1, 2. Rosai ḇefnai fa fandun kowawos nyan koḇuk sneprei faro snonkaku ḇefafardun sya? (Mam sonin ro randak artikel ine.)

SUSI doḇe, ”Ro swaf taun oser rofyor romawa nuḇedi imar, sne nuḇedi iduf kaku.” Naek oso ḇekara ḇaḇeri na swari imarḇuri doḇe, ”iduf fafayaḇa isof baken ḇyena nakdufe”. Kakuya, snonkaku ḇebor sisya sḇaḇir rarirya. Naek srar ḇero sidang Kristen ro kirine, sisya sibor skara ḇaḇeri nari snonkaku siswar sya simar rofyor Armagedon ryama ḇaim. Imbude snonkaku oso waswar imar, ḇaido wafawi sino sisya sḇefafardun. Inja, rariso snonkaku ḇefafardun sya na sisma sneprei ya?

² Ono sisya sikofen fafisuya bisa ḇyuk pararei faro par koḇena. Ḇape wos ḇeradine nkaku ke? Kabom oso doḇe, ”Roro rosai yasmana, roi ḇefrur fa snonkaku oso iprei iso nyan rariso ḇyuk oras ḇyena.” Insama par ro baken koḇena naprei fasaw ido, nefandun oras ma ḇaḇefaduru ḇepyum. Rarirya kako, insama par ro sne koḇena  naprei, nefandun oras ma ḇaḇefaduru ḇepyum. Inja, fafnoḇek rosai monda ḇefnoḇek snonkaku ḇefafardun sya?

3, 4. Rosai ḇefnai fa na kokyar Yahwe ifawi kaku fafardun koḇena?

³ Kma ḇesawarwar koḇedi, Yahwe iso ḇepok syadi fa ḇeḇuk sneprei ḇeko. (Wasya 2 Korintus 1:3, 4.) Bisa ḇyaḇir fafardun ro sne snonkaku sya. Fyasna nyan ḇepyum syadi ro roi ani, ma ḇyeasas faro kawasa ḇyesya, ”Aya ḇardi iso Mankun ḇeḇuk sneprei faro mkoya.”—Yesaya 51:12; Mazmur 119:50, 52, 76.

⁴ Yahwe I kako fafisu oso snonkaku iswar sya simar, imnis raris manfamyan ḇyesya Abraham, Ishak, Yakub, Moses, ma Raja Daud. (Bilangan 12:6-8; Matius 22:31, 32; Kisah 13:22) Refo ikofen Yahwe imander kaku fa ḇyawes kaḇer snon ḇesoasuser ansya. (Ayub 14:14, 15) Ma rofyor sikḇawes kaḇer kwar, nari sisma aski ma pararei ḇekain fyoro. Yahwe I kako dakḇaḇir sne ḇyedi ḇyefafardun rofyor Rumkun ḇyedi imar. Refo ikofen snar Yesus ima ’byemankun bepon syadi Allah imarisen kaku’. (Amsal 8:22, 30) Samswen kaku fa kofawimnis rariso Yahwe sneḇaḇir ḇyedi rofyor myam Romawa ḇyeja imar kuker kandera.—Yohanes 5:20; 10:17.

5, 6. Rariso Yahwe ḇyuk sneprei beko?

⁵ Kokyar kaku nari Yahwe ifnoḇek ko. Inja koḇeḇirḇar awer ma kokofenḇair sne ḇefafardun ma saneso koḇena. Nari kosma sneprei kaku snar kofawi Yahwe ifawimnis kaku sneḇaḇir koḇena ma imarisen ḇyuk fafnoḇek kofandunna. Ḇape, rariso ifrurna rai?

⁶ Nyan oser yaiso kuker fafnoḇek rur ḇesren ya. (Kisah 9:31) Yesus ḇyeasas Yahwe nari ḇyuk rur ḇesren faro mansei ḇeyor faro I ya. (Lukas 11:13) Susi, ḇeḇeyap ḇepon ani, dobe, ”Nuḇenadi ker ma nuyor insama Yahwe ḇyuk sneprei ḇenu. Rofyor nufrur radine ker, saswar-ḇaḇye ro Allah nfaduru sne ma swaruser nuḇena.”—Wasya Filipi 4:6, 7.

7, 8. Rosai ḇefnai fa na kokyar Yesus nari ḇyuk sneprei beko?

⁷ Rofyor Yesus ryo supswan, isofari rari-rari Kma ḇyeja kuker mananis kaku ro wos ḇyena ma rosai ifrurna. (Yohanes 5:19) Yahwe iwan Yesus ḇe supswan fa ḇyuk sneprei faro ”snonkaku ḇesanekar” ma ”snonkaku ḇeḇefardun syakam”. (Yesaya 61:1, 2; Lukas 4:17-21) Yesus ifawi kaku kandera ro snonkaku ḇero fafisu ani sismana  ma imarisen ifnoḇek si.—Ibrani 2:17.

⁸ Rofyor Yesus ḇyeromawa babo, min ro kina ḇyedi ḇaido bati ḇyesya ono sisya simar. Imnis raris, Yesus kma befan ḇyedi Yusuf i, imbude imar rofyor Yesus byeromawa babo kaker. * (Mam fas-fas kasun ro sop.) Wawasenpan kada ine napyan ḇe Yesus i ḇa snon besawarwar fa syambraḇ ro fafardun ismana, ma ro fafisu ḇemnis kako ḇyuk sneprei faro snari ma bedar ḇyesi.

9. Rariso Yesus fyasnaḇair ifawi mnis kaku sneḇaḇir snonkaku ḇesesya?

⁹ Rofyor fararmyan ḇyeja, Yesus fyasnaḇair ifawi kaku sneḇaḇir snonkaku sya. Imnis raris, rofyor Lazarus bati ḇyedi imar, Yesus ḇyaḇir sne ḇefafardun Maria ma Marta su, ifawi nari kerower ḇyawes kaḇer Lazarus i, ḇape i kako kyanes.—Yohanes 11:33-36.

10. Rosai ḇefnai fa kokyar Yesus ifawimnis sneḇaḇir koḇena ro kirine?

¹⁰ Yesus i kako ifawi sneḇaḇir koḇedi ro kirine ke? Refo fyasnabos snar Yesus ḇyefararwe ḇa. Refo ikofen, ”Yesus Kristus fyarwe ḇa, ro ḇeponiwara, baboine, isof fyoro-fyoro.” (Ibrani 13:8) Sap i ḇe ”Manfarkin kankenem ya”, Yesus i kako fafisu oso dakḇe fafardun, inja bisa ”ifnoḇek snonkaku ḇesma fafrowes sya”. (Kisah 3:15; Ibrani 2:10, 18) Inja nari kokyar Yesus i kako ḇyaḇir saneso ro snonkaku ḇefafardun sya. Yesus ifawi kaku sneḇaḇir sena, ma bisa ḇyuk sneprei ḇesi ’rofafisu sefandunya’.—Wasya Ibrani 4:15, 16.

11. Mnuk rosai monda ḇebuk sneprei ḇe Au?

¹¹ Mnuk ḇefas kuker Yesus ḇyefafardun rofyor Lazarus imar ima mnuk oser monda rofandu mnuk ḇebor ḇeḇefas ro Allah Wos Byeja na ḇeḇuk sneprei ḇeko. Kakuḇae, ”fas-fas ro Refoya kam insa nfarkor ko. Snar farkarkor kosma ro Refoya nafrur fa kodworen ma kosambraḇ isof kokyar faro Allah”. (Roma 15:4) Rofyor ḇefafardun ido, bisa wasma sneprei kuker wawasya mnuk-mnuk ḇeyun sneprei nane:

• ”Yahwe fyanam kuker snonkaku ḇesanekar; ma snonkaku bena raryaḇ ḇa kwar fyaspar si.”—Mazmur 34:18, 19.

• ”Rofyor ḇaḇeḇirḇar nafo kaku ro aya, buk wos sneprei ma kananon maro aya.”—Mazmur 94:19.

• ”Ma Allah, Kma koḇedi, kuker Manseren Yesus Kristus, saswar-fakamaman ḇyena iswar ko kwar ma ḇyuk ḇeko sneprei ḇekain fyoro ma saneraro ḇeḇye maḇeko, ma nbuk sneprei ma samambraḇ.”—2 Tesalonika 2:16, 17. *—Mam fas-fas kasun ro sop.

12. Nyan rariso kofnoḇek snonkaku ḇefafardun sya?

¹² Sidang kako bisa ḇyuk sneprei faro snonkaku ḇefafardun sya. (Wasya 1 Tesalonika 5:11.) Rosai bisa wafrurya fa buk sneprei ma swambraḇser snonkaku ”ḇeraryaḇ werḇa”? (Amsal 17:22) Waswarepen ”oras nasya fa kofasis ma oras nasya fa kowawos.” (Pengkhotbah 3:7) Kabom oso ḇenirḇe Dalene ikofen snonkaku ḇefafardun sya fandun kaku sikofenḇair swaruser ma sneḇaḇir sena. Inja, roi ḇepyum bisa wafrurna isoine warower pyum kaku, wasunuk awer awawos ḇyena. Junia, bena bedar snon ḇemun mankundi, doḇe, ”Wafawimnis fafardun sena ḇa ido, ḇefandun syadiya ḇensewar kaku fa wafawimnis sneḇaḇir sena.”

13. Rosai fandun fa koswarepen ya?

¹³ Fandun fa koswarepen sne ḇefafardun snonkaku oser-oser ma nyan sifasnaḇairna neḇeseyaye. Fyorno ido, samswen ḇeko fa kofasnaḇair saneso koḇena. Refo ikofen, ”Sneya ifawi faro sararmar mankun ḇyena, ma snonkaku ḇese ḇa ḇesowarpu raryaḇ ḇyena.” (Amsal 14:10) Iba syadiwer rofyor snonkaku oso bisa fyasna sneḇaḇir ḇyedi, imbude snonkaku ḇesesya sifawi mnisḇa rosai ḇyaḇirna.

14. Rariso koḇuk sneprei faro snonkaku ḇefafardun sya?

¹⁴ Osower ido, kokmom rosai imbe kokofen ḇe snonkaku ḇefafardun sya. Ḇape, Refo ikofen snar ”ramar ro snonkaku bena fawawinanem iso ḇebuk pararei ya”. (Amsal 12:18) Snonkaku ḇebor sisma wos sneprei ro brosur Bila Seseorang yang Anda Kasihi Meninggal. * (Mam fas-fas kasun ro sop.) Ḇape, fyorno ido roi ḇepyum bisa kofrurya iso ’kokanes fnoḇek snonkaku ḇekanes sya’. (Roma 12:15) Gaby, swa byedi imarburi kwar, doḇe fyorno ido nyan oser fa kofasnaḇair sneḇaḇir koḇena iso kuker kokanes. Ikofenwer, ”Iso ḇefnai fa yasma sneprei rofyor bati yesya sikanes fnoḇek aya. Ro fafisu ani, yaḇaḇir yemir monda ḇefafardun ya ḇa.”

15. Rofyor samswen ḇe ko fa koḇuk wos sneprei ido, rosai na kofrur ya? (Mam kako kotak ” Wos Sneprei Ḇeyun Pararei.”)

¹⁵ Rofyor samswen ḇe Au fa wakofen ḇeri wos ḇeyun sneprei ido, bisa wakofenḇairna roro kartu, e-mail, SMS, ḇaido syapram. Bisa wafas mnuk-mnuk ḇeḇuk sneprei, fawar rari-rari ḇepyum ro snonkaku ḇemar kwar ani, ḇaido fawar ḇepyum muḇena rofyor ikenem kaker. Junia ikofen, ”Kosma SMS ḇeknampu ḇefrur sneprei ḇaido  kosma fararyor fa koryur kayam kuker naek srar Kristen ḇesesya nafnoḇek kaku ko, yaḇaḇir siswar ma sfandun aya.”

16. Nyan oser rosai bisa koḇuk sneprei faro snonkaku ḇefafardun sya?

¹⁶ Nadi koḇena bisa nafnoḇek naek srar ḇefafardun sya. Ko kako bisa koḇenadi ḇesi ḇaido koḇenadi kayam kuker si. Imḇude samswen ḇe Au fa kwanes rofyor ḇenadi. Ḇape nadi bedi kuker sne ḇesiper bisa nun sneprei. Dalene iswarepen, ”Rofyor naek srar srama fa sḇuk sneprei ḇe aya ido, yor si fa sḇenadi kuker aya. Rofyor sḇenadi, randak ya sawos mnuk-mnuk, ḇape rofyor sawos wos riḇeso kwar wos sena nambran pyum ma nadi sena nsae kaku ro sne sena. Kakyar, saswar, ma sawarwar sena nsambraḇser kakyar yedi kaku.”

17-19. Rosai ḇefnai fandun kaku koḇuk sneprei faro ḇefafardun sya?

¹⁷ Kopok kofawi mnisḇa fafisu riḇeso snonkaku oso ḇyefafardun. Rofyor snonkaku oso min ro kina ḇyedi imar, randak ya bati ma kina ḇyesya sisya sibor ḇeḇuk sneprei ḇe i. Ḇape fyoroḇa ramnai, nari skaḇer fa sifrur fararur sena ro rasras wer. Ḇape kaku ya, snonkaku ḇefafardun ani fyandun kaker wos sneprei. Inja, komarisen kofnoḇek i pdef. ”Ḇati ḇekaku fyasna saswar ya ro oras nakam, ma ḇyemanḇekanaek koḇedi ro fafisu ḇesamswen.” (Amsal 17:17) Fandun fa koḇuk sneprei faro  snonkaku ḇefafardun sya fafisu sifandun ko.—Wasya 1 Tesalonika 3:7.

¹⁸ Koswarepen, fyorno ido snonkaku oso nari ḇyefafardun wer. Imbude ine snaro tanggal farḇakḇuk suḇena, doya, sonin, fararur oso, ma sananarem, mkarem, ḇaido musim oso. Rofyor snonswa ḇaido binswa oso swari imarburi, na ifrur roi oso ro mankundi, raris rofyor ryama ḇe kebaktian ḇaido Swarapepen, ine bisa nafrur fa ḇyesneso fafayaḇa. Naek oso doḇe, ”Rofyor swa yedi imar, yakara tanggal farḇakḇuk nuḇena nari nḇe fafisu ḇeḇyeḇa ma ḇesamswen kaku ḇe aya. Ḇape, naek srar ḇeḇeso srama sfanjur kuker aya fnoḇek bati ḇefanam yedi. Inja yaḇaḇir yemir ḇa ro fafisu ani.”

¹⁹ Koswarepen snar fandun kaku kosambraḇser snonkaku ḇefafardun sya rofafisu ḇeḇeso. Junia ikofen, ”Rofyor ono ḇerama ḇefnoḇek ḇaido ḇeḇarek kuker aya ido, ine nbuk fainda ḇeba kaku ḇe aya. Ma roi sifrur nane nbuk sneprei kaku.” Kakuḇae, kopok kopyosḇa sne ḇefafardun ḇaido sneḇaḇir sena snar sbarek ro mankunsi. Ḇape bisa koḇuk sneprei kuker kofrur roi oso ḇesi. (1 Yohanes 3:18) Gaby doḇe, ”Yakofen kasumasa nabor faro Yahwe I snar ḇyuk penatua ḇesawarwar kaku faro aya. Sifnoḇek aya insama yasusu awer ro fafisu ḇesamswen yasmana. Sifrur fa yaḇaḇir snar Yahwe isya fyorepen aya.”

20. Rosai ḇefnai fa Yahwe asas ḇyena na nḇuk sneprei kaku ḇeko?

²⁰ Nari komarisen kaku snar kofawi Yahwe iso Allah ḇeḇuk samambraḇ sne, nari ipyos sne ḇefafardun nakam rofyor fafisu kaḇakḇok ya. (Yohanes 5:28, 29) Allah ḇyeasas ”nari dor’n marmar ya isof fioro-fioro, ma Tuan Bena Papoik Yahwe I nari ipyos ḇeri mkarui ro snonkakusya kam mka sena”. (Yesaya 25:8, fas-fas kasun ro sop) Inja, ro fafisu ani nari oso ḇaḇeri ’ḇekanes fnoḇek snonkaku ḇekanes’, ḇape snonkaku syakam ḇero supswan nari ’siryaḇ fnoḇek snonkaku ḇeryaḇsya’.—Roma 12:15.