FARKARKOR 1
Nari ’Koḇeananjar Roi Ḇepyum Ya Ḇaḇeri’
MNUK FARO TAUN 2022: ”Snonggaku ḇesewar Yahwe I sya nari seananjar roi ḇepyum ya ḇaḇeri.”—MZ. 34:10.
DOYA 4 ”Yahwe Iso Manfarandows Yedi”
ROI NA KOFARKOR *
Daud ḇyaḇir snar ’ḇyeananjar roi ḇepyum ya ḇaḇeri’, syadi wer ro fafisu ḇesamswen na (Mam syos ḇe 1-3) *
1. Fafisu ḇesamswen risai Daud ismai na?
DAUD isya ifrar ibur snar Saul raja Israel ro fafisu ani, ḇyesewar fa imbe myuni. Inja ras oso, fafisu Daud fyandun roḇean na, ryama isrow imam Ahimelekh ro kota Nob, ma dor mamami ririm monda. (1 Sam. 21:1, 3) Ḇarpur ya, Daud ma sordade ḇyesi siyokef ro abyaḇ oso. (1 Sam. 22:1) Rosai ḇewar fa Daud ismai fafisu ḇeradine?
2. Rosai Saul ifrur ya inja ifrur samswen manggundi? (1 Samuel 23:16, 17)
2 Saul imarisen Daud i ḇa kaku snar snonggaku ḇebor simarisen ma snanen Daud i kukro ro mamamun ḇebor ḇyemenang ker. Saul ifawi kako snar Yahwe kyinfir Daud kwar ḇe raja fa fyadwer i snar isouser ḇa. (Wasya 1 Samuel 23:16, 17.) Ḇape fyor ani, Saul ḇye raja kaker ro Israel. Inja na nya sordade ḇeba kaku ma ismai sonem ro snonggaku sya inja nafrur fa Daud ifrar ibur. Roi ḇeḇejadi ine, Saul kyara bisa idwarek Yahwe marisen Ḇyena fa ḇye Daud i fa ḇye raja ke? (Yes. 55:11) Refo ikofenḇair roi ine ḇa. Ḇape roi ine, na nafrur samswen Saul manggundi, snar mansei ḇepampum Yahwe nari ḇyeḇekafyo!
3. Rofyor Daud ismai fafisu ḇesamswen moḇsa myam na rai?
3 Daud ima snonggaku ḇena sne ḇerun rirya. Ḇyesewar marmar kaku fa ḇye raja Israel ḇa. Yahwe iso ḇekinfir i ḇe raja. (1 Sam. 16:1, 12, 13) Ḇape Saul iso ḇemam Daud i ḇe mbroḇ ḇyedi. Daud ismai roi ḇemun rariryano, byuk sasar ya ḇe Yahwe I ḇa. Ikako isnurem ḇa fyor ḇyeananjar roḇean ḇaido iyokef ro abyaḇ dori. Imboi ro abyaḇ ani imbude fyas doya sanandik ḇepyum oso ḇeser wos ḇero tema koḇedine: ”Snonggaku ḇesewar Yahwe I sya nari seananjar roi ḇepyum ya ḇaḇeri.”—Mz. 34:10.
4. Fakfuken rosai monda nari kawosna ma rosai ḇefnai ya?
4 Ro baboine, Yahwe manfamyan Ḇyesi kako seananjar roḇean ma roi ḇese sfandun na, * syadiwer ro fafisu pandemi ine. Snar kandera ḇeba fyanam kaku kwar, fafisu koḇedine nari syamswen syadi. (Mat. 24:21) Inja kirine, mgorama kawos fakfuken rifyak nane: Rosai Daud wos ḇyena ḇekofen ”nari seananjar roi ḇepyum yaḇaḇeri” ine kyurfasnai ḇe? Rosai ḇefnai fa komarisen faro roi kosmai na? Rosai ḇefnai fa kokyar kaku snar Yahwe nari kyadaunwarek ko? Ma rariso kofasos manggun ko ro kirine faro samswen na ḇerama ya?
”NARI YAḆEANANJAR ROI RISAI YA ḆAḆERI”
5-6. Rariso Mazmur 23:1-6 ifnoḇek ko fa kofawi pyum Daud wos ḇyena snar Allah manfamyan Ḇyesi nari ”seananjar roi ḇepyum ya ḇaḇeri”?
5 Rofyor Daud ikofen nari Yahwe manfamyan Ḇyesi ”seananjar roi ḇepyum ya ḇaḇeri” wos ine kyurfasnai ḇe? Infa kofawina, komam Mazmur ḇe-23. Mazmur ine kako Daud iso ḇefasi ma iser wos ḇemnis rarirya. (Wasya Mazmur 23:1-6.) Ro mnuk ḇerandak, ikofen, ”Yahwe ima Manfarandows yedi. Nari yaḇeananjar roi risai ya ḇaḇeri.” Ramnai, Daud dap roi ḇefandun kaku ḇeḇeso, isoine barakas ismai na snar ikyar faro Yahwe, Manfarandows ḇyedi. Ikako myam Yahwe fyarkini ”ro nyan ḇekaku” ma Yahwe kuker souser isaramperi ro fafisu imarisen ḇaido fyor ḇyesusa ya. Daud ifawi rofyor isya ro ”moḇ ḇeabris” Yahwe Ḇyedi, nari kenem ḇyedi imkeiburo samswen na ḇa. Inja ro ras ono ido, ḇyaḇir ḇyesanekar, imnis ra isya ”ro wandow ḇepampan kaku”. Fyorno ido, fandun fa myamunmun kuker mbroḇ ḇyesi. Ḇape, snar Yahwe iso Manfarandows ḇyedi, inja Daud imkak ḇa.
6 Inja, rosai ḇekurfasnai ro Daud wos ḇyena nari ”seananjar roi ḇepyum ya ḇaḇeri”? Daud nya roi ifandun nakam insa fyanam pdef ḇe Yahwe I. Ma marasrisen ismai na ndrama ro arasai ḇaido roebor ismai na ḇa. Snar Daud imarisen faro rosai Yahwe fyasos ḇe i na. Roi ḇefandun kaku faro i isoine barakas ma kadaunwarek ro Allah I.
7. Ro Lukas 21:20-24, fafrowes risai snonggaku Kristen ḇero Yudea ro abad randak sismai na?
7 Ro Daud wos ḇyena, kofarkor snar kopok kofakapon arasai na awer. Inja, na komarisen faro arasai kosmai na. Mḇape, napok nefandun syadi ro kenem koḇena ḇa. Iso snonggaku Kristen ḇeḇarek ro Yudea ro abad randak sḇaḇir ya. (Wasya Lukas 21:20-24.) Yesus byuk swarapepen ḇe si kwar doḇo rofyor ’smam sordade-sordadesya saiwarek Yerusalem ido’, fandun fa ”sifrar sibur be bon” insama simkei. Ḇape, ine kyurfasnai fandun fa sifrur roi nabor syadi wer. Ro artikel Menara Pengawal taun 1999 fyasnaiḇair, ”Sibur yaf ma rum, ma siryur arasai ro rum sena ḇa. Sna kakakyar snar Yahwe nari kyadaun ma isaramper si, sifakapon ḇaḇesamsyom Yahwe Ḇyedi robo samswen nakam imbude smam ḇe roi ḇefandun kaku.”
8. Rosai kofarkor ro farfyar snonggaku Kristen ḇero Yudea sya?
8 Rosai farkarkor ya faro ko? Artikel Menara Pengawal ani ikofen kako snar imbude nari kosmai fafrowes ḇerarirya kako, ma moḇ komam farawrowes ani nfasnaiḇair na ḇefandun syadi iso arasai faro kankenem koḇena ke ḇaido Allah asas Ḇyena faro kankenem koḇena. Ramnai, artikel ani ikofen wer, ”Rofyor kofrarbur, nari koḇekandera fafayaḇa ma kananjar. Iḇye kada kofasos kwar fa kofrur rosai monda, imnis ra min koḇansi ro abad randak ḇefrarbur ro Yudea sya.” *
9. Paulus anun ḇyedi faro snonggaku Ibrani nbuk kakakyar ḇe Au faro roi risai?
9 Ausya kwarauser snonggaku Kristen ansi sneḇaḇir sena ke? Na marḇak ḇe si fa sibur roi snana ma sibur ḇe moḇ ḇebabo na. Fandun fa sikyar snar Yahwe nari fyamfon fandun rasras sena. Ḇape kakuya, sfasos si kwar faro fafrowes ro kakyar sena ine. Taun ririm fyor sordade Romawi sya siyarwarek Yerusalem ḇaim, Manwawan Paulus byuk anun ḇefandun kaku ine kwar faro snonggaku Ibrani sya doḇe: ”Mkormomen pipi awer, mboi mkokenem imnis kuker rosai isya faro mko. Snar Allah ikofen kwar, ”Nari yarir aw ḇa ma nari yabur aw ḇa.” Rarirya kuker kakyar kokofen: ”Manseren ifnoḇek aya, inja nari yamkak ḇa. Snonkaku oso ḇaḇeri nari ifrur roi oso maḇe aya!” (Ibr. 13:5, 6) Snonggaku Kristen ḇeso Paulus anun ḇyedine kwar na napyan syadi ḇe si fa sifrur fararwe ro kankenem sena insama napyan ro moḇ sḇarek baboya. Sikyar snar Yahwe nari fyamfon fandandun rasras sena. Kirine, Paulus wos ḇyena bisa nbuk kakyar ḇe ko kako.
NARI KOMARISEN KUKER ROI KOSMAI NA
10. Farkarkor rosai Paulus irwas faro koni?
10 Paulus byuk anun ḇemnis rarirya faro Timotius i, ma anun ḇyena ine faro ko kako. Fyas ḇo doḇe, ”Rofyor roḇean ma sansun naisya, namnis kwar.” (1 Tim. 6:8) Ine kyurfasnai kopok fa kan roḇean ḇeyanggir, kosmai moḇ ḇepyum ḇaido kokoḇes sansun ḇebabo awer ke? Rarirya ḇa. Paulus wos ḇyena kyurfasnai fandun fa komarisen kuker rosai monda kosmai na. (Flp. 4:12) Inema roi ḇefrur fa Paulus fyarmku fyor ismai fafisu ḇesamswen sai monda. Koswarepen, inema roi ḇemaeja kaku kosmai na ro arasai kosmai na ḇa, ḇape wis koḇena kuker Allah koḇedi.—Hab. 3:17, 18.
Er Israel ’seananjar roi oso ḇaḇeri’ fafisu simbranyaryar swaf taun ri 40. Komarisen faro rosai kosmai ro kirine ke? (Mam syos ḇe 11) *
11. Ro Moses wos ḇyena faro er Israel sya, rosai kofarkor ro komarisen faro roi kosmai na?
11 Yahwe ifawimnis kaku rosai kofandun na, ma imbude naḇese kuker rosai kokara kofandun na. Mam pan rosai Moses ikofen faro er Israel fyor siyar fafisu swaf taun ri 40: ”Yahwe Allah mgoḇedi ḇyebarakas rosai mgofrur kam kwar na. Ifawi kaku marandan mgoḇena ro moḇ ḇeursba ḇemkei ine. Ro swaf taun ri 40 ine, Yahwe Allah mgoḇedi ryous mgo ḇesya kwar, ma mgoananjar roi oso ḇaḇeri.” (Ul. 2:7) Ro swaf taun ri 40 ani, Yahwe byuk manna ḇe si fa san. Ma sansun sisansun na fyor sisae ro Masir namuk ḇa. (Ul. 8:3, 4) Imbude snonggaku Israel ono skara snar roi Yahwe byuk nane nasrow ḇaim. Ḇape, Moses byuk swarapepen ḇe si snar roi sfandun nakam neḇefamfon kwar. Kirine, Yahwe byuk ḇe ko kako rosai kofandun na. Imbape roi byuk nane imbude rya nasyadadi ḇa ḇaido nabor ḇa, fandun fa komarisen faro roi kosmai nane. Nari imarisen rofyor kofasnai kasumasa koḇena pdef ma kofawi barakas kosmai na ndrama roi I.
WAKYAR KAKU SNAR YAHWE NARI KYADAUNWAREK AU
12. Rosai ḇefasnaiḇair snar Daud ikyar kaku faro Yahwe, ḇape faro manggundi ḇa?
12 Daud ifawi snar Yahwe ima isouser ma iswar kaku faro snonggaku ḇeswar I sya. Rofyor fyas Mazmur ḇe-34, kenem ḇyedi isya nesamswen kaku. Ḇape, snar kakyar ḇyena, Daud rya myam ”Yahwe malaikat Ḇyesi skainyaryar” i. (Mz. 34:7, fasfas kasun) Daud imbude kyarauser Yahwe malaikat Ḇyesine simnis ra sordade ḇekain ma ḇemamwarek fa sfasos kwar fa smun mbroḇ ḇyesi. Kakuya, Daud manggundiso sordade ḇebri kaku, ma Yahwe ikako ḇyeasas kwar fa ḇye ifa ḇye raja. Daud ikako ḇyekir fa byuk ali-ali ma sumber. Rarirya, ikyar faro manggundi ḇa mboi faro Allah. (1 Sam. 16:13; 24:12) Daud ikyar kaku Yahwe malaikat Ḇyesi nari ’sfaspar snonggaku ḇesyowi I’. Kakuḇae, koro kirine na kokyar ḇa faro kadaun kosmai kuker mukjizat na. Snonggaku ḇekyar Yahwe I bisa na simar. Ḇape, kofawi na kaḇakḇok ma kankenem fyoro isya.
Fafisu kandera ḇeba ya, Gog ro Magog imbude ḇyensewar fa imbe myun ko ro moḇ koḇena. Ḇape, kosmai sneprei snar kofawi Yesus ma malaikat ḇyesi sifawi roi ḇejadina ma nari sifnoḇek ko. (Mam syos ḇe 13)
13. Rosai ḇefnai fa Gog ro Magog nari skara napyan ḇe si fa smun ko, ḇape rosai ḇefnai fa komgak awer? (Mam sonin ḇero ḇarpon.)
13 Kero wer, nari kosmai fafrowes ro kakyar ya. Gog ro Magog, isoine raryur ro er sya, nari fasaw smun Allah kawasa Ḇyesi. Ma imbude nari koḇaḇir kenem koḇena isya ro samswen kaku. Fyor roi anna nejadi, fandun fa kokyar kaku snar Yahwe nari fyaspar ko. Faro er-er sya, rya komnis ra domba ḇesambraḇ ḇa ma oso ḇaḇeri ḇekadawunwarek ko ḇa. (Yeh. 38:10-12) Kona romamun ḇa, ma ko kako kosmai farkarkor oḇa kuf romamun. Inja, nari skara napyan fa sikafyo ko, imḇape Allah sordade malaikat Ḇyesi skainyaryar ko ma sisya sores fa sibriwarek ko. Rosai ḇefnai fa er sya smam si ḇa? Snar koma koḇese, sima sikyar faro Yahwe I ḇa. Na skandor fyor Allah sordade malaikat Ḇyesi smamunwarek ko!—Why. 19:11, 14, 15.
KOFASOS KORO KIRINE ḆERI
14. Rosai monda na kofrur kaku ro kirine insama kofasos ko faro fafrowes nari ḇerama ya?
14 Rosai na kofrur ro kirine insama kofasos ko faro fafrowes nari ḇerama ya? Ḇepon ya, komam kaku snar arasai na nḇe roi ḇefandun kaku awer ro kenem koḇena, snar ras oso nari kofrar koḇur roi anna kam. Ko kako fandun fa komarisen faro rosai kosmai na, koswarepen roi ḇefrur kaku fa koḇeaski iso wis koḇena kuker Yahwe I. Fyor komambir pyum kaku Allah koḇedi ido, nari kokyar syadi snar syambraḇ fa kyadawunwarek ko fafisu Gog ro Magog imbe myun ko.
15. Farfyar rosai monda ḇefrur Daud ikyar kaku nari Yahwe ifnoḇek i ḇesya kwar?
15 Mam pan kada roi ḇese kofarkor ro Daud insama kofasos ko faro fafrowes na ḇerama ya. Daud doḇe, ”Ḇaḇirpan ma mam snar Yahwe ima ipyum; snonggaku ḇefadiren faro I ḇyeaski.” (Mz. 34:8) Ro wos anna, bisa kofawi rosai ḇefnai fa Daud ikyar kaku snar Yahwe bisa ikyari. Daud ima ikyar ker ḇe Yahwe I kwar, ma Yahwe ifrur fyafko raso ḇaḇeri. Fafisu Daud byabo kaker, isya raso myamunmun kuker Goliat i, sordade Filistin oso ḇebamantar ma syambraḇ kaku. Daud ikofen faro i, ”Rasine kako, Yahwe nari byuk ḇe au ro bramin ayedi.” (1 Sam. 17:46) Ma kaku iso ḇeḇejadi. Ḇarpur ya, fafisu Daud ifarmyan ḇe Raja Saul, raja ḇyesewar kaku kwar fa myuni. Ḇape, ”Yahwe ryous Daud i”. (1 Sam. 18:12) Snar rodine Daud ḇyaḇir Yahwe fafnoḇek Ḇyena ker. Inja, Daud ikyar kaku Yahwe nari ifnoḇek i ro samswen ismai na.
16. Ro fafisu risai monda komam Yahwe ḇaḇenaḇye Ḇyena?
16 Kokyar pdef faro Yahwe ro kirine ido, nari kokyar kaku snar syambraḇ fa fyasparbur koro fafisu iyama. Fyorno ido, imbude fandun fa kor izin ro ḇebukor koḇedi insama koso munara sarawrow wilayah ḇaido sarawrow regional. Ḇaido imbude kor fararwe ro oras kofararur na insama bisa koso fananjur nakam ma koso ḇaḇebaryas na pdef. Imbape imbe kofrur roi ani, kofandun kakakyar ma kokyar kaku faro Yahwe I. Rariso fyor fararyor koḇena spampum na ma sisasyar ko? Na kokyar snar Yahwe nari fyamfon fandandun koḇena rasras ke ma ipok ibur ḇaido ḇyefnder ko ḇa ke? (Ibr. 13:5) Waswarepen snar Yahwe ima isouser. Naek srar ḇebor ḇefarmyan ro oras nakam smam ro manggunsi kwar rariso Yahwe ifnoḇek si ro fafisu ḇesamswen na.
17. Mnuk koḇedi faro taun 2022 ine rosai, ma rosai ḇefnai fa ine isrow kaku?
17 Snar Yahwe ryous ko, kopok komgak awer kuker rosai nari ḇeḇejadi na. Allah koḇedi nari ipok ibur ko ḇaḇeri, rofyor kosewar ḇepon Karajan Ḇyedi. Ro kirine, fandun fa kofasos manggun ko faro fafisu ḇesamswen nari ḇerama ya ma nari kokyar kaku snar Yahwe nari ifnoḇek ko ḇesya kwar. Insama nbuk swarapepen snar roi ani nfandun kaku, Raryur Naek Ḇefarkin skinfir Mazmur 34:10 ḇe mnuk taunan koḇedi faro 2022: ”Snonggaku ḇesewar Yahwe I sya nari seananjar roi ḇepyum ya ḇaḇeri.”
DOYA 38 Nari Ifrur Au fa Wasambraḇ
^ Mnuk faro taun 2022 ine sun naro Mazmur 34:10: ”Snonggaku ḇesewar Yahwe I sya nari seananjar roi ḇepyum ya ḇaḇeri.” Yahwe manfamyan ḇebor ḇesouser Ḇyesi sikenem kuker ananjar. Inja wos ”nari seananjar roi ḇepyum ya ḇaḇeri” ine kyurfasnai ḇe? Ma rariso mnuk ine nfasos ko faro fafisu ḇesamswen na ḇerama ya?
^ Mam ”Pertanyaan Pembaca” ro Menara Pengawal 15 September 2014.
^ Mam Menara Pengawal 1 Mei 1999, ram 19.