1-2. Samswen rosai monda ḇekur Yahwe kawasa Ḇyesi, ma snar samswen nane moḇsa smam mankunsi rai?

KWARAPAN fawar rikyor skoine: Dokter ikofen ḇe manbesrar oso snar ismai dafduf ḇemarḇak ma nari fyoro mura baken ḇyedi iryar ḇa. Manbesrar ḇeumur taun ri 50 kwar sisasyar i ro moḇ ifararur ya, ma syewar fararur ḇese wer mboi ismai na ḇaime. Imbesrar ḇesinan kwar syambraḇ ḇa kwar fa ifrur nabor syadi ro fararmyan ḇe Yahwe I.

² Wakro fafisu ḇemnis radirya ido, imbude na ḇaḇir sfandun Au ḇa kwar. Samswen ḇeradirya rya dunbur raryaḇ Bena, nafnai fa ḇesanekar, ma nafrur samswen Au fa kwain pyum kuker ḇesesya.

3. Moḇsa Setan ma snonkaku ḇeso i sya smam kankenem ya rai?

³ Nyan dunya ine smam kankenem ya imnis Setan mamam ḇyena. Ro fafisu iwara isof ro baboine, Setan ifrur pyum snonkaku sya ḇa, rya seroyoḇa. Setan ifawi Eva isouser faro Yahwe I ḇa ido, nari imar. Ḇesyaḇo ikofen ḇe Eva i nari ismai ḇaḇemkei. Inema roi ḇeḇyeḇa kaku. Ro dunya ḇero baboine, Setan iso ḇefara kaku farḇaḇyan na, fararur polotik, ma agama. Iso ḇefnai fa ḇefarḇaḇyan sya, manḇepoik, ma manfarkin agama sya sesyowi snonkaku sya kenem sena ḇa ma sfandun faro sneḇaḇir sena ḇa.

4. Rosai nari kawos ro farkarkor ine?

⁴ Imbape, Yahwe ima iḇese kaku ro Setan i. Yahwe imarisen kofawi ima ḇyesyowi kaku ko. Ma imarisen ifnoḇek  ko fafisu kosmai samswen ḇefrur fa koḇaḇir koḇe royoḇa. (Mz. 136:23; Rm. 12:3) Farkarkor ine nari dawosḇair nyan Yahwe ifnoḇek ko rofyor samswen rikyor skoine nkur ko: (1) Fafisu koduf, (2) fafisu samswen fa kosewar pipi, ma (3) fafisu koḇesinan kwar ma koḇaḇir jadi fa kofrur roi ḇepyum ro fararmyan ḇe Yahwe I wer ḇa. Ḇepon ya, rwama kawos rosai ḇefnai fa kokyar kaku Yahwe ima iswar ma ḇyesyowi manfamyan Ḇyesi oser-oser.

5. Rosai ḇefrur fa wakyar Yahwe myam Auma ḇemaeja?

⁵ Koinema koḇeḇefrur ro saprop, mboi koḇemaeja syadi ro saprop na. (Kej. 2:7) Kokarapan roi ḇeḇeso ḇefrur fa kokyar Yahwe myam koma koḇemaeja. Yahwe ifrur snonkaku koine ma ḇyuk samambraḇ ḇe ko fa kakfasnai rari Ḇyena. Rarirya, Yahwe ḇye snonkaku koine kokaki syadi ro ḇraur ḇesena ro supswan ine kam. (Kej. 1:27) Ifrur ko kako fa koḇepoik supswan ma aiwan sya.​—Mz. 8:4-8.

6. Roi ḇese rosai ḇefrur fa kokyar Yahwe myam snonkaku ḇenapes ḇa koine koḇemaeja kaker?

⁶ Rofyor Adam ifrur sasar kwar, Yahwe iswar pdef snonkaku sya. Iswar ko rawo imarisen ḇyuk Roma iswar kaku, Yesus i, fa imarwarek ko snar sasar koḇena. (1 Yoh. 4:9, 10) Ḇeknam ro Yesus marmar ḇyedi, Yahwe nari ḇyawes snonkaku ḇemar kwar snar sasar ro Adam, iḇye ”snonkaku ḇenapes sya ma ḇenapes ḇa sya”. (Kis. 24:15) Refo ikofenḇair fafisu koduf, kona roi oḇa, ḇaido koḇesinan kwar ke, Yahwe myam koḇemaeja kaker.​—Kis. 10:34, 35.

7. Rosai wer ḇefrur fa kokyar Yahwe ima iswar ma ḇyesyowi kaku ko?

⁷ Roi ḇeḇeso naisya wer ḇefrur fa kokyar Yahwe iswar ma ḇyesyowi kaku ko. Dun ko fa kofanam faro I ma myam kwar moḇsa komam abar ḇepyum na rai. (Yoh. 6:44) Rofyor kofanam ḇe Yahwe I kwar, nari Yahwe dakfanam faro ko kako. (Yak. 4:8) Oso wer ido, Yahwe ḇyuk oras ma syewar kaku fa fyarkor ko. Ine fyasnaiḇair myam koma koḇemaeja kaku. Ifawi kaku kirinema koma snonkaku ḇemnis rariso ma ifawi na koḇe snonkaku ḇefrur pyum syadi wer. Ḇyuk kako wos aprer ḇe ko kukro iswar ko. (Ams. 3:11, 12) Nane kam nfasnaibos Yahwe ima iswar ma ḇyesyowi kaku ko!

8. Rariso Mazmur 18:27-29 nafnoḇek ko fa kona kakara ḇepyum fafisu kosmai samswen?

⁸ Ono sisya smam Raja Daud ima snonkaku ḇena royoḇa, ḇape Daud ifawi Yahwe iswar ma isaramper i. Naiso nafnoḇek Daud fa nya kakara ḇepyum fafisu ismai samswen. (2 Sam. 16:5-7) Fafisu kosmai samswen ḇaido koḇesanekar, Yahwe na ifnoḇek ko fa kona kakara ḇepyum ma syambraḇser ko fa kokamar samswen na. (Wasya Mazmur 18:27-29.) Kofawi Yahwe iwaira ko ido, roi osoḇaḇeri na idwarek ko fa kofarmyan ḇe I kuker raryaḇ. (Rm. 8:31) Rarirya, rwama kawos samswen rikyor ro kankenem koḇena. Ro samswen anna oser-oser, fandun fa koswarepen Yahwe ima iswar ma ḇyesyowi kaku ko.

9. Fafisu koduf moḇsa na komam mankunko rai?

⁹ Fafisu koduf ido, nari koḇaḇir koma sfandun ko wer ḇa. Na komai fyor snonkaku sya sifawi dafduf koḇena ḇaido  kofandun fafnoḇek snonkaku ḇese. Snonkaku ḇese sifawi dafduf koḇena ḇa yo, komai awer kukro kopok ḇa fa kofrur roi ḇepon ya kofrur ro rasras na. Ro samswen ḇeradine, moḇsa Yahwe syambraḇser ko rai?

10. Imnis wos ro Amsal 12:25, rosai na ḇesambraḇser ko ro fafisu kodufe?

¹⁰ Fafisu kodufe, ”wos ḇepyum” na nsambraḇser ko. (Wasya Amsal 12:25.) Refo iser wos ḇepyum ro Yahwe ḇeḇuk swarapepen ḇe ko snar fafisu koisya koduf, Yahwe isya fyandun kaku ko. (Mz. 31:19; 41:3) Kowasya ker Refo ya ido, Yahwe nari ifnoḇek ko fa kosawen kakara ḇesasar snar dafduf koḇena.

11. Rariso manbesrar oso ismai fafnoḇek ro Yahwe I rai?

¹¹ Kokarapan fawar ro manbesrar oso snori Yorgen. * Byabo kaker, mboi daksmai dafduf ḇefrur fa baken ḇyedi iryar ḇa fasaw kaku. Ine nafrur fa ḇyaḇir na sfandun i ḇa kwar. Yorgen doḇe, ”Yakara ḇaḇeri ma yaḇor moḇsa na yafrur dafduf ayenane rai. Yamai kaku kukro snonkaku sya smam ker aya.” Ikofen wer, ”Fyor dafduf ayenane naḇyeḇa syadi wer, yakara nari kenem ayena nfadwer kaku. Sanerine ikar kaku, ma yor Yahwe I fa ifnoḇek aya.” Moḇsa Yahwe ifnoḇek i rai? Ikofen wer, ”Snar samswen fa yakara roi oser monda, inja sanun aya fa yawasya mnuk ḇeḇeso ro syap Mazmur ḇekofenḇair Yahwe ima fyandun kaku kawasa Ḇyesi. Ro ras ḇe ras yawasya kaḇer na ker, ma nane nbuk sneprei ma nsambraḇser aya. Fawas mura, snonkaku sya smam mboi yaryaḇ syadi. Ipyum syadi iso soḇe kakara ḇepyum  ayena nsambraḇser si kako. Yafawi kaku Yahwe kyarem nadi ayena kwar! Yahwe ifnoḇek aya fa yamam mankundaya kuker nyan ḇepyum. Yakara monda faro rosai Refo ikofen ḇekur nyan Yahwe myam aya ro dafduf ayena.”

12. Fafisu Ausya wadufe, rosai fandun fa wafrur insama Yahwe ifnoḇek Au?

¹² Fafisu Ausya wadufe, wakyar kaku Yahwe ifawi pyum roi ḇekur Au na. Wor Yahwe I fa ifnoḇek Au insama nwa kakara ḇepyum faro samswen ḇekur Au na. Ramnai, swewar wos ḇeḇuk sneprei ro Yahwe I ro Refo. Kwara monda faro mnuk ḇekofenḇair Yahwe ima iswar ma ḇyesyowi kaku manfamyan Ḇyesi. Wafrur na ido, nari mam Yahwe ima ifrur pyum kaku faro snonkaku ḇefarmyan kuker soasuser ḇe I.​—Mz. 84:11.

13. Ḇeḇukor ro kina oso ismai fararur wer ḇa ido, moḇsa na ḇyaḇir rai?

¹³ Ḇeḇukor ro kina oser-oser na simarisen sfasos fandandun ro kina sesi. Kokarapan, manbesrar oso ifrur sasar ḇaḇeri mboi sisasyar i ro moḇ fyararur ro ya. Syewar kaku kwar, mboi ismai fararur ḇaim. Samswen ḇeradine nafrur fa ḇyaḇir ismai royoḇa. Ḇape, myam ḇe Yahwe asas Ḇyena mura nane nsambraḇser i. Rariso?

14. Rosai ḇefnai fa Yahwe ifrur mnis asas Ḇyena ḇesya kwar?

¹⁴ Yahwe ifrur asas Ḇyena rarirya ḇesya kwar. (Yos. 21:45; 23:14) Roi ḇeḇeso isya ḇefnai ya. Oser ya, snar roi anna naser snonsnon ḇepyum Ḇyedi. Yahwe ikofen kwar nari ḇyuk ḇe manfamyan ḇesouser Ḇyesya roi sifandun na, ma kyara fandun fa ifrur raris rosai ikofen na. (Mz. 31:1-3)  Oso wer ido, Yahwe ifawi kina Ḇyesi koine na koḇesneso ma kofafko fyor ḇyuk rosai kofandun na ḇa. Yahwe ḇyeasas kwar nari ḇyuk roi kofandun ro rasras ma roi kofandun fa kofarmyan pdef ḇe I. Osoḇaḇeri na idwarek Yahwe fa ifrur mnis asas Ḇyena!​—Mat. 6:30-33; 24:45.

15. (a) Samswen rosai ḇekur snonkaku Kristen ḇero abad randak siwara? (b) Wos ḇero Mazmur 37:18, 19 nafrur fa kokyar faro rosai?

¹⁵ Koswarepen roi ḇefnai Yahwe I fa ifrur mnis asas Ḇyena ido, nari kokyar Yahwe ifnoḇek ko pdef fafisu samswen fa kosewar pipi na. Kokarapan fawar ro snonkaku Kristen ḇero abad randak siwara. Fyor sewayam kaku si ro Yerusalem, sikam sikpar sibur ḇesisye ḇe sup ya. (Kis. 8:1) Kokarapan, samswen rosai ḇekur si na. Rya sismai rum ma fararur oḇa. Rarirya ḇesyaḇo, Yahwe ibur si ḇa ma siryaḇ pdef. (Kis. 8:4; Ibr. 13:5, 6; Yak. 1:2, 3) Yahwe ifnoḇek pdef snonkaku Kristen ḇesoasuser ansya, ma nari dakfnoḇek ko kako.​—Wasya Mazmur 37:18, 19.

16. Fafisu risai na kokara Yahwe fyandun ḇa faro roi kofrur ro fararmyan ya?

¹⁶ Fafisu koḇe mansar binsar kwar, na kokara kosambraḇ ḇa kwar fa kofrur nabor syadi ro fararmyan ḇe Yahwe I. Raja Daud ḇyaḇir radirya kako fyor ḇye mansar kwar. (Mz. 71:9) Moḇsa Yahwe na ifnoḇek ko rai?

17. Farkarkor rosai kun ro imbesrar ḇenir ḇe Yuliana fawar ḇyeja?

¹⁷ Kokarapan fawar ro imbesrar oso snori Yuliana. Sor i fa dakso pelatihan fadaduru Balai Karajan, mboi imewer iso  na. Doḇe, ”Ayama yaḇe binsar kwar, kabom risaya, ma yafawi roi nakam ro fararur ine ḇa. Ayama yakfawi royoḇa.” Mboi, ro roḇ fyor sifrur pelatihan ḇaim, ḇyenadi ḇo ikofen roi ikram ro sneri ḇe Yahwe I. Meserdi, fafisu ryama ḇe Balai Karajan kwar, kyorwanan fandun fa iso ke roḇa. Ḇape ro pelatihan anya, ḇeḇuk pelatihan ikofen snai ḇo doḇe ḇaḇekir ḇefandun kaku ya iso komarisen Yahwe fyarkor ko. Srar Yuliana fyar, ”Fafisu anya yakara, ’Yakna ḇaḇekir anya ḇae!’ Yakanes ḇeri kukro yafawi Yahwe kyarem nadi ayena kwar. Ḇyuk kakyar ḇe aya snar yana roi ḇemaeja fa yaḇuk ḇe I ma imarisen fyarkor aya.” Srar Yuliana iswarepen muraḇe fafisu anya ma ikofen, ”Rofyor yarama ḇe pelatihan anya, yasyasen ma yaḇesanekar. Ḇape fyor yabur, yasmai samambraḇ, yamkakwarek wer ḇa, ma yaḇaḇir sifandun aya!”

18. Mnuk risai ḇero Refo ḇefasnai Yahwe ḇyesyowi fararmyan koḇena fafisu koḇesinan kwar?

¹⁸ Koḇesinan kwar, mboi Yahwe fyandun kaker ko. (Mz. 92:12-15) Imbude kokara roi kofrur ḇaido koḇuk na nabor kuf ḇa. Ḇape, Yesus fyarkor ko rosai monda koḇuk ro fararmyan, Yahwe ḇyesyowi kaku na. (Luk. 21:2-4) Inja, kwara monda faro roi swambraḇ fa wafrur na. Imnis raris, bisa wawos ḇe snonkaku ḇese fa sakfawi Yahwe I, wanadiwarek naek srar sya, ma swambraḇser si insama sisouser pdef. Yahwe myam Au ḇe min ḇefararur kayam fnoḇek I, inema snar samambraḇ Bena naisya ḇa, mboi snar wamarisen wasouser faro I.​—1 Kor. 3:5-9.

19. Imnis wos ḇero Roma 8:38, 39, na kokyar faro rosai?

¹⁹ Kaku ḇeri, Yahwe iso Allah ḇeswar ma ḇesyowi kaku snonkaku ḇefarmyan faro I sya. Na kokofen kasumasa kaku kukro ikyar ko fa kofarmyan ḇe I! Yahwe idaw ko fa kofrur marisen Ḇyena, ma kona aski ḇekaku kukro kosyom faro I. (Why. 4:11) Dunya ine myam koḇeḇefandun ḇa, ḇape Allah myam ko rarirya ḇa. (Ibr. 11:16, 38) Fafisu koḇesanekar kukro kodufe, samswen fa kosewar pipi, ḇaido koḇe mansar binsar kwar, koswarepen pdef snar roi osoḇaḇeri na idwarek Kma koḇedi ro nanki saswar Ḇyena ḇyuk ḇe ko na.​—Wasya Roma 8:38, 39.