1-3. (a) Rosai ḇefnai fa Yahwe iswar Salomo i, ma barakas rosai Salomo ismaina? (b) Fakfuken risai na neḇekarem ro farkarkor inena?

SALOMO ḇyeraja ro Israel rofyor ḇye snonkbor kaker. Ro randak ḇaḇepapoik ḇyedi, Yahwe fyasna mankundi ro mafafu ḇe i ma ikofen, ”Wor mura rosai wamarisen yaḇuk ḇe au na.” Salomo kyarem, ”Ayama yababo kaker ma yafawi roi noḇa. . . . Buk ḇe manfamyan banine sne ḇesoasuser fa yaḇemankara kawasa ḇansi.” (1 Raj. 3:5-10) Salomo dor ”sne ḇesoasuser”. Inema fararyor ḇesyadadi ḇa nairi! Iso ḇefnai fa Yahwe iswar Salomo i! (2 Sam. 12:24) Allah imarisen faro Raja Salomo fararyor ḇyena inja ḇyuk ḇe i ”sne ḇefawawi nananem ma ḇefo kuker fawawi”.​—1 Raj. 3:12.

² Fafisu Salomo isoasuser, isma barakas nabore. Ismai fakamaman fa ḇyawes bait ”faro snonsnon Yahwe Allah Israel”. (1 Raj. 8:20) Ḇyesno-sno snar nya fawawi nanem ro Allah. Ma fyas syap rikyor ḇero Refo ḇeser wos ikofen na fafisu ismai sḇayoḇ ro Allah. Oserya iso syap Amsal.

³ Ro syap Amsal, wos ”sne” neḇefas syadi ro rarwan utin oser. Imnis raris, ro Amsal 4:23, kowasya, ”Iba syadi ro roi nakam fandun fa mamwarek na, wamamwarek sne bedi.” Ro mnuk ine, wos ”sne” kyurfasna ḇe rosai? Nari kofawi kankarem ḇyena ro farkarkor ine. Na komam kako kankarem faro fakfuken risuru suine: Rariso Setan ḇyesewar fa dawninyan sne koḇena? Ma rosai na kofrur ya fa komamwarek sne koḇena? Insama kosoasuser pdef ḇe Allah, fandun fa kofawi pyum kankarem faro fakfuken anna.

4-5. (a) Rosai knam ro wos ”sne”? (b) Rariso nyan fa kofaduru ḇaken saprop koḇena fa naprei nfarkor ko fandun fa komamwarek sne koḇena?

⁴ Ro Amsal 4:23, wos ”sne” kyurfasna ḇe kakara mankun koḇena, sneḇaḇir, roi ḇedif fa kofrur roi ono, ma marisen koḇena. (Wasya Mazmur 51:6 ma catatan kaki.) Nane nefasnaḇair mansei kaku ko, roi neḇemam ro bandi monda ḇa.

⁵ Nyan fa komamwarek sne koḇena ima imnis raris kofaduru ḇaken saprop koḇena fa naprei. Ḇepon ya, infa baken koḇena naprei pdef fandun fa kan roḇean ḇepyum, ma koḇeolah raga ker. Rarirya kako, insama kankenem Kristen koḇena napyum pdef fandun fa kan roḇean rur ḇepyum kuker kowasya Refo ma publikasi ḇeknam ro Refo na. Osower ido, kofasnai kakyar faro Yahwe I ḇesya kwar isoine kosomnis rosai kofarkor kwar na ma kawosḇair na. (Rm. 10:8-10; Yak. 2:26) Ḇesuru ya, imbude kokara koduf ḇa snar roi komam ro bandi na, mboi ro bandum ya rarirya ḇa. Rarirya kako, imbude na kokara kona kakyar ḇesambraḇ, snar komyaren kofrur fararur ḇesren koḇena, ḇape imbude marasrisen ḇesasar ya isya isur ro sne koḇena. (1 Kor. 10:12; Yak. 1:14, 15) Fandun fa koswarepen kaku Setan imarisen dawninyan kakara koḇena. Ḇepon syadiya, rariso ifrur na rai? Ma moḇsa komamwarek mankun ko rai?

6. Rosai Setan imarisen fa ifrur ya, ma rariso syewar fa ismai roi imarisen anna?

⁶ Setan imarisen komnis ra i, fa kopampum Yahwe sasoser Ḇyena ma kofandun mankunko. Setan ipok idif ko ḇa fa kokara ma kofrur raris i. Ḇape, syewar nyan ḇese fa ismai roi imarisen na. Rupa ra, dawninyan snonkaku sya fa sawninyan ko. (1 Yoh. 5:19) Kofawi kwar koḇebati kuker si ido nari ”ḇaḇeḇarḇorya” dawninyan kakara ma kankenem koḇena. Mboi, Setan imarisen insama koḇuk swaf fa kokayamyam kuker si. (1 Kor. 15:33) Raja Salomo isapi ro nyan ḇeradine. Fyarḇuk kuker bin ḇesyom Yahwe I  ḇa sya, ma ḇarpurya ’sawninyan kaku i’ ma ’fawawas sifrur fa sneri ḇyinkwan’ ro Yahwe I.​—1 Raj. 11:3; catatan kaki.

7. Rosai wer Setan ḇyuk na fa irwas nyan kakara ḇyena, ma rosai ḇefnai fandun fa kosasor ko ro roi ine?

⁷ Roro felem ma fasasna ḇero telefisi na Setan irwas nyan kakara ḇyena. Ifawi mnis komarisen korower farfyar ro snonkaku sya ma farfyar senane na nḇuk saneprei faro ko monda ḇa, ḇape nfarkor ko nyan kokara, koḇaḇir, ma roi kofrur na nraya. Yesus ikir kaku fa ḇyuk fawawar fa ḇyukifarkor snonkaku sya. Imnis raris, wos sarḇer ḇekur snon Samaria ḇefrur pyum ma romawa ḇeḇoḇ farfnak nana ḇyenakam. (Mat. 13:34; Luk. 10:29-37; 15:11-32) Imbape, snonkaku Setan dawninyan kakara sena kwar sya na sḇuk fawawar fa sfarkorninyan ko. Fandun fa kokara mnis. Kakuḇae, felem ma fasasna ḇero telefisi ono na nbuk sneprei ma nfarkor ko. Ḇape fandun fa kosasor ko. Fyor kokinfir hiburan na, ipyum syadi kofuken mankunko, ’Felem ma fasasna ro telefisi na nfarkor aya fa yakara yaso marisen kraf yena nama nsasar ḇa ke?’ (Gal. 5:19-21; Ef. 2:1-3) Rosai nari wafrur ya rofyor mam mboi fasasna anna nefasna Setan kakara Ḇyena? Pampum na beri imnis ra wamewer wasma dafduf ono!

8. Rosai na sinan sya sifrur fa sifnoḇek romawa sesya fa smamwarek sisnesna?

⁸ Auma sinan disau ido, nwa fakamaman fa mamwarek romawa besi snar Setan syewar fa dawninyan sinesna. Kakuḇae, na wafrur rosai rirya monda fa mamwarek si insama sisma kaku dafduf ḇa. Mam mnis rum bedi fa isren, ma wasawen roi na ḇefrur au ḇaido romawa besi mkoduf. Rarirya kako, fandun fa mamwarek romawa besi ro felem, fasasna ḇero telefisi, game elektronik, ma situs web ḇeser Setan kakara ḇyena na ḇeawninyan  si. Yahwe ḇyuk papoik ḇe au fa wafnoḇek romawa besi insama sḇebati kuker I. (Ams. 1:8; Ef. 6:1, 4) Inja, wamkak awer fa wafrur sasoser ḇero kina ya dori ḇeknam ro Refo na. Wakofenḇair ḇe romawa besi rosai bisa smam ḇaido smam ḇa na, ma wafnoḇek si fa sifawi roi ḇefnai fa wor si fa sifrur rarirya. (Mat. 5:37) Fafisu romawa besi siba muryase, farkor si fa skarauser ro mankunsi roi ḇeḇye ma ḇeḇyeḇa na imnis Yahwe sasoser Ḇyena. (Ibr. 5:14) Ma waswarepen, romawa besi na sifarkor nabor ro roi wakofen na monda ḇa mboi ro roi wafrur na kako.​—Ul. 6:6, 7; Rm. 2:21.

9. Rosai roi oser ḇefasnai Setan kakara ḇyena, ma rosai ḇefnai fa kakara ḇeradine na nun samswen?

⁹ Setan ḇyesewar kako fa dawninyan kosnesna kuker ifrur fa kokyar faro fawawi dunya syadibur Yahwe kakara Ḇyena. (Kol. 2:8) Setan kakara ḇyena oser isoine: Roi ḇepon kaku ro kankenem koḇena iso kona arasai nabor. Snonkaku ḇena kakara ḇeradine imbude na sikenem mararen, ḇaido oroḇaberi. Rarirya ido, sro samswen kaku. Sai ḇefnai ya? Snaro smam monda faro sasewar pipi ḇo sfandun ḇa faro pararei sena, kina sesya, ma iba syadi ḇaḇebati sena kuker Allah. (1 Tim. 6:10) Na kokofen kasumasa snar Kma koḇedi ro nanki ḇyuk fawawi nanem ḇefnoḇek ko fa kona mamam ḇemnis faro pipi.​—Pkh. 7:12; Luk. 12:15.

10-11. (a) Rosai fandun fa kofrur na fa kokadaunwarek mankunko? (b) Ro fafisu iwara, rosai manwarwaren sya sifrur na, ma rariso sneuser koḇena namnis manwarwaren ḇe ko?

¹⁰ Insama komamwarek pyum kwar kosnesna ido, fandun fa kofawi kaku roi ḇemun na ma fasaw fa kokadaunwarek mankunko. Rofyor kowasya wos ”mamwarek” ḇero Amsal 4:23 na koswarepen beri ḇe fararur ro manwarwaren oso. Ro Raja Salomo fafisu ḇyedi, manwarwaren na sores ro ayar karui ḇoya fa smamwarek mnu ya. Rofyor smam mbroḇ sya sisya sfanamnam ido na sḇuk aḇyair. Kowasenkara roi nane ido na nafnoḇek ko fa kofawi rosai fandun fa kofrur ya insama Setan dawninyan kakara koḇena ḇa.

¹¹ Ro fafisu iwara, manwarwaren sfararur kayam kuker ḇemamwarek kerwa ḇeba ḇero mnu sya. (2 Sam. 18:24-26) Sikam smamwarek mnu ya kuker smam mnis insama kerwa ḇeba na neḇeken fafisu mbroḇ sya srama fanam. (Neh. 7:1-3) Sneuser koḇena kofarkor kwar kuker Refo * namnis manwarwaren. Rofyor Setan syewar fa dawninyan kosnesna, isoine kakara, sneḇaḇir, roi ḇedif ko, ḇaido marisen koḇena ido na sneuser koḇena nḇuk aḇyair ḇe swarapepen ḇe ko. Rarirya ido fandun fa korower na ma kosewar fa kopampum awyae anna.

12-13. Imbude kosma fafrowespan fa kofrur rosai rirya, ḇape rosai fandun fa kofrur ya?

¹² Kokarapan conto ḇefasnai moḇsa kokadaunwarek mankunko rai insama Setan kakara ḇyena nawyaye awer ko. Yahwe fyarkor ko kwar ”farbuk ma roi ḇemamas roḇa fararur famfnom [fandun fa] neḇekofen awer rofandu [ko]”. (Ef. 5:3) Ḇape rosai nari kofrur ya rofyor min fararur ḇaido bati ro rumfarkor sfawar  roi ḇekur fararur farḇuk ya? Kofawi fandun fa ”kobur ḇarḇorna ma rmomen supswan ine”. (Tit. 2:12) Manwarwaren ḇaido sneuser koḇena, na nḇuk swarapepen ḇe ko. (Rm. 2:15) Ḇape na korower na ke? Imbude komarisen fa korower rosai sikofen na ḇaido komam sonin sirwas na. Ḇape, fandun fa kopampum na kuker kofadwer awawos anna ḇaido kobur si imnis ra koken kerwa ḇeba ḇero mnu ya.

¹³ Kofandun ḇaḇebri fa kopampum farawrowes ro bati koḇesya fa kokara ḇaido kofrur roi ḇesasar na. Kokyar kaku Yahwe myam sasewar koḇena ma nari ḇyuk samambraḇ ma fawawi nanem kofandun na infa kopampum Setan kakara ḇyena. (2 Taw. 16:9; Yes. 40:29; Yak. 1:5) Ḇape, rosai wer na kofrur fa komamwarek kosnesna?

14-15. (a) Faro rosai fandun fa koḇas kosnesna, ma moḇsa kofrur na rai? (b) Rariso Amsal 4:20-22 nafnoḇek ko fa kosmai fainda nabor syadi ro ḇaḇewasya Refo koḇena? (Mam kako kotak ” Nyan fa Kokarauser.”)

¹⁴ Infa komamwarek kosnesna, fandun fa kopampum kakara ḇesasar na monda ḇa mboi kosma kako kakara ḇepyum na. Kowasen kaḇer wos sarḇer ḇekur mnu oso ḇeḇeayar karui ani. Ḇemamwarek kerwa ḇeba sya na sken kerwa na insama mbroḇ sya sisun awer. Ḇape, fafisu ḇese siseḇen kerwa na fa sun mundum roḇean ma roi ḇebor ḇesena. Kerwa na neḇeseḇen ḇa ido, kawasa ḇero mnu ani nari siḇiser. Rarirya kako, fandun fa koḇas kosnesna faro Allah kakara Ḇyena fa nfarkin ko ḇesya kwar.

¹⁵ Refo ya iser Yahwe kakara Ḇyena. Inja rofyor kowasya na ido, korir Yahwe kakara Ḇyena nfara nyan kakara, sneḇaḇir koḇena, ma roi kofrur na. Rariso insama kosma fainda nabor syadi ro ḇaḇewasya Refo koḇena? Ḇepon ya koḇenadi. Imbesrar oso doḇe, ”Rofyor yawasya Refo ḇaim, yaḇenadi ḇe Yahwe I. Yor insama ifnoḇek aya fa ’yamam bos roi ḇepyum kaku’ ḇero Wos Ḇyena.” (Mz. 119:18) Fandun kako fa kokarauser rosai kowasya na. Rofyor koḇenadi, kowasya, ma kokarauser ido, Allah Wos Ḇyena na nsun kaku ’ro kosnesna dona’, ma komarisen faro Yahwe kakara Ḇyena.​—Wasya Amsal 4:20-22; Mz. 119:97.

16. Rosai fainda kosma ro JW Broadcasting? Fawar pan conto oso.

¹⁶ Nyan ḇese insama Allah kakara Ḇyena nfarkin ko iso komam vidio sfasos ro JW Broadcasting^® na. Imbeswa oso sukofen, ”Acara numam ro paik ḇe paik nama kankarem ro nadi nuḇena! Nane nsambraḇser ma nafnoḇek nu fafisu nuḇesneso ḇaido nuḇaḇir nuyemire. Nurower ker doya na ro rum rofyor nukankun, nufrur sren rum ya, ḇaido nuyinem tei.” Acara ine ifnoḇek ko fa komamwarek kosnesna. Nfarkor ko fa kona Yahwe kakara Ḇyena ma kopampum farawrowes fa kona Setan kakara ḇyena.

17-18. (a) Rosai barakas kosmana snar kofrur rosai kofarkor ro Yahwe I, raris neḇekofenḇair ro 1 Raja-Raja 8:61? (b) Farkarkor rosai kun ro Raja Hizkia fawar ḇyeja? (c) Imnis Daud nadi ḇyeja ro Mazmur 139:23, 24, rosai kor ro nadi koḇena?

¹⁷ Fafisu komam ro mankunko fainda ro kofrur roi ḇenapes ya, kakyar koḇena nasambraḇ syadi wer. (Yak. 1:2, 3) Sne koḇena naprei snar kofrur Yahwe imarisen kaku fa dor koḇe romawa Ḇyesi, nafnai fa komarisen syadi wer fa kofrur marisen Ḇyena. (Ams. 27:11) Farawrowes  ḇekur ko na nḇuk swaf fa kofasnai kofarmyam Kma koḇedi kuker sne ḇesiper. (Mz. 119:113) Kofasna koswar kaku Yahwe kuker kosouser parenta Ḇyena ma kofrur marisen Ḇyena.​—Wasya 1 Raja-Raja 8:61.

¹⁸ Kakuḇae na kofrur sasar snar konapes ḇa. Rofyor kosapi ido, koswarepen Raja Hizkia fawar ḇyeja. Ifrur sasar mboi imbror ma fyarmyan pdef ḇe Yahwe ”kuker sne ḇesiper”. (Yes. 38:3-6; 2 Taw. 29:1, 2; 32:25, 26) Inja, mkorama kopampum Setan kakara ḇyena ḇeawninyan ko. Iḇye ya koḇenadi fa kona ”sne ḇesoasuser”. (1 Raj. 3:9; wasya Mazmur 139:23, 24.) Na kosoasuser pdef faro Yahwe I, rofyor komamwarek sne koḇena syadibur roi nakam.