1. Rosai ḇefrur snon oso na ifrur pyum swari ma romawa ḇyesya?

KWARA ido, ”ḇeḇebukor” ima kyurfasnai ḇe rosai? Ḇebukor ro kina ḇeḇeso sifrur pyum siswasi ma romawa sesya kuker moḇ siba rona ḇaido moḇ sisur ro kina sesya dori. Yanita, imḇesrar oso ḇeḇarek ro Eropa, doḇe, ”Ro moḇ yaḇarek ya, snonggaku sya smamkyof bin sya ro snon sya ma soḇe bin sya simnis ra binfyan.” Mambesrar oso ḇenir Luke, ḇeḇarek ro Amerika Serikat, dakkofen ḇo doḇo, ”Sinan ḇeḇesnon riḇeso sya sfarkor romawa snon sesi insa srower awer bin sya kukro roi sikofen na nefandun manggun ḇa.” Ḇape, Yahwe imewer kaku snon sya simbran fararur sena ḇeḇebukor kuker nyan ḇerarirya ḇa. (Mam kako Markus 7:13.) Rarirya ido, moḇsa snon oso imbran pyum fararur ḇyena ḇe ḇebukor ro kina rai?

2. Rosai snon oso ḇebukor ro kina fandun fa ifawi kaku ya, ma rosai ḇefnai ifawi kaku roi ani?

² Insama snon oso imbran pyum fararur ḇyena ḇe ḇebukor ro kina, fandun fa ifawi kaku rosai Yahwe dor ro i na. Fandun fa ifawi kaku rosai ḇefnai fa Yahwe ifrur fasasos faro ḇeḇebukor ma moḇsa iso Yahwe ma Yesus nyan ḇepyum suḇena. Rosai ḇefnai fandun kaku ifawi roi ani? Snar Yahwe ḇyuk papoik faro ḇeḇebukor ro kina dori sya kwar, ma imarisen sbuk papoik sismai na kuker pyum kaku.​—Luk. 12:48b.

3. Roro 1 Korintus 11:3, moḇsa Yahwe ifrur fasasos faro ḇeḇebukor sya?

³ Wasya 1 Korintus 11:3. Mnuk ine fyasnaibos kaku fasasos faro ḇeḇebukor sya. Yahwe ḇyuk fasasos ani fa  fyarkin pyum kina Ḇyesi ro nanggi ma supswan ine. Yahwe I monda ḇena papoik ḇekaki syadi. Ma, Yahwe ḇyuk papoik Ḇyedi faro braur Ḇyesi ro nanggi ma supswan ine. Ḇape, nyan sbuk papoik sena kam raya nari siso ḇekarem ro barpon Yahwe I. (Rm. 14:10; Ef. 3:14, 15) Yahwe ḇyuk papoik ḇe Yesus i fa ḇyebukor ro sidang Kristen. Ḇape Yesus manggundi nari dores ro ḇarpon Yahwe I fa ḇyuk kankarem faro nyan ifrur pyum ko rai. (1 Kor. 15:27) Yahwe ḇyuk papoik ḇe snonswa sya kako fa sḇepoik faro siswasi ma romawa sesya. Ḇape snonswa sya na sbuk kankarem ro barpon Yahwe ma Yesus faro nyan sifrur pyum kina sesya.​—1 Ptr. 3:7.

4. Papoik risai Yahwe ma Yesus suna na?

⁴ Yahwe iso ḇebukor faro kina ḇyesi ro nanggi ma supswan, nya papoik fa ifrur sasoser faro romawa ḇyesi. Ma dor kaku si fa sisouser sasoser anna kam. (Yes. 33:22) Yesus ḇyebukor ro sidang Kristen, i kako nya hak fa ifrur sasoser ma dor ko fa kosouser faro i.​—Gal. 6:2; Kol. 1:18-20.

5. Papoik risai ḇebukor ro kina Kristen sna na, mboi rosai ḇefnai fa papoik sena nasyadi ḇa?

⁵ Imnis ra Yahwe ma Yesus su, ḇeḇebukor ro kina Kristen sya sna papoik fa sbuk sasoser faro kina sesi. (Rm. 7:2; Ef. 6:4) Ḇape, papoik sena nasyadi ḇa. Imnis raris, sasoser sifrur nakam neknam ro wos farkankin ḇero Refo ya. (Ams. 3:5, 6) Ma, sna papoik noḇa fa sifrur sasoser faro snonggaku ḇesun ro kina sena ḇa. (Rm. 14:4) Oso wer ido, fyor romawa sesi siba ma sḇarek ḇese kwar, romawa ansya na sfasnai syowi pdef ḇe sinan sya, ḇoi sḇebukor faro romawa sesya wer ḇa.​—Mat. 19:5

6. Rosai ḇefnai fa Yahwe ifrur fasasos faro ḇeḇebukor sya?

⁶ Yahwe ifrur fasasos faro ḇeḇebukor sya snar iswar kina Ḇyesi. Fasasos ine iso hadiah ro I. Snar fasasos nasya kwar faro ḇeḇebukor sya, roi ḇero Yahwe kina Ḇyesi dori nambram pyum ma nesapurnakḇa. (1 Kor. 14:33, 40) Rofyor Yahwe dapbos mansei na ḇeḇebukor ya ḇa ido, kina ḇyesi ro nanggi ma supswan ine sesapurnak ma sismai aski noḇa. Imnis raris, fyor snemuk oso sifrur ḇeri, na ono sisya sifawi ḇa mansei kaku na ḇefrur snemuk ani ma mansei na ḇebuk farkankin fyor sifrur na.

7. Ro Efesus 5:25, 28, rosai Yahwe dor ro snonswa sya fa sifrur na?

⁷ Fasasos faro ḇeḇebukor ima ipyum ido, rosai ḇefnai fa baboine bin ḇebor sya sisya sḇaḇir snonswa sesya sifrurmnis si ḇa ma simarisen bin sya siso marisen sena? Snar snon ḇebor sya sisouser faro Yahwe sasoser Ḇyena ḇa ma simarisen skinfir syadi fa sisouser roi ḇero moḇ siba rona ḇaido moḇ sisur ro kina sesya dori. Ḇaido imbude sifrur siswasi imnis marisen sena fa sfasnai roi sifrur nane roi ḇepyum nairi. Imnis ra snonswa oso imbude imarisen swari iso marisen ḇyena snar kyara fyandun kaku ma imarisen fyasnai ḇe snonggaku ḇesesya ima snon ḇesambraḇ kaku dirya. Imbude kyara na jadi fa idif swari fa iswari, ḇape ima na ifrur swari imgak faro i. ma ḇyaḇir fyor swari imgak i ido, napyan fa iso marisen ḇyena. * Snon ḇena kakara ma kenem ḇerarirya ḇyesyowi bin sya ḇa, ḇefandun syowi ya. Inja nyan kakara ma kenem sena namnis ḇa kuker rosai Yahwe imarisen na.​—Wasya Efesus 5:25, 28.

8. Moḇsa snon oso imbran pyum fararur ḇyena ḇe ḇebukor ro kina rai?

⁸ Snon oso imbran pyum fararur ḇyena ḇe ḇebukor ro kina kuker iso Yahwe ma Yesus nyan suḇena fa sumbran fararur suḇena ḇe ḇebukor. Ro farkarkor ine kawos rari risuru Yahwe ma Yesus sufasnai na, ma kawos wer moḇsa ḇebukor ro kina sya sfasnai rari ansuine fa sifrur pyum siswasi ma romawa sesya.

9. Moḇsa Yahwe fyasnai sne ḇerun rai?

⁹ Sne ḇerun. Yahwe ima manḇefawinanem kaku, ḇape imarisen ryower kakara ro manfamyan ḇyesi. (Kej. 18:23, 24, 32) Yahwe imarisen kako ḇyuk swaf faro snonggaku ḇesya ro papoik Ḇyeja fa sikofenḇair kakara sena. (1 Raj. 22:19-22) Yahwe ima inapes kaku, ḇape dor ko fa kakmnis ra I ḇa. Imbape, imarisen ifnoḇek snonggaku ḇenapes ḇa koine insama kofarmyan ḇe I kuker sne ḇesiper. (Mz. 113:6, 7) Refo kako ikofenḇair Yahwe ifnoḇek snonggaku sya. (Mz. 27:9; Ibr. 13:6) Raja Daud doḇe ifrur roi ḇeba kaku snar Yahwe fyasnai sne ḇerun ma imarisen ifnoḇek i.​—2 Sam. 22:36.

10. Moḇsa Yesus fyasnai sne ḇerun rai?

¹⁰ Kwarapan Yesus nyan ḇepyum ḇyena. Yesus ima manggorari ro manfamyan ḇyesi, boi imarisen ḇyansren wemin sena. Rosai ḇefnai fa Yahwe imarisen sfas fawar ine ro Refo ya? Imarisen kokame isoine ḇeḇebukor ro kina sya fa sfarkor ro Yesus nyan ḇepyum ḇyena. Yesus manggundi ikofen, ”Snar yaḇuk nyan oso kwar faro mko, insa mko kako mkakfrur raris moḇ rosai yafrur faro mko kwar raya.” (Yoh. 13:12-17) Yesus nya papoik ḇeba raryano, imewer sifarmyan i. Ḇape, imarisen ifarmyan snonggaku ḇesesya.​—Mat. 20:28.

11. Moḇsa ḇeḇebukor ro kina sfasnai sne ḇerun raris Yahwe ma Yesus su?

¹¹ Farkarkor ya ḇe ko. Ḇebukor ro kina oso na fyasnai sne ḇerun kuker nyan nabore. Imnis raris, dor swari ma romawa ḇyesya fa sifrur rosai rirya kuker mnis kaku. Imarisen kako fa ryower kakara  sena, syadi wer rofyor kakara sena naḇese ro roi kyara na. Marley, ḇeḇarek ro Amerika Serikat, doḇe, ”Aya kuker swa yedi fyorno ido nuna kakara oser ḇa. Ḇape, yafawi iswar ma ḇyesyowi aya inja dor kakara ayena ma kyara pyum resari rofyor dun snemuk ḇaim. Ḇebukor ro kina oso fyasnai sne ḇerun ido na imarisen ifrur fararur ḇero rum na, fyandun rosai nari snonggaku sikofen na ḇa snar nama fararur ro bin senairi. Ine napyan ḇa. Imbesrar oso ḇenir Rachel doḇe, ”Ro moḇ ayedi smam snon sifnoḇek siswasi fa sḇan sren rosaser ḇaido sifrur sren rum, karyer ḇaido ḇeḇarek fanam rodia sya soḇe ima snon ’ḇesambraḇ ḇa dirya.’ Soḇe ima ryower do binsya monda.” Snonggaku ro moḇ bedi sya skara radia ido, waswarepen kukro Yesus i monda ḇyan manfamyan ḇyesi wemin sena, ima fararur women sifrur nairi. Ḇebukor ro kina oso ḇembran pyum fararur ḇyena na kyara faro roi snonggaku sikofen kuker i ḇa. Imboi, na myam ḇepon swari ma romawa ḇyesya fandun sena. Rosai wer ḇebukor ro kina oso fyasnai wer ya?

12. Snar suswar ko, rosai Yahwe ma Yesus sufrur faro ko?

¹² Saswar. Roi Yahwe ifrur nakam neknam ro saswar. (1 Yoh. 4:7, 8) Yahwe kuker saswar fyamfon fandandun rur koḇena ro Wos Ḇyena, Refo ya, ma organisasi Ḇyedi. Ifawi pyum sneḇaḇir koḇena kuker byuk kakakyar ḇe ko snar iswar ko. Rariso kuker fandandun ro ḇaken saprop koḇena? Yahwe ”ḇyukma ḇeko ro roi ḇeḇor fakona na”. (1 Tim. 6:17) Rofyor kofrur sasar ido, isonek ko, ḇoi Ipok imnai fa iswar ko. Snar iswar ko, Yahwe fyasos fasaspar faro ko. Yesus i kako dakswar ko inja imarisen byuk kankenem ḇyedi ḇe ko. (Yoh. 3:16; 15:13) Inja, roi osoḇaḇeri isya ḇefrur Yahwe ma Yesus sumnai fa sufasnai saswar suḇena faro snonggaku ḇesouser faro su.​—Yoh. 13:1; Rm. 8:35, 38, 39.

13. Rosai ḇefnai fa snonggaku oso ḇebukor ro kina fandun fa fyasnai saswar ḇyena faro kina ḇyesya? (Mam kako ro kotak ” Moḇsa Snon Oso Ḇefarḇuk Babo Fyasnai Syowi faro Swari Rai?”)

 ¹³ Farkarkor ya ḇe ko. Roi ḇebukor ro kina ifrur nakam neknam kaku ro saswar ya. Rosai ḇefnai fa roi ine fyandun kaku? Manwawan Yohanes kyarem ḇo doḇe, ”snonggaku ḇeayin naek [ḇaido kina ḇyedi] myam faroya, nari rariso iswar Allah myam ḇaimya.” (1 Yoh. 4:11, 20) Snonswa ḇeswar kina ḇyesi ma ḇemarisen ḇeso Yahwe ma Yesus nyan suḇena ido, nari fyamfon fandandun rur ro kina ḇyesya, fyawi pyum kina ḇyesya sneḇaḇir sena, ma fyamfom roi kina ḇyesya sfandun ro ras-ras na. (1 Tim. 5:8) I kako nari fyarkor ma isonek romawa ḇyesya. Osower ido, ḇyesewar kaku fa ifrur Yahwe imarisen ma kina ḇyesi kako. Mgorama kawos moḇsa ḇebukor ro kina oso iso pyum Yahwe ma Yesus nyan sufrur fararur anna kam.

14. Moḇsa ḇebukor ro kina fyamfon fandandun rur ro kina ḇyesya rai?

¹⁴ Famfon fandandun rur ro kina bedi. Raris Kmari, Yesus imarisen kaku fa fyamfon fandandun rur ro manfamyan ḇyesi. (Mat. 5:3, 6; Mrk. 6:34) Ḇebukor ro kina sifrur rarirya kako, fyamfon fandandun rur ro kina ḇyesya ma myam ḇe roi ḇefandun kaku dirya. (Ul. 6:6-9) Inja, myam kaku fa i ma kina ḇyesya siwasya ma sfarkor Refo, siso fananjur, ma sbaryas aḇar ḇepyum ḇesya kwar. I kako ifnoḇek kina ḇyesya fa sna wis ḇepyum kuker Yahwe ma sḇebati pdef.

15. Nyan oser risai ḇebukor ro kina ifrur fa fyawi pyum kina ḇyesya sneḇaḇir sena?

¹⁵ Ifawi pyum kina ḇyesya sneḇaḇir sena. Yahwe fyasnaiḇair saswar ḇyena faro Yesus i ro ḇarpon snonggaku ḇese ḇero ris ḇyesya. (Mat. 3:17) Yesus fyasnai kako dakswar manfamyan ḇyesi roro wos ma roi ifrur na. Rarirya, manfamyan ḇyesi kako sikofen siswar i. (Yoh. 15:9, 12, 13; 21:16) Ḇebukor ro kina na fyasnai ḇe swari ma romawa ḇyesi iswar si kuker roi ifrur na. Imnis raris, fyarkor Refo kayam kuker kina ḇyesi. Ikofenḇair kako iswar ma ḇyesyowi si. Oras ḇesrow ido, i kako ḇyuk wos sandik ḇe si ro ḇarpon snonggaku ḇese.​—Ams. 31:28, 29.

16. Rosai ḇebukor ro kina fandun fa ifrur ya wer, ma rosai ḇefnai fa isasori?

¹⁶ Fyamfon fandandun ras-ras ro kina ḇyesi. Yahwe fyamfon fandandun ras-ras ro snonggaku Israel fyor sisya sismai samamyai snar sisouser faro I ḇa. (Ul. 2:7; 29:5) Baboine kako, Yahwe fyamfon fandandun ras-ras koḇena ḇesya kwar. (Mat. 6:31-33; 7:11) Yesus ḇyuk anan faro snonggaku ḇeso i sya. (Mat. 14:17-20) Ma ḇyuk sneprei fyor sidufe.  (Mat. 4:24) Ḇebukor ro kina ifrur Yahwe imarisen fyor fyamfon kaku kina ḇyesi fandun ras-ras sena. Ḇape na myam monda fararur ḇyena ḇa. Kukro na nafrur ḇyefnder fararur ḇyena ḇe ḇebukor ya, isoine myam fandandun ro rur ma sneḇaḇir kina ḇyesi.

17. Moḇsa Yahwe ma Yesus sufarkor ma susonek ko rai?

¹⁷ Fyarkor kina ḇyesi kuker nyan saswar. Yahwe fyarkor ma isonek ko faro faḇaḇye koḇena. (Ibr. 12:7-9) Raris Kmari, Yesus i kako fyarkor snonggaku ḇero baḇ papoik ḇyedi kuker nyan saswar ya. (Yoh. 15:14, 15) Ḇyuk anun ḇepakrek ḇe si ḇoi pyum kaku. (Mat. 20:24-28) Ifawi pyum kaku koma konapes ḇa ma kofrur sasar ker.​—Mat. 26:41.

18. Ḇebukor ro kina fyor iso Yahwe ma Yesus nyan suḇena, rosai iifawi kaku ya?

¹⁸ Ḇebukor ro kina iso Yahwe ma Yesus nyan suḇena ido, nari ifawi kaku swari ma romawa ḇyesya sima sinapes ḇa. Fyor sifrur sasar, nari irmom si ḇa. (Kol. 3:19, fasfas kasun) Imbape, imnis wos ḇero Galatia 6:1, isonek si ”kuker myaren” ma manggundi ḇyuk swarapepen ḇe i snar i kako inapes ḇa. Raris Yesus, ifawi fandun kaku fa dyasnai nyan ḇepyum.​—1 Ptr. 2:21.

19-20. Fyor ḇebukor ro kina ifrur snemuk, moḇsa iso Yahwe ma Yesus nyan suḇena rai?

¹⁹ Ḇebukor ifrur snemuk ḇeyun payamyum. Yahwe ifrur snemuk faro payamyum koḇena. Imnis ra, ifrur kankenem ya isya, faro marisen Ḇyena monda ḇa, ḇoi insama kona aski. Ma, osoḇaḇeri ḇedif I fa ḇyuk Romawa Ḇyedi fa imarwarek ko. Imarisen ifnoḇek ko. Yesus i kako ifrur rarirya. (Rm. 15:3) Imnis ra, swaf fa imnaisu ḇyuk fa fyarkor snonggaku sya.​—Mrk. 6:31-34.

²⁰ Snonswa ḇeḇebukor ifawi ḇemarḇak iso ifrur snemuk ḇeyun payamyum ma roi ine fyandun kaku. Sifawibos roi befnai ifrur snemuk ani ḇaido snar masasor ḇa. Imarisen isouser farkankin ro Refo insa ifrur snemuk ḇepyum. * (Ams. 2:6, 7) Inja, kyara manggundi ḇa ḇoi ḇesesya kako.​—Flp. 2:4.

21. Rosai nari kawos ro farkarkor ḇerama ya?

²¹ Yahwe ḇyuk ḇebukor ro kina fa suf fararur ine, ma imarisen insama simbran pyum na. Iso pyum Yahwe ma Yesus nyan suḇena ido, nari imbran pyum fararur ḇyenane. Ma binswa imbran pyum fararur ḇyena ido, farḇakḇuk suḇena na neaski. Moḇsa binswa myam kaku swari ḇeḇebukor ya, ma samswen risai imbude susmai na? Fakfuken nane na kawos ro farkarkor ḇerama ya.