1-2. (a) Rosai ḇefnai fa Yesus fyasna nyan ḇepyandam fa koḇukiswarepen marmar ḇyedi? (b) Rosai Yesus rari ḇyena na kawos na?

WASWAREPEN kaker ke rosai monda sifrur ro munara Swarapepen Kristus marmar ḇyedi? Kakuḇae, na koswarepen mnis moḇsa sifrur munara ine rai. Rosai ḇefnai ya? Snaro munara ine ipyan kaku, syamswen ḇa. Imboi ine iso munara ḇefandun kaku rirya. Inja, na kofuken ro mankunko, ’Rosai ḇefnai fa sifrur munara ine kuker nyan ḇepyan monda ma ḇyesyadadi ḇa?’

² Rofyor Yesus fyarmyan ro supwan ine, sifawi mnis i snaro ḇyukfarkor kakaku ya kuker nyan ḇepyandam, ḇesnaibos, ma samswen fa sfawina ḇa. (Mat. 7:28, 29) Inja, fyasna kako nyan ḇepyandam ḇe ko fa koswarepen * marmar ḇyedi. Mkorama kawos roi ḇekur roḇean sfasos ro munara Swarapepen inena. Na kawos kako roi riḇeso Yesus ikofen ma ifrur na. Rarirya ido, na kofawi pyum Yesus ima nya sne ḇerun kaku, ḇaḇebri, ma isaswar. Na kawos kako rariso nyan ya insama kakso pyum Yesus nyan ḇyena.

3. (a) Imnis ḇeḇefas ro Matius 26:26-28, rosai ḇefasnaḇair Yesus ifrur randak munara Swarapepen kuker nyan ḇepyan? (b) Mamami ma anggur kyurfasna ḇe rosairiri?

³ Yesus ifrur randak munara Swarapepen kuker manfamyan ri 11 ḇesouser ḇyesya. Ḇyuk roḇean ḇedawer ro  munara Paskah na fa ḇyerak munara swarapepen ḇepyan ani. (Wasya Matius 26:26-28.) Ḇyuk monda mamami ḇepisen ḇa ma anggur sfasos kwarna. Yesus ikofen faro manwawan ḇyesi mamami kyurfyasna ḇe baken ḇyedi ma anggur ḇe rik ḇyedi. Kniko wer na ḇyuk na ḇe farsarser faro fandun sena. Manwawan sya sifawi munara ine ḇyefandun kaku, ḇape na sifrurna kuker nyan ḇepyan monda. Rosai ḇefnai ya?

4. Anun rosai Yesus ikofen ḇe Marta i ḇefnoḇek ko fa kofawi roi ḇefrur fa ifrur munara Swarapepen ḇepyandam?

⁴ Kokarapan fafisu ya Yesus ifarmyan ro swaf taun rikyor kwar. Paik ḇeḇeso aniwara ryama fa myamfar bati ḇyesya isoine Lazarus, Marta, ma Maria. Rofyor kyainus bati ḇyeskoine, Yesus fyarkor sko. Marta isya kako rodia, mboi syombirek kaku fa fyasos roḇean nabor faro Yesus ḇedakam sko ani. Inja, kuker myaren Yesus isonek Marta ḇo ikofen fandun ḇa fa fyasos roḇean nabor. (Luk. 10:40-42) Barpur mura, fyor fanam imbe smuni, Yesus ifrurmnis wos ḇyenane. Fyasos munara Swarapepen ḇepyandam. Farkarkor rosai kun ro Yesus i?

5. Rosai kofarkor ro Yesus i ro munara Swarapepen ḇepyan monda, ma rariso ine imnis kuker wos ḇero Filipi 2:5-8?

⁵ Ro rosai Yesus ikofen ma ifrur nakam nasnaibos nya sne ḇerun. Ro roḇ rofyor imar ḇaim kako, fyasnai sne ḇerun. (Mat. 11:29) Yesus ifawi snar kerower na ḇyuk farsarser ḇeba kaku faro snonkaku koine. Dakfawi kako Yahwe na ḇyawes i fa ḇyepoik ḇe Raja ro nanki. Inja, iwan manfamyan ḇyesi fa sifrur munara ḇesamswen ḇa, ḇape munara ḇepyan monda fa sḇukiswarepen marmar ḇyedi ro taun ḇe taun. (Yoh. 13:15; 1 Kor. 11:23-25) Munara Swarapepen ḇepyan monda ine fyasnai snar Yesus ima snon ḇena sne ḇerun. Na komarisen kaku snar Raja koḇedi ro nanki nya rari ḇepyum ine.​—Wasya Filipi 2:5-8.

6. Rariso kakfasna sne ḇerun raris Yesus rofyor kosmai fafrowes?

⁶ Rariso kakfasnai sne ḇerun raris Yesus i rai? Kuker kofakapon fandandun snonkaku ḇese ro fandandun koḇena bardi. (Flp. 2:3, 4) Kwarapan kada, ro roḇ fyor Yesus imar ḇaim, ifawi fyoro werḇa na smuni kuker nyan ḇeḇyeba kaku. Mboi, imkakwarek syadi faro manfamyan ḇyesi snar nari sḇesneso kaku. Inja, ro roḇ  ani ḇyuk sneprei, syambraḇser, ma ḇyuk akurfasnai ḇe si. (Yoh. 14:25-31) Yesus ifakapon fandandun snonkaku ḇese ḇardibur fandandun ḇyedi. Ima nyan ḇepyum kaku fa kosona!

7. Ro roḇ Yesus ifrur randak munara Swarapepen raposa, rariso fyasnai ḇaḇebri ya rai?

⁷ Yesus ifrur randak munara Swarapepen fnoḇek manwawan ḇyesi raposa, ro roḇ ani kako Yesus fyasnai ḇyebri kaku. Rariso fyasnai na rai? Yesus duf fararur fa ifrur Allah marisen ḇyedi. Mboi ifawi infa ifrur na ido fandun fa ismai samamyai marmar raris snonkaku ḇeḇarḇor. (Mat. 26:65, 66; Luk. 22:41, 42) Yesus isoasuser isof ro imar. Rarirya, nane nun sanandik faro snonsnon Yahwe, nakanowser Yahwe ḇaḇepapoik Ḇyedi, ma snonkaku ḇemḇror sya sismai swaf fa sikenem fyoro. Osower ido, Yesus fyasos manfamyan ḇyesi fa simkak ḇa rofyor sismai fafrowes ro ras-ras nayama.

8. (a) Rosai Yesus ikofenḇair faro manwawan ḇesoasuser ḇyesya? (b) Rofyor Yesus imar kwar mura, rariso manfamyan ḇyesya sfasna ḇaḇebri raris Yesus i rai?

⁸ Yesus fyasnai ḇyebri kako kuker myam faro fandun mankun ḇyedi monda ḇa. Imbape, myam faro fandandun ro manwawan ḇesoasuser ḇyesya. Rofyor Yesus iwan Yudas i fa syae, insape fyasnaiḇair munara Swarapepen faro si. Kaku ya nari manfamyan ḇesmai ramrem ansine siswarapepen fainda ro Yesus rik ḇyena ma nari saksowarpu ro ḇaḇeasas babo. (1 Kor. 10:16, 17) Insama sisoasuser pdef ma sakḇepoik fnoḇek Yesus ro nanki, Yesus ikofenḇair rosai i ma Kmari sumarisen na. (Yoh. 15:12-15)  Yesus ikofenḇair kako nari sismai fafrowes. Mura, danun ḇe si fa ’sisambraḇser sisnemna’ insama sakḇebri raris i! (Yoh. 16:1-4a, 33) Taun nawas mura, Yesus manfamyan ḇyesya siso pdef rari ḇefabri mankun ḇa ma sifasnai ḇaḇebri. Na sismai kandera ma fafrowes ḇebor rariryano sisonemyaye si.​—Ibr. 10:33, 34.

9. Rariso na kakfasna ḇaḇebri raris Yesus i rai?

⁹ Ko ro baboine, na kakfasna ḇaḇebri raris Yesus i. Imnis raris, koḇebri fa kofnoḇek naek srar koḇesya ḇesmai wayam snar kakyar sena. Fyorno ido, naek srar koḇansine sisun si ro bui snar sasar sifrur na ḇa. Rarirya ido, fandun fa kosewar fa kofnoḇek si, ine kako kuker kawos warek si ro pengadilan. (Flp. 1:14; Ibr. 13:19) Nyan ḇesewer kofasnai ḇaḇebri iso koḇaryas ”kuker makaku”. (Kis. 14:3) Imbude sino sisya spampum ḇaido sewayam ko, mboi raris Yesus i, komarisen koḇaryas ankankinem Karajan ya pdef. Ḇape, fafisu ono rya komkak kero. Rosai na kofrur ya?

10. Rosai na kofrur ro minggu-minggu fanam ḇe munara Swarapepen ya, ma rosai ḇefnai ya?

¹⁰ Na koḇebri syadi rofyor kokara fainda kosmai ro farsarser fasaspar Yesus ḇyedi. (Yoh. 3:16; Ef. 1:7) Ro minggu-minggu fanam ḇe munara Swarapepen kona swaf fa kofasnai syowi faro Yesus marmar ḇyedi. Koso mnis ḇaḇewasya Refo faro Swarapepen sfasos kwar na. Kokarauser roi ḇeḇesya fyor Yesus imar ḇaim ma fafisu ikḇok kwar. Inja, rofyor korama ro munara Swarapepen ya, nari kofawimnis knam ro mamami ḇepisen ḇa ma anggur na. Kofawimnis rosai Yahwe ma Yesus sufrur kwar ḇe ko na ma fainda faro ko ma kina koḇesya ido, na kokyar  kaku faro saneraro ro ras ḇarpon iyama. Ma, na kun snemuk fa koḇebri isof pupes.​—Ibr. 12:3.

11-12. Rosai monda kofawi kwar ro munara Swarapepen ya?

¹¹ Kofawi kwar munara Swarapepen iswarepen ko farsarser ḇemaeja kaku ro Yesus i monda ḇa, mboi kakfarkor sne ḇerun ma ḇaḇebri ḇyena kako. Na kokofen kasumasa kaku snaro Yesus na fyasnai rari-rari nane pdef rofyor ḇye Imam Ḇeba kobedi ro nanki! (Ibr. 7:24, 25) Infa kofasnai syowi koḇena, fandun fa koso Yesus parenta ḇyena fa kofrur pdef munara Swarapepen fa koḇukiswarepen marmar ḇyedi. (Luk. 22:19, 20) Koso munara ine ro tanggal ḇemnis kuker tanggal 14 Nisan. Ine iso tanggal ḇefandun kaku ro swaf taun oser.

¹² Ro munara Swarapepen sifrur kuker nyan ḇepyan ma ḇesyadadiḇa ine na kofarkor rari ḇeseya wer. Yesus imarisen imarwarek ko snaro rari ine kako. Rofyor isya ro supswan ine, snonkaku sya sifawi i snar rari ine. Rari rosai rirya?

13. Rariso Yohanes 15:9 ma 1 Yohanes 4:8-10 nfasnaiḇair saswar ro Yahwe ma Yesus sufasnai na, ma mansei ḇesmai fainda ro saswar suḇenane?

¹³ Ro Yesus fararur ḇyena kam, fyasnai mnis kaku Yahwe saswar ḇeba Ḇyena faro ko. (Wasya Yohanes 15:9; 1 Yohanes 4:8-10.) Ḇepon kaku ya, saswar iso ḇedif i fa imarisen imarwarek ko. Koma snonkaku ḇesmai ramrem ḇaido ”domba ḇese” ke, kokame kosmai fainda ro Yahwe ma Yesus saswar sufasnai roro farsarser fasaspar ya. (Yoh. 10:16; 1 Yoh. 2:2) Osower ido, roi risuru monda sḇuk ro munara Swarapepen sufasnai Yesus ima iswar ma kyara asuser manfamyan ḇyesya. Moḇsa ndrariri?

14. Kuker nyan risai Yesus fyasnai saswar faro manfamyan ḇyesya?

¹⁴ Yesus fyasnai saswar faro manfamyan ḇyesi ḇesmai ramrem kuker ifrur munara Swarapepen ḇepyan monda ma ḇesamswen ḇa. Fafisu nawas mura, manfamyan ḇesmai ramrem ansine na sifrur ker munara ine ro taun ḇe taun ro fafisu sairirya monda, rofyor sismai ro bui kako. (Why. 2:10) Na sisambraḇ fa sifrurna ke? Imbo, bisa bae!

15-16. Rariso naek srar ḇeḇeso sifrur munara Swarapepen ro fafisu ḇesamswen na rai?

¹⁵ Isof ro baboine, snonkaku Kristen ḇekaku sya sḇesewar kaku kwar fa sifrur munara Swarapepen Yesus marmar ḇyedi. Sisewar fa siso mnis kaku moḇsa sifrur munara ine rai. Fyorno ido, sifrur na ro fafisu ḇesamswen kako. Imnis raris, fafisu Naek Harold King demir ismai ro bui ro Cina, syewar nyan fa ifrur munara Swarapepen. Kuker fasasis, fyasos mamami ma anggur na ro roi ismai na. Ikor mnis kaku tanggal faro munara Swarapepen ani. Fyor oras ya imnis kwar fa ifrur munara ani, idisen, inadi ma dawos faya ro Refo. Nane kam ifrur na ro mankundi.

¹⁶ Fawar oser isya wer. Fafisu Perang Dunia II, imbesrar ri ḇebeso sisun si ḇe bui ro kamp konsentrasi. Sifawi na sismai roi ḇemun mboi sisewar fa sifrur munara Swarapepen. Imbape snar sifandun roi nabor ḇa faro munara ani, inja jadi fa sifrur na kuker nyan ḇefasis monda. Sikofen, ”Nkores yar meja mkun oso ḇeḇekawef kuker kruḇen ḇepyoper. Nkorir mamami ma anggur ro meja yabori. Nkopam padamara monda  snaro nkosnai lampu ya ido nari sifawi rosai nkofrur na . . . . Nkap kaḇer asas ḇekaku faro Kma nkoḇedi isoine fa nkoḇuk samamḇraḇ nkoḇenakam fa nkoḇukisandik snonsnon ḇesren Ḇyedi.” Sifasnai kakyar ḇesambraḇ kaku! Yesus iswar kaku ko, inja ifrur munara Swarapepen ḇepyan fa kofrur ro fafisu ḇesamswen kako!

17. Fakfuken rosai na kokarauser na?

¹⁷ Rofyor munara Swarapepen fyanam kwar, kokarauser fakfuken-fakfuken nane kada: ’Rariso yaso mnis Yesus i fa yafasnai saswar syadi wer? Yamam ḇepon fandandun ro naek srar sya bardibur fandandun mankun yena ke? Na yor si fa sifrur roi sisambraḇ fa sifrur ḇa na ke, ḇaido yafawi mnis ḇaḇeraryar ḇa sena ke?’ Rirya kada kakso Yesus nyan ḇyena fa kofasnai ”ḇaḇaḇir oser”.​—1 Ptr. 3:8

18-19. (a) Roi risai na koswarepen na ḇesya kwar? (b) Rosai fandun fa kofrur ya?

¹⁸ Ras oso nari kofrur munara Swarapepen Kristus marmar ḇyedi werḇa. Fyor Yesus ”iwerma” ro fafisu kandera ḇeba ya, nari iryur snonkaku ḇesmai ramrem ”kyimfir kwar sya” fa sek ḇe nanki. Ro fafisu ya kako, na kofrur munara Swarapepen ine werḇa.​—1 Kor. 11:26; Mat. 24:31.

¹⁹ Inja nari kofrur munara Swarapepen ya werḇa, mboi Yahwe kawasa ḇyesiko na koswarepen ḇesya kwar farkarkor kosma ro munara sifrur kuker nyan ḇepyan ani. Isoine sne ḇerun, ḇaḇebri, ma saswar ḇeba kaku ro snonkaku oso. Ro fafisu ya, ḇeso kwar ro munara ḇepyum kaku ine sya, nari sfawar ḇe ḇekenem ro Firdaus sya infa saksmai fainda kako. Ḇape infa kosmai fainda ro munara ine ro kirine, fandun fa koso Yesus sne ḇerun, ḇaḇebri, ma saswar ḇyena. Kofrur na ido, kokyar Yahwe na ḇyebarakas ko.​—2 Ptr. 1:10, 11.