabernakel ya, Imam Ḇeba Eli syambraḇser i ḇo doḇe Yahwe nari kyarem nadi ḇyena, ma ine ḇyuk sneprei kaku ḇe i.​—1 Sam. 1:9, 17.

8. Rariso fananjur nafnoḇek ko rai? Fasnaiḇair na.

⁸ Na koknon kaḇer fyor koso pdef ro fananjur ya. Ro fananjur nakam, nari manbesrar ḇeyun nadi ḇerandak dor Allah rur ḇesren Ḇyedi fa ifnoḇek ko. Aski iso rur bon ḇyena. (Gal. 5:22) Rofyor komkakwarek kaku mboi koso fananjur koḇena pdef ido, Yahwe ma naek srar sya na sisambraḇser ko ma sifnoḇek ko insama sne ma swaruser koḇena naknon kaḇer. Nadi ma fananjur nama nyan ḇepon kaku fa Yahwe ḇyuk sneprei ko. (Ibr. 10:24, 25) Rwama kawos roi ḇese wer kofarkor ro Hana i.

9. Samswen rosai Hana ismai kaker na, mboi rosai ḇefnoḇek i?

⁹ Samswen ḇekur Hana i, nandebur i ḇeri ḇa. Fafisu Hana ḇyeari ro tabernakel raposa, ibur ḇe rum ḇyedi wer ma ḇyarekus Penina kaker. Refo ikofenḇair ḇa Penina fyadwer kenem ḇyedi kwar. Inja, rya Penina kyoryae Hana i kaker. Ḇape, Hana fyafayaf wer ḇa. Hana ikyar Yahwe ryower nadi ḇyena, ma nane nafrur i fa iknon. Fyanam ḇe Yahwe I fa ismai sneprei ma kananon. Ḇarpur mura, Yahwe kyarem Hana nadi ḇyena ma dakkapar romawa kako!​—1 Sam. 1:19, 20; 2:21.

10. Rosai kofarkor ro Hana fawar ḇyena?

¹⁰ Samswen koḇena naisya kaker mboi na koknon kaḇer. Koḇenadi ker ma koso pdef fananjur ya kwar, mboi samswen koḇena rya ono nandebur ko ḇa. Imbape, kofarkor ro Hana fawar ḇyena snar roi oso na idwarek Yahwe I ḇa fa ḇyuk sneprei ko. Yahwe ipok ḇyefnder ko ḇa, inja nari ḇyebarakas ko kukro kokyar faro I kwar.​—Ibr. 11:6.

11. Rosai monda ḇefrur fa Paulus nya makakwarek ro kenem ḇyedi?

¹¹ Paulus imkakwarek kukro samswen ḇekur i na nabor mankenem. Raris, iswar naek srar sya, inja imkakwarek si kako fyor sismai samswen. (2 Kor. 2:4; 11:28) Fafisu Manwawan Paulus ḇyaryas, mbroḇ sya sewayam i ma sisun i ḇe bui. Daksmai samswen ḇesena, rupa ra dananjar kako. (Flp. 4:12) Rarwan rikyor, kapal dek anya imsar ro soren. Kokarapan, na imkak kaku fyor imbe rya kuker dek kapal wer. (2 Kor. 11:23-27)  Rosai ḇefnoḇek Paulus i fafisu nya makakwarek ro kenem ḇyedi?

12. Rosai ḇefnoḇek Paulus i fa imkakwarek syadi wer ḇa?

¹² Paulus imkakwarek naek srar ḇyesi fafisu sismai samswen, ḇape ipok syewar fa ifrur mnis samswen sena kuker samambraḇ mankun ḇyedi ḇa. Paulus fyasnai sne ḇerun kaku. Dor fafnoḇek snonkaku ḇese fa smamwarek sidang. Imnis raris, ikyar Timotius ma Titus su fa suf fararur ono. Fararur skofrur na nafnoḇek Paulus i fa imkakwarek syadi wer ḇa.

13. Rariso penatua sya siso Paulus nyan ḇyena?

¹³ Kor snonkaku ḇese fa sifnoḇek ko. Raris Paulus i, penatua ḇebor ḇesawarwar simkakwarek naek srar ḇero sidang ḇesmai samswen sya. Ḇape, penatua oso derer na ipok ḇa fa ifnoḇek ḇero sidang syakam. Sne ḇerun na idif i fa dor fafnoḇek ro naek ḇesesya ma fyarkor naek ḇe roma babo sya insama sifnoḇek i fa sfarkin Allah domba Ḇyesi.​—2 Tim. 2:2.

14. Rosai Paulus kyara na ḇa, ma rosai kofarkor ro i?

¹⁴ Kofasnai kofandun ḇesesya fa sḇuk sneprei ḇe ko. Paulus fyasnai sne ḇerun kaku, inja ifawi fyandun wos sneprei ro bati ḇyesya. Kyara ḇa na snonkaku ḇese smam ima iryar ḇa kwar isof fyandun samarawraw ro bati ḇyesi. Ro Paulus syapram ḇyedi ḇe Filemon i, doḇe, ”Ro saswar bena yasma kwar marasrisen ḇeba ma samambraḇ.” (Flm. 7) Paulus dap min ḇyesi riḇeso sisnosna, ḇesambraḇser kaku i kwar ro fafisu ismai samswen. (Kol. 4:7-11) Kuker sne ḇerun kofasnai kofandun samarawraw ido, naek srar koḇesi nari simarisen sḇuk fafnoḇek kofandun na.

15. Fafisu Paulus ifawi fyoro wer ḇa na smun i fa imar, rosai ḇeḇuk sneprei ḇe i?

¹⁵ Kokyar faro Allah Wos Ḇyena. Paulus ifawi wos ḇero Refo nari nbuk sneprei ḇe i. (Rm. 15:4) Nbuk fawawinanem kako ḇe i ro samswen rosai monda ḇekur i na. (2 Tim. 3:15, 16) Rofyor sisun Paulus i ḇe bui ro Roma ḇerarwan risuru, ifawi fyoro wer ḇa na smun i fa imar. Ro fafisu ḇeradine, rosai Paulus ifrur ya? Dor Timotius i fa ryama fasaw ma dun syap ḇeniw ḇyena. (2 Tim. 4:6, 7, 9, 13) Rosai ḇefnai ya? Kukro syap ḇeniw naiso  fasfas ḇeḇeso ro Syap-Syap Ibrani Paulus ḇyukifarkor Refo ya. Kosmai samswen ḇemarḇak kaku mboi kofarkor myaren Refo raris Paulus ido, Yahwe nari ḇyuk sneprei ḇe ko roro mnuk-mnuk kowasya kwar anna.

16. Rosai Daud ḇyaḇir na rofyor ifrur sasar ḇeba?

¹⁶ Daud ifrur roi ḇeḇyeḇa kaku kwar. Denfus Bat-syeba i mura ifrur aw fa smun Bat-syeba swari, ma syewar fa iyokef roi ḇeḇarḇor ifrur kwar anna. (2 Sam. 12:9) Randak ya, fyor sneri ḇyuk sasar ḇe i, fyandun ḇa. Inja, nafnai fa wis ḇyena kuker Yahwe I namuk, sneri kako iknon ḇa kaku ma idufe. (Mz. 32:3, 4) Rosai ḇefnoḇek Daud i fyor sneri iknon ḇa snar ifrur sasar ḇeba? Ma rosai na ḇefnoḇek ko fyor kofrur sasar ḇeba?

17. Ro Mazmur 51:1-4, rosai Daud ifrur fa fyasnai imbror kaku kwar?

¹⁷ Koḇenadi fa kor ampun. Ḇarpur mura, Daud ḇyenadi ḇe Yahwe I. Imbror kaku kwar ma ikofenḇair ḇe Yahwe I roi ifrur kwar na. (Wasya Mazmur 51:1-4.) Ine ifnoḇek i fa iknon ma ḇyeaski wer! (Mz. 32:1, 2, 4, 5) Kofrur sasar ḇeba ido, kopok kosewar fa koyokef awer na. Imbape, koḇenadi ḇe Yahwe ma kokofenḇair roi kofrur kwar na. Nari sne koḇena naknon syadi ma nbuk sasar ḇe ko wer ḇa. Ḇape, koḇe kona wis ḇepyum kaḇer kuker Yahwe ido, na koḇenadi monda ḇa.

18. Moḇsa Daud myam wos aprer ro Yahwe I rai?

¹⁸ Komarisen kosmai wos aprer. Rofyor Yahwe iwan nabi Nathan fa fyasnai Daud sasar ḇyena, Daud ibriwarek mankundi ḇa ḇaido ikofen ḇa roi ifrur na sasar ḇeba naisya ḇa. Mboi, ikofen kaku ima ifrur sasar kwar faro Bat-syeba swari monda ḇa, mboi ḇesyadi faro Allah Yahwe I. Daud imarisen ismai wos aprer ro Yahwe I, inja Yahwe ḇyuk ampun ḇe i. (2 Sam. 12:10-14) Kofrur sasar ḇeba ido, fandun fa kawos ḇe penatua sya kukro Yahwe ryem si kwar fa sfarkin ko. (Yak. 5:14, 15) Kopok kobriwarek mankunko awer. Korower fasaw wos aprer sḇuk ḇe ko na ma kosouser na kada, nari fasaw kako fa koknon ma koḇeaski wer.

19. Fandun fa kun snemuk fa kofrur rosai?

 ¹⁹ Kun snemuk fa kofrur sasar awer imnis kofrur ḇepon na. Raja Daud ifawi insama ifrur sasar imnis ifrur ḇepon na ḇa, fyandun fafnoḇek ro Yahwe I. (Mz. 51:7, 10, 12) Fafisu Yahwe ḇyuk ampun ḇe Daud i kwar, dun snemuk fa pyampum kakara ḇesasar na. Rarirya, ismai kaḇer aski ro sne ma swaruser ḇyena.

20. Rariso kofasnai syowi faro payasyos sasar ro Yahwe I?

²⁰ Kofasnai syowi faro payasyos ro sasar koḇena rofyor koḇenadi kor fa Yahwe ḇyuk ampun, komarisen kosmai wos aprer, ma kosewar kaku insama kofrur sasar awer imnis kofrur ḇepon na. Kofrur na ido, na kosmai aski ro sne ma swaruser koḇena. James dakfrur sasar ḇeba kako ma doḇe roi anna nkaku. Ikofen radine, ”Fafisu yakofen kaku sasar yena ḇe penatua sya, yaḇaḇir rya roi ḇemarḇak sikanow na bur aya. Yasmai aski ro sne ma swaruser yena wer.” Ine nbuk sneprei kaku fyor kofawi ”Yahwe fyanam kuker snonkaku ḇesanekar ma snonkaku ḇena raryaḇ ḇa kwar fyaspar si”!​—Mz. 34:18.

21. Rariso komam monda Yahwe I fa ifnoḇek ko rai?

²¹ Snar papupes dunya ine fyanam kwar, inja nari roi nabor naisya nafnai fa komkakwarek syadi wer. Fyor makakwarek irup ko kwar, kosewar fasaw fafnoḇek ro Yahwe I. Kofarkor myaren Refo ya. Kun farkarkor ro Hana i, Manwawan Paulus i, ma Raja Daud i. Kor Yahwe ifnoḇek ko fa kofawi roi risai ḇefrur fa komkakwarek kenem koḇena. (Mz. 139:23) Komam monda Yahwe I fa ifnoḇek ko, ḇesyadi fyor koḇor koḇerari kwar. Kofrur rarirya ido, na komnis manfasfas Mazmur ḇedisen faro Yahwe I: ”Rofyor makakwarek irup aya, buk sneprei aya ma wafrur fa yaknon.”​—Mz. 94:19.