1-2. (a) Rosai ḇefnai fa Yahwe ḇyuk swaf ḇe ko insama kaksun ro kina Ḇyedi? (b) Moḇsa Yahwe ifrur na rai?

YAHWE dor ko kwar fa kaksun ro kina Ḇyedi fa kosyom faro I. Inema syowi ḇeba kaku nairi! Ḇeyaksun ro kina ine sima snonkaku ḇeḇuk farsamsyom faro Allah kwar ma ḇekyar faro farsarser fasaspar ro Roma Ḇyedi. Komarisen kaku koro kina ine. Komarisen kukro kosmai payamyum ro fafisu ine kako ma kona saneraro kankenem fyoro ro nanki ḇaido ro Firdaus ro supswan ine.

² Snar Yahwe iswar kaku ko, inja ḇyuk swaf ḇe ko fa kaksun ro kina Ḇyedi. Ḇape, fandun fa ḇyuk Roma Ḇyedi fa imarwarek ko. (Yoh. 3:16) Yahwe ḇyak ko kuker ḇaḇyak ḇekaki. (1 Kor. 6:20) Yesus imarwarek ko kwar, inja bisa kofanam faro Yahwe I. Kokara kada, ima Allah Ḇekaki Syadi ro supswan ma farsyos ine, ḇesyaḇo ḇyuk syowi ḇeba kaku fa kor I ḇe Kma koḇedi. Ro farkarkor ḇepon ya, kawos kwar Yahwe ima Kma ḇefrur pyum kaku.

3. Rofyor kokara roi ḇepyum Yahwe ḇyuk kwar na, rosai na kofuken ya? (Mam kako kotak ” Yahwe Myambir Kaku Aya Ke?”)

³ Raris manfasfas Refo oso, imbude kakfuken radine: ”Rosai nari yaḇuk fa yaḇak kaḇer ḇe Yahwe I roi ḇepyum ḇyuk kwar ḇe aya na?” (Mz. 116:12) Ḇekaku ya, koma kona royo fa koḇak kaḇer ḇe Yahwe I ḇaḇeri. Mboi, saswar Ḇyena iso ḇefnai fa kakswar I. Manwawan Yohanes doḇe, ”Kosaswar snar Allah iswar syadi ko ḇepon kwar.” (1 Yoh. 4:19) Inja, kuker nyan risai monda kofasnai saswar koḇena faro Kma koḇedi ro nanki?

4. Ro Yakobus 4:8 ya, rosai ḇefnai fa kofanam faro Yahwe I?

⁴ Yahwe imarisen kofanam ma kawos yoḇ I. (Wasya Yakobus 4:8.) Danun ḇe ko fa koḇenadi ro fafisu nakam kukro imarisen ryower ko ḇesya kwar. (Rm. 12:12) Nya swaf ma imarisen ryower ko. Inja, komarisen fa kakrower I kuker kowasya Refo, syap-syap koḇena, ma korower pyum ro fananjur ya. Romawa sya sawos ker kuker sinan sesya ido, nari sfanam syadi si. Rarirya kako, kawos ḇe Yahwe I ma korower ker I kada, nari kofanam pdef faro I.

5. Rosai na kofrur insama Yahwe imarisen faro nadi koḇena?

⁵ Kwarapan rosai monda wakofen ḇe Yahwe I ro nadi. Yahwe imarisen fa kokofenḇair roi kokara ma koḇaḇir na. (Mz. 62:8) Kofuken mankunko, ’Wos yakofen ro nadi ayena yap kaḇer ker na raris fasfas sefoto kopi na monda ke, wos ayena nsasyar ro sanerido raris fasfas sfas kaku na?’ Kakuḇae waswar kaku Yahwe I, ma wamarisen insama wis Bena kuker I nsambraḇ pdef. Inja, fandun fa wawos yoḇ I ḇesya kwar. Wakofenḇair moḇ ḇaḇir raya. Fawar ḇe I roi ḇefrur fa wamarisen ma roi ḇefrur fa wamkak na. Wakyar kaku bisa wor I fa ifnoḇek Au.

6. Rosai ḇefnai fandun fa kofanam pdef ḇe Kma koḇedi ro nanki?

⁶ Insama kofanam pdef ḇe Kma koḇedi ro nanki, Yahwe I, fandun fa kokofen kasumasa faro I ḇesya kwar. Kakḇaḇir raris manfasfas Mazmur moḇ ḇyaḇir raya, doḇe, ”Roi wafrur na nabor fafayaḇa, sye Yahwe Allah yedi, fararur ḇeba Bena ma kakara Bena ḇe inko nabor kaku. Oso imnis Au ḇa, imbe yasewar fa yapḇair roi anna kam, mboi yapok fa yakofen na ḇa snar nabor fafayaḇa!” (Mz. 40:5) Na kokofen kasumasa ro kosnesna monda ḇa, mboi komarisen kofasnai na ro wos ma fararur koḇena. Nane naiso ḇefnai fa koma koḇese ro snonkaku ḇebor ḇero baboine sya. Snonkaku ḇero baboine sesyowi roi Allah ifrur nakam faro si na ḇa. Ine kyurfasnai koisya kokenem ro ’rasras ḇepupes’ kwar. (2 Tim. 3:1, 2) Komewer kaku kakso kenem senane!

7. Rosai Yahwe imarisen fa kofrur ya, ma rosai ḇefnai ya?

⁷ Sinan sya simewer smam romawa sesi serakrok ker, mboi simarisen fa romawa sesi siswaryae si. Rarirya kako, Yahwe imarisen insama romawa Ḇyesi koine koswaryae ko. Ḇekaku ya, snar koswaryae ko, ine kofasnaiḇair koma snonkaku Kristen ḇekaku siko. (Yoh. 13:35) Kakḇaḇir raris manfasfas Mazmur ḇekofen, ”Napyum ma nafrur marisen kaku rofyor naek srar sḇarek kayam ro ḇaḇeoser!” (Mz. 133:1) Koswar naek srar koḇesi ido, kofasnaiḇair koswar Yahwe I. (1 Yoh. 4:20) Komarisen kaku koḇe kina oser kuker naek srar ḇefasnai frur pyum ma sawarwar!​—Ef. 4:32.

8. Imnis ro 1 Yohanes 5:3, roi ḇefandun syadi rosai ḇefnai fa kosouser faro Yahwe I?

⁸ Yahwe dor romawa sya fa sisouser sinan sesi, ma dor ko fa kosouser I kako. (Ef. 6:1) Kosouser I kukro iso ḇefrur konya, ḇyuk kenem ḇe ko, ma ima ifrur pyum syadi ro sinan syakam. Mboi, roi ḇefandun syadi ḇefnai fa kosouser I iso kukro koswar I. (Wasya 1 Yohanes 5:3.) Roi ḇefnai fa kosouser faro Yahwe I  naisya nabore, mboi idafdif ko ḇa fa kosouser faro I. Yahwe ḇyuk ḇaḇemkei ḇe ko fa kokinfir ro mankunko, inja imarisen myam kokinfir fa kosouser I kukro koswar I.

9-10. Rosai ḇefnai fandun fa kofawi ma kosouser rosai Yahwe ikofen na?

⁹ Sinan sya simarisen fa romawa sesya sismai payamyum. Iso ḇefnai fa sikofenḇair moḇsa romawa sesya sikenem pyum rai. Romawa sesya sisouser ido, ine kyurfasnai sikyar ma sesyowi sinan sesi. Mboi, ḇefandun syadi iso kofawi rosai Kma koḇedi ro nanki roi ikofen na, ma kosouser na. Kosouser ido, kofasnai koswar ma koḇesyowi Yahwe I, ine nari nbuk payamyum ḇe ko. (Yes. 48:17, 18) Mboi, snonkaku ḇesouser Yahwe ma parenta Ḇyena ḇa nari nun samswen ḇe mankunsi.​—Gal. 6:7, 8.

¹⁰ Kokenem raris Yahwe marisen Ḇyena ido, nari nkadaunwarek kenem, swaruser, ma wis koḇena kuker I. Yahwe fyawi roi ḇepyum syadi faro ko. Aurora, bin ḇeḇarek ro Amerika Serikat, doḇe, ”Yafawi kosouser faro Yahwe ido, nari kenem koḇena napyum ḇesya kwar.” Roi ikofen nane nkakubos ḇeri. Mankundaw waksmai payamyum kwar kukro wasouser roi Yahwe ikofen na ke?

11. Rariso nadi nafnoḇek ko rofyor samswen fa kosouser?

¹¹ Rofyor samswen fa kosouser, nadi nari nafnoḇek ko. Fyorno ido, samswen  fa kosouser Yahwe I kukro koine snonkaku ḇesasar siko, mboi na kosewar kaku fa kosouser faro I. Manfasfas Mazmur ḇyenadi ḇe Allah ḇo doḇe, ”Wafrur fa yasmai raryaḇ wer snar fasaspar ryamuma ro Au; wafrur fa yamarisen yasouser Au kada.” (Mz. 51:12) Perintis biasa oso ḇenir ḇe Denise, doḇe, ”Samswen fa yasouser Yahwe parenta Ḇyena oso ido, na yaḇenadi fa yor samambraḇ ro I insama yafrur roi ḇepyum.” Kokyar Yahwe nari kyarem fararyor ḇeradine na.​—Luk. 11:9-13.

12. Ro Efesus 5:1, rosai fandun fa kofrur ya?

¹² Wasya Efesus 5:1. Snar koinema Yahwe ”romawa iswar kaku” Ḇyesiko, inja kosewar kaku fa kosouser I. Koso rari-rari Ḇyena kuker kofasnai saswar, frur pyum, ma koḇuk ampun faro snonkaku ḇefrur sasar maro ko. Fafisu snonkaku ḇemambir Yahwe ḇa sya smam kenem ḇepyum koḇena, imbude na simarisen sakfarkor fa sakfawi Yahwe I. (1 Ptr. 2:12) Sinan Kristen sya fandun fa sifrur pyum romawa sesya raris moḇ Yahwe ifrur pyum ko raya. Sifrur rarirya ido, nari romawa sesi simarisen sakḇebati kuker Yahwe I.

13. Rosai fandun fa kofrur insama komkak ḇa?

¹³ Komam kada, romawa sima smanen kaku kma sesi, inja na simarisen sfawar si ḇe bati sesi. Ko kako, komanen  kaku Kma koḇedi ro nanki ma komarisen snonkaku ḇesesya sakfawi I. Kakḇaḇir raris Raja Daud i, fyas ḇo doḇe, ”Nari yamanen syadi Yahwe I.” (Mz. 34:2) Ḇape, komai fa kokofenḇair Yahwe I ḇe ḇesesya ido na rariso? Rariso insama komkak ḇa? Koswarepen monda nari Yahwe imarisen ma nari snonkaku ḇesesya sismai payamyum fyor kofnoḇek si fa sakfawi Yahwe I. Yahwe na ifnoḇek ko fa komkak ḇa. Raris moḇ ifnoḇek naek srar ro abad randak siwara fa simkak ḇa, na ifnoḇek ko kako fa komkak ḇa.​—1 Tes. 2:2.

14. Rosai monda ḇefnai fandun fa kora kokofenḇair ankinem ḇepyum ḇe snonkaku ḇesesya?

¹⁴ Yahwe ima myamfarfir ḇa, ma imarisen koswar snonkaku ḇese ḇerama ro er ḇesisye kuker ko. (Kis. 10:34, 35) Nyan oser ḇepyum fa kofasnai saswar ḇe ḇesesya iso, kokofenḇair ankinem ḇepyum faro si. (Mat. 28:19, 20) Fararur ine nun bon ḇepyum. Snonkaku ḇerower konsya sna kenem ḇepyum syadi ma sna saneraro kankenem fyoro ḇefo marisen ro ras ḇarpon iyama.​—1 Tim. 4:16.

15-16. Rosai monda na ḇefrur fa komarisen ḇesya kwar?

¹⁵ Yahwe ima Kma ḇesaswar, imarisen kina Ḇyesi sismai marisen. (Yes. 65:14) Kirine kosmai samswen ker, mboi roi nabor naisya ḇefrur fa komarisen. Imnis ra, kokyar kaku Kma koḇedi ro nanki iswar kaku ko. Kona fawawi ḇemnis kaku ro Refo. (Yer. 15:16) Kosun kako ro kina ḇeswar Yahwe I, ḇesouser parenta Ḇyena, ma ḇeswaryae.​—Mz. 106:4, 5.

¹⁶ Na komarisen ḇesya kwar kukro kokyar kaku kankenem koḇena ro ras ḇarpon iyama ipyum syadi. Kofawi Yahwe nari ipyos roi ḇeḇarḇor nakam ma Karajan Ḇyedi nari ifrur supswan ine ḇe Firdaus. Kona kako saneraro ḇepyum kaku snar snonkaku ḇemar sya nari sikenem kaḇer ma nari kosrow kuker snonkaku koswar sya. (Yoh. 5:28, 29) Fafisu ani, na komarisen ra! Ḇefandun syadi wer, kokyar fyoro wer ḇa snonkaku ḇero nanki ma supswan, na sḇuk syowi, sanandik, ma samsyom faro Kma ḇesaswar koḇedi.