1. Rosai ḇefasnai kina ḇero baboine sya siswaryae si ḇa?

REFO ḇyardi kwar ro ras-ras ḇepupes, snonggaku sya nari ”siswaryae si ḇa”. (2 Tim. 3:​1, 3) Komam ro baboine kada, snonggaku sya kenem sena imnis kuker roi Refo ikofen ine kwar. Imnis raris, imbeswa ḇebor sya sifrur farḇakḇuk sena fa namuk, ebe sinan sya srakrok, ma romawa sya sḇaḇir sinan sesya siswar si ḇa. Kina ḇeḇarek ro rum oser kako rya sifanam si wer ḇa kwar. Snon oso ḇebuk ker anun faro ḇefarḇuk sya doḇe, ”Sna, kma, ma romawa sya sifanam si ḇa ḇo simarisen syadi sifnak komputer, tablet, hp, ḇaido video game. Sḇarek ro rum oser, mboi smambir pyum oso ma ḇesesya ḇa.”

2-3. (a) Imnis wos ḇero Roma 12:10 ya, faro mansei fandun fa kofasnai saswar ya? (b) Rosai nari kawos ro farkarkor ine?

² Komewer kakmnis snonggaku ḇero dunya ine ḇefawi saswar ḇa. (Rm. 12:⁠2) Imbape, komarisen kosewar fa koswar kina koḇesi ma naek srar ro sidang sya. (Wasya Roma 12:10.) Saswar ḇemnis rariso kofasnai yoḇ si? Fandun fa koswar kaku naek srar koḇesi ro sidang imnis moḇ koswar eba, kasun, kma, ma sna koḇesya ḇero kina koḇedi raya. Kofasnai saswar yoḇ si ido, nari nafrur fa naek ma srar ḇero sidang syakam simarisen sfarmyan ḇe Yahwe I.​—⁠Mi. 2:​12.

³ Insama kofasnai saswar ine, rwama kofarkor ro Yahwe I ma fawar ro snonggaku sfas ro Refo ya.

4. Rosai Yakobus 5:​11 ikofen ḇekur Yahwe saswar Ḇyedi?

⁴ Refo ikofenḇair ḇe ko Yahwe nya rari ḇepyum nabore. Imnis ra Refo doḇe, ”Allah ikada isaswar.” (1 Yoh. 4:⁠8) Allah Yahwe saswar Ḇyediso eḇedari komarisen koḇebati kuker I. Mboi Refo ikofen wer ḇo doḇe Yahwe ”saswar ḇyedi iba”. (Wasya Yakobus 5:​11.) Roi Refo ikofen nane ḇyeḇair Yahwe iswar kaku ko!

5. Rariso Yahwe fyasnai sawarwar Ḇyena, ma moḇsa koso nyan Ḇyena rai?

⁵ Komam Yakobus 5:​11 kada, doḇe Yahwe saswar Ḇyedi iba ma sneri ifo kuker sawarwar. (Kel. 34:⁠6) Nyan oser Yahwe fyasnai sawarwar ḇe ko iso byuk ampun faro sasar koḇena. (Mz. 51:⁠1) Refo doḇe snonggaku ḇefasnai sawarwar nari byuk ampun monda ḇa. Fafisu myam ḇesesya sekandera ido, saswar ya dek ro sneri ma nadif i fa isaramper si. Yahwe doḇe marisen ḇero sneri fa isaramper ko iba syadi ro sna oso saswar fyasnai ḇe romawa ḇyedi. (Yes. 49:15) Yahwe sneri ifo kuker sawarwar, inja myam koḇekandera ido, imarisen isaramper ko. (Mz. 37:39; 1 Kor. 10:13) Kofasnai sawarwar ḇe naek srar koḇesi kuker kobuk ampun faro si ma kokram masasor ḇa. (Ef. 4:​32) Nyan ḇepyum oso kofasnai sawarwar faro naek srar koḇesi iso kosaramper si rofyor sismai samswen. Kofasnai sawarwar faro snonggaku ḇesesya ido, ima koso Yahwe nyan Ḇyena ḇefasnai ḇepon sawarwar ya.​—⁠Ef. 5:⁠1.

6. Rariso Yonatan ma Daud sufasnai suswaryae su rai?

⁶ Refo naser fawar ro snonggaku ḇenapes ḇa sya. Sima sinapes ḇa kaker, mboi siswaryae ma sebati si. Oser ya iso Yonatan ma Daud su. Refo doḇe, ”Yonatan ma Daud suḇebati fanam kaku, ma Yonatan iswar Daud i imnis ra iswar manggundi.” (1 Sam. 18:⁠1) Yahwe kyinfir Daud i kwar fa ḇye raja fadwer Saul i. Iso eḇedari Saul sneri dosam faro Daud i ma syewar fa imbe myun i. Mboi, Saul roma ḇyedi Yonatan i dakfrur ra kmari ḇa. Yonatan ma Daud suna wos oser kwar fa suḇebati ma sufnoḇek su pdef.​—⁠1 Sam. 20:⁠42.

7. Roi risai bisa ḇedwarek Yonatan ma Daud fa suḇebati?

⁷ Yonatan ma Daud ḇaḇebati suḇena napyum kaku. Kokara ido, roi nabor bisa nadwarek su fa suḇebati. Rupa ra, Yonatan ḇyeumur syadi taun ri 30 ro Daud i. Yonatan bisa kyara fa imewer ḇyebati kuker snonggaku ḇebabo syadi ro i ma imewer kako ḇyebati kuker snonggaku ḇena fawawi nabor kuf ḇa. Ḇape, Yonatan myam Daud rarirya ḇa ḇo ḇyesyowi kaku i.

8. Kwara ido, rosai ḇefnai fa Yonatan ima bati ḇepyum kaku faro Daud i?

⁸ Yonatan imbe fyafayaf Daud ido, bisa ḇae. Kukro, ima Raja Saul roma ḇyediri. Bisa kyara iso ḇesrow syadi fa ḇye raja fadwer kmari. (1 Sam. 20:31) Imboi Yonatan fyasnai sne ḇerun, ma isouser faro Yahwe I. Inja isaramper Daud i ḇe raja Yahwe kyinfir kwar ani. Ifawi nari kmari Saul i, imsor fafaya i ḇa, mboi imewer ibur Daud i.​—⁠1 Sam. 20:​32-​34.

9. Yonatan myam Daud i ḇe mbroḇ ḇyedi ke? Fasnaiḇair pan.

⁹ Yonatan iswar kaku Daud i, inja myam i ḇe mbroḇ ḇyedi ḇa. Yonatan ima mansonanem ma mambri diri. Sifawi Yonatan ma kmari Saul, suma ”sururen syadi ro mansapur” ma ”susambraḇ syadi ro singa”. (2 Sam. 1:​22, 23) Inja Yonatan imarisen ido, bisa dararer manggundi. Ḇape, Yonatan imewer isyadi ro Daud ḇaido imarisen ḇa faro roi ḇepyum Daud ifrur na. Oroḇa mboi, Yonatan myanen Daud i kukro imgak ḇa ma ikyar faro Yahwe I. Ḇekaku ya, randak Yonatan iswar Daud iso fafisu myam Daud myun Goliat i. Inja, moḇsa kofasnai saswar ḇemnis rarirya faro naek srar koḇesi rai?

10. Koswar kaku ḇeri naek srar koḇesi ido, rosai nari kofrur yoḇ si?

¹⁰ Refo ikofen ḇe ko, ”Kaku ḇeri mkoswaryae mko kuker sne ḇesiper.” (1 Ptr. 1:​22) Yahwe fyasnai nyan ḇepyum ḇe ko kwar. Kosouser faro I fa koswar ḇesesya kuker sne ḇesiper ido, nari iswar ko pdef. (Rm. 8:​38, 39) Wos ”kaku ḇeri” ro wos Yunani kyurfasnai kosewar kaku insama kofasnai saswar ya. Fyorno ido, napyan fa kofasnai koswar kaku ḇeri naek srar koḇesi ḇa. Komam mboi, sia sifrur fa kofafayaf ido, ipyum fa ’kofasnai saswar koḇena ro kofnoḇek yae ko. Ma koḇesewar fa kofaduru ḇaḇeoser rur ya insa fyesepen ko kuker aski’. (Ef. 4:​1-3) Komarisen insama kokain pyum kuker naek srar koḇesi ido, komam monda faro sasar sena awer. Imbape kosewar kaku fa komam si imnis moḇ Yahwe myam si raya.​—⁠1 Sam. 16:7; Mz. 130:⁠3.

11. Rosai ḇefnai fa fyorno ido napyan ḇa fa kofasnai saswar faro naek srar koḇesi?

 ¹¹ Napyan ḇa ḇe ko fa kofasnai saswar faro naek srar koḇesi rofyor kofawi roi ḇeḇye ḇa ro si. Snonggaku Kristen ro abad randak sya saksmai roi ḇeradine kako. Rupa ra Euodia ma Sintikhe su, rya sufararur pyum kaku kwar fa susaramper Paulus i ro ḇaḇebaryas. Ḇape fafisu suyemire, surakrok ker. Inja, Paulus danun su fa suna kakara oser ro fararur ḇesren faro Yahwe I.​—⁠Flp. 4:​2, 3.

12. Moḇsa kofasnai saswar manbekanaek faro naek srar koḇesi rai?

¹² Inja moḇsa kofasnai saswar manbekanaek faro naek srar koḇesi rai? Komambir pyum si ido, nari napyan fa kofawi si ma koswar si. Koḇebati kuker si kukro komam ro umur ma moḇ srama ro ya ḇa. Koswarepen, Yonatan ḇyeumur syadi taun ri 30 ro Daud i, mboi bisa ḇyebati fanam kuker i. Wamarisen bebati kuker snonggaku oso ḇeumur syadi ḇaido ḇebabo syadi ro Au ke? Wafrur na ido, ima waswar naek srar syakam.​—⁠1 Ptr. 2:​17.

13. Rosai ḇefnai fa na kofanam syadi faro snonggaku syakam ḇa?

¹³ Koswar naek srar koḇesi ido, ine kyurfasnai nari kofanam faro snonggaku ḇero sidang syakam ke? Oroḇa, rarirya ḇa. Kaku ḇae, nari napyan ḇe ko fa kofanam kuker snonggaku ḇemarisen faro rosai komarisen na kako. Yesus dor manwawan ḇyesi kam ḇe ”bati”, mboi iswar syadi Yohanes i. (Yoh. 13:23; 15:15; 20:⁠2) Fama, Yesus myanmin syadi Yohanes i ḇa. Rupa ra fafisu Yohanes ma ḇedar ḇyedi Yakobus suyor nasan ḇekaki ro Karajan Allah, Yesus ikofen faro su, ”Ḇoi mnuk kankain ro ḇar raku ma ḇar rasar yeja, mankun daya Yapok fa Yaḇuk i ḇa.” (Mrk. 10:​35-​40) Imnis ra Yesus i, kopok komanmin syadi awer bati ḇefanam kuker konsya monda. (Yak. 2:​3, 4) Kofrur rarirya ido, nari nafnai fa naek srar sya skain pyum ḇa ma sidang koḇedi ḇyeoser ḇa.​—⁠Yud. 17-​19.

14. Imnis anun ro Filipi 2:3 ya, rosai ḇefnoḇek ko insama kokara kopyum syadi ro ḇesesya ḇa?

¹⁴ Kofasnai saswar manbekanaek faro naek srar sya ido, nari komewer kosewar fa kopyum syadi ro ḇesesya. Koswarepen, Yonatan sneri idosam Daud i ḇa ma myam i ḇe mbroḇ ḇeyun nasan ḇyedi bur i ḇa. Kokame bisa kakfrur ra Yonatan i. Komewer komam naek srar sya ḇe mbroḇ koḇedi kukro sna samambraḇ syadi ro ko, mboi ’kuker randun sne komam min koḇesi sikaki syadi ro manggun ko’. (Wasya Filipi 2:⁠3.) Koswarepen naek srar oser-oser sakbuk fafnoḇek faro sidang kako. Kona sne ḇerun ido, nari komam roi ḇepyum ro naek srar koḇesi ma kofarkor ro si.​—⁠1 Kor. 12:​21-​25.

15. Rosai kofarkor ro Srar Tanya ma kina ḇyesi fawar sena?

¹⁵ Fafisu kosmai fafrowes ido, Yahwe syambraḇser ko roro naek srar ḇefasnai saswar ma ḇebuk fafnoḇek kofandun na. Komam fawar ro imbesrar oso ḇena romawa rikyor ḇero sup Amerika Serikat. Dakso Munara Sarawrow Internasional 2019 ”Saswar Ipok Imnai Ḇa!” Imbesrar ani snori Tanya. Fyawar ḇo doḇe, ”Nggek oto fa nggobur ḇe hotel, mura oto oso ifrar famfnom rawo ifrarpum oto nggoḇedi. Nggokame nggopyum monda, oso ḇyepar ḇa.  Inja, nggokandor kaku. Mura nggosae ma nggores ro nyan fadu ya. Fyoro ḇa, snonggaku oso dor inggo fa nggosun ro oto ḇyeja. Iso naek koḇedi insape dakbur ro munara ine kako. Derer monda ḇa ḇemam inggo. Naek srar ririm ḇeraker Swedia sakmam inggo kako. Imbesrar sya sforepen aya ma inai yesuya, inja nggoḇoryae ḇa! Yakofen ḇe si nggopyum monda, mboi simewer sibur inggo, ma sḇarek kuker inggo isof ro tim medis srama ma smam rosai nggofandun na. Ro fafisu ḇesamswen ḇeradine, nggomam kaku Yahwe saswar Ḇyena. Roi nggosmai nane nafrur fa nggoswar syadi naek srar sya, ma nggoswar ma nggoḇesyowi syadi Allah Yahwe I kako.” Waswarepen ras oso wasmai samswen ḇo naek srar sya sfasnai saswar kuker sisaramper Au ke?

16. Rosai ḇefnai fa kofasnai kaku saswar manbekanaek faro ḇesesya?

¹⁶ Kokarapan payamyum kosmai fyor kofasnai saswar manbekanaek faro ḇesesya. Kobuk sneprei ḇe naek srar sya fafisu sismai samswen. Allah kawasa Ḇyesi koine nari koḇeoser syadi wer. Kofasnai koma Yesus manfamyan ḇyesiko. Rarirya, snonggaku ḇena sne ḇenapes sya nari smam ma simarisen srama fa saksyom Yahwe I. Ipyum syadi wer, na kobuk sanandik ḇe Yahwe I, ’Kma sne ḇeḇye, ma Allah ḇebuk samambraḇ sne faro snonggaku’. (2 Kor. 1:⁠3) Iḇye kada kofasnai pdef saswar manbekanaek ine!