1. Rofyor snonkaku oso imbe dawos ḇe raja, rosai fandun fa ifrur ya?

KWARAPAN, Ausya wakenem ro sup Persia ro fafisu naiwara. Waḇe rwa wasrow kuker raja fa wawos parkara oso. Inja, na rwaḇe moḇ ḇenir ḇe Syusyan, isoine moḇ raja ḇyarek ro ya. Mboi wawos ḇe raja ḇaime, fandun fa wor ijin resari. Oroḇa ido, na smun Au fa wamar!​—Est. 4:11.

2. Imbe kofanam faro Yahwe ido, moḇsa komam I rai?

² Komarisen kaku kukro Yahwe ima dakfrur raris raja Persia ani ḇa! Yahwe ḇyepoik syadi ro snonkaku ḇena papoik syakam. Nya nasan Manḇedaw, Allah Ḇepoik Syadi, ma Ḇekaki Syadi. Ḇape, bisa kawos yoḇ i ro fafisu nakam. Imarisen insama komkak awer fa kawos yoḇ I. Dor ko fa kor I ḇe ”Kma”. (Mat. 6:9) Ine nafrur sneprei kaku kukro kofawi Yahwe imarisen fa kofanam faro I!

3. Rosai ḇefnai fa kor Yahwe I ḇe ”Kma”, ma rosai nari kawos ro farkarkor ine?

³ Kor Yahwe I ḇe ”Kma” ima isrow kaku kukro iso Knam ro kankenem koḇena. (Mz. 36:9) Snar ima Kma koḇedirya, inja fandun fa kosouser faro I. Kofrur rosai dor ro ko ido, nari kosmai barakas ḇepyum kaku. (Ibr. 12:9) Kirine kako na kosmai payamyum ḇyena. Ro farkarkor ine, nari kawos rariso Yahwe fyasnai ima Kma ḇeswar kaku ko ma rosai ḇefnai fa kokyar kaku nari ryir ko ḇaḇeri isof ro ras nayama. Ḇape, rwama kawos ḇepon rosai ḇefnai fa kokyar kaku Kma koḇedi ro nanki iswar kaku ko.

4. Rosai ḇefnai fa sisya samswen fa smam Yahwe I ḇe Kma sedi?

⁴ Ras oso, kwara rya samswen fa mam Yahwe I ḇe Kmami ke? Sisya skara Yahwe ima ikaki syadi ma dakfandun ko ḇa. Sia soḇe Allah Ḇekaki Syadi na fyandun faro ko oser-oser ḇa. Imbape, Kma koḇedi imewer kokara radiri. Ḇyuk kankenem ḇe ko ma imarisen fa kofanam faro I. Ine iso roi Manwawan Paulus ikofen faro snonkaku ḇero Atena sya. Ikofen wer ḇo doḇe Yahwe ima ’ḇyinkwan ro ko ḇa’. (Kis. 17:24-29) Allah imarisen fa ko oser-oser kawos yoḇ I imnis ra roma mkun oso dawos yoḇ sinan ḇyesuya.

5. Rosai kofarkor ro imbesrar oso fawar ḇyena?

⁵ Ḇesesya wer ido, samswen fa smam Yahwe I ḇe Kma sedi kukro kma ḇekapar si siswar ma sifrur pyum si ḇa. Kokarapan imbesrar oso fawar ḇyena. Fyar ḇo doḇe, ”Kamam ima dawos ḇe aya ido, dawos pyum ḇaḇeri. Inja fafisu insape yafarkor randak Refo ya, samswen fa yafanam ḇe Kma koḇedi ro nanki. Mboi fyor yamambir Yahwe I kwar, yafadwer kakara yena.” Wakḇaḇir rarirya kako ke? Rarirya ido, besanekar awer. Wakyar kaku na ras oso, Au kako nari mam Yahwe I ḇe Kma ḇefrur pyum kaku.

6. Imnis wos ro Matius 11:27, rosai nyan oser Yahwe ifnoḇek ko fa komam I ḇe Kma ḇesaswar?

⁶ Yahwe ifnoḇek ko fa komam I ḇe Kma ḇesaswar. Nyan oser ya iso rofyor kowasya ro Refo fawar ḇekur rosai Yesus dawos ma rosai ifrur na. (Wasya Matius 11:27.) Yesus iso pyum kaku Kmari rari Ḇyena, naiso eḇedari ikofen radine, ”Mansei ḇemam aya kwar ido, myam Kmaya kwar kako.” (Yoh. 14:9) Yesus dapḇair ker Yahwe I ḇe Kma. Ro syap Injil rifyak monda, Yesus ḇyuk apap ”Kma”, ”Mami”, ”Kmaya”, ḇekur ḇe Allah Yahwe I, barbor ya fanam ḇe 200. Rosai ḇefnai fa Yesus dap ker Yahwe I ḇe Kma? Roi oser ya iso insama snonkaku sya sikyar Yahwe I ḇe Kma ḇeswar si.​—Yoh. 17:25, 26.

7. Rosai kofarkor ro Yahwe I ro nyan ifrur pyum Roma Ḇyedi?

⁷ Kokarapan rosai kofarkor ro Yahwe I ro nyan ifrur pyum Roma Ḇyedi, Yesus i. Yahwe ryower Yesus nadi ḇyena ḇesya kwar. Ryower monda ḇa mboi kyarem na kako. (Yoh. 11:41, 42) Ro fafisu ḇesamswen kako, Yesus ḇyaḇir Kmari iswar ma ifnoḇek i.​—Luk. 22:42, 43.

8. Moḇsa Yahwe fyasos roi Yesus fyandun na rai?

⁸ Yesus ifawi kaku Yahwe iso ḇeḇuk kenem ḇe i ma iso ḇefasos roi fyandun na insama ikenem pdef. Naiso ḇefnai fa Yesus doḇe, ”Yakenem snar Mami.” (Yoh. 6:57) Yesus ikyar kaku faro Kmari, ma Yahwe fyasos roi fyandun ro rasras na. Ḇefandun syadi wer, Yahwe ifnoḇek Yesus i fa isoasuser pdef.​—Mat. 4:4.

9. Moḇsa Yahwe fyasnai iswar kaku Yesus i rai?

⁹ Snar Yahwe iso Kma ḇesaswar, inja ifrur fa Yesus ikyar Kmari isya ifnoḇek i. (Mat. 26:53; Yoh. 8:16) Yahwe kyadaunwarek Yesus i ḇa ro roi ḇefrur fa ḇyekandera. Mboi, ifnoḇek Yesus fa isusu ḇa. Yesus ifawi kandera rosai monda ḇekur i na nakain fyoro ḇa. (Ibr. 12:2) Yahwe fyasnai iswar kaku Yesus i kuker ryowerepen nadi ḇyena, ḇyuk rosai fyandun na, fyarkor i, ma isaramper i. (Yoh. 5:20; 8:28) Rwama komam moḇsa Kma koḇedi ro nanki fyasnai iswar kaku ko imnis moḇ iswar Yesus raya.

10. Imnis wos ḇero Mazmur 66:19, 20, moḇsa Yahwe fyasnai iswar kaku ko?

¹⁰ Yahwe ryowerepen nadi koḇena. (Wasya Mazmur 66:19, 20.) Yahwe idwarek ko fa kawos yoḇ I ḇa, mboi dor ko fa konadi faswef. (1 Tes. 5:17) Inja, ro fafisu nakam ma ro moḇ risai monda bisa koḇenadi. Nya swaf ḇesya kwar fa ryowerepen ko. Koḇesyowi Yahwe I kukro ryower nadi koḇena ma nane nafnai fa kofanam syadi faro I. Manfasfas Mazmur doḇe, ”Yaswar Yahwe I snar ryower mkarem ayena, fararyor ayena fa yor fafnoḇek.”​—Mz. 116:1.

11. Moḇsa Yahwe kyarem nadi koḇena rai?

¹¹ Kma koḇedi ryower nadi koḇena monda ḇa, mboi kyarem na kako. Manwawan Yohanes ḇyuk kakyar ḇe ko ḇo doḇe, ”Imnaf fararyor koḇena, rofyor kor rosairya wer imnis kuker [Allah] marisen ḇyedi.” (1 Yoh. 5:14, 15) Kakuḇae, imbude na Yahwe kyarem nadi koḇena raris marisen koḇena ḇa. Mboi ifawi roi ḇepyum faro ko, inja fyorno ido kyarem nadi koḇena ḇeri ḇa ḇaido imarisen fa kowaf resari.​—2 Kor. 12:7-9.

12-13. Ro nyan risai monda Kma koḇedi ro nanki ḇyuk rosai kofandun na?

¹² Yahwe ḇyuk rosai kofandun na. Iso roi imarisen kako fa ḇebukor ro kina sya sakfrur na. (1 Tim. 5:8) Kma oso na fyasos pyum rosai romawa ḇyesi sfandun ro rasras na. Imnis ra roḇean, sansun, ḇaido rum fa sḇarek. (Mat. 6:32, 33; 7:11) Rarirya kako, raris kma ḇesawarwar, Yahwe fyasos pyum roi kofandun ro rasras na isof fafisu nayama.

¹³ Ḇefandun syadi wer, Yahwe ḇyuk roi kofandun fa kona wis ḇepyum kuker I. Ro Refo, Yahwe ikofenḇair ḇe ko mansei kaku I, marisen Ḇyena, rosai ḇefnai fa ifrur ko fa kokenem ro supswan ine, ma rosai na ḇeḇejadi ro rasras ḇarpon nayama. Yahwe ḇye sinan koḇesi ma snonkaku ḇese fa sifnoḇek ko insama komambir pyum I. Ḇyuk fafnoḇek pdef ḇe ko roro sidang yadori. Ro sidang ya, penatua ma naek srar ḇena kakyar ḇesambraḇ sya sisya sifnoḇek ko fa koḇebati kuker I. Oso wer ido, ro fananjur kako Yahwe fyarkor ko fnoḇek naek srar koḇesi. Inja, Yahwe fyasnai ima iswar kaku kokam ro nyan risai monda.​—Mz. 32:8.

14. Rosai ḇefnai fa Yahwe fyarkor ko, ma moḇsa ifrur na rai?

¹⁴ Yahwe fyarkor ko. Koma konapes raris Yesus i ḇa. Iso ḇefnai fa Kma ḇesaswar koḇedi na fyarkor ko kuker ḇyuk aprer ḇesrow faro ko. Refo doḇe, ”[Yahwe] fyarkor snonkaku [iswar sya].” (Ibr. 12:6, 7) Yahwe fyarkor ko ro nyan ḇebor. Imnis raris, roi kowasya ro Refo ma korower ro fananjur na, nfarkor ko fa kofadwer kenem ma kakara koḇena. Ḇaido kosmai fafnoḇek ro penatua sya. Moḇ risai monda Yahwe fyarkor ko raya, ifrur na kukro iswar kaku ko.​—Yer. 30:11.

15. Moḇsariso Yahwe kyadaunwarek ko rai?

¹⁵ Yahwe isaramper ko ro samswen ḇekur ko na. Kma ḇesaswar oso na isaramper romawa ḇyesi fafisu sismai samswen. Rarirya kako, Kma koḇedi ro nanki isaramper ko ro samswen ḇekur ko na. Ḇyuk rur ḇesren fa kyadaunwarek ko ro roi nari ḇefnai fa wis koḇena kuker I namuk. (Luk. 11:13) Yahwe ifnoḇek ko kako fafisu koḇesanekar. Imnis raris, ḇyuk saneraro ḇepyum kaku ḇe ko. Saneraro nane nafnoḇek ko fa komkuepen  pdef rofyor kosmai samswen. Kokarapan roi ine: Kandera rosai monda ḇekur ko na, nari Yahwe ipyos nakam bur ko. Inja, samswen rosai ḇekur ko nari nakain fyoro ḇa, mboi barakas Yahwe ḇyuk ḇe ko nari nakain fyoro-fyoro.​—2 Kor. 4:16-18.

16. Rosai Adam ismai kukro isouser faro Kma ḇesaswar ḇyedi ḇa?

¹⁶ Kofawi Yahwe iswar kaku ko rofyor kokara rosai Yahwe ifrur fafisu Adam isouser faro I ḇa. Snar isouser Kmari ro nanki ḇa, Adam ma romawa isof kpu up ḇyesi kako saksun ro Allah kina Ḇyesi wer ḇa. (Rm. 5:12; 7:14) Imbape, Yahwe ifrur roi oso fa ifnoḇek Adam kpu up ḇyesi.

17. Snar Adam isouser ḇa kwar mura, rosai Yahwe ifrur wer?

¹⁷ Yahwe ḇyuk samamyai ḇe Adam i, mboi ḇyuk saneraro ḇe Adam kpu up ḇyesi. Fafisu ya ḇeri Yahwe ḇyeasas nari snonkaku ḇesouser sya saksun kaḇer ro kina Ḇyesi. (Kej. 3:15; Rm. 8:20, 21) Ḇeknam ro Yesus marmar ḇyedi, Yahwe na ifrur asas Ḇyena fa namnis. Yahwe ḇyuk Roma Ḇyedi fa imarwarek ko kwar, ine fyasnai iswar kaku ko.​—Yoh. 3:16.

18. Fafisu ono kobur Yahwe I kwar, mboi rosai ḇefnai fa kokyar kaku Yahwe imarisen kakḇe romawa Ḇyedi wer?

¹⁸ Koma snonkaku ḇenapes ḇa siko, mboi Yahwe imarisen ifnoḇek ko fa kakḇe romawa Ḇyedi kukro iswar ko. Imbude fafisu ono kofrur fa fyafko ma kobur I, mboi Yahwe imarisen kaker ko ḇo iwaf ko fa kokaḇer yoḇ I. Yesus fyar farfyar ḇekur romawa ḇebyor fa ḇyukifasnai Yahwe ima Kma ḇesawarwar kaku. (Luk. 15:11-32) Kma ḇero farfyar anna ikyar kaker nari romawa ḇyedi kyaḇer  wer. Fafisu romawa ani ibur kaḇer ḇe rum ḇyedi, kmari imarisen kaku ḇo isaser i. Rofyor kobur Yahwe I kwar mboi kombror ido, kokyar kaku Kma ḇesaswar koḇedine na imarisen myam kokaḇer yoḇ I.

19. Moḇsa Yahwe nari ipyos roi ḇeḇyeḇa Adam ifrur kwar na rai?

¹⁹ Kma koḇedi nari ipyos roi ḇeḇyeḇa Adam ifrur kwar nakam. Rofyor Adam isouser ḇa, Yahwe kyara namuk kwar fa ikanow snonkaku ri 144.000 fa sakfarmyan ḇe raja ma imam ro nanki fnoḇek Roma Ḇyedi. Ro dunya babo iyama, Yesus ma ḇepoik kayam fnoḇek i sya nari sifnoḇek snonkaku ḇesouser sya fa sakḇe snonkaku ḇemnis kaku. Fafisu fafrowes ḇepupes isyonde kwar, Allah nari ḇyuk kankenem fyoro ḇe si. Kma koḇedi nari iryaḇ kaku fafisu myam snonkaku ḇemnis kaku sibor syadi ro supswan ine. Sima roma ma inai Ḇyesirya. Inema fafisu ḇeyun marisen kaku!

20. Moḇsa Yahwe fyasnai iswar kaku ko rai, ma rosai nari kawos ro farkarkor ḇerama ya?

²⁰ Yahwe fyasnai kwar iswar kaku ko. Ima Kma ḇefrur pyum kaku koḇedirya. Ryowerepen nadi koḇena ma ḇyuk rosai kofandun ro rasras na, ma roi ḇesambraḇser wis koḇena kuker I. Fyarkor ko ma isaramper ko. Ḇyuk ḇe ko kako roi ḇepyum ro ras nayama. Na komarisen kaku kukro kofawi Kma koḇedi iswar kaku ko! Ro farkarkor ḇerama ya, nari kawos moḇsa romawa Ḇyesi koine, kakfasnai syowi faro saswar Ḇyena.