Fakfuken Ro Ḇewasya
Fandun fa snonkaku Kristen sna senjata api, imbude pistol ḇaido senapan, fa sḇuki kadaunwarek si ke?
Snonkaku Kristen siso wos farkin ro Refoya, rofyor sun snemuk fa sikadaunwarek mankunsi. Farkankin ine fyasnaḇair snar na snonkaku Kristen sḇuk senjata, raris pistol, senapan, ḇaido senjata api ḇesena fa sikadaunwarek mankusi ro snonkaku ḇesesya ḇa. Komam rosai ḇeḇewar nane:
Faro Yahwe I, kankenem snonkaku iso roi ḇesren. Manḇefas mazmur, Daud, fyas kuker Yahwe, ”Ro au kankenemya isya.” (Mazmur 36:9) Inja, rofyor snonkaku Kristen oso dun snemuk fa kyadaunwarek mankundi ḇaido roi ḇebor nyana, myampyum insama roi ifrurna nun marmar ḇaido nafnai nyaki rik faro snonkaku ḇesesya ḇa.
Kakuḇae, roi risai monda snonkaku oso ḇyuk fa ḇyuki kadaunwareki na bisa nafnai nyaki rik. Imbape, senjata api isya ido, na napyan fa ḇyukimun snonkaku oso, rofyor imbe myuni ḇaido pyam sasar i. * (Mam fas-fas kasun ro sop.) Ma kako, snon ḇemamun ani iwarai kwar. Inja rofyor senjata api ya isya, roi ḇeḇyeḇa bisa nejadi ma na ono sisya bisa sḇeḇemun.
Ro roḇ rofyor Yesus imar ḇaime, dor manfamyan ḇyesi fa sun sumber na. Ḇape, fandun ya faro sikadaunwarek mankunsi ḇa. (Lukas 22:36, 38) Imbape, Yesus imarisen fa ḇyuk farkarkor ḇefandun kaku besi: Manfamyan ḇyesi fandun fa sfasna rarmomen ḇa, iba syadiwer rofyor sisya kuker snonkaku ḇeyun senjata sya. (Lukas 22:52) Rofyor Petrus kyaruk Imam Beba manfamyan ḇyedi kuker sumber, Yesus ikofen ḇe Petrus i, ”Swower sumber ani.” Ramnai, Yesus ikofen kako wos farkin oser faro snonkaku Kristen ḇero baboine, ”Mansei ḇefnak kuker sumber nari ryo kuker sumber.”
Raris ḇeḇeḇair ro Mikha 4:3, Allah kawasa ḇyesi ”nari skam sumber-sumber sena ḇe akif ma bom-bom sena ḇe inoi bekarakruk.” Snonkaku Kristen ḇekaku sifawisi snar sikenem kuker aski. Siso parenta-parenta Allah ḇyuk faroro manwawan Paulus i, isoine ”mkomunsu awer na kuker ḇarḇor” ma kako ”mkosewar fa mkokenem kuker aski faro snonkakusya kam”. (Roma 12:17, 18) Paulus ismai samswen ma kako ro ”manfasyar ḇeyun raro” raryano, ipok ibur wos farkin ro Refoya ḇaḇeri fa ḇyuk kyadaunwareki. (2 Korintus 11:26) Imbape, ikyar faro Allah ma ifawi snar wos farkin bero Refo nama naser fawinanem ma ”napyum syadiburo roi ḇebor sḇukimamun na”.
Faro snonkaku Kristen, kankenem ya ḇyemaeja syadiburo arasai na. Kofawi snar kankenem snonkaku oso ”ḇyeknam ro nana ḇyenaḇa.” (Lukas 12:15) Inja, rofyor manfasyar ḇekif senjata oso kawos pyum kwar ḇe i boi imewer ido, fandun fa koso Yesus ananun ḇyena, ”Mkomunsu awer snonkaku ḇefrur ḇarḇor faro mko.” Ine fyasnaḇair na korir fa dun rosai monda imarisen na. (Matius 5:39, 40; Lukas 6:29) * (Mam fasfas kasun ro sop.) Kakuḇae, ḇepyum kaku iso koiso ḇesma roi ḇeradine ḇa. Ḇape, ine na kobinkwanburna rofyor koso ananun ro Refo, isoine infa kararer awer kuker roi ḇeḇor ḇero supswan ine. (1 Yohanes 2:16) Osower ido, ko kako na kona samswenḇa rofyor ḇebarek ro ris koḇedi sya sifawi snar koiso Saksi Yahwe ḇeswar aski.
Snonkaku Kristen skarauser sneuser ro snonkaku ḇesesya. (Roma 14:21) Naek ma srar ribeso sisya sikandor, ḇaido iba syadiwer skarkar rofyor sifawi snar min Kristen oso nya senjata api fa ḇyuki kadaunwareki ro snonkaku ḇesesya. Imbude sasoser ḇero moḇya ḇyuk hak fa kona senjata api. Ḇape snar koswar naek srar sya, inja na kofrur roi oso kofawi na ḇefrur fa sikarkar ḇa.
Snonkaku Kristen simarisen sḇefarari ḇepyum faro snonkaku ḇesesya. (2 Korintus 4:2; 1 Petrus 5:2, 3) Rofyor snonkaku Kristen oso nya senjata api fa ḇyukikadaunwarek mankundi ro snonkaku ḇese sya ido, penatua sya na sḇuk ananun ro Refo ḇe i. Ḇape dun snemuk fa nya pdef senjata api ya ido, na ḇyefarari ḇepyum ḇa. Inja, na pok fa dakna fararur ḇaido fakamaman rosai monda ro sidang ḇa. Roi ine kako faro snonkaku Kristen oso rofyor nya fararur bewan i fa dun senjata api na. Ḇepyum syadi ya naek ani syewar fararur ḇebabo. *—Mam fas-fas kasun ro sop.
Snonkaku Kristen oso fandun fa dun snemuk ro mankundi kuker nyan kyadaun mankundi, kina ḇyesi, ma arasai ma kuker fararur kyinfir na. Rofyor ifrur snemuk, fandun fa iso kaku wos farkin ro Refo ya. Allah koḇedi befawi nananem kaku ḇyuk beko wos farkin nane snaro iswar ko. Iso ḇefnai fa snonkaku Kristen ḇefanam kaku kuker Yahwe sya skinfir fa sna senjata api ḇa fa sḇukikadaunwarek mankunsi ro snonkaku ḇese sya. Sikyar kaku ḇe Allah ma sisouser wos farkin ro Refo, insape na simkei kaku isof fyoro-fyoro.
Ro fafisu kandera ḇeba ya, Snonkaku Kristen sya na sikyar ma sisewar fa sikadaun mankunsi ḇa
^ par. 3 Snonkaku Kristen oso bisa dun snemuk fa nya senapan oso fa ḇyukimaraf aiwan ro sup fa dan. Ḇaido, ḇyuki kadaunwareki ro aiwan ḇeyan ḇepek. Ḇape rofyor senapan ani ḇyuk naḇa ido, fandun fa isae pelor ḇyena, ḇaido bisa iper senjata ani fa neoser-oser, ma ryirna ro moḇ ḇese ma kyarwarekna. Ro moḇ pamarenta idwarek fa sna senjata api na ido, snonkaku Kristen fandun fa siso sasoser ḇero moḇ ya.
^ par. 6 Infa kofawi nyan ḇebor fa kokadaunwarek ko ro pemerkosaan ido, wasya ro artikel ”Cara Mencegah Pemerkosaan” ro Sedarlah! 8 Maret 1993.
^ par. 2 Infa wasma informasi nabor syadiwer kuker pekerjaan yang mengharuskan membawa senjata, mam Menara Pengawal 1 November 2005, ram ḇeḇe 31; ma 15 Juli, 1983, ram ḇeḇe 25-26.
