MUSEUM Bible Lands ḇero Yerusalem nya karuifas ḇeser fasfas sifrur ro fandu taun 700 ma 600 SM. Sun karuifas ine ro aḇyaḇ sbukrir snonggaku ḇemar sya ro moḇ fanam ḇe Hebron ro Israel. Fasfas ani ryok radine: ”Fafras kyur ḇe Hagaf romawa Hagav ro Yahweh Sabaot.” Rariso fasfas ine fyasnaiḇair rosai Refo ikofen na nkaku? Fasfas ani iser Allah snonsnon Ḇyedi sfas kuker Huruf Ibrani ḇekwar ri 4 YHWH. Ine fyasnaiḇair snonggaku ḇekenem ro fafisu sfas Refo ya, sifawi kwar ma sap snonsnon Yahwe ro ras ḇe ras. Smam mboi ro aḇyaḇ ani kako sisrow fasfas ḇese ḇefrur ya iso snonggaku ḇeyokef ma ḇesrowyae ro diwa sya. Sfasepen snonsnon sena ḇardi ma Allah snonsnon Ḇyedi kako ro ander aḇyaḇ ani.

Dr. Rachel Nabulsi ḇeraker University of Georgia ikofen kakara ḇyena ḇekur fasfas ḇekwar ani. Doḇe, ”Sfas ker snonsnon YHWH, ine nḇeḇair snonsnon ani fyandun kaku . . . Mnuk ro Refo ma fasfas ani nfasnai snonggaku Israel ma snonggaku Yehuda smam snonsnon YHWH ḇyefandun kaku ro kankenem sena.” Inja fasfas ani fyasnaiḇair Refo ima kyaku, kukro ro Refo sfas Allah snonsnon Ḇyedi ro huruf Ibrani ri 4 YHWH rarwan risyaran.

Wos ”Yahweh Sabaot” sfas ro karuifas ani, knam ya iso ”Yahwe ḇena sordade”. Ine nḇeḇair ro fafisu sfas Refo ya, sap ker snonsnon Allah monda ḇa mboi nasan ”Yahwe ḇena sordade” sap ker na kako. Ine fyasnai Refo ima kyaku kukro nasan ”Yahwe ḇena sordade” sfas na rarwan ri 283 ro Syap-Syap Ibrani. Ḇebor na naisya ro syap Yesaya, Yeremia, ma Zakharia.