1-2. (a) Rosai ḇefrur fa snonggaku ḇebor samswen fa sikyar faro snonggaku ḇena papoik sya? (b) Rosai nari kawos ro farkarkor ine ya?

 SNONGGAKU ḇebor samswen fa sikyar faro snonggaku ḇena papoik sya. Smam boi pamarenta ma sasoser sifrur na nun payamyum syadi faro snonggaku ḇenana ma ḇepoik sya. Mboi nun susa faro snonggaku ḇesabarar sya. Refo ikofen, ”Snonggaku sepoik snonggaku isof sismai kandera ro manggunsi.” (Pkh. 8:9) Irya monda ḇa, manfarkin agama sya kako sfasnai kenem ḇeḇye ḇa, eḇedari snonggaku ḇebor sikyar faro Allah wer ḇa. Inja fafisu koḇuk farkarkor Refo ḇe snonggaku oso, na kosewar kaku kofnoḇek i fa ikyar faro Yahwe I ma faro snonggaku ryem sya.

² Ḇefarkor Refo sya monda ḇa na ḇesewar fa sikyar faro Yahwe I ma organisasi Ḇyedi. Ḇefawi kakaku fyoro kwar koine kako fandun fa kokyar roi Yahwe ifrur nakam nama napyum ḇesya kwar. Ḇape, fyorno ido roi ono rya nafrur samswen ko fa kokyar faro Yahwe I. Ro farkarkor ine, nari kawos roi ri kyor anskoine: (1) rofyor kowasya fawar ro Refo mḇoi kofawi mnis na ḇaime, (2) rofyor kosmai akurfasnai ro Yahwe organisasi Ḇyedi samswen fa koso na, ma (3) fafisu kosmai samswen ro fafisu iyama.

3. Rosai ḇefnai fawar ono ro Refo nafrur samswen ko fa kokyar faro Yahwe I?

 ³ Rofyor kowasya Refo ya, nono ido kokara rosai ḇefnai Yahwe ifrur roi anine, rosai ḇefnai kyinfir fa iso nyan ḇeradine. Rupa ra, ro syap Bilangan ikofen snon Israel oso iryur aimun ro ras Mananai, inja Yahwe myun i fa imar. Taun nawas mura, syap 2 Samuel fyawarḇair Raja Daud dun snon oso swari mura myun snon ani, mboi Yahwe byuk ampun faro i. (Bil. 15:32, 35; 2 Sam. 12:9, 13) Inja na kofuken ro kosnesna, ’Daud ifrur sasar ḇeba ḇesyaḇo sai ḇefnai fa Yahwe byuk ampun ḇe i, fama myun fa imar snon ḇefrur sasar ḇeba manggun ḇa ani?’ Imḇe wakfawi kankarem ḇyena kako ke? Koswarepen roi ri kyor ḇeuser nane fafisu kowasya Refo ya.

4. Imnis wos ḇero Kejadian 18:20, 21 ma Ulangan 10:17, rosai ḇefnai kokyar kaku roi Yahwe kyinfir fa ifrur na nkaku ḇesya kwar?

⁴ Refo fyas mnis kaku ḇesya kwar ḇa fawar oso. Rupa ra, kofawi Daud imbror kaku ro sasar ḇyena. (Mz. 51:2-4) Ḇape, snon ḇeyuk sasoser ras Mananai ani ryariso? Fyafko faro roi ifrur kwar na ke? Daksouser Yahwe sasoser Ḇyena ḇa ro ḇepondi ke? Sbuk ker swarapepen ḇe i mboi idardower ḇa ḇaido pyampum na ke? Refo ikofenḇair ḇe ko ḇa. Imbape roi kofawi kaku iso Yahwe ima ”inapes ḇesya kwar”. (Ul. 32:4) Rofyor Yahwe kyinfir imbe ifrur roi oso, ifawi ḇepon kakaku ḇyena. Snonggaku syama siḇese. Roi snonggaku sikofen na, kakara ḇesasar, ma roi ḇesena nawyae roi skinfir fa sifrur na. (Wasya Kejadian 18:20, 21; Ulangan 10:17.) Kofarkor fa kofawi nabor Yahwe ma sasoser Ḇyena ido, na kokyar syadi roi kyinfir fa ifrur nakam nkaku ḇesya kwar. Rarirya ido, fyor kowasya fawar oso ro Refo bo kofawi mnis na ḇaim, kokyar pdef Allah koḇedi ”nyan ḇyenakam nkaku nairi”.​—Mz. 145:17.

5. Rosai ḇefnai fa fyorno ido kokara sasar roi oso? (Mam kako kotak ” Snar Konapes Ḇa Mamam Koḇena Nasnai Manggun Ḇa”.)

⁵ Snar koine snonggaku ḇenapes ḇa si ko nyan kakara koḇena nkaku rarirya ker  ḇa. Allah Yahwe ifrur snonggaku koine kona samambraḇ fa kakfasnai rari ḇepyum Ḇyena, inja na komarisen kaku fyor komam snonggaku sya sifrurmnis snonggaku ḇese. (Kej. 1:26) Ḇape snar konapes ḇa, fafisu kokara kofawi kakaku ḇyena kam kwar kako mboi, bisa kun kakara ḇesasar. Ine iso ḇekur Yunus i, imarisen ḇa kaku fafisu Yahwe kyinfir fa byuk ampun faro kawasa Niniwe sya. (Yun. 3:10–4:1) Ḇape, kokarapan payamyum sismai na snar Yahwe fyasnai sawarwar ḇe si. Snonggaku Niniwe sisyadi ri 120.000 simḇror ma sismai ḇaḇye! Nasnai kaku Yunus iso ḇena kakara ḇesasar ḇekur kawasa ansya, mḇoi Yahwe ima roḇa.

6. Rosai ḇefnai fandun fa Yahwe ikofenḇair ḇe ko ḇa snemuk ifrur na?

⁶ Fandun fa Yahwe ikofenḇair ḇe snonggaku sya ḇa rosai ḇefrur fa ifrur roi oso. Kakuḇae, ro fafisu iwara Yahwe ryir manfamyan Ḇyesi ono fa sakkofenḇair kakara sena ḇekur rosai imḇe ifrur na ḇaido roi ifrur kwar na. (Kej. 18:25; Yun. 4:2, 3) Fyorno ido, Yahwe ikofenfasnai roi ḇefnai fa kyinfir fa ifrur roi oso. (Yun. 4:10, 11) Ḇape kakuya, fandun fa Yahwe ikofenḇair faro ko ḇa snemuk ifrur na. Yahwe ima Allah ḇefrur ko, inja fandun fa ifuken ḇepon ḇe ko ḇa, komarisen ke roḇa faro roi imḇe ifrur ya.​—Yes. 40:13, 14; 55:9.

7. Roi risai rya samswen fa kofrur na, ma samswen fa kofrur na kukro?

⁷ Na kokyar kaku roi Yahwe ifrur na nkaku ḇesya kwar. Ḇape rya samswen kaku fa kokyar faro snonggaku ryem sya. Kukro? Imbude kokorwanan roi skinfir fa sifrur na namnis Yahwe akurfasnai ḇyena ke ḇaido kakara manggun sena monda. Snonggaku ḇeḇeso ḇekenem ro awar Refo ya, imbude sakkara radirya kako. Kokarapan fawar ḇeyap ro  syos eḇe 3. Ḇeyuk sasoser ras Mananai ani kina sedi imbude sifakfuken, Moses dor akurfasnai ro Yahwe I ke roḇa fyor myun ḇaime snon ani ra imar. Uria snon Het ani, swari Daud ifrur sasar kuker i anya, imbude bati ḇyesya skara Daud byuk sasar nasan ḇyedi ḇe raja insama ismai samamyai marmar ya ḇa. Ḇape koswarepen kaku, Yahwe ima ikyar faro snonggaku ryem kwar sya. Inja, kokyar faro si ḇa ido ine imnis ra kokyar faro Yahwe I ḇa.

8. Roi risai ḇefrur sidang Kristen ro abad randak ma sidang Kristen ḇero fafisu koḇedine sumnis? (Farfyar 16:4, 5)

⁸ Ro fafisu koḇedine Yahwe fyarkin kawasa Ḇyesya roro ”women ḇesouser ma ḇefawinanem”. (Mat. 24:45) Fararur sena imnis raryur naek ḇefarkin ḇero abad randak sya, isoine sfasos Allah kawasa Ḇyesi ro supswan ine ḇesiper ma sbuk akurfasnai ḇe penatua sya. (Wasya Farfyar ro Manwawansya (Kisah) 16:4, 5.) Mura penatua sya na smam mnis insama naek srar ḇero sidang sisouser akurfasnai ani. Kosouser akurfasnai ḇerama ro organisasi ma penatua sya ido, ine fyasnaiḇair kokyar faro Yahwe I.

9. Ro fafisu risai rya samswen ḇe ko fa kosouser akurfasnai penatua sya sbuk na, ma rosai ḇefnai ya?

⁹ Fafisu ono napyan ḇe ko ḇa fa kosouser roi penatua sya sap namuk kwar na. Rupa ra, taun riḇeḇeso ḇarpur ine fararwei naisya ro sidang ma moḇ ḇebor na. Snar roi anine penatua nari sor manbaryas riḇeḇeso fa siryur kuker sidang ḇese ḇena manbaryas ḇebor ḇa, insamaido sbuk pyum Balai Kerajaan na. Sor ko fa  koryur kuker sidang ḇebabo ido, imbude na kokara samswen kukro na kobur bati ma kina koḇesya ro sidang ḇepon ya. Yahwe iso ḇewan penatua sya fa sikofenḇair ḇe manbaryas sya oser-oser ro sidang saiso na iryur roya ke? Aroḇa. Naiso na ḇefrur samswen ko fa koso akurfasnai sbuk na. Ḇape Yahwe ikyar faro penatua sya, ma ryir si fa sun snemuk ro manggunsi, inja fandun fa kokyar faro si kako. *

10. Imnis wos ḇero Ibrani 13:17, rosai ḇefnai kaku kosaramper penatua sya?

¹⁰ Rosai ḇefnai fa kosaramper penatua sya ma kosouser akurfasnai sbuk ḇe ko na, ḇesyadi roi sap kwar anna nasrow kuker roi komarisen na ḇa? Snar kofrur na ido, kakfaduru ḇaḇeoser ro fandu Allah kawasa Ḇyesi. (Ef. 4:2, 3) Sidang na syambraḇ syadi fafisu naek srar sfasnai sne ḇerun fa sisouser roi badan penatua sap namuk kwar na. (Wasya Ibrani 13:17.) Ḇefandun syadi ya iso, kofasnai kokyar syadi faro Yahwe I rofyor kosaramper snonggaku Yahwe ikyar sya fa smamwarek ko.​—Farfyar 20:28.

11. Rosai na ḇefnoḇek ko insama kokyar kaku faro akurfasnai penatua sya sbuk na?

¹¹ Rosai na ḇefnoḇek ko insama kokyar kaku faro akurfasnai penatua sya sbuk na? Isoine koswarepen kaku na senadi ḇepon sor farkankin ro rur ḇesren ya fafisu sawawos roi imbe sifrur ro sidang ya dori. Skarauser kako wos farkin ro Refo ya ma sisouser akurfasnai ro Yahwe organisasi Ḇyedi. Penatua ansine sisewar kaku fa sifrur Yahwe imarisen ma smamwarek pyum kawasa Ḇyesi. Penatua ḇesouser ansine sifawi na sikarem ḇe Yahwe I moḇsa simbran fararur sena rai. (1 Ptr. 5:2, 3) Oso wer ido, kokarapan: Snonggaku ḇero dunya ine sḇesisye snar moḇ srama ya, agama, ma polotik na, fama Yahwe kawasa Ḇyesi seoser ma sisyom ḇe Allah ḇekaku ya derer. Ine ndarirya snar Yahwe ḇyebarakas organisasi Ḇyedi!

12. Rosai monda penatua sya skara kaku na fafisu oso isya ifrur sasar ḇeba?

¹² Yahwe byuk fararur ḇefandun kaku ḇe penatua sya isoine fa smamfaduru sidang ya fa isren pdef. Oso isya ifrur sasar ḇeba ido, Yahwe dor penatua sya fa skara namuk na snonggaku ani isya pdef ro sidang ya ke roḇa. Sisewar kaku fa sifawi imbror kaku kwar ke? Imbude ikofen fyafko kwar, ḇape dayin kaku roi ifrur kwar na ke? Syewar insama ifrur sasar ani wer ḇa ke? Ifrur sasar ani snar awyae ḇeḇyeḇa ro bati ḇyesya ido, na imarisen imnai ḇyebati kuker si wer ke? Penatua sya na skara pyum kaku roi anine ma roi ḇesena. Senadi kako ma sisewar wos farkin ḇesrow ro Refo na, ramnai sun wos oser snonggaku ani na isya pdef ro sidang ya ke roḇa. Fyorno ido, na sun wos oser fa sisasyar snonggaku ḇefrur sasar bur sidang ya.​—1 Kor. 5:11-13.

13. Fafisu bati ma kina koḇesi sisasyarbur sidang ido, imbude rosai na kokara na?

¹³ Snonggaku sisasyarbur sidang ani ima bati ma karyer ḇefanam koḇedi ḇa ido, na napyan fa kona kakara oser kuker roi penatua sya sifrur na. Ḇape ima bati ḇefanam koḇedi ido na rarso? Imbude na kofakfuken ro kosnesna, penatua sya skara pyum roi nakam kwar ke, ḇaido kofuken snemuk sun na namnis kuker Yahwe marisen Ḇyena kwar ke. Kokara radirya ido, rosai na ḇefnoḇek ko insama kokyar pdef faro penatua sya ma koso snemuk sun kwar na?

14. Fafisu penatua sna wos oser fa sisasyar bati ḇaido kina koḇesi ido rosai fandun fa koswarepen na?

 ¹⁴ Fandun fa koswarepen Yahwe iso ḇewan fa sisasyarḇur ḇefrur sasar ḇemewer ḇemḇror ḇa sya. Roi anine na nun payamyum faro naek srar ro sidang ma snonggaku ḇefrur sasar ani kako. Smam monda ḇefrur sasar ani isya pdef ro sidang ido, nari dun awyae ḇeḇyeḇa faro naek srar ḇesesya. (Gal. 5:9) Oso wer ido, na kyara sasar ifrur na naba manggun ḇa, eḇedari na syewar fa ifrur fararwei oḇa insama nya wis ḇepyum kaḇer kuker Yahwe I. (Pkh. 8:11) Kokyar fafisu penatua sya sun snemuk fa sisasyar snonggaku oso ro sidang, sifawi inema fararur ḇefarfnak risyaḇa. Imnis hakim ḇero er Israel ḇepon siwara, penatua sya sifawi sima ”semankara faro Yahwe I mḇoi faro snonggaku sya ḇa”.​—2 Taw. 19:6, 7.

15. Rosai ḇefnai fa ro kirine fandun fa kokyar kaku faro Yahwe akurfasnai byuk na?

¹⁵ Snar papupes dunya ine fyanam kaku kwar, fandun fa kokyar faro roi Yahwe ifrur nakam. Kukro? Ro fafisu kandera ḇeba ya, imbude na kosmai akurfasnai komam na rya naḇese kero, nasrow ḇa, ḇaido samswen fa koso na. Ro fafisu anya, Yahwe nari dawos beri ḇe ko ḇa. Rya nari byuk akurfasnai roro snonggaku ryem sya. Ro fafisu ḇesamswen ḇeradine, nasrow ḇa kaku fa kokorwanan bo kofakfuken, ’Akurfasnai sbuk anna ndrama kaku ro Yahwe I ke, ḇaido kakara manggun senarya ke?’ Ro fafisu anya nari wakyar faro Yahwe ma organisasi Ḇyedi ke? Moḇ mam akurfasnai organisasi byuk ro kirine nafnoḇek Au fa wafawi kankarem ḇyena. Wakyar ma wasouser akurfasnai sbuk ro kirine ido, nari napyan syadi fa wasouser faro akurfasnai sbuk ro fafisu kandera ḇeba ya.​—Luk. 16:10.

16. Ro ras Armagedon rosai ḇefrur samswen ko fa kokyar faro roi Yahwe kyinfir fa ifrur na?

¹⁶ Roi ḇese wer fandun fa koswarepen ya iso, roi Yahwe kyinfir fa ifrur ro pupes dunya ine moḇsa komam na rai? Kirine komarisen kaku insama snonggaku ḇeyakfarmyan ḇe Yahwe ḇaim sya, kina koḇesya kako, skinfir fa sakfarmyan ḇe Yahwe I, fyor pupes ani ryama ḇaim. Ḇape ro ras Armagedon, Yahwe roro Yesus i, nari dapḇair na sismai fasaspar ke roḇa. (Mat. 25:31, 33; 2 Tes. 1:7-9) Koma kopok kapḇair ḇa mansei nari ḇesmai Yahwe sawarwar Ḇyena. (Mat. 25:34, 41, 46) Nari kokyar roi Yahwe ifrur anna nkaku ke,  ḇaido komnai kofarmyan ḇe I snar komarisen ḇa faro roi ifrur na ke? Nasnai kaku fandun fa kokyar faro Yahwe I ro kirine insama nari kokyar kuker sne ḇesiper faro I ro fafisu iyama.

17. Roi Yahwe ifrur ro papupes dunya ine byuk payamyum rosai?

¹⁷ Roi Yahwe kyinfir fa ifrur na dun payamyum ro dunya babo ya. Ro fafisu anya, agama ḇekaku ḇa na, farbaḇyan ḇeyan fambram, ma pemerenta ḇefrur susa snonggaku sya nari napromes kwar. Nari kosmai dafduf ono wer ḇa, koḇe mansar binsar ḇa, ḇaido koḇesneso wer ḇa snar snonggaku koswar sya simar bur ko. Ibiris ma rur ḇeḇarḇor sya, nari sawninyan snonggaku sya wer ḇa ro swaf taun syaran oser. Ma roi ḇeḇye ḇa ḇejadi snar ḇaḇembroḇ sena nari napromes. (Why. 20: 2, 3) Kokarapan moḇ koḇaḇir raya ro fafisu anya. Na kokofen kasumasa kaku kukro kokyar pdef faro roi Yahwe ifrur nakam.

18. Farkarkor rosai kun ro fawar ro snonggaku Israel ḇefas ro Bilangan 11:4-6 ma 21:5?

¹⁸ Ro dunya babo ya, roi ono naisya kaker na ḇefrur samswen ko fa kokyar faro Yahwe I ke? Kokarapan, fawar ro snonggaku Israel sya. Fyoro ḇa fafisu sisasyarbur Masir raposa, sisasurem snar smander robean san ro sup Masir anya. Spapum kwar faro manna Yahwe byuk ḇe si na ma smam na ḇe mamami ḇefrur yayin. (Wasya Bilangan 11:4-6; 21:5) Rariso kuker ko? Nari kakfasnai kenem ḇemnis ra si ro fafisu kandera ḇeba ya imnai kwar ke? Fafisu anya, imbude na kona fararur nabor fa kofrur sren supswan ine ma kofadwer i ḇe Firdaus. Randak ya rya kenem koḇena rodiwa napyan ḇa. Raris snonggaku Israel nari kosurem faro rosai Yahwe fyasos ro fafisu anya ke? Ro kirine koḇesyowi roi nakam Yahwe fyasos kwar na ido na koḇesyowi syadi faro roi fyasos ro fafisu iyama.

19. Rosai kofarkor ro farkarkor ine ya?

¹⁹ Fandun fa kokyar roi Yahwe ifrur nakam nkaku nairi. Fandun fa kokyar kako faro snonggaku Yahwe ryem sya, kukro Yahwe ikyar si fa smam insama kawasa Ḇyesi sisouser faro akurfasnai byuk na. Iḇye kada koswarepen wos Yahwe ikofen ḇe nabi Yesaya ine, ”Mgokyar pdef ma mgoḇoryae ḇa kada nari mgosambraḇ.”​—Yes. 30:15.