1-3. (a) Fafisu risai imbude Mazmur 147 ine ḇyeḇefas? (b) Rosai nari kofarkor ro Mazmur 147?

FYORNO ido komanen snonkaku oso snar wos ḇyena ḇaido roi ifrurna. Inja, ko kako nari komarisen kosandik Yahwe I snaro ḇaḇepapoik ḇyeja. Ine nfasnaḇair ro braur ḇepyum kaku ḇyena. Ko kako komarisen kosandik I snar ḇyuk Rumkun ḇyedi kwar ḇe farsarser snar iswar kaku ko.

² Rofyor kowasya Mazmur 147, nasnaibos ḇeko snar manḇefas mazmur imarisen kaku isandik Yahwe I. I kako imarisen insama ḇesesya saksandik Allah kuker i.—Wasya Mazmur 147:1, 7, 12.

³ Kofawimnis ḇa mansei ḇefas Mazmur 147. Imbude ikenem ro fafisu snonkaku Israel skaḇer ḇe Yerusalem rofyor Yahwe fyaspar si ro ḇaḇewanan ro Babilon. (Mazmur 147:2) Manḇefas mazmur isandik Yahwe I snar kawasa Ḇyesya kirine bisa sisyom Yahwe I ro mnu marin sena. Ramnai, manḇefas mazmur dap roi ḇefnai ḇesewer fa kosandik Yahwe I. Rosai rirya? Ma rosai ḇefnai fa  kokofen ”Haleluyah!,” ḇaido ”Sandik faro Yah!”?—Mazmur 147:1, fas-fas kasun ro sop.

4. Rofyor Raja Kores imkei Israel ro Babilon, rariso sneḇaḇir sena ma rosai ḇefnai ya?

⁴ Kwarapan kada rariso sneḇaḇir snonkaku Israel sya rofyor sewanan si ro Babilon. Rodiwa snonkaku Babilon sya sanonef si ma sikofen, ”Mkodisen maro inko doya Zion oso.” Ḇape, simewer sidisen snaro Yerusalem moḇ smanen kaku ani simkoki kwar. (Mazmur 137:1-3, 6) Sesanekar fafayaḇa, inja sifandun fafnoḇek. Ḇape raris Allah Wos Ḇyena, Yahwe nari ifnoḇek si. Nyan ya rariso? Raja Kores ḇerama ro Persia kyafyo Babilon. Ramnai ikofenwer, ”[Yahwe] iwan ayafa yabawes rum oso faro I ro Yerusalem.” I kako ikofen ḇe snonkaku Israel sya, ”Mansei monda rofandu mko ro kawasa ḇyesi, Yahwe, Allah ḇyedi, ryous i. Iḇye kada ryamura.” (2 Tawarikh 36:23) Wos ine nun sneprei kaku ḇe snonkaku Israel ro Babilon sya!

5. Rosai manḇefas mazmur ikofen kuker samambraḇ Yahwe ḇyeja fa ḇyuk pararei?

⁵ Yahwe ḇyuk sneprei faro er Israel mondaḇa, ḇape faro snonkaku Israel oser-oser kako. Ro kirine Yahwe ifrur rarirya kako. Manḇefas mazmur fyas snar Allah ”Ḇyuk pararei faro snonkaku ḇesanekar, ma pyarkepen ḇar ḇedufna.” (Mazmur 147:3) Rofyor koduf ma koḇoryae ido, kokyar kaku Yahwe nari myamfaduru ko. Yahwe imarisen ḇyuk sneprei ḇeko ma pararei ro sne koḇena. (Mazmur 34:18; Yesaya 57:15) I kako ḇyuk fawawinanem ma samambraḇ ḇeko insama kofrurmnis kaḇer samswen rosai monda kosmana.—Yakobus 1:5.

6. Rosai fainda kosma ro Mazmur 147:4? (Mam sonin ro randak artikel ine.)

⁶ Ramnai manḇefas mazmur myam ḇe farsyos ma ikofen Yahwe ”iwof barbor ro maksya” ma ”dor sikam kuker sisnosna oser-oser”. (Mazmur 147:4) Manḇefas mazmur bisa myam maksya, ḇape barbor sena ifawi na ḇa. Kirine, ilmuwan sya sifawi snar miliaran maksya sisya ro galaksi koḇedi. Ma trilyunan galaksi sisya ro farsyos ḇeba ine! Snonkaku sna samambraḇ ḇa fa siwof barbor ro maksya. Ḇape, Manbedaw koḇedi bisa iwof si. Iba syadiwer, dor sikam kuker sisnosna oser-oser. (1 Korintus 15:41) Maksya monda Allah ifawi moḇ skain rona, inja I kako na myamḇir kaku ko. Ifawi kosya rodiso, rosai koḇaḇirna, ma rosai kofandunna.

7, 8. (a) Rosai Yahwe ifawi kuker konya? (b) Buk contoh ḇefasnaḇair Yahwe saswar ḇyedi.

⁷ Yahwe ifawi samswen kosmana, ma nya samambraḇ fa ifnoḇek ko. (Wasya Mazmur 147:5.) Imbude kwara samswen  wasnama marḇak kaku ma jadi fa wakamarna ḇa. Ḇape, Allah ifawi ḇaḇeraryarḇa koḇena, ma ”iswarepen snar koine saprop”. (Mazmur 103:14) Ko kako konapesḇa, inja ras ḇe ras kofrur sasar ker, ma na nafrur fa koraryaḇ ḇa. Imbude kofafko snar kawos sasar, marisen ḇesasar koḇena, ḇaido komambayair snonkaku ḇesesya. Kakuḇae, Yahwe nya sasar osoḇaḇeri, ḇape ifawi kaku sneḇaḇir koḇena.—Yesaya 40:28.

⁸ Ras oso wakḇaḇir Yahwe bramin ḇyedi ifnoḇek Au ro fafisu ḇesamswen wasmana ke? (Yesaya 41:10, 13) Roi ine iso perintis oso ḇenirḇe Kyoko ismana. Ḇyaḇir ḇyesanekar rofyor fyarmyan ro moḇ ḇebabo. Ḇape, Kyoko ifawi snar Yahwe ifawimnis samswen ismana. Ro sidang ḇebaboya, naek srar sisya sibor ḇefawimnis sneḇaḇir ḇyedi. Ryower rya Yahwe ikofen ḇe i, ”Yaswar Au kaku, ine snaro Auma perintis mondaḇa, ḇape snar Auma inai Yedi ma buk kankenem bedi kwar. Yamarisen wasma aski snar Auma Saksi Yedi.” Rosai Yahwe ifrur faro Au ḇefasnaḇair snar ”fawawi ḇyena nabor fafayaḇa”?

9, 10. Fandandun rosai Yahwe ḇyuk ḇepon na? Buk contoh oso.

⁹ Kokame kofandun roḇean, sansun, ma moḇ fa koḇarek. Imbude na komkak kona roḇean nabor ḇa. Ḇape, Yahwe ifrur supswan ine kwar insama bisa nbuk roḇean ḇemnis faro ḇekenem syakam, iba syadiwer faro ”mkun manwawa ḇefararyorker sya”. (Wasya Mazmur 147:8, 9.) Manwawa monda Yahwe ḇyuk anan ḇesi, iba syadiwer snonkaku koine Yahwe nari fyasos rosai kofandunna.—Mazmur 37:25.

¹⁰ Ḇape ḇefandun syadi iso, Yahwe fyasos anan rur insama kakyar koḇena syambraḇ pdef. Ma, ḇyuk ḇeko ”Saswar-ḇaḇye ro Allah, ḇesyadi ro kakara.” (Filipi 4:6, 7) Naek oso ḇenirḇe Mutsuo ma swari suḇaḇir kaku Yahwe fafnoḇek ḇyedi. Ro 2011, rofyor tsunami myun Jepang indokada sumar, ḇape snar suyek ro atap rum suḇedi inja sumar ḇa. Ro ras ani, arasai suḇenakam napromes. Ro roḇya suḇarek monda ro lantai suru rum suḇedi ḇepampan ma ḇepnunek kaku. Meser arwoya, susewar roi oso bisa ḇesambraḇser kakyar suḇena. Syap oser monda susma yaiso Buku Kegiatan Saksi-Saksi Yehuwa 2006. Mutsuo byas syap ani ma myam judul ”Tsunami Terdahsyat yang Pernah Dicatat.” Farfyar ani fyawar saprop iwawa ro Sumatra taun 2004 ḇefrur fa warya dek ma myunpres roi nakame. Rofyor suwasya farfyar ro roi ḇekur naek srar ansya, swari sukanes. Suḇaḇir Yahwe ḇyuk fafnoḇek ḇemnis kaku rofafisu sufandun na. Yahwe I kako fyasos fandandun ḇesewer ḇesu. Naek srar ro moḇ ḇese ro Jepang sḇuk roḇean ma sansun besu. Ḇape, roi ḇefrur fa kakyar suḇena nasambraḇ kaku iso rarama ro ḇar naek organisasi iwan fa sisambraḇser sidang-sidang ro moḇ ani. Mutsuo doḇe, ”Yaḇaḇir Yahwe isya ro ris nkoḇedi, ma myamfaduru nko. Yaknon kaku!” Randak ya Allah ḇyuk fandandun rur insama kakyar nkoḇena  nasambraḇ, ramnai fyasos fandandun ḇesena.

11. Rosai kofrurya insama kosma fafnoḇek ro Allah?

¹¹ Yahwe ”ḇyuk sneprei faro bena sneḇenaḇye sya”. Iswar kaku ko ma imarisen ifnoḇek ko. (Mazmur 147:6a) Rariso kosma fafnobek ḇyena rai? Fandun fa koḇebati fanam ḇe I. Iso ḇefnai fa fandun kaku kona sneḇenaḇye. (Zefanya 2:3) Snonkaku bena sneḇenaḇye nari sikyar Yahwe na ipyos ḇaḇenapnapesḇa ma kandera rosai monda sismana. Yahwe imarisen faro snonkaku ḇemnis radiri.

12, 13. (a) Rosai fandun fa kobinkwan na insama kosma Allah fafnoḇek ḇyedi? (b) Yahwe imarisen faro snonkaku bemnis rariso?

¹² Ḇape, Allah na ”isawen snonkaku  ḇeḇarḇor ḇe saprop”. (Mazmur 147:6b) Komewer kaku kosma roi ḇeradirya! Komarisen Allah fyasna saswar ḇyeja faro ko. Inja fandun kaku kayin rosai dayin na. (Mazmur 97:10) Imnis raris, kayin fararur amoralitas seksual. Inja, nari koḇinkwanbur rosai monda na ḇeyun koḇe fararur ḇesasar ani, raris pornografi. (Mazmur 119:37; Matius 5:28) Imbude ine samswen kaku beko, ḇape fandun fa kofrurna snaro nari kosma barakas ro Yahwe I.

¹³ Jadi fa kosma bon ḇa snaro samambraḇ koḇena monda. Fandun fa kokyar faro Yahwe I. Nari imarisen rofyor korir kakyar koḇena faro roi snonkaku sya sikyar na ke? Aroḇa, Yahwe myanenḇa faro ”samambraḇ ro kuda”. Na kokyar faro mankunko ḇaido faro snonkaku ḇese monda ke? Yahwe ryir kakyar ḇyeja faro samambraḇ snonkaku sya ḇa. (Mazmur 147:10) Inja, fandun fa koḇenadi ḇe Yahwe I ma kor insama bisa kopampum ḇaḇeraryarḇa koḇena. Yahwe nari fyafayafḇa fa ryower nadi koḇena. ”Yahwe imarisen faro snonkaku ḇemkak faro I sya, faro snonkaku ḇewaf saswar soasuser ḇyena.” (Mazmur 147:11) Yahwe ima iswar ko ḇesya kwar. Nari ifnoḇek ko pdef fa kopampum marisen ḇesasar na.

14. Manḇefas mazmur ikyar faro rosai?

¹⁴ Yahwe ḇyuk kakyar beko nari ifnoḇek ko rofyor kosma samswen. Rofyor er Israel skaḇer ḇe Yerusalem, manḇefas mazmur kyarauser Yahwe fafnoḇek ḇyenakam. Idisen, ”Kerwa beba bedi ifrur i fa inako; ḇyebok roma inai bedi rofandu au. Ḇyuk aski ro moḇ bedi.” (Mazmur 147:13, 14) Yahwe ikofen nari ifrur nako kerwa ḇeba sena. Ine nafrur fa manḇefas mazmur ḇyaḇir imkakḇa ma ikyar Yahwe nari kyadaunwarek kawasa ḇyesya.

15-17. (a) Fyorno ido rariso sneḇaḇir koḇena faro samswen kosmana, ḇape rariso Yahwe ḇyuk Wos ḇyena fa nafnoḇek ko? (b) Fawar contoh ḇefasnaḇair Allah Wos ḇyena bisa fasaw fa nafnoḇek ko beri.

¹⁵ Imbude nari wamkakwarek faro  samswen wasmana. Ḇape, Yahwe na ḇyuk beko fawawinanem fa kofarmku pdef. Manḇefas mazmur doḇe Allah, ”ikofen parenta ḇyena ḇe supswan; kuker fasaw kaku wos ḇyena nafrar”. Ramnai manbefas mazmur dawos kuker salju, embun beku, ma es. Ramnai ifuken, ”Mansei ḇepok faro pananuk ḇyena ya?” Ramnai ikofen Yahwe ”fyarem wos ḇyena, ma nakame nambren”. (Mazmur 147:15-18) Allah koḇedi ifawi rosai riryakam ma bisa ifrur rosai monda, raris bisa fyara pananunek ro es ma salju. Inja na ifnoḇek ko fa kofrur mnis kaḇer samswen rosai monda kosmana.

¹⁶ Kirine, Yahwe fyarkin ko roro Wos ḇyena, Refoya. Manḇefas mazmur ikofen, ”kuker fasaw kaku wos ḇyena nafrar” fa nafnoḇek ko. Yahwe fyarkin ko kuker nyan ḇemnis ro fafisu kofandunna. Kwarapan kada fainda wasmana ro Refo, publikasi ḇerama ro ”manfamyan ḇeḇesyowi ma ḇefawi nananem”, JW Broadcasting, jw.org, penatua sya, ma naek srar sya. (Matius 24:45) Wamam kwar ro kankenem bedi, Yahwe fasaw kaku fa fyarkin Au ke?

¹⁷ Srar oso ḇenirḇe Simone isma fafnoḇek ro Allah Wos ḇyena. Randak ya ḇyaḇir sfanduniḇa ma Yahwe iswari ḇa kako. Ḇape rofyor ḇyesneso, dor fafnoḇek ro Yahwe I ro nadi ḇyedi. I kako fyarkor refoya pdef. Simone dobe, ”Rofyor yor fafnoḇek ro Yahwe, ḇyuk ḇe aya samambraḇ ma farkankin yafandunna pdef.” Ine nafnoḇek i fa nya kakara ḇemnis kaḇerwer.

18. Fakamaman rosai wasmana, ma alasan rosai monda ḇefrur fa ’Wasandik Yahwe I’?

¹⁸ Manḇefas mazmur ifawi, Yahwe kyinfir er Israel sya fa sḇekawasa ḇyesi rofandu er syakam bero supswan ine. Siso monda besma ”wos ḇyena” ma ”sasoser-sasoser ḇyena”. (Wasya Mazmur 147:19, 20.) Kirine, kosma fakamaman ḇeba kaku snaro koḇuk Yahwe snonsnon ḇyedi. Kokofen kasumasa snar bisa kofawi Yahwe I, kona Wos ḇyena ḇefarkin ko, ma koḇebati fanam kuker I. Raris manḇefas Mazmur 147, roi nabor naisya ḇefrur fa ”Kosandik Yahwe I” ma kor snonkaku ḇesesya fa saksandik I kako.