1. Moḇsa faya sawos ro munara sarawrow ro taun 1935 nawyae romawa babo oso?

RANDAK iwara sifawi Saksi-Saksi Yahwe sya ḇe Siswa-Siswa Alkitab. Imbeswa oso ḇena roma rikyor ma inai risuru, sakḇe Siswa-Siswa Alkitab kako. Eḇe sinan ro kina ine sufarkor pyum romawa suḇesi fa sifarmyan ḇe Yahwe I ma siso Yesus parenta ḇyena. Romawa oso ro kina ine dakḇebaptis ro taun 1926 fyor ḇyeumur taun ri 18. Raris Siswa-Siswa Alkitab ḇesesya, ro fafisu ani romawa ine kako daknan ma dakinem ro ras Munara Swarapepen ya. Ḇape fafisu ryower faya ḇejudul ”Raryur Ḇeba”, kakyar ḇyeja faro saneraro kankenem ya nfadwer. Ḇeyawos faya ani iso Naek J. F. Rutherford ro munara sarawrow ḇero Washington, D.C., Amerika Serikat ro taun 1935. Rosai Siswa-Siswa Alkitab sifawi ro munara anine?

2. Fawawi ḇebabo risai Naek Rutherford fyasnaiḇair ro faya ḇyeja?

² Naek Rutherford fyasnaiḇair ro faya ḇyeja mansei kaku ”fananjur ḇeba” (King James Version), ḇaido ”raryur ḇeba” (Terjemahan Dunia Baru), ḇeyap ro Fasasna 7:9 ya. Ro fafisu anya, Siswa-Siswa Alkitab soḇe raryur ḇeba ine kako nari sek ḇe nanggi. Mboi sima siḇese ro ḇesmai ramrem sya kukro sisouser kuf ḇa. Naek Rutherford byuk mnuk-mnuk ro Refo fa fyasnaiḇair raryur ḇeba ine Allah kyinfir si fa sikenem ro nanggi ḇa. Imbape sima domba-domba ḇese * ro Kristus nari ḇesasyarbur ”kandera ḇeba” ya ma sikenem fyoro ro supswan ine. (Why. 7:​14) Yesus doḇe, ”Yasma domba-domba ono ḇese kako fa sisya, ḇeyaksun ro padwar ine ḇa; domba ansi nari yunsi kako ma nari simnaf mkaren ayedi ma sikam senai oser kuker manfarandows oser.” (Yoh. 10:16) Domba-domba ḇese ansine siso Saksi-Saksi Yahwe ḇesouser nari ḇekenem fyoro ro Firdaus ro supswan ine. (Mat. 25:​31-​33, 46) Rwama kawos rariso fawawi ḇebabo ine nawyae Saksi-Saksi Yahwe ḇebor sya ma romawa babo insandi kako.​—⁠Mz. 97:11; Ams. 4:​18.

3-4. Ro munara sarawrow taun 1935 anya, rariso snonggaku risyaran insape sifawi saneraro sena, ma rosai ḇefnai ya?

³ Ḇeyun faya ro munara sarawrow ani dor ḇe kawasa ḇerama sya radine: ”Mansei ḇena saneraro fa ḇekenem fyoro ro supswan, yor fa mgores?” Naek oso fyar ḇo doḇe kawasa ḇerama sya se 20.000 ma bar ḇeba ro si sores ḇeri. Mura Naek Rutherford doḇe: ”Mgomame! Fananjur ḇeba!” Kawasa ḇerama ansi siryaḇ ma skaru naba. Snonggaku ḇeyores ansi sifawi kaku sima seḇekinfir fa sikenem ro nanggi ḇa. Sifawi sismai ramrem kuker Allah rur ḇesren Ḇyedi ḇa. Ro meserdi, sebaptis snonggaku ri 840 ma ḇebor ro si siso domba-domba ḇese sirya.

⁴ Fyor srower faya ani raposa, roma babo insandi ma snonggaku risyaran ḇesesya san mamami ma sinem anggur ro Munara Swarapepen ya wer ḇa. Naek srar ḇebor sakḇaḇir raris naek oso roi ikofen ya: ”Munara taun 1935 iso Munara ḇepupes yan mamami ma yinem anggur. Yafawi Yahwe rur ḇesren Ḇyedi ifnoḇek aya fa yaḇaḇir yakna saneraro fa yakenem ro nanggi ḇa, mboi yana saneraro fa yakenem ro supswan ma yakso warpu fa yafrur supswan ine ḇe firdaus.” (Rm. 8:​16, 17; 2 Kor. 1:​21, 22) Ro taun ani ḇe bo, raryur ḇeba ine barbor sedi dek syadi wer ma sfararur kayam kuker ḇesmai ramrem ḇekenem kaker ro supswan ine sya.

5. Moḇsa Yahwe myam snonggaku ḇeyan mamami ma ḇeyinem anggur wer ḇa ro Munara Swarapepen ya?

⁵ Moḇsa Yahwe myam snonggaku ḇeyan ma ḇeyinem wer ḇa ro Munara Swarapepen ro taun 1935 ḇe bo? Ma Saksi-Saksi Yahwe ḇero baboine ḇeyan ma ḇeyinem ro Munara Swarapepen kwar, mboi ḇarpur ya sifawi sima snonggaku ḇesmai ramrem sisya ḇa moḇsa serai? (1 Kor. 11:28) Sino sisya san ma sinem kukro sifawi mnis ḇaim saneraro sena. Mboi sifawi sisasar kwar, san ma sinem wer ḇa, ma sifarmyan pdef ḇe Yahwe ido, nari Yahwe imarisen si fa sakḇe domba-domba ḇese. San mamami ma sinem anggur wer ḇa mboi siso pdef Munara Swarapepen ani kukro sesyowi rosai Yahwe ma Yesus sufrur kwar faro si na.

6. Rosai Yesus iwan ḇe malaikat sya?

⁶ Kero wer kandera ḇeba ya ryama. Ḇape komam kaḇer rosai Fasasna fasal 7 ikofen ḇekur snonggaku ḇesmai ramrem ma raryur ḇeba ro domba-domba ḇese, na nsambraḇser ko.  Yesus iwan malaikat sya fa sidwarek wam rifyak ḇeyun farmakakok. Sidwarek wam ani insama iso awer ḇe supswan isof snonggaku Kristen ḇesmai ramrem syakam seḇekakop kwar ḇaido Yahwe myam sisouser kwar. (Why. 7:​1-4) Yesus naek ḇyesi ḇesmai ramrem ansine sfasnai sisouser kwar, inja na sakḇe raja ma imam fnoḇek i ro nanggi. (Why. 20:⁠6) Allah Yahwe I, Yesus i, ma malaikat sya na simarisen kaku smam snonggaku ri 144.000 ḇesmai ramren ansine, ḇarpur ya sismai ḇaḇyak sena ro nanggi.

7. Imnis wos ro Fasasna 7:​9, 10 ya, mansei Yohanes myam ya, ma rosai snonggaku ansi sifrur ya? (Mam sonin ḇero ḇarpon.)

⁷ Yohanes ikofen ḇekur raja ma imam ri 144.000 raposa, myam roi ḇepyum ḇese wer isoine raryur ḇeba sisasyarbur Armagedon ya. Snonggaku ri 144.000 sima siḇese ro snonggaku ḇeyaksun ro raryur ḇeba. Raryur ḇeba sima sibor syadi ḇaido sipok skor dandonek seja ḇa. (Wasya Fasasna 7:​9, 10.) Snonggaku ansine ”sisansun syatu ḇepyoper”, ine kyurfasnai smamwarek si fa sisren pdef ro dunya ḇeḇarḇor ine kwar ma sisouser faro Yahwe ma Yesus su. (Yak. 1:​27) Sar naba ḇo soḇe sismai fasaspar ro Yahwe I ma Rumgun domba ani, Yesus i, ma si kako suf srai ram ḇeḇair simarisen faro Raja Yahwe ryem kwar isoine Yesus i.​—⁠Mam kako Yohanes 12:​12, 13.

8. Raris fasfas ḇero Fasasna 7:​11, 12 ya, moḇsa ḇero nanggi sya na sḇaḇir rai?

⁸ Wasya Fasasna 7:​11, 12. Moḇsa ḇero nanggi sya na sḇaḇir rai fafisu smam raryur ḇeba ansi? Yohanes myam ḇero nanggi syakam siryaḇ kaku ma sisandik Allah. Simarisen kako fa smam ḇardadi anna ndarirya, fafisu raryur ḇeba sisasyarbur kandera ḇeba ma sikenem pdef.

9. Imnis wos ḇero Fasasna 7:​13-​15 ya, rosai raryur ḇeba sifrur ro baboine na?

⁹ Wasya Fasasna 7:​13-​15. Yohanes doḇe raryur ḇeba ansi ’spap syatu sena kwar ma sifrur na fa napyoper kuker Rumgun Domba ani rik ḇyena’. Ine kyurfasnai sna sneuser ḇesren ma Yahwe imarisen faro si. (Yes. 1:​18) Sima snonggaku Kristen ḇebuk kenem sena faro Yahwe I ma ḇebaptis kwar. Sfasnai kakyar faro Yesus farsarser marmar ḇyena ma sḇebati kuker Yahwe I. (Yoh. 3:​36; 1 Ptr. 3:​21) Snar Allah imarisen faro si, inja bisa ”sufarmyan ḇe Yahwe ras ma roḇ” ro supswan ine. Ro baboine, siso ḇefrur nabor syadi ma siryaḇ kaku fa sbaryas ma sbuk farkarkor kukro smam Karajan Allah ḇe roi ḇefandun kaku.​—⁠Mat. 6:​33; 24:14; 28:​19, 20.

10. Rosai raryur ḇeba sikyar kaku na, ma asas rosai simarisen fa smam nari ndarirya?

¹⁰ Raryur ḇeba ḇesasyarbur kandera ḇeba ya, sikyar kaku Allah nari kyadaunwarek si pdef kukro ’rum kruḇen ḇyedi isya rofandu snonggaku sya’. Domba-domba ḇese simarisen kaku fa smam Allah asas Ḇyenane ndarirya. Nane namnis raris asas ḇeyoḇe, ”[Allah] nari ipyos mkarui nakambur mka sena, snar marmarya isyaḇa kwar; sne ḇefafardun, kankanes, roḇa dafduf naisyaḇa kako.”​—⁠Why. 21:​3, 4.

11-12. (a) Imnis fasfas ḇero Fasasna 7:​16, 17 ya, barakas rosai nari raryur ḇeba sismai na? (b) Rosai ḇefnai fa domba-domba ḇese sakso Munara Swarapepen ya?

¹¹ Wasya Fasasna 7:​16, 17. Fafisu ine, Yahwe kawasa Ḇyesi sino sisya san mnis ḇa kukro sismai kumpan ḇesrow ḇa fa sbukikowes roi sfandun na ḇaido sna samswen snar sḇarek ro moḇ smamunmun ro na. Ḇesesya sisun si ro bui kukro kakyar sena. Ḇape, raryur ḇeba simarisen snar sifawi fyor dunya ḇeḇarḇor ine imgok kwar, nari sna roḇean nabor kaku ma sismai farkankin ḇebor ro Yahwe I. Fafisu Ibiris dunya ḇeḇarḇor ḇyedine ḇyeḇekakok, nari Yahwe kyadaunwarek raryur ḇeba ansi. Inja Yahwe masasor Ḇyedi kyur si ḇa. Kandera ḇeba imnai raposa, Yesus nari fyarkin snonggaku ḇefaspar kwar ansine ’ḇe war ḇebuk kankenem fyoro’. Kokarapan, raryur ḇeba ansine sna saneraro ḇepyum kaku, isoine bisa sikenem fyoro ma sipok simar wer ḇa!​—⁠Yoh. 11:⁠26.

¹² Domba-domba ḇese sikofen kasumasa kaku faro Yahwe I ma Yesus su snar sna saneraro ḇepyum kaku! Yahwe kyinfir si fa sikenem ro nanggi ḇa mboi Yahwe iswar si, imnis moḇ iswar ḇesmai ramrem sya raya. Raryur risuru ansuine sukam susandik Allah ma Kristus. Nyan oser ya iso siso Munara Swarapepen Kristus Marmar Ḇyedi.

13-14. Rosai ḇefnai fa snonggaku ḇesmai ramrem ma domba-domba ḇese srama siso Munara Swarapepen ya?

¹³ Taun ḇarpur ine kokor ido, oser ro snonggaku ri 1.000 ḇeyakso ro Munara Swarapepen san mamami ma sinem anggur. Ro sidang ḇebor na, ḇeyan mamami ma ḇeyinem anggur sya sisya ḇa. Ḇebor ḇerama ro Munara Swarapepen sismai saneraro fa sikenem ro supswan. Inja rosai ḇefrur fa srama sakso Munara Swarapepen Kristus marmar ḇyedi? Ine imnis ra roi ḇefrur fa korama ro munara fakawin ro bati koḇedi. Korama kakso kukro kofasnai saswar ma imbe kosaramper bati koḇedi. Rarirya kako, domba-domba ḇese srama ḇe Munara Swarapepen kukro imbe sfasnai siswar ma saksaramper Kristus ma snonggaku ḇesmai ramrem sya. Oso wer ido, sesyowi Yesus farsarser marmar ḇyedi kukro naiso ḇewar fa nari sismai kankenem fyoro ro supswan ine.

¹⁴ Oso wer ido, roi ḇefrur fa domba-domba ḇese srama sakso Munara Swarapepen iso snar sisouser Yesus parenta ḇyena. Fafisu Yesus ifrur randak Munara Swarapepen fnoḇek manfamyan ḇesouser ḇyesi, ikofen yoḇ si radine, ”Mkofrur rarirya fa mkoswarepen aya.” (1 Kor. 11:​23-​26) Inja domba-domba ḇese nari siso pdef Munara Swarapepen fafisu snonggaku ḇesmai ramrem sya sikenem kaker ro supswan ine. Mboi sor snonggaku ḇesesya fa sakso Munara Swarapepen fnoḇek si.

15. Rosai na kofrur fa kosandik Allah ma Yesus su ro Munara Swarapepen ya?

¹⁵ Ro Munara Swarapepen, kona swaf fa kosandik Allah ma Yesus rofyor kodisen ma konadi. Faya na sawos ro Munara Swarapepen judul ḇyeja iso ”Kofasnai Syowi Kasumasa faro Rosai Allah Yahwe ma Yesus Kristus Sufrur Kwar ḇe Ko Na!” Faya ani nari nafnoḇek ko fa koḇesyowi syadi Allah Yahwe ma Yesus su. Fafisu sirwas mamami ma anggur, nari koswarepen roi ansuine suḇeḇair ḇe Yesus baken ma rik ḇyena. Na kokarauser saswar Yahwe fyasnai ḇe ko kuker byuk Rumgun Ḇyedi fa imar fadwer ko insama kosmai kankenem ya. (Mat. 20:28) Mansei monda ḇeswar Kma koḇedi ro nanggi ma Rumgun Ḇyedi nari simarisen srama siso Munara Swarapepen.

16. Roi ḇemnis rosai snonggaku ḇesmai ramrem ma domba-domba ḇese sismai na?

¹⁶ Yahwe iswar snonggaku ḇesmai ramrem sya ma domba-domba ḇese. Yahwe imyof raryur risuru ansuine. Kofawi na ro? Yahwe byuk ḇaḇyak ḇemnis kaku isoine kankenem ro Roma Ḇyedi fa byak namuk si. Raryur suru ansuine suna saneraro ḇesisye. Imbape, sukam fandun fa susouser faro Allah ma Kristus. (Mz. 31:23) Ma kofarander awer, Allah rur ḇesren Ḇyedi nari isaramper kokame. Ine kyurfasnai koma snonggaku ḇesmai ramrem ke domba-domba ḇese ke, Yahwe byuk rur ḇesren Ḇyedi imnis rosai kofandun na oser-oser.

17. Snonggaku ḇesmai ramrem ḇekenem kaker ro supswan ine sya rosai siwaf kaku ya?

¹⁷ Snonggaku ḇesmai ramrem sya sismai saneraro fa sikenem ro nanggi fafisu sḇeaḇen ḇeri ḇa. Allah iso ḇebuk saneraro ani fa naisya ro sisnesna. Skarauser saneraro sena, senadiwarek na, ma simarisen kaku sismai sasuref sena ro nanggi. Sifawi mnis ḇaim nari baken ḇemnis rariso sismai ro nanggi ya. (Flp. 3:​20, 21; 1 Yoh. 3:⁠2) Rarirya mboi, siwaf kaku fa sisrow ḇeri Allah Yahwe I, Yesus i, malaikat sya, ma ḇesmai ramrem ḇesesya. Simarisen kaku fa sḇepoik kayam kuker si ro Karajan nanggi.

18. Domba-domba ḇese rosai siwaf kaku na?

¹⁸ Domba-domba ḇese siwaf kaku fa sikenem fyoro ro supswan ine. Iso roi snonggaku syakam simarisen kaku na. (Pkh. 3:​11) Siwaf kaku fafisu siso warpu fa sfadwer supswan ine ḇe firdaus. Smander kaku nari ras oso sḇawes rum faro manggunsi, sifrur yaf faro manggunsi, ma sfaduru pyum romawa sesi. (Yes. 65:​21-​23) Siwaf kako fa simbran farma ro supswan ine ḇesiper, ḇe bon na, sup yado, soren, ma imbe sfarkor nabor ro Yahwe ḇraur Ḇyena kam. Imboi roi ḇefrur fa siryaḇ syadi iso sifawi wis sena kuker Yahwe I nari nsambraḇ syadi.

19. Munara Swarapepen byuk swaf fa kofrur rosai, ma ras risai kofrur na ro taun ine?

¹⁹ Yahwe byuk kwar saneraro ḇepyum ro fafisu iyama faro manfamyan Ḇyesi kam. (Yer. 29:11) Munara Swarapepen Kristus marmar ḇyedi byuk swaf ḇe kokam fa kokofen kasumasa faro Allah ma Kristus ḇekur roi sufrur kwar insama kosmai kankenem fyoro ya. Inja Munara Swarapepen iso Munara ḇefandun kaku faro snonggaku Kristen fa siso na. Nari sifrur Munara ine ro ras Sabtu, 27 Maret 2021 fyor ori ya syun kwar. Ro sup ḇebor simkei fa sifrur munara ine, nari snonggaku ḇerama sya sibore. Ḇesesya sḇarek ro moḇ sidwarek fararur koḇena, mboi nari sakso. Ono sisya wer sifrur munara ine ro bui. Allah Yahwe, Yesus, malaikat, ma snonggaku ḇesmai ramrem ḇeyek ḇe nanggi kwar sikame siwaf kaku munara ḇefandun ine. Inja iḇye kada sidang nakam, raryur, ma ko oser-oser bisa kofrur Munara Swarapepen ine!