1. Imnis ra Raja Daud i, rosai na kakfuken ya?

KOKAME komarisen kokenem kuker payamyum ma koḇoryae ḇa. Ḇape fyorno ido, kona makakwarek kaker. Iso ḇefnai fa Yahwe manfamyan Ḇyesi ono sisya sakfuken raris Raja Daud i. Ifuken Yahwe I radine, ”Isof fafisu risai na yamgakwarek ma yaḇesneso ro ras ḇe ras?”​—⁠Mz. 13:⁠2.

2. Rosai nari kawos ro farkarkor ine?

² Kaku ḇae, na koisya kona makakwarek kaker ro kenem ine. Imboi bisa kofrur roi ono insama komgakwarek syadi ḇa. Nari kawos ḇepon rosai monda ḇefrur fa komgakwarek kenem koḇena. Nari kawos kako nyan ḇepyan riwonem ḇefnoḇek ko insama koḇoryae ḇa rofyor kosmai samswen.

3. Roi risai monda na ḇefrur fa komgakwarek, ma bisa kokrenbur na ke?

³ Roi nabor naisya na nafrur fa komgakwarek kenem koḇena ma jadi fa kokrenbur na ḇa. Rupa ra komgakwarek kukro taun ḇe taun roḇean, sansun, ma ḇaḇyak rum na nek syadi wer. Oso wer ido, ro moḇ kofararur ḇaido  ro rumfarkor, bati koḇesya sisewar fa sifrowes ko insama kanggarkar ḇaido kofrur farḇuk ḇeḇye ḇa. Ma baboine komam kada, snonggaku ḇefrur ḇarḇor sibor syadi wer. Kosmai samswen ḇeradine kukro kokenem warpu snonggaku ḇena kakara raris rosai Refo ikofen na ḇa. Ibiris, manḇepoik dunya ine, ifawi snonggaku sino sisya na simgakwarek kenem sena rawo sifarmyan ḇe Yahwe I wer ḇa. (Mat. 13:22; 1 Yoh. 5:​19) Iso eḇedari samswen ḇebor ḇero dunya ine nafnai fa snonggaku sya simgakwarek syadi!

4. Rosai ḇefnai fa komgak syadi awer?

⁴ Komgakwarek syadi mura, nane nafrur fa kokara roi eḇesena wer ḇa. Imbude komgakwarek kukro kona pipi fa kobukikowes roi kofandun na ḇa. Ḇaido koduf rawo jadi fa kofararur wer ḇa. Komgak kako nari ras oso kosoasuser ḇa fafisu sifrowes ko fa koyuk Allah sasoser Ḇyena. Kero wer nari Ibiris ma ḇeso i sya siḇe smun Allah kawasa Ḇyesi. Inja, komgak rosai nari kofrur ro fafisu anya. Imbude kokara ḇo koḇe, ’Yamgakwarek faro roi nane nama nsasar ke?’

5. Rosai kofawi kaku ro Yesus wos ḇyena ḇeyoḇe, ”Mkomkakwarek awer”?

⁵ Yesus ikofen ḇe manfamyan ḇyesi radine, ”Mkomkakwarek awer.” (Mat. 6:​25) Inja, Yesus doḇe kopok komgakwarek awer faro roi nakam ke? Roḇa! Koswarepen Yahwe manfamyan Ḇyesi ro fafisu naiwara sia sakna makakwarek kako, mboi Yahwe iswar si kaker. * (1 Raj. 19:4; Mz. 6:⁠3) Ḇekaku ya, Yesus ikofen rarirya insama kokyar syadi. Imewer komgakwarek syadi kenem koḇena kukro nari nafnai fa komam ḇepon fararmyan koḇena ḇe Yahwe I ḇa. Inja, rosai nari kofrur kaku fafisu komgakwarek?​—⁠Mam ” Nyan Kofrur Na Rai”.

6. Imnis anun ro Filipi 4:​6, 7 ya, rosai na ḇefnoḇek ko rofyor komgakwarek?

⁶ (1) Koḇenadi ḇesya kwar. Komgakwarek faro samswen oso ido, koḇenadi kor fafnoḇek ro Yahwe I. (1 Ptr. 5:⁠7) Nari Yahwe kyarem nadi koḇena ma kosmai kananon ḇesyadi ro snonggaku sya kakara sena kam. (Wasya Filipi 4:​6, 7.) Yahwe nari byuk kananon ro swaruser koḇena roro rur ḇesren Ḇyedi.​—⁠Gal. 5:​22.

7. Rosai koswarepen kaku fafisu koḇenadi ḇe Yahwe I?

⁷ Fafisu kawos ḇe Yahwe I ro nadi, kokofenḇair roi koḇaḇir kaku na. Kofar samswen koḇena ḇe I ma kokofenḇair moḇ kokara samswen anna rai. Komam mboi bisa kosasyar ro samswen anna ido, kor fawinanem ma samambraḇ ro Yahwe I fa kofrur na radiri. Imbape jadi ḇa ido, kor Yahwe I fa isaramper ko insama komgak syadi awer ma koḇoryae ḇa. Kokofen kaku roi kofandun na ro nadi koḇena ido, nari komam kaku moḇ Yahwe kyarem nadi koḇena raya. Mboi konadi kwar fama komam rya kyarem nadi koḇena ḇaim ido, kosusu awer. Yahwe imarisen kokofen mnis samswen ḇekur ko na monda ḇa, mboi konadiwarek na ḇesya kwar kako.​—⁠Luk. 11:​8-​10.

8. Rosai monda na kor ro nadi koḇena?

⁸ Kokofen makakwarek koḇena ḇe Yahwe I ro nadi, mboi komam insama kokofen kasumasa kako. Ipyum fa kokara roi ḇepyum kosmai kwar na, isyadi wer fafisu kosmai  samswen nabore. Fafisu ono ido, samswen fa kokofenḇair roi koḇaḇir kaku na faro Yahwe I. Ḇape koḇefnder awer, kokofen monda ’Yahwe yo wafnoḇek aya!’, nari ryower na.​—⁠2 Taw. 18:31; Rm. 8:​26.

9. Rosai na kofrur kaku rofyor komgake?

⁹ (2) Kokyar manggunko awer, mboi kokyar Yahwe fawawinanem Ḇyena. Ro fafisu Yesaya ikenem ya, snonggaku Yehuda simgak faro snonggaku Asiria kukro siḇe srama smun si. Kawasa Yehuda simewer snonggaku Asiria sepoik si, inja sor fafnoḇek ro snonggaku Masir sya. (Yes. 30:​1, 2) Yahwe byuk swarapepen ḇe si ḇo doḇe sikyar faro snonggaku Masir sya, inja nari sismai roi ḇeḇye ḇa. (Yes. 30:​7, 12, 13) Roro nabi Yesaya i, Yahwe ikofenḇair ḇe kawasa ansi moḇsa sismai payamyum raya. Yesaya doḇe, ”Mgokyar pdef ma mgoḇoryae ḇa kada, nari mgosambraḇ.”​—⁠Yes. 30:15b.

10. Ro fafisu risai kofasnai kokyar faro Yahwe I?

¹⁰ Fafisu risai kofasnai kokyar faro Yahwe I? Rupa ra, sbuk fararur ḇe ko kuker ḇaḇyak ḇekaki. Imboi fandun fa kofararur ro oras kawan syadi ma nari nakyaren fararmyan koḇena ḇe Yahwe I. Oso wer ido, na bin ḇaido snon ro moḇ kofararur ya daksyom Yahwe I ḇa ḇo imarisen fyanam ker ko. Ḇaido kokarapan kina koḇesya soḇe nari spampum ko kukro kofarmyan pdef ḇe Yahwe I. Ro fafisu ḇeradine, na samswen fa kofrur snemuk. Ḇape Yahwe nari byuk akurfasnai kofandun na. (Mat. 6:​33; 10:37; 1 Kor. 7:​39) Nari kokyar faro Yahwe I ma koso akurfasnai byuk na ke?

11. Fawar ro Refo risai ḇefnoḇek ko fa koḇoryae ḇa rofyor kosmai samswen kaku?

¹¹ (3) Kofarkor ro snonggaku ḇefasnai nyan ḇepyum ma ḇeḇye ḇa. Refo naser farfyar ḇebor ḇefasnai fandun fa kokyar faro Yahwe I ma koḇoryae awer. Rofyor kowasya farfyar anna, kokarauser rosai ḇefnobḇek Allah kawasa Ḇyesi fa siknon pdef ro fafisu ḇesamswen kaku. Imnis raris, fafisu kankain karkara Yahudi siwan fa manwawan sya sbaryas awer, simgak ḇaḇeri ḇo sikofen radine, ”Inkoso syadi faro Allah ro inkoso snonkaku.” (Kis. 5:​29) Ipyum syadi wer fafisu siprer manwawan ansi, siḇor famfnom ḇa. Rosai ḇefnai fa simgak ḇa? Kukro sifawi Yahwe isya ryous si, ma imarisen faro si. Inja, sbaryas pdef angginem ḇepyum ya. (Kis. 5:​40-​42) Rarirya kako, fafisu Stefanus imbe imar anya, imgak ḇaḇeri ma smam mgasi isnai imnis ra malaikat. (Kis. 6:​12-​15) Rosai ḇefnai ya? Snar ikyar kaku Yahwe imarisen i.

12. Imnis wos ḇero 1 Petrus 3:​14 ma 4:​14 ya, rosai ḇefnai fa na komarisen fafisu kosmai wayam?

¹² Manwawan sya smam kaku kwar Yahwe isya ryous si. Yahwe byuk ḇe si samambraḇ fa sifrur mujisat. (Kis. 5:​12-​16; 6:⁠8) Yahwe byuk samambraḇ fa kofrur mujisat ro baboine ḇa. Rarirya mboi, Yahwe ikofen ro Refo ḇo doḇe rofyor kosmai wayam kukro kokofenḇair kakaku ya, nari imarisen faro ko ma byuk rur ḇesren fa fyarkin ko. (Wasya 1 Petrus 3:​14; 4:​14.) Inja kokara ker awer ro ras naiwama rofyor kosmai wayam ido, moḇsa na koḇerai. Ro fafisu ine ḇeri, kosewar insama kokyar kaku Yahwe nari isaramper ma fyaspar ko. Raris Yesus manfamyan ḇyesi ro fafisu naiwara, kokyar faro Yesus wos ḇyenane: ”Snar mankundaya nari yaḇuk faro mko fawawi ro wos, isof mbroḇ mkoḇesi sipok sisampum mkoḇa.” Yesus ḇyeasas, ”Rofyor mkores nako, nari mkosma kankenem mkoḇena.” (Luk. 21:​12-​19) Kofawi Yahwe iswarepen pyum kaku roi ḇekasun ro manfamyan ḇesouser Ḇyesi ḇemar kwar sya. Yahwe swarapepen Ḇyenane nafnai fa ḇyawes si fa sikenem kaḇer.

13. Farkarkor rosai kun ro snonggaku ḇeḇoryae ma ḇekyar faro Yahwe I ḇa sya?

¹³ Kun farkarkor kako ro snonggaku ḇeḇoryae ma ḇekyar faro Yahwe I ḇa sya. Kofawi fawar sena ido, nari koḇinggwanbur nyan ḇesasar sena. Raris rofyor Raja Asa insape ḇyepoik ro Yehuda, sordade ḇeba kaku srama imbe smun i mboi ikyar faro Yahwe I. Inja Yahwe isaramper i fa kyafyo mbroḇ ḇyesi. (2 Taw. 14:​9-​12) Ḇarpur ya, Raja Baasya ro Israel ma sordade ḇyesi sibor ḇa ḇo srama fa sakmamun kuker Asa i. Mura, Asa dor fafnoḇek ro Yahwe I ḇa ḇo ḇyak sordade Siria fa sifnoḇek i. (2 Taw. 16:​1-3) Ma fafisu iduf marḇak rawo imbe imar ya, isnefer faro Yahwe I ḇa.​—⁠2 Taw. 16:⁠12.

14. Rosai kofarkor ro Asa sasar ḇyena?

¹⁴ Randak ya fyor Asa ismai samswen, syewar Yahwe I. Ḇape ḇarpur mura, dor Yahwe fafnoḇek Ḇyedi ḇa ḇo ikyar faro manggundi. Fafisu Asa kyara imbe dor fafnoḇek ro snonggaku Siria fa smamun kuker kawasa Israel, kyara nari dun payamyum ḇe er Yehuda. Ḇape, roi nane nakain fyoro ḇa. Yahwe ikofen roro nabi oso, ”Snar wakyar faro raja Siria mboi wakyar faro Yahwe Allah bedi ḇa, raja Siria sordade ḇyesi sikfisbur ḇramin bedi.” (2 Taw. 16:⁠7) Inja, kosasor ko insama kokara awer kosambraḇ fa kofrur samswen koḇena fa namnis ro manggunko ḇo komewer kor Yahwe farkankin Ḇyena ro Refo ya. Isyadi wer fyor imbe kun snemuk fasaw, fandun fa kokyar ḇe Yahwe I ma nari isaramper ko fa kosmai bon ḇepyum.

15. Fafisu kowasya Refo ya, rosai bisa kofrur ya?

¹⁵ (4) Koswarepen mnuk ro Refo na. Fafisu kowasya mnuk ro Refo ḇekofen fandun fa kokyar faro Yahwe I ma koḇoryae awer, kosewar fa koswarepen na. Nyan ḇepyum ḇefnoḇek ko fa koswarepen na iso kowasya kuker mgarem naba, kofasepen na, ma komam kaḇer na. Yahwe iwan Yosua i fa iwasya myaren Sasoser Taurat insama fyasnai fawinanem ro rosai ifrur na. Roi iwasya na, nafnoḇek Yosua i kako fa imgak ḇa fyarkin Allah kawasa Ḇyesi. (Yos. 1:​8, 9) Wos ḇero Refo na nbuk kananon ro swaruser ma kosnesna rofyor koro fafisu na ḇefrur fa koḇeḇirḇar ḇaido komgak.​—⁠Mz. 27:​1-3; Ams. 3:​25, 26.

16. Moḇsa Yahwe ḇye naek srar sya fa sifnoḇek ko rai?

¹⁶ (5) Koḇebati kuker naek srar koḇesi. Yahwe ḇye naek srar sya fa sifnoḇek ko insama koḇoryae ḇa ma kokyar faro I. Ro fananjur ari koḇena, na kosmai payamyum  ro faya na, kankarem ro naek srar sya, ma awawos ḇesambraḇser ko. (Ibr. 10:​24, 25) Rofyor kofawar makakwarek koḇena ḇe bati ḇefanam kuker ko ro sidang, nane nari nbuk sneprei ḇe ko kako. ”Wos ḇepyum” ḇeramuma ro bati oso, na nafnoḇek ko fa komgakwarek syadi ḇa.​—⁠Ams. 12:⁠25.

17. Imnis wos ḇero Ibrani 6:​19 ya, rariso saneraro koḇena nafrur fa kona kakara ḇemnis fafisu kosmai samswen ḇaido komgakwarek?

¹⁷ (6) Kufepen nako saneraro koḇena. Saneraro koḇena faro ras naiwama imnis ra yor ḇesambraḇ, ḇefrur fa kona kakara ḇemnis fafisu kosmai samswen ḇaido komgakwarek. (Wasya Ibrani 6:​19.) Inja, kokarauser Yahwe asas Ḇyena ḇekur ras naiwama. Fafisu anya, roi ḇefrur fa komgakwarek naisya ḇa kwar. (Yes. 65:17) Kowasenpan koro dunya babo ya, fyor roi ḇeḇye ḇa na naisya wer ḇa. (Mi. 4:⁠4) Kakyar faro saneraro koḇena nari nsambraḇ syadi rofyor kofawar na ḇe snonggaku ḇesesya. Inja, kosewar fa kobaryas ma kobuk farkarkor faro snonggaku sya. Rarirya kada, nari kokyar syadi faro saneraro koḇena ḇesya kwar.​—⁠Ibr. 6:​11.

18. Kero wer rosai nari ḇekur ko, ma rariso insama koḇoryae ḇa?

¹⁸ Papupes dunya ine fyanam kaku kwar, inja nari kosmai samswen nabor syadi ḇefnai fa komgakwarek. Mnuk skinfir faro taun 2021 nafnoḇek ko fa koḇoryae ḇa, kokyar faro samambraḇ koḇena ḇa mboi kokyar faro Yahwe I. Ro swaf taun ine ḇesiper, iḇye kada kofasnai kakyar koḇena faro Yahwe asas Ḇyenane: ”Mgokyar pdef ma mgoḇoryae ḇa kada, nari mgosambraḇ.”​—⁠Yes. 30:⁠15.