Sinan ayesuya sufawi kakaku ya taun 1920 fafisu sufarḇuk ḇaime. Yaḇeaḇen ro taun 1939. Inggoḇarek ro Inggris. Yababa kaker ya, yasoker fananjur kuker sinan ayesuya, ma ḇarpur ido yakso Sekolah Pelayanan Teokratis. Yaswarepen kaker fafisu yasmai randak tugas Sekolah anya. Fafisu anya, yaḇeumur taun ri wonem kaker, ma yaknampu syadi ro mimbar ani. Inja, yek ḇe kotak oso insama bisa yamam ḇerama syakam. Yasyasen kaku kukro yawos ro ḇarpon snonggaku ḇeba sya.

Fafisu iwara, kamami ḇyeketik wos ḇepyandam ro kartu oso insama yabuk naro ḇaḇebaryas na. Yakbaryas randak ḇe rum oso fafisu yaḇeumur taun riwar. Yamarisen kaku kukro ḇena rum ya imarisen iwasya kartu yabuk ḇe i na ma dun ḇeri syap ”Karena Allah Itu Benar Adanya”. Yafrar fasaw ḇe kamami fa yafawar na ḇe i. Yamarisen kaku yabaryas ma yaso fananjur. Nakame nafrur fa yakmarisen fa yakfarmyan ḇe Yahwe kuker sne ḇesiper.

Yamarisen kaku kakaku ḇero Refo fafisu kamam ayeja dun Menara Pengawal ker ḇe aya. Majalah anna ndrama kwar ido, na yamarisen ḇo yakain yawasya na ḇeri. Yakyar syadi wer ḇe Yahwe I, ma ḇarpur mura ido yabuk kankenem yedi ḇesiper fa yakfarmyan.

Ro taun 1950, aya kukro kina ayesya nggoso Pertemuan Wilayah Pertambahan Teokratis sifrur ro New York. Tema faro ras Kamis, 3 Agustus, iso ”Hari Utusan Injil”. Ro ras anya, Naek Carey Barber, ḇarpur ḇeḇe oser ro Raryur Naek Ḇefarkin, ḇyuk faya faro ḇebaptis sya. Ro pupes faya ḇyedi,  ḇyuk fakfuken risuru faro imbe ḇebaptis sya. Yores ma yakarem, ”Imbo!” Yaḇeumur taun ri 11, imboi yafawi kaku ima snemuk ḇefandun kaku dirya. Fyor imbe yaḇebaptis, rya yamgak kero kukro yafawi yakas ḇa. Ḇape, imem ayedi ikfin aya isof ro kolam ani ma ikofen nakame nambran pyum monda. Kakuḇeri nakame nambran fasaw kaku. Wemin yesya nasabu ro war kopuk ya ḇaime. Inja fafisu anya, naek oso fyaraun aya ḇo ḇyuk aya ḇe naek imbe ḇebaptis aya anya. Mura yaḇebaptis, ma raposa sfaraun aya wer fa yasae ro kolam ani. Ro ras ḇefandun kaku anya, Yahwe ikfin aya ḇesya kwar fa yambran ro nyan ḇemnis ya.

Yamnai ro farkarkor yena raposa, imbe yakḇe merintis. Mboi, guru-guru yesya sidif ker aya inja yaksun farkarkor ḇekaki. Imbape fyoro ḇa fyor yaksun ro farkarkor ani, yakara na yafarmyan ḇe Yahwe kuker sne ḇesiper ḇa ma yamam farkarkor ayena. Inja, yun snemuk fa yasae ro universitas ani. Yakofenḇair roi yasmai nane ḇe Yahwe I. Ramnai, yafas surat ḇe dosen-dosen ayesya ma yakofen asuser ḇe si kukro imbe yasae ro pupes taun randak yasun farkarkor anya. Fafisu anya, yakyar faro Yahwe I kuker sne ḇesiper ayena, inja yaḇemerintis ḇeri.

Yasun randak ro fararmyan yena ro oras nakam paik Juli 1957. Yafuken naek srar ḇero Betel London sya bisa yakso warpu perintis ḇefarmyan fyoro kwar sya ke roḇa. Ḇarpur mura ido, yaḇe merintis fnoḇek Naek Bert Vaisey ro kota Wellingborough. Yafarkor nabor ro i. Imyaren kaku, ma ifnoḇek aya fa yana jadwal dinas ḇepyum. Ro sidang inggoḇedi, nuḇesuru monda ma binbesrar ḇeḇe sinan kwar riwonem. Yafrur fasasos ma yaḇuk kankarem ker ro fananjur, inja yasmai swaf nabor fa yabawes kakyar ayena ḇe Yahwe I ma yafasnai kakyar ayena.

Ḇarpur mura ido, sisun aya ḇe bui swaf riḇeso monda kukro yapampum dinas militer. Mura ido yasrow kuker Barbara i, ima perintis istimewa dirya. Nufarḇuk ro taun 1959, ma numarisen siwan nuḇe moḇ sarirya monda. Moḇ nufarmyan randak iso Lancashire ro ḇar barat laut Inggris. Ro Januari 1961, sor aya fa yaso Sekolah Pelayanan Kerajaan paik oser ro Betel London. Yakandor kukro inggofarkor ramnai, yasmai fararur fa yaḇe pengawas keliling. Ro minggu swaf risuru, pengawas wilayah ḇefyoro kwar fyarkor aya ro kota Birmingham, ma simarisen fa Barbara iso warpu aya. Ramnai, nukaḇer ḇe moḇ nufarmyan randak ya ro Lancashire ma Cheshire.

Ro Agustus 1962, rofyor nuḇe cuti, nusmai surat ro kantor cabang. Ima formulir fa nuso Sekolah Gilead. Barbara ma aya nunadi kuker roi nusmai ine, ramnai nuser formulir ani ma nubuk kaḇer na ḇe kantor cabang imnis akurfasnai sbuk na. Paik ririm  raposa, nuraḇe Brooklyn, New York, fa nuso kelas Gilead ḇeḇe 38. Ro paik risamfur, inggosmai farkarkor Refo ḇesyadi wer.

Ro Sekolah Gilead, inggofarkor Allah Wos Ḇyena, organisasi Ḇyedi, ma farfyar ro naek srar ro supswan ḇesiper. Fafisu anya, sape nuḇe umur 20 syadi. Nufarkor nabor wer ro siswa-siswa ḇeso ro kelas inggoḇedi. Yamarisen kukro ras nakam yasmai tugas fa yafararur kayam kuker Naek Fred Rusk, oser ro instruktur inggoḇeja. Farkarkor ḇepyum fyasnaibos nasya, fandun fa kobuk ananun kuker nyan ḇekaku. Komamuser samaido anun koḇena neknam kaku ro Refo ya. Instruktur semir ḇa, rodia naek ḇefarmyan fyoro kwar kako sakrama fa sfarkor inggo, imnis ra Nathan Knorr, Frederick Franz, ma Karl Klein. Nuna farkarkor nabor kako ro Naek A.H Macmillan ḇefasnai sne ḇerun ya. Ro faya ḇyedi, nufawi moḇsa Yahwe ifnoḇek kawasa Ḇyesi fafisu sismai fafrowes ro taun 1914 isof ro randak taun 1919.

Sekolah ani imnai raposa, Naek Knorr ikofenḇair ḇe aya ma Barbara nari senufa nura ḇe Burundi ro Afrika. Nura ḇeri ḇe perpustakaan Betel ma nusewar Buku Tahunan fa numampan manbaryas ḇero Burundi sya sefis rodiwa. Nukandor kaku kukro sikofenḇair barbor ro manbaryas ḇero Burundi sya ḇa. Insape nufawi moḇ imbe nura ine sbaryas ro i ḇaime. Nuyakfawi nabor kuker Benua Afrika ine ḇa. Numgak kaku. Imboi nuḇenadi kaku ramnai, nuknon syadi.

Ro moḇ nufarmyan babo ine, nakame naḇese kaku ro moḇ nuḇedi, cuaca ḇyena, budaya sena, ma wos sena. Kirine fandun fa nufarkor wos Prancis. Ma ḇese wer iso, nukmom imbe nuḇarek rodiso. Ras risuru fyor nusya ro diwa kwar, Harry Arnott ryama ḇe moḇ nuḇarek ine fyor imbe ibur ḇe Zambia moḇ fyarmyan roya. Snar ifnoḇek nu, inja nusrow apartemen oso ḇarpur ḇeḇe rum ḇerandak nuḇedi ḇe misionaris. Ḇape fyoro ḇa mura, nusmai dadwarek ro ḇesmai papoik sya. Sakrower ḇaim kuker Saksi Yahwe sya. Insape nufrur fararur nuḇena ro moḇ ani, sikofen nuḇarek awer rodiwa kukro nuyakna surat ijin faro fararur nuḇena ḇa. Inja faḇye kaku, nubur moḇ ani ma nufrur  fararwei ḇebabo wer ro sup ḇebabo, isoine ro Uganda.

Numa numgak nuraḇe Uganda kukro visa noḇa. Imbape nukyar ḇe Yahwe I. Nusmai fafnoḇek ro naek oso ḇerama ro Kanada ḇefarmyan ro Uganda. Ikofenḇair ḇe ḇefararur ro imigrasi sya roi nusmai nane, inja muraido sbuk swaf ḇenu fa nufrur surat ijin fa nuḇarek rodia. Nanekam nafrur nukyar Yahwe ima ifnoḇek nu kaku.

Roi ḇero Uganda naḇese kaku ro Burundi. Fararur ḇaḇebaryas nasya ro Uganda kwar, manbaryas ḇero diwansya sape se 28 monda. Ro moḇ ḇebabo ine, sibor sifawi wos Inggris. Mboi nufawi fandun fa nufarkor wos awin oser sena insamaido snonggaku sakfawi kakaku ma sakfarmyan ḇe Yahwe I. Nubaryas ḇepon ro Kampala. Ma wos sepake nabor rodia iso Luganda. Ḇape, roi nufrur na nefromo ḇa kukro ḇaḇebaryas nuḇena nun bon ḇepyum. Nufawi syadi wer ḇefarkor Refo kuker nunsya roi sfandun na. Simarisen sikofenḇair ma sfawar roi sḇaḇir na ḇe nu rofyor inggo farkor Refo.

Numarisen kaku nufnoḇek snonggaku ḇese fa sakfarkor kakaku ya. Mboi nuryaḇ syadi wer rofyor sor nu fa nufarmyan ro tugas keliling. Imnis akurfasnai nusmai ro kantor cabang Kenya, nufrur ”marandan” ḇeri fa nusewar moḇ-moḇ ḇefandun syadi perintis istimewa. Snonggaku ḇero diwansya sakfawi ḇaim Saksi sya mboi sisaser pyum nu kaku. Ḇepyum ya wer iso sfasos roḇean fa nuyane.

”Marandan” nuḇena nasya kaker. Ro Kampala, yek kereta ras risuru ḇe pelabuhan ḇero kota Mombasa, Kenya, ramnai yek wai ḇe soren Seychelles, aimando ḇero Samudra Hindia. Ḇarpur ya, ro taun 1965 isof ro 1972, yaraker ḇe aimando anna kuker Barbara i. Randak ya, manbaryas risuru monda ḇero diani. Mboi ḇarpur ido, kelompok isya ma ḇye sidang kako. Yafrur ”marandan” kako ḇe Eritrea, Etiopia, ma Sudan fa yasrow kuker naek srar ḇero diwasya.

Ro Uganda, roi ḇekur ḇe polotik na nfarwei rofyor militer siso ḇeyuf papoik fafisu anya. Fafisu ḇeradine imbran swaf taun ḇe taun. Fafisu anya, yafarkor snar ipyum kaku rofyor koso Refo parenta ḇyena fa ’koḇak faro kaisar rosai koḇuk faro kaisar’. (Mrk. 12:17) Ro ras oso, sor kawasa syakam fa sedaftar ro kantor polisi ḇefanam rodia. Nuso naḇeri. Ras riḇeso ramnai, fyor aya kuker misionaris oso numbranuk ro kampala ido, polisi srama yoḇ nu. Nusyasen kaku! Siksof nuḇe mata-mata ma sun nuḇe kantor polisi pusat. Ro kantor ani, nukofenḇair numa misionaris monda ma nuḇe daftar kwar. Mboi sikyar nu ḇa. Smamwarek nu ma sun nu ḇe kantor polisi ḇefanam kuker rum inggoḇedi. Numarisen kukro ḇemamwarek ro diansya smambir nu ma sifawi numa nuḇe daftar kwar. Inja iwan fa sfor nu ḇa. Nusnesna naprei kaku!

Ro fafisu anya muma, nusmai fafisu ḇefrur marisen ḇa rofyor oto nuḇedi simnai na ro pos-pos militer smamwarek na, sordade ḇemamwarek rodia sinem swan ido na sifrur rarya ker. Nusmai ḇeradine kwar ido, nuḇenadi ker. Inja, nuknon syadi, ma senu fa  numbran wer. Ḇape faḇye kaku, taun 1973, misionaris syakam ḇeḇe mandaman sya siwan si fa sibur sup Uganda.

Inja, nusmai fararwei wer. Kirine, nuraḇe Pantai Gading, Afrika Barat. Nufarkor wos ḇebabo wer, ma nuyawos wos Prancis wer, ma nufarwei moḇ nuḇekayam ḇaido nuyawos kuker misionaris ḇerama ro moḇ ḇese sya. Numam wer Yahwe fafnoḇek Ḇyeja, kukro fyoro ḇa ido, snonggaku ḇena sne ḇerun ḇero diansya simarisen sakrower abar ḇepyum nuyun anya. Yahwe ifrur nyan nuḇena namnis snar nukyar faro I.

FAFISU NAMNIS WER ḆA

Fafisu nufarmyan ro Betel London, Barbara dafduf ḇyedi nmarḇak syadi wer, ḇarpur ido ryoe. Yasmai saramper ḇeba kaku ro kina Betel sya, syadi ro imbeswa mambeswa oso insama yakyar pdef ḇe Yahwe I. Ḇarpur mura, yasrow imbesrar oso ḇenir ḇe Ann, fafisu ya fyarmyan ḇe komuter. Dakḇe perintis istimewa fafisu iwara, ma iswar kaku Yahwe I. Inja nufarḇuk ro taun 1989 ma nufarmyan ro Betel London isof ro kirine.

Ro taun 1995 isof ro 2018, yafararur ḇe wakil kantor pusat (fafisu iwara sap ḇe pengawas zona). Ro taun ḇe taun anna, nuraḇe ḇe indokada sup ri 60. Ro rarama nuḇena, yamam ro manggundaya rosai monda ḇekur manfamyan Ḇyesi, Yahwe ḇyebarakas ker si.

Ro taun 2017, yara kaḇer ḇe Afrika wer. Yamarisen kukro ine ḇerandak yakun Ann ḇe Burundi. Nuryaḇ kaku numam manbaryas ro sup ani sibor syadi wer. Ro sampak moḇ yambran yabaryas ro rum ḇe rum taun 1964 fafisu anya, kirine rum Betel ḇepduk kaku isya rodia. Ro sup ani, manbaryas ri 15.500 syadi sisya rodia.

Yamarisen kaku fyor yana jadwal faro rarama ayena taun 2018, kukro sup oso nari yarama kaḇer iso Pantai Gading. Fyor nura ro Abidjan, kota ḇeba ro sup ani, yaḇaḇir rya yabur kaḇer ḇe mnu marin yedi. Yamam daftar nomor telfon ro ḇefararur ro Betel sya, ma naek ḇeḇarek ro ris sim faro tamu nuḇarek anya iso Naek Sossou. Yaswarepen ido, fafisu anya dakḇe pengawas kota rofyor ayasya ro Abidjan. Mboi naek inema Sossou ḇese diri. Ineido romawa ḇyedi.

Kaku, Yahwe ima ifrur kaku roi ḇyeasas na. Ro samswen ḇebor yasmai na, yamam fyor kokyar faro Yahwe ido, nari ifrur nyan koḇena namnis. Kirine, yamarisen kaku fa yaso Yahwe nyan Ḇyena, inari ḇesnai ker isof ro dunya babo ya.​—Ams. 4:18.