1, 2. Ro sistem ine, rosai ḇefnai fa snonkaku ḇesabarar sya nari sisya pdef?

SISTEM ekonomi ro dunya ine naḇyeḇa ma nmarḇak ro bar oser. Raris, romawa babo sya samswen kaku fa sisewar fararur ro kirine. Ḇesesya sra ḇe moḇ ḇenana fa sikenem rodiwa. Ḇape ro moḇ ani kako, snonkaku ḇesabarar sibor kaku. Ro laporan ḇebabo oso, snonkaku bena nana nabor syadi, nana ḇyena namnis kuker nana ro snonkaku syakam ro dunya ine. Ine fyasnaḇair imbude snonkaku ḇeḇeso nana sena nabor fafayaḇa, ḇape snonkaku syaran ma syaran sisya sesabarar kaku. Yesus kyarem roi ine rofyor ikofen, ”Snonkaku ḇesaḇarar sisya faswef kuker mko.” (Markus 14:7) Rosai ḇefnai fa roi ḇeradine bisa nasya?

² Yesus ifawi Karajan Allah iso monda na ḇepyos sistem ḇaḇefarḇaḇyan ro dunya ine. Refo ikofen, ”ḇefaḇaḇyan ro supswan” ḇaido sistem ḇaḇefarḇaḇyan, sistem polotik ma agama sikam bar ro dunya Setan ine. (Fasasna faro Yohanes [Wahyu] 18:3) Allah kawasa ḇyesya sisaebur ro polotik ma agama ḇekakuḇa. Ḇape, ḇebor ro si sisaekufḇa  ro sistem ḇaḇefarḇaḇyan ro dunya Setan.

3. Fakfuken rosai monda nari kowawosna?

³ Snonkaku Kristen koine, fandun fa komam pyum mamam koḇena faro sistem ḇaḇefarḇaḇyan. Kokarapan kada, ’Rariso yaḇuk nana yasmana fa yafasnaḇair soasuser yedi faro Allah? Rariso insama yasowarpu manken’m ḇa kuker dunya farḇaḇyan ya? Pengalaman rosai monda ḇefasnaḇair snar Allah kawasa ḇyesya sikyar faro Yahwe I?’

4, 5. (a) Rosai manwarwaren ro Yesus farfyar ḇyeja ismana? (b) Rosai Yesus imarisen manfamyan ḇyesya sifrurna ?

⁴ Wasya Lukas 16:1-9. Fandun fa kokara kaku Yesus farfyar ḇyeja kuker manwarwaren ḇeḇye ḇa ani. Siksof manwarwaren ani ḇyoḇ afafer nana tuan ḇyena, inja tuan ḇyedi isasyar i ro fararur ḇyeja. * (Mam fas-fas kasun ro sop.) Ḇape, manwarwaren ani nya ”kakara ḇeḇye”. Rofyor syae ro fararur ḇyena ḇaim, iseref ḇaḇebati kuker snonkaku na ḇefnoḇek i rofyor syae ya. Ro farfyar ine Yesus fyarkor manfamyan ḇyesiḇa insama siso nyan ḇeḇyeḇa ro dunya ine, imnis raris snonkaku ḇebor ro kirine sifrurna. Ḇape, Yesus ḇyuk farfyar ine fa ḇyuki farkor si farkarkor ḇefandun kaku oso.

⁵ Imnis raris manwarwaren ḇesma samswen ifawi ḇaim na, Yesus i kako ifawi manfamyan ḇebor ḇyesya sikako nari samswen ḇesi fa sisewar fandandun sena ro dunya ḇeḇyeḇa ine. Inja ikofen bo doḇe, ”Mkoseref ḇaḇebati kuker arasai ḇeḇyeḇa na.” Rosai ḇefnai fa ikofen radirya? Insa rofyor arasai anna nafnoḇek siḇa kwar ido, bati ansuya, isoine Yahwe ma Yesus su, nari sumarisen ’mkosma mob ro rum ḇekain fyoroya’. Farkarkor rosai bisa kun ro Yesus ananun ḇyedi ine?

6. Rariso kofawi snar sistem ḇaḇefarḇaḇyan ro kirine nama Allah marisen ḇyedi ḇa?

⁶ Yesus fyasnaḇair ḇa rosai ḇefnai fa nana ḇaido arasai dapna ḇe ”ḇeḇyeḇa”. Ḇape, Refo fyasnabos kaku snar sasewar syadadi pipi nama Allah marisen ḇyediḇa. Imnis raris, Yahwe fyasos Adam ma Eva fandandun suḇenakam kuker waworek monda. (Kejadian 2:15, 16) Ḇarpurya, rofyor Allah ḇyuk rur ḇesren ḇyeja faro snonkaku ḇesma ramrem sya, ”oso ikofen ḇa, nana ḇyena faro mankundi, ḇape roi ḇebor anna faro sikam”. (Farfyar ro Manwawansya [Kisah] 4:32) Nabi Yesaya ikofenḇair kako snar ro fafisu iwama snonkaku syakam nari siryaḇ snar supswan ḇyuk bon. (Yesaya 25:6-9; 65:21, 22) Ḇape, rofyor fafisu ani ryama ḇaim, Yesus manfamyan ḇyesya fandun kaku fa sna ”kakara ḇeḇye”. Fandun fa sisewar fandandun sena ro dunya ḇeḇyeḇa ine, ma ro fafisu ḇemnis sḇensewar fa sifrur Allah imarisen.

7. Ananun rosai Yesus ḇyuk ro Lukas 16:10-13?

⁷ Wasya Lukas 16:10-13. Manwarwaren ro Yesus farfyar ḇyeja iseref ḇaḇebati kuker snonkaku ḇesesya faro fandandun mankun ḇyedi. Imbape, Yesus imarisen insama manfamyan ḇyesya siseref ḇaḇebati ro nanki ma sisewar fandandun mankun sena awer. Imarisen fyarkor ko snar nyan fa koḇuk ”arasai ḇeḇyeḇa na” bisa nfasnaḇair soasuser koḇena faro Allah. Nyan ya rariso?

8, 9. Buk contoh ḇeḇeso ro soasuser naek srar ḇeḇuk ”arasai ḇeḇyeḇa na”.

⁸ Nyan oser kofasnaḇair soasuser koḇena iso, kuker koḇuk farsarser roro nana koḇena faro fararur ḇaḇeḇaryas ro supswan ḇesiper Yesus dapna nari nḇendarirya. (Matius 24:14) Inai oser ro India imarisen ikram pipi ro celengan. Kyinfir fa kyoḇes mainan ḇa. Rofyor celengan ḇyedi ifo, ḇyuk nakam faro fararur ḇaḇeḇaryas. Naek oso kako ro India bena yaf srai. Ḇyuk srai bon nabor ḇe kantor penerjemahan wos Malayalam. Kantor penerjemahan ani sisya sfandun srai, inja naek ani kyara rofyor ḇyuk srai ido, ine ḇyefandun syadi ro ḇyuk pipi monda. Naek ani fyasnaḇair ”kakara ḇeḇye”. Rarirya kako, naek srar ḇero Yunani sḇuk mani zaitun, keju, ma roḇean ḇesena faro kina ro Betel.

⁹ Naek ḇesewer ḇyuk aidoram ḇyeja ro Sri Lanka fa sḇuk na faro moḇ fananjur, kebaktian, ma rum faro manfamyan ro oras nakam sya. Kakuḇae, rosai naek ine ḇyukna, nafnoḇek kaku manḇaryas rodiwa snar sisma kumpan nabor ḇa. Ro sup ḇese ḇedwarek fararur koḇena, naek srar sya sḇuk rum sena ḇe Balai Kerajaan. Kuker rarirya, perintis sya ma naek srar bena kumpan nabor ḇa bisa sna moḇ fa sḇuki fanjur, inja sbak moḇ fa sḇuki fanjur werḇa.

10. Fainda rosai monda kosmana rofyor kofasna snemura?

¹⁰ Raris contoh ḇefasnaḇair snar Allah kawasa ḇyesya ’sinapes ro roi kasun na’. (Lukas 16:10) Sḇuk nana sena faro fandandun snonkaku ḇesesya. Ine nafnoḇek si fa sḇebati kuker Yahwe I. Rariso sneḇaḇir koḇena rofyor kofrur roi oso ḇe snonkaku ḇesesya? Nari simarisen kaku snar sifawi rofyor sfasna snemura, nari sisma nana ḇekaku ro nanki. (Lukas 16:11) Srar oso ḇebuk ker pipi ḇyena fa ḇesaramper fararur Karajan, ikofen snar fyoro mura nya rari-rari ḇepyum syadiwer. Ikofen, ”Snar yafasna snemura ḇesya kwar, rari ma kenem yedi napyum syadiwer.  Napyan ḇe aya fa yarower ananun, yaḇuk maf faro ḇesesya, ma yakabaḇaḇ, ma yafafko fasawḇa.” Sibor sisya ḇeḇaḇir snar sifasna snemura ine nun fainda faro mankunsi.—Mazmur 112:5; Amsal 22:9.

11. (a) Rariso farsarser koḇukna nfasnaḇair ”kakara ḇeḇye”? (b) Rosai fainda ya snar koḇuk farsarser kuker sne ḇesiper? (Mam sonin ro randak artikel ine.)

¹¹ Rofyor koḇuk nana koḇena fa kofnoḇek fararur ḇaḇeḇaryas, ine kyurfasna kona ”kakara ḇeḇye”. Osower ido, kofarmyan ro oras nakamḇa ḇaido kora ḇe moḇ ḇefandun fafnoḇek ḇa, ḇape bisa kofnoḇek naek srar ḇesesya pdef. (Amsal 19:17) Imnis raris, farsarser koḇukna, snonkaku ḇebor ro moḇ ḇesabarar kaku bisa sisma publikasi koḇena ma sfarkor napnapes. Ro sup bondi raris Kongo, Madagaskar, ma Rwanda, Refo oser ḇaḇyak ḇyeja nek kaku. Refo oser ḇaḇyak ḇyeja imnis kuker ḇaḇyak ro snonkaku ḇefararur minggu oser ḇaido paik oser. Taun ḇe taun, naek srar sya fandun fa skinfir imbe skoḇes roḇean faro kina sesya ḇaido imbe skoḇes Refo. Ḇape, snar farsarser nasya ma kumpan ’sismana namnis’, inja organisasi Yahwe bisa sefararwe ma sirwas Refo kuker ḇaḇyak ḇa ḇe kina syakam ma ḇefarkor Refo sya. (Wasya 2 Korintus 8:13-15.) Inja, ḇeḇuk ma ḇesma syakam sḇebati kuker Yahwe I.

12. Rariso Abraham fyasnaḇair ikyar faro Allah?

¹² Ko kako bisa koḇebati kuker Yahwe rofyor kosewar nana ḇekakuna ma kosowarpu syadi ḇa ro dunya ḇaḇefarḇaḇyan. Iso roi Abraham ifrurna. Isouser Yahwe kuker ibur mnu beba Ur moḇ ḇenana fa ḇyarek ro rum kruben monda snar imarisen ḇyebati kuker Yahwe. (Ibrani 11:8-10) Ikyar faro Allah, ḇape faro arasai ḇyena ḇa. (Kejadian 14:22, 23) Yesus imarisen insama manfamyan ḇyesya sna kakyar ḇemnis rarirya. Fafisu oso ikofen ḇe romawa babo ḇenana oso, ”Rofyor wamarisen wafrur imnis ido, rwamura, ḇoḇ nana ḇeḇor bena ma bukna faro snonkaku ḇesaḇarar sya, rarirya nari wasmai nana ro boiyas, ḇarpurya rwamuma ma waso Aya.” (Matius 19:21) Snon ḇebabo ani nya kakakyar imnis raris Abraham i ḇa. Ḇape snonkaku ḇese sino sisya sikyar ḇe Allah.

13. (a) Ananun rosai Paulus ḇyuk ḇe Timotius i? (b) Rariso bisa kofrur anun Paulus ḇyedine?

¹³ Timotius ima snon oso bena kakakyar. Paulus dap i ḇe ”sordade ḇeḇye ro Yesus Kristus”. Ramnai Paulus ikofen faro i, ”Rofyor sordade oso ḇyesewar ro fararur ma ḇyefandun ḇaḇefandun mankundi ḇyena ḇa, rarirya mananir ro sarar ḇyedi imarisen.” (2 Timotius 2:3, 4) Manfamyan Yesus ro kirine, ma ḇefarmyan ro oras nakam sisyadi ro yuta rioser, sḇensewar kaku  fa sifrurmnis ananun Paulus ḇyedine ro kenem sena. Simewer fasasnai ḇero dunya ine nawyaye si. Siswarepen wos ḇefarkin ine, ”Snonkaku ḇenyaki ima manfamyan ro snonkaku ḇebuk nyaki.” (Amsal 22:7) Setan imarisen insama koḇuk oras koḇenakam ma samambraḇ koḇena fa kofararur ḇe dunya ḇaḇefarḇaḇyan ḇyena. Ono sisya nyaki sena nabor fafayaḇa snaro sḇukikoḇes rum, oto, ḇaido sḇukbak farkarkor, ḇaido faro munara farḇakḇuk sena. Rofyor kosasor ko ḇa ido, bisa koḇuk oras koḇena taun ḇe taun fa kobak kaḇer nyaki koḇena monda. Inja rofyor kofasnaḇair kakara ḇeḇye kuker kokenem syadadi ḇa, koḇenyaki ḇa, ma koḇoḇ famfnom ḇa roi kosmana. Kuker rarirya nari roi oso ḇaḇeri ḇedwarek ko fa kofarmyan ḇe Allah ma koḇemanfamyan werḇa faro sistem ḇaḇefarḇaḇyan ro kirine.—1 Timotius 6:10.

14. Rosai snemuk imbe kofrurna? Buk contoh.

¹⁴ Insama kokenem syadadi ḇa, fandun fa korir ro ḇarpon Karajan Allah. Imbeswa oso suna fararur ḇepyum kaku. Ḇape, sumarisen sufarmyan ro oras nakam wer. Inja suḇoḇ bisnis, wai ḇeba, ma nana suḇena. Ramnai, sufararur ro konstruksi ḇero kantor pusat ro Warwick, New York. Ine ipyum kaku snaro sufararur kayam fnoḇek sinan suḇesya minggu ḇeḇeso ro fararur ḇero Warwick ani. Contoh ḇesena isoine srar perintis oso ro Kolorado, AS. Fyararur ro bank. Ifararur pyum kaku, inja bos ḇyedi ikofen imbe ḇyuk fararurwer ḇe i, na ḇyuk gaji ḇyeja nek syadi ro gaji ḇerandak ḇyena. Ḇape, rofyor dun fararur ani ido nari samswen ḇe i fa iso ro ḇaḇeḇaryas. Inja pyampum fararur ḇepyum ani. Ine contoh ḇeḇeso monda ro rosai Yahwe manfamyan ḇyesya sifrurna. Rarirya kako rofyor korir ro ḇarpon fandandun Karajan ido, kyurfasna koḇesyowi syadi ḇaḇebati koḇena kuker Allah ma nana ḇekakuna ro arasai koḇena.

15. Arasai rosai ḇefrur fa koraryaḇ?

¹⁵ Nana nabor snonkaku sismana nfasnaḇairḇa Yahwe iso ḇebarakas si. Yahwe ḇyebarakas snonkaku ’ḇenana ro ḇaḇenapnapesya’. (Wasya 1 Timotius 6:17-19.) Imnis raris, srar oso ḇenirḇe Lucia ifawi ro Albania sefandun manḇaryas sibor syadi. * (Mam fas-fas kasun ro sop.) Inja ro 1993, ibur Italia ma ḇyarek rodiwa. Ifawiḇa rosai nari ifrur rodiwa, ḇape ikyar Yahwe nari fyaduru i. Fyarkor wos Albania ma ifnoḇek snonkaku syadi ri 60 fa sifrur farsamsyom mankun sena. Imbude kofnoḇek snonkaku sibor imnis rarirya ḇa ro moḇ koḇedi. Ḇape rosai monda kofrur fa kofnoḇek snonkaku insa sḇebati kuker Yahwe ma nari sḇearasai ḇekain fyoro ma nafrur fa koraryaḇ kaku.—Matius 6:20.

16. (a) Nari rosai ḇeḇejadi kuker sistem ḇaḇefarḇaḇyan anna? (b) Rariso koḇuk kaku nana kosmana?

¹⁶ Yesus fyasnabos kaku snar sistem ḇaḇefarḇaḇyan nane nari napromes. Ikofenḇa, ’Nari arasai anna nafnoḇek mko.’ Ḇape ikofen, ’arasai anna  nafnoḇek mkoḇa kwar.’ (Lukas 16:9) Ro ras ras ḇepupes ine, bank ḇeborna sebangkrut ma sup beba ḇesena sisma samswen beba ekonomi. Fyoro werḇa, fafisuya nari naḇyeḇa syadiwer. Bar ro dunya Setan raris sistem polotik, agama, ma ḇaḇefarḇaḇyan nari neḇemun pres. Brawen ma perak smam ḇe roi ḇekakur ro sistem ḇaḇefarḇaḇyan ine nari nḇe roi ḇekakurḇa, imnis raris nabi Yehezkiel ma Zefanya sufas na. (Yehezkiel 7:19; Zefanya 1:18) Kwarapan kada, ro fafisu ḇepupes ro kankenem koḇena insape kofawi fyoro kwar koḇuk nana ḇekaku koḇena fa kosewar ”arasai ḇeḇyeḇa na” ro dunya ine, rariso sneḇaḇir koḇena? Imbude koḇaḇir komnis raris snonkaku ḇebuk kankenem ḇyeja ḇesiper fa isewar pipi, ḇape pipi ismanakam pipi ḇekaku ḇa. (Amsal 18:11) Nana ḇero dunya nanekam nari napromes. Inja wafnak awer oras bedi fa buk nana wasmana fa waseref ḇaḇebati ro nanki. Nari kosma raryaḇ kaku snar koḇuk roi ḇepyum syadi faro Yahwe ma Karajan Ḇyedi.

17, 18. Rosai Allah bati ḇyesya siwaf kaku ya?

¹⁷ Rofyor Karajan Allah ḇyepoik ro supswan, na koḇak sewa ḇaido cicilan werḇa. Nari roḇean nabor nasya, kosmana kuker ḇaḇyak ḇa. Fandun fa koḇak dokter werḇa ḇaido kokoḇes obat. Yahwe bati ḇyesya nari simarisen fa sisma bon-bon ḇepyum ḇero supswan ine. Brawen, perak, ma permata nari sḇuk na snar padakduk sena, mboi nafrur fa sekayan ḇa. Bisa kobawes rum ḇepyum ro ai, karui, ma mankarmom ḇepyum nakame kuker ḇaḇyak ḇa. Bati koḇesya nari sifnoḇek ko snar simarisen, ḇape snar kobak si ḇa. Nari kokame koḇuk faro oso ma ḇesesya bon-bon ḇero supswan ine.

¹⁸ Ine barakas ḇeḇeso monda ḇemaeja kaku faro snonkaku ḇeseref ḇaḇebati ro nanki. Yahwe kawasa ḇyesya ro supswan nari sibras kuker raryaḇ rofyor srower Yesus ikofen, ”Mkorama, ne, besma ḇok ro Kma Yedi, mkakna Ḇaḇesasoser ḇefasos kwar faro mko ro fafisu supswan ine ḇyeḇefrur ya.”—Matius 25:34.