1-2. (a) Rariso anun ḇero Yesaya 41:10 nafnoḇek Yoshiko i rai? (b) Mansei na ḇesma fainda ro Yahwe anun Ḇyena ḇeḇefas ro Yesaya 41:10 ya?

IMBESRAR Kristen ḇesoasuser snori Yoshiko ismai abar ḇepyumḇa. Dokter ikofen ḇe i snar nari ikenem paik riḇeḇeso monda. Moḇsa kyara roi ine rai? Yoshiko iswarepen mnuk ro Refo imarisen kaku na, Yesaya 41:10. (Wasya.) Anun ḇeḇuk sneprei ḇero mnuk ani nafnoḇek imbesrar koḇanine fa ikyar kaku faro Yahwe I. Inja, kuker myaren ikofen ḇe dokter ima imkak ḇa, snaro Yahwe isya dufepen ḇramin ḇyedi. * Mnuk ine kako na nafnoḇek ko pdef fa komkak ḇa rofyor kosmai samswen ḇemarḇak kaku. Infa kofawi moḇsa ine ryarirya, na kawos ḇepon rosai ḇefnai fa Allah ḇyuk anun ine ḇe Yesaya i.

² Randakya, Yahwe iwan Yesaya i fa fyasepen wos anna fa nḇuk sneprei faro snonkaku Yahudi, nari ḇarpurya sḇeḇeyun ḇe Babilon. Imbape, anun anna nefainda faro snonkaku Yahudi sya monda ḇa mboi faro Yahwe kawasa Ḇyesi kam ḇekenem ro fafisu ine kako. (Yes. 40:8; Rm. 15:4) Baboine, kokenem ro ras-ras ḇepupes ḇefo kuker ”kandera nabor”, inja kofandun syadi wos samaraḇraḇ ḇero syap Yesaya.​—2 Tim. 3:1.

3. (a) Asas rosai ḇefas ro mnuk ro Refo ḇeḇekinfir faro taun 2019, Yesaya 41:10 ya? (b) Rosai ḇefnai fa kofandun asas rikyor anskoya?

³ Ro farkarkor ine, na komamuser asas rikyor Yahwe Ḇyena ḇeḇefas ro Yesaya 41:10 ḇesambraḇser kakyar  koḇena isoine: (1) Yahwe nari ryous ko, (2) Iso Allah koḇedi, ma (3) Nari ifnoḇek ko. Kofandun asas rikyor anskoya * snar raris Yoshiko i, kaksmai samswen ro kankenem koḇena. Kaksmai samswen kako snar roi ḇeḇyeḇa ḇeḇesya ro dunya ine. Sia ro fandu ko sisma ḇaḇewayam ro pamarenta sya. Mkorama kawos asas rikyor anskoya iser-iser.

4. (a) Rosai asas ḇerandak na kawos ya? (Mam kako fasfas kasun.) (b) Rariso Yahwe fyasnaḇair sneḇaḇir Ḇyedi faro ko? (c) Moḇsa ḇaḇir rai faro Allah wos Ḇyanya?

⁴ Asas ḇerandak Yahwe ḇyuk ḇe ko iso: ”Wamkak awer, snar yarous au.” * Yahwe fyasna isya ryous ko kuker myam faduru ko ma fyasna sawarwar faro ko. Komam kada rariso fyasnaḇair saswar ma sneḇaḇir Ḇyedi faro ko rai. Yahwe doḇe, ”Snar auma ḇemaeja, ḇesyowi ro mamam yedi, ma Yaswar au.” (Yes. 43:4) Roi osoḇaḇeri ḇero supswan ma farsyos ine na idwarek Yahwe I fa fyasnai saswar ma soasuser Ḇyena faro manfamyan Ḇyesi koine. (Yes. 54:10) Snar iswar ko ma fyanam kuker ko, nafrur fa koḇebri syadi. Nari kyadaunwarek ko ro fafisu ine, raris moḇ ifrur ḇe bati Ḇyedi Abram (Abraham) raya. Yahwe ikofen yoḇ i, ”Wamkak awer, Abram e. Aya iso adai bedi.”​—Kej. 15:1.

5-6. (a) Moḇsa kofawi rai Yahwe ima imarisen ifnoḇek ko ro samswen kosmaina? (b) Farkarkor rosai kun ro Yoshiko fawar ḇyeja?

⁵ Kofawi Yahwe ima imarisen ifnoḇek ko ro samswen kosmana snar ḇyeasas faro kawasa Ḇyansi, ”Fafisu wambranuk sorenya, nari Yarous au. Fafisu wambranuk warḇedaf ya, daf ḇyedi dun au ḇa. Fafisu wambranuk ro forya, na warusḇa, ma for ḇyena na nakun au ḇa.” (Yes. 43:2) Rosai knam ro wos nane?

⁶ Yahwe ḇyeasas fa ipyosbur samswen kosmana ḇa. Mboi nari ipok ryir monda ḇa samswen ḇebor raris ”warḇedaf” nafrur fa koḇoryae ma komnai kofarmyan ḇe I, ḇaido samswen ḇemarḇak  raris ”for” na nkur ko pdef. Ḇyeasas kwar nari ryous ko, ifnoḇek ko fa ’kombranuk’ ḇaido kosaebur samswen anna. Rosai nari Yahwe ifrur ya? Nari ifrur fa komkak werḇa inja na kosoasuser pdef faro I, iba syadi rofyor kosma roi ḇemun. (Yes. 41:13) Yoshiko, ḇeḇeyap ḇepon anya, myam ro mankundi roi nane nkaku. Inai ḇyedi doḇe, ”Nkomanen kaku snar Awini imkak ḇaḇeri. Nkomam kaku Yahwe ḇyuk aski ro swaruser ḇe i. Isof ro ras ryoe ya, Awin ḇyaryas Yahwe ma asas Ḇyena ḇe perawat sya ma ḇeduf ḇesesya.” Farkarkor rosai kun ro Yoshiko fawar ḇyenane? Kokyar Allah nari ’ryous ko’ ido, na komkak ḇaḇeri ma kosambraḇ ro fafisu ḇesamswen na.

7-8. (a) Rosai asas ḇesuru na kawos ya, ma rosai knam ya? (b) Rosai ḇefnai fa Yahwe ikofen ḇe snonkaku Yahudi ro ḇaḇewomen sya fa ’simkakwarek awer’? (c) Wos risai ḇero Yesaya 46:3, 4 ḇefnoḇek kaku Allah kawasa Ḇyesi fa simkak ḇa?

⁷ Mam asas ḇesuru Yesaya fyas ya, ”Wamkakwarek awer, snar Aya iso Allah bedi.” Rosai knam ro wos nane? Ro wos Ibrani wos ”wamkakwarek” ḇero mnuk ine kyurfasna ḇe ”mam ker ḇe ḇarpur snar wamkak nari roi oso ḇaido snonkaku ḇeḇarḇor oso na myun au” ḇaido ”wasyasen imnis ra snonkaku oso isya ismai roi ḇemun”.

⁸ Rosai ḇefnai fa Yahwe ikofen ḇe snonkaku Yahudi nari ḇeḇeyun ḇe Babilon sya fa ’simkakwarek awer’? Snaro ifawi ḇeḇarek ro sup ani sya nari simkake. Rosai na ḇefrur fa simkake? Snonkaku Yahudi na sḇeḇewomen ro swaf taun ri 70. Fanam ḇe pupes swaf anya, sordade Media-Persia nari srama fa smun Babilon. Yahwe nari ḇye sordade ansine fa fyasparbur kawasa ḇyesi ro ḇaḇewomen ro Babilon. (Yes. 41:2-4) Snonkaku Babilon ma er-er ḇese ḇekenem ro fafisu ani rofyor sifawi mbroḇ sesya sfanam kwar ido, sisewar kaku insama simkak ḇa kuker sikofenyae si, ”Swambraḇ.” Sifrur kako amfyanir ḇebor ro allah sedi, sikyar nari skadaunwarek si. (Yes. 41:5-7) Imbape, Yahwe ikofen ḇe snonkaku Yahudi sya, ”Auma manfamyan Yedi, sye Israel [wamnis er-er ḇesesya ḇa] . . . Wamkakwarek awer, snar Aya iso Allah bedi.” (Yes. 41:8-10) Mam kada Yahwe doḇe, ”Aya iso Allah bedi.” Roro wos nane, Yahwe isya ḇyuk kakakyar ḇe manfamyan ḇesoasuser Ḇyesi fa simkakwarek awer kuker ikofen ima ipok ḇyefnder si ḇa. Ima Allah sedi pdef, ma siso kawasa Ḇyesi pdef. Ikofen ḇe si, ”Nari yun au . . . ma yafnoḇek au.” Kaku beri, wos samaraḇraḇ ma ḇeḇuk sneprei nane nasambraḇser snonkaku Yahudi ro ḇaḇewomen sya.​—Wasya Yesaya 46:3, 4.

9-10. Rosai ḇefnai fandun fa komkak awer? Fasnaiḇair pan.

⁹ Iba syadiwer ro baboine, snonkaku ḇero ris koḇedi simkakwarek snar dunya ine iḇyeḇa syadi. Kakuḇae, roi nane nawyaye ko kako. Ḇape fandun fa komkak awer. Yahwe ikofen ḇe ko, ”Aya iso Allah bedi.” Rosai ḇefnai fa wos nane nafrur fa komkak ḇa?

¹⁰ Kokarapan wos sarḇer ine. Snon risuru suyek pesawat, susnosna Jim ma Ben. Mura wam ḇeba ifnak pesawat ani, nafrur fa pesawat ani iwawa. Fyoro ḇa ramnai, ḇeyun pesawat ani ikofen ḇe ḇeyek syakam, ”Mkokain pdef ma mkofes nako sabuk pengaman. Nari pesawat ine iwawa ro swaf kero.” Jim imkak kaku. Ḇape ḇeyun pesawat ani ikofen wer, ”Mkomkakwarek  awer. Ḇeyawos ine iso pilot mkoḇedi.” Jim ikyar mankun ḇa faro rosai pilot ani ikofen na ma iwawa bruri ḇo doḇe, ”Dawos radirya monda ke?” Ḇape, myam mboi Ben ima imkak ḇaḇeri. Jim ifuken i, ”Sai ḇefnai fa wamkak ḇaberi?” Ben imbrif ma doḇe, ”Snar yamamḇir kaku ḇeyun pesawat ine. Ima kma yediri!” Mura Ben ikofen, ”Yamarisen yakofenḇair kamami ḇe au. Yakyare, fyor wamamḇir i ma wafawi moḇsa dun pesawat ya rai, au kako na wamkak ḇa.”

11. Farkarkor rosai kun ro wos sarḇer ḇekur snon risuru ḇeyek pesawat ansuya?

¹¹ Farkarkor rosai kun ro wos sarḇer ine? Raris Ben, na komkak ḇa snar komamḇir kaku beri Kma koḇedi ro nanki, Yahwe I. Kofawi na fyarkin pyum ko fyor kombranuk kankenem ḇefo kuker samswen ḇemarḇak ro ras-ras papupes dunya ine. (Yes. 35:4) Fafisu snonkaku ḇero dunya ine siḇoryae ro makakak sena, koma na komkak ḇa snar kokyar faro Yahwe. (Yes. 30:15) Kakfur raris Ben kuker kokofenḇair ḇe min koḇesi roi na ḇefrur fa sna kakakyar faro Allah. Rarirya, sikako na sikyar Yahwe nari ifnoḇek si fafisu sisma samswen sairirya monda.

12. (a) Rosai asas ḇekyor na kawos ya? (b) Rosai na koswarepen fyor kowasya mnuk-mnuk ḇekofen Yahwe ”ḇramin” Ḇyedi?

¹² Kwarapan asas ḇekyor Yesaya fyas ine: ”Nari yakadaunwarek au, nari yafnoḇek au.” Yesaya isya fyasnaiḇair moḇsa Yahwe na kyadaunwarek kawasa Ḇyesi fyor ikofen, ”Yahwe nari ryama kuker papoik Ḇyedi, ma ḇramin Ḇyedi nari ḇyepoik faro I.” (Yes. 40:10) Ro Refo wos ”ḇramin” sḇuk ker na fa sḇukiḇair ḇe papoik. Inja, wos ḇekofen ”ḇramin Ḇyedi nari ḇyepoik” neswarapepen ḇe ko Yahwe  iso Raja ḇena papoik ḇeba kaku. Kuker snopor ḇeba Ḇyedi ifnoḇek ma kyadauwarek kawasa Ḇyesi ro ḇepon iwara. Ma ifrur rarirya kwar fa ifnoḇek ma kyadaunwarek ḇekyar I sya ro baboine.​—Ul. 1:30, 31; Yes. 43:10.

13. (a) Fafisu saiso Yahwe na ifrur imnis asas Ḇyedi fa kyadaunwarek ko? (b) Asas rosai ḇeḇuk samamḇraḇ ma kakakyar syadi ḇe ko?

¹³ Iḇye syadi fafisu mbroḇ koḇesi sewayam ko, Yahwe ifrur imnis asas Ḇyedi, ”Nari Yakadaunwarek au.” Baboine ro sup ḇeba ḇeḇeso, mbroḇ koḇesi sisewar fa sidwarek fararur ḇaḇeḇaryas ma organisasi koḇedi. Rariryano, komkakwarek syadi ḇa faro roi ḇemun ḇerarirya. Yahwe ḇyeasas kwar nari ḇyuk samambraḇ ma kakakyar syadi ḇe ko. Doḇe, ”Romamun rosairirya monda sḇukimun mko na nun bon oḇaḇeri.” (Yes. 54:17) Wos nane neswarepepen ḇe ko faro roi rikyor ḇefandun kaku.

14. Rosai ḇefnai fa kokandor ḇa ḇembroḇ Allah I sya na siḇe smun ko?

¹⁴ Ḇeoserya, manfamyan Yesus koine, kofawi nari sayin ko. (Mat. 10:22) Yesus ḇyardi nari manfamyan ḇyesya sisma wayam kaku ro ras-ras papupes. (Mat. 24:9; Yoh. 15:20) Ḇesuruya, bardadi Yesaya fyasnaḇair mbroḇ koḇesi nari sayin ko monda ḇa mboi sḇuk romamun rosairirya fa sḇukimun ko. Romamun anine isoine ankarkar ḇesnai bos ḇa, wos ḇekaku ḇa ḇekur ko, ma sewayam ko kuker rarmomen, (Mat. 5:11) Yahwe nari ryir mbroḇ koḇesi fa sḇuk romamun sena fa sḇukimun ko. (Ef. 6:12; Why. 12:17) Ḇape fandun fa komkak awer. Snaro?

15-16. (a) Rosai roi ḇekyor fandun fa koswarepen na, ma rariso Yesaya 25:4, 5 nekofen bos roi ine? (b) Rariso Yesaya 41:11, 12 fyasnaḇair rosai nari ḇekur snonkaku ḇembroḇ konsya?

¹⁵ Kwarapan roi ḇekyor fandun fa koswarepen na. Yahwe ikofen ”romamun rosairirya monda sḇukimun [ko] na nun bon oḇaḇeri”. Raris ander na nekadaunwarek  ko ro wam doḇerya, rarirya kako Yahwe kyadaunwarek ko ro ”rarmomen ro snonkaku ḇemasasor”. (Wasya Yesaya 25:4, 5.) Mbroḇ koḇesi nari sismai bon oḇaḇeri fa sifrur koḇekandera isof fyoro.​—Yes. 65:17.

¹⁶ Osower ido, Yahwe syambraḇser kakyar koḇena faro I kuker fyasnaiḇair mnis kaku rosai nari ḇekur snonkaku ”ḇemsor [ko] sya kam”. (Wasya Yesaya 41:11, 12.) Nyan rosai monda mbroḇ koḇesi sisewar fa sḇukimun ko ḇaido mamunmun ya iba rariso, mboi bon ya imnis: Ḇembroḇ Allah kawasa Ḇyesikam ”nari seroioḇa ma sipromes”.

17-18. (a) Rariso ḇaḇewasya Refo nasambraḇser kakyar koḇena faro Allah I? Fawar pan wos sarḇer oso. (b) Rariso kokarauser mnuk Refo ḇeḇekinfir faro taun 2019 na nafnoḇek ko rai?

¹⁷ Kosambraḇser kakyar koḇena faro Yahwe kuker komamḇir kaku I. Nyan oser kofrur ya iso kowasya myaren Refo ya ma kowasenkara rosai kowasya na. Refo fyasepen rariso Yahwe kyadaunwarek kawasa Ḇyesi ro fafisu iwara. Fasfas anane nḇuk kakakyar ḇe ko na kyadaunwarek ko ro baboine.

¹⁸ Kwarapan wos sarḇer ḇepyum kaku Yesaya ḇyukifasnai moḇsa Yahwe kyadaunwarek ko rai. Kyur Yahwe I ḇe manfarandows oso ma manfamyan Ḇyesi ḇe domba mkun sya. Yesaya ikofen ḇekur Yahwe I, ”Kuker bramin Ḇyedi, nari iryur domba mkun sya, ma nari dun si ro ander Ḇyedi.” (Yes. 40:11) Fyor kowasen Yahwe ḇramin ḇesambraḇ Ḇyedi fyorepen ko, koḇaḇir kosmai payamyum ma komkak ḇa. Infa ḇefnoḇek ko pdef fa komkak ḇa rofyor kosmai samswen na, manfamyan ḇeḇesyowi ma ḇefawinanem skinkir kwar Yesaya 41:10 ḇe mnuk faro taun 2019, ”Wamkakwarek awer, snar Aya iso Allah bedi.” Kwarauser kada faro wos ḇeḇuk kakakyar kaku nane. Na nsambraḇser Au fafisu wasma samswen ro ras-ras nayama.