RO AWAR Refo ya, rofyor snon oso imbe dun bin oso ḇe swa faro i ido, na kina suḇesya sawawos ḇepon fa sna wos oser simarisen fa sufarḇuk. Rarirya ido, nari snon anine kina ḇyedi sun ararem faro eḇe bin ya kina ḇyedi. Ararem sbuk na nasoine nana ḇekakur, aiwan, ḇaido pipi. Fyorno ido, sbak ararem kuker sifrur fararur ono. Roi ine iso Yakub ifrur ya. Insama nari fyarbuk kuker Rakhel i, fyararur taun ri fik faro Rakhel kmari. (Kej. 29:17, 18, 20) Rosai ḇefnai fa sbuk ararem anine?

Ḇefawinanem Refo oso snori Carol Meyers ikofen, ”Ro kina [ḇefrur yafe], inai sedi na dakfararur kako. Rofyor fyarḇuk kwar, nari ifnoḇek kina ḇyedi wer ḇa. Inja, smam ararem sbak na ḇe roi fa sbukifadwer inai ani fararur ḇyedi.” Ararem ine kako na nafrur kina ri suru ansi fa sfanam syadi si. Sifnoḇek yae ro fafisu ḇesamswen na. Oso wer ido, ararem fyasnai kako sapsasor bin ani kwar ma nari swari iso ḇemam i, mboi kmari ḇa.

Ararem ine fyasnaiḇair ḇa smam binswa oso ima imnis ra roebor sboḇ na. Syap Ancient Israel—Its Life and Institutions (Kankenem ma Rari ro Israel Ḇepon Iwara) ikofen, ”Snar fandun fa sbuk pipi ḇaido roi ḇesena ḇe ararem faro eḇe bin kina ḇyedi, inja imbude na smam farḇakḇuk ḇero kina Israel ḇe roi sboḇ na. Ḇape, rya smam [ararem] ḇe roi sbukibak fadwer faro eḇe bin kina ḇyedi, mboi ḇe ḇaḇyak sbukiḇak inai sedine ḇa.”

Ro sup ḇeḇeso ḇero babo ine, sifrur kaker sbak ararem ine. Sinan ḇeḇe Kristen imbe sor ararem ido, fandun fa sfasnai sna ’kakara ḇemnis’ kuker sor syadadi ḇa. (Flp. 4:5; 1 Kor. 10:32, 33) Rarirya ido, sfasnai sima ”sewomen faro pipi” ḇa, ḇaido seyanfambram ḇa. (2 Tim. 3:2) Oso wer, sor syadadi ḇa ido, mambesrar imbe dun inai sedi ani, nari fandun fa iwaf awer rawo ismai pipi nabor kuf kwar insape sufarḇuk. Ḇaido mambesar ani ḇye perintis ido, fandun fa imnai ro fararur perintis ḇyeja awer fa syewar fararur ḇese insama ismai pipi fa byukibak ararem sor syadadi anya.

Ro sup ḇeḇeso, pamarenta sifrur sasoser fa sbak ararem. Sinan Kristen ḇeḇarek ro diwa nari sisouser sasoser ani. Snaro? Refo ikofen kwar snonggaku Kristen fandun fa ’sisouser faro pamarenta’ ma sasoser sifrur na, ḇesyadi fafisu sasoser anna naḇesebur sasoser Allah Ḇyena ḇa.​—Rm. 13:1; Kis. 5:29.