1. Fyor kofawi Allah iswar ko, moḇsa koḇaḇir rai?

MANWAWAN Yohanes fyas ḇo doḇe ’Allah ima isaswar’. (1 Yoh. 4:⁠8) Wos ker ine ikofenḇair ḇe ko kakaku ine: Allah iso knam ro kankenem ine, ma I kako knam ro saswar ya. Yahwe iswar kaku ko! Saswar Ḇyenane nafrur fa koknon, komarisen, ma koḇeaski.

2. (a) Imnis ḇero Matius 22:​37-​40 ya, sasoser risuru rosai ḇeba syadi ya? (b) Rosai ḇefnai samswen kaku fa kosouser sasoser ḇesuru anya?

² Snonggaku Kristen koine kopok kokinfir ḇa imbe kofasnai saswar ke roḇa. Ima roi fandun fa kofrur kaku nairi. (Wasya Matius 22:​37-​40.) Fafisu komambir pyum Yahwe I kwar, nari napyan fa kosouser sasoser ḇeba syadi ine. Kofawi Yahwe ima inapes, isaswar, ma ifrur pyum ko. Imbape rya samswen ḇe ko fa kosouser sasoser ḇesuru ya. Rosai ḇefnai ya? Kukro min koḇesya ma naek srar sya sikam sinapes ḇa. Inja fyorno ido, imbude sawos ma sifrur roi ḇefnai fa kokara siswar ko ḇa. Yahwe ifawi kosouser sasoser ani ima napyan ḇa. Iso ḇefnai fa Yahwe fyarkin snonggaku ḇeḇeso fa sfas Refo ya, ma roi sfas anna nfarkor ko rosai ḇefnai fa koswaryae ko ma moḇsa kakfasnai na rai. Oso ro manfasfas ansi iso Yohanes i.​—⁠1 Yoh. 3:​11, 12.

3. Rosai Yohanes ikofen ker na?

³ Ro Yohanes fasfas ḇyena, ikofen ker snonggaku Kristen fandun fa sfasnai saswar. Ro fasfas ḇekur Yesus kankenem ḇyedi, Yohanes dap ker rari saswar ine nabor syadi ro manfasfas injil rikyor anskoya. Rofyor Yohanes fyas syap Injil ma syapram rikyor ḇyena, rya ḇyeumur taun utin oser kwar. Syap-syap anna nfarkor ko fa kofasnai saswar ro rosai monda kofrur ro kenem koḇena. (1 Yoh. 4:​10, 11) Ḇape Yohanes manggundi fyandun swaf fa dakfawi roi fyas anna.

4. Yohanes fyasnai saswar pdef ḇe snonggaku ḇesesya ke?

⁴ Fafisu Yohanes byabo ya, fyasnai saswar ya pdef ḇa. Rupa ra ro ras oso, Yesus ma manfamyan ḇyesi simbranuk Samaria fa sra ḇe Yerusalem. Sifyafer ro mnu oso ḇero Samaria, mboi snonggaku ḇero diansya simewer sfasnai saswar frur pyum faro si. Inja, rosai Yohanes ifrur ro fafisu ani? Yohanes ma ḇedar ḇyedi Yakobus i, sufuken Yesus i ḇo suyoḇe imarisen ido suyor insama for ya isabu ro nanggi mumfes fa myun kawasa ansi! (Luk. 9:​52-​56) Ro swaf ḇese wer, Yohanes fyasnai saswar faro manwawan ḇesesya ḇa. Yohanes ma Yakobus sukofen ḇe susnasu fa dor ḇe Yesus insa byuk nasan ḇepyum faro su fa suyakwarpu Yesus i ro Karajan nanggi. Rofyor manwawan ḇesesya srower rosai Yakobus ma Yohanes sufrur nane, simarisen ḇaḇeri! (Mat. 20:​20, 21, 24) Yohanes ifrur roi ḇesasar nane kwar, fama Yesus iswar i pdef.​—⁠Yoh. 21:⁠7.

5. Rosai nari kawos ro farkarkor ine?

⁵ Ro farkarkor ine, nari kawos nyan ḇepyum Yohanes fyasnai kwar ma roi ḇeḇeso fyas ḇekur saswar ya. Nari kofarkor kako nyan kofasnai saswar ḇe naek srar koḇesi. Oso wer ido, na kofarkor nyan ḇepyum ḇebukor ro kina sya bisa siso na fa sfasnai saswar faro kina sesi.

6. Moḇsa Yahwe fyasnai iswar ko rai?

⁶ Imbude kokara kofasnai saswar faro snonggaku ḇesesya kwar kuker kawos roi ḇepyum yoḇ si. Ḇape koswar kaku si ido, nari kofasnai na ro fararur koḇena kako. (Mam kako Yakobus 2:​17, 26.) Imnis raris, Yahwe iswar kaku ko. (1 Yoh. 4:​19) Fyasnai saswar Ḇyena ḇe ko roro wos ḇepyum sfas ro Refo ya. (Mz. 25:10; Rm. 8:​38, 39) Imbape, kokyar Yahwe iswar ko ro wos na monda ḇa, mboi ro rosai ifrur na kako. Yohanes fyas, ”Allah fyasna saswar ḇyedi ro kosnesna snar iwan Rumkun oser ḇyedi ḇesupswan ine insa kuker Rumkun ḇyedi kosma kankenem.” (1 Yoh. 4:⁠9) Yahwe byuk Roma Ḇyedi iswar kaku fa imarwarek ko. (Yoh. 3:​16) Inja, kokyar Yahwe iswar kaku ko ḇae.

7. Rosai Yesus ifrur kwar fa fyasnai ima iswar kaku ko?

⁷ Yesus ikofen ḇe manfamyan ḇyesi ḇo doḇe ima iswar si. (Yoh. 13:1; 15:⁠15) Fyasnai iswar kaku si ma iswar ko ro rosai dawos na monda ḇa, mboi ro rosai ifrur na kako. Doḇe, ”Snonkaku ḇeswar syadi bati ḇyesi isoine, snonkaku ḇeḇuk kankenem ḇyedi faro bati ansi.” (Yoh. 15:13) Kokarauser roi Yahwe ma Yesus sufrur kwar ḇe ko na ido, rosai na komarisen kofrur kaku ya?

8. Rosai fandun fa kofrur kaku imnis anun ro 1 Yohanes 3:​18 ya?

⁸ Kofasnai koma koswar Allah Yahwe ma Yesus su kuker kosouser su. (Yoh. 14:15; 1 Yoh. 5:⁠3) Yesus iwan ko fa koswaryae ko. (Yoh. 13:​34, 35) Kofasnai koswar naek srar koḇesi ro wos koḇena monda ḇa, mboi ro rosai kofrur na kako. (Wasya 1 Yohanes 3:​18.) Rosai monda na kofrur fa kofasnai koma koswar si?

9. Saswar ya idif Yohanes i fa ifrur rosai?

⁹ Yohanes ḇyarekus kmari ma isaramper kina ḇyesi fa smam fandun ro kina sesi sasewar sena. Rarirya mboi, fararur ḇefandun syadi ro kenem ḇyedi iso ifnoḇek snonggaku ḇese fa smambir Yahwe ma Yesus su. Inema nyan kankenem ḇepyan risya ḇa. Yohanes ismai wayam ma ro papupes abad randak Masehi rofyor ḇye mansar kaku kwar, sun i fa ḇyarek ro moḇ ḇese. (Kis. 3:1; 4:​1-3; 5:​18; Why. 1:⁠9) Fafisu sisun Yohanes i ro bui snar byaryas snonsnon Yesus, fyasnai iswar snonggaku ḇesesya. Rupa ra, fafisu ryo myos Patmos, fyasepen fasasnai myam na, mura fyarem na ḇe sidang-sidang insama sakfawi kako rosai nari kero ḇerama na. (Why. 1:⁠1) Ramnai, fafisu ibur myos Patmos kwar, rya insape fyas syap Injil ḇyeja ḇekur Yesus kankenem ma fararmyan ḇyena. Fyas kako syapram rikyor ḇesambraḇser ma ḇebuk sneprei ḇe naek srar sya. Moḇsa koso Yohanes nyan fyasnai saswar ḇyena rai?

10. Moḇsa kofasnai koswar snonggaku ḇesesya rai?

¹⁰ Rosai imbe kokinfir fa kofrur ro kenem koḇena, kofasnai koswar snonggaku ḇese. Dunya ḇeḇarḇor ine imarisen insama kobuk oras ma samambraḇ koḇena faro fandun manggun koḇena ḇardi, imnis ra sasewar pipi ma snonsnon. Ḇape manbaryas binbaryas Karajan ro supswan ine ḇesiper, sfasnai siswar manggunsi ḇa kuker sbuk oras sena fa sbaryas abar ḇepyum ma sisaramper snonggaku sya fa sfanam ḇe Yahwe I. Sia sbuk oras sena kam fa sbaryas ma sbuk farkarkor Refo.

11. Ḇebor ro naek srar koḇesi rosai sifrur kwar fa siswar Yahwe ma min sesi?

¹¹ Ḇebor ro naek srar koḇesi sfararur ro ras oso ḇesiper fa sisewar fandun sena ma kina sesi. Rarirya mboi, naek srar ḇesouser ansine sisewar kaku fa sisaramper Allah organisasi Ḇyedi. Rupa ra, ono sisya sisaramper snonggaku ḇesmai rim ḇeba sya, sia wer sifnoḇek fararur ḇaḇawes, ma snonggaku oser-oser sna swaf fa sbuk farsarser kumpan fa siksaramper fararur ro supwan ine ḇesiper. Sifrur roi nane kukro siswar Allah ma min sesi. Kofasnai koswar naek srar koḇesi kuker koso fananjur ro minggu nakam ma kosewar kaku fa kobuk kankarem. Imbude kombrus kwar, mboi kosewar fa koso fananjur na. Rya komgak kero, mboi kobuk kankarem monda. Manggunko kona samswen nabore, rariryano bisa kosambraḇser ḇesesya rofyor fananjur ya imbran baim ḇaido posa kwar. (Ibr. 10:​24, 25) Na koḇesyowi kaku rosai naek srar koḇesi sifrur kwar na!

12. Moḇsa Yohanes fyasnai ima iswar naek srar ḇyesi ro nyan ḇese rai?

¹² Yohanes fyasnai saswar faro naek srar ḇyesi wer kuker byuk wos anun ma myanen si. Raris ro syapram ḇyedi, byuk wos mananen ḇe naek srar sya kukro sfasnai kakyar ma sfararur pyum, mboi byuk wos anun ḇekur sasar sena kako. (1 Yoh. 1:8–​2:​1, 13, 14) Rarirya kako, kobuk wos mananen faro naek srar koḇesi ḇekur roi ḇepyum sifrur kwar na. Imboi koisya kofawi oso nya kenem ḇeḇye ḇa ido, kofasnai koswar i kuker kobuk wos anun ḇe i. Imbude komgak fa kobuk wos anun ḇe bati oso, mboi Refo doḇe bati ḇekaku na sanunepen si.​—⁠Ams. 27:⁠17.

13. Rosai kopok kofrur awer na?

¹³ Roi ono naisya na kopok kofrur na ḇa fa kofasnai koswar naek srar koḇesi. Imnis raris, na komsor fasaw awer faro rosai sikofen na. Kokarapan roi ḇeḇejadi ro ras fanam ḇe Yesus marmar ḇyedi. Ikofen ḇe manfamyan ḇyesi mansei ḇeyan kraf ma ḇeyinem rik ḇyena siso nari ḇesmai kankenem ya. (Yoh. 6:​53-​57) Yesus wos ḇyenane nafrur kanandor isof manfamyan ḇebor sya sibur i. Ḇape bati ḇekaku ḇyesi ma Yohanes i kako sibur i ḇa, mboi sisouser pdef faro i. Sima sikandor kako ma sifawi mnis roi Yesus ikofen na ḇa. Fama Yesus bati ḇesouser ḇyansine skara sasar i ḇa ḇaido simsor faro wos ḇyena ḇa. Imbape, sikyar i kukro sifawi roi ikofen nama roi ḇekaku nairi. (Yoh. 6:​60, 66-​69) Inja, koswarepen kofafayaf fasawsaw awer faro rosai bati koḇesya sikofen na! Ḇape kobuk swaf ḇe si fa sikofenḇair roi skara kaku na.​—⁠Ams. 18:13; Pkh. 7:⁠9.

14. Rosai ḇefnai fa kopok kayin awer naek srar koḇesi?

¹⁴ Yohanes danunepen ko kako fa kayin awer naek srar koḇesi. Koso wos anun ine ḇa ido, ine kyurfasnai komam monda Ibiris dawninyan ko. (1 Yoh. 2:​11; 3:​15) Ine iso ḇekur snonggaku Kristen ḇeḇeso ro papupes abad randak Masehi. Ro fafisu anya, Ibiris dawninyan snonggaku sya fa sayin Allah kawasa Ḇyesi ma sifnai si fa seoser ḇa. Fafisu Yohanes fyas syapram ḇyedi, snon ono sisya sfasnai rari ḇemnis ra Ibiris i. Rari ine ifrur fa sidang ya ḇyeoser ḇa. Oser ya iso, Diotrefes i. (3 Yoh. 9, 10) Ḇyesyowi penatua ḇerama ro sidang ḇefaker naek ḇefarkin sya ḇa, ma pyampum naek srar ḇefasnai frur pyum faro snonggaku imarisen ḇa sya. Inema roi ḇeḇye ḇa kaku! Baboine kako Ibiris syewar fa ifrur Allah kawasa Ḇyesi seoser ḇa. Iḇye kada, kopok kayin awer naek srar koḇesi mboi koswar si ḇesya kwar.

15. Rosai fandun fa ḇebukor ro kina sya siswarepen na?

¹⁵ Nyan ḇepon kaku ḇebukor ro kina oso fyasnai iswar kina ḇyedi iso fyasos roi sfandun ro ras-ras na. (1 Tim. 5:⁠8) Ḇape na ḇepon syadi fa iswarepen ya iso isaramper kina ḇyesi fa sna wis ḇepyum kuker Allah. (Mat. 5:⁠3) Komam kada, Yesus fyasnai nyan ḇepyum faro ḇebukor ro kina sya. Imnis ḇero syap Injil Yohanes, fafisu spai Yesus ro ai kandera ma fanam imbe imar anya, iswarepen kaker kina ḇyesi. Ro moḇ spai Yesus ro ya, Yohanes isya dores fanam Yesus snari, Maria i. Ḇyekandera kaku mboi dor Yohanes i fa myamwarek Maria i. (Yoh. 19:​26, 27) Yesus naek srar ḇyesi sisya na smam pyan Maria fandun ḇyena. Mboi rya fafisu anya, sḇe snonggaku Kristen ḇaim. Inja, Yesus imbe ifawi oso isya na ḇemam pyan Maria fandun ḇyena ro ras-ras ma ḇesambraḇser i kako fa fyarmyan pdef ḇe Yahwe I.

16. Fararur rosai monda Yohanes ifrur na?

¹⁶ Yohanes duf fararur nabore. Ima manwawan diri, inja fandun fa iryaḇ kaku ro fararur ḇaḇebaryas. Dakfarḇuk kwar kako, inja na syewar roi kina ḇyesi sfandun ro ras-ras na ma isaramper si fa sna wis ḇepyum kuker Allah. (1 Kor. 9:⁠5) Rosai ḇebukor ro kina ḇero baboine sya sfarkor ro Yohanes i?

17. Rosai ḇefnai fa ḇebukor ro kina, fandun fa isaramper kina ḇyesi insama sfanam ḇe Yahwe I?

¹⁷ Mambesrar oso ḇebukor ro kina imbude duf fararur ḇefandun nabore.  Imnis raris fandun fa fyararur myaren ro moḇ fyararur ya insama naser sanandik faro Yahwe snonsnon Ḇyedi. (Ef. 6:​5, 6; Tit. 2:​9, 10) Imbude nya fararur ḇese wer ro sidang, imnis raris myamfar naek srar sya, syambraḇser si, ma fandun fa iryaḇ ro ḇaḇebaryas. Oso wer ido, fandun fa fyarkor myaren Refo ya fnoḇek swari ma romawa ḇyesi. Nari sesyowi kaku rosai ifrur kwar insama sismai payamyum, marisen, ma sfanam pdef ḇe Yahwe I.​—⁠Ef. 5:​28, 29; 6:⁠4.

18. Rosai Yohanes ikyar kaku ya?

¹⁸ Yohanes ikenem kawan ma nya fawar nabore. Samswen ḇekur i na nabor rawo bisa nafnai fa kakyar ḇyena nsambraḇ ḇa. Fama syewar monda ker fa isouser Yesus parenta ḇyena, ine kako parenta fa iswar naek srar sya. Iso ḇewar fa Yohanes ikyar kaku Allah Yahwe ma Yesus suswar i ma nari susambraḇser i fa kyamar samswen na. (Yoh. 14:​15-​17; 15:10; 1 Yoh. 4:​16) Ibiris ma dunya ḇyedine idwarek Yohanes i ḇa fa imnai iswar naek srar ḇyesi ma fyasnai na ro rosai ikofen ma rosai ifrur na.

19. Anun rosai 1 Yohanes 4:7 ikofen ḇe ko fa kofrur na, ma kofrur na insama?

¹⁹ Raris Yohanes i, kokenem ro dunya Ibiris ḇyepoik ro ya. Ima dakfawi dakfasnai saswar ḇa. (1 Yoh. 3:​1, 10) Ibiris imarisen komnai koswar naek srar koḇesi, mboi kobuk swaf ḇe i ḇa ido, ine nari ndarirya ḇa. Rarirya kosewar fa koswar naek srar koḇesi ma kofasnai na ro rosai kokofen ma rosai kofrur na. Kofasnai saswar ido, na kosmai payamyum ro fandu naek srar koḇesi ma na kosmai marisen pdef.​—⁠Wasya 1 Yohanes 4:⁠7.