Manwawan Paulus ifawi Setan propaganda ḇyena nun ḇe roi ḇemun. Ḇape snonkaku Kristen ḇeborsya sifawimnis ḇaim roi ine. Imnis raris, naek srar ḇeḇeso ro Korintus skara sores nako kwar ro napnapes ya, inja nari sisapi ro Setan denem ḇyenaḇa. (1 Korintus 10:12) Iso ḇefnai fa Paulus ḇyuk swarapepen ḇesi, ”Yamkak warek kakara naek srar mkosma fafrowes fa nari mkoḇesyowi faro Kristusḇa, imnis raris ḇepon iwara Hawa kako isma fafrowes ro ikakya.”—2 Korintus 11:3.

Paulus wos ḇyena ine nḇuk swarapepen ḇeko insama kokyar mankunko awer. Insama kopampum Setan propaganda ḇyena ido, fandun fa kofawi denem ḇyena inja bisa koḇinkwanburna.

Propaganda sawos rodine kurfasna ḇe informasi ḇesasar sḇuk farkor ninyan snonkaku sya ḇaido sḇukifara nyan kakara sena ma rosai sifrurna. Ro syap Propaganda and Persuasion, propaganda ine sap i ḇe ”fasna syowiḇa, nun ḇe roi ḇemun, ma marḇak ro bar oser”. Propaganda kako smamna ḇe ”ankarkar, awawos ḇekakuḇa faro roi oso, awyaye faro snonkaku sya, ma fafrowes faro kakara snonkaku sena”.

Propaganda ima roi ḇeḇyeḇa kaku snaro kofawiḇa fawas ma fawas dawyae nyan kakara koḇena. Ine imnis raris gas ḇemamur komam ḇa na ḇaido konas ḇa na. Vance Packard, ahli oso ḇefarkor kuker kenem snonkaku sya, doḇe propaganda ine  ”kofawiḇa mḇoi nawyae kwar” rosai kofrurna. Ahli ḇese syawer sikofen propaganda ine nafnai fa snonkaku sya sifrur roi ḇeḇyeḇa kaku ma nsun ro swaruser ḇa. Propaganda kako nafnai fa snonkaku sya bisa sifrur genosida (smunpres er oso), mamamun, ma ḇaḇewayam snar er ḇaido agama.—Easily Led—A History of Propaganda.

Propaganda ro snonkaku sya monda bisa nafrowes ko, iba syadiwer Setan propaganda ḇyena! Setan ifawi kwar kenem ro snonkaku sya rofyor Allah daw si. Iba syadiwer ro kirine ḇyepoik ro ”supswan ḇesiper”, inja bisa ḇyuk rosai riryakam ro dunya ine fa ḇyuk ankarkar ḇyena. (1 Yohanes 5:19; Yohanes 8:44) Setan ’ryup kakara’ snonkaku ḇeḇorsya kwar kuker propaganda ḇyena isof ro kirine ’dankarkar supswan ḇesiper’. (2 Korintus 4:4; Wahyu 12:9) Rariso na pampum Setan propaganda ḇyena?

Yesus fyarkor ko nyan ḇepyan fa kopampum propagandana. Ikofen, ”Mkofawi napnapesya ma napnapesya nari ḇyuk ḇaḇemkei faro mko.” (Yohanes 8:31, 32) Ro mamamun, sordade oso fandun fa isewar informasi ḇekaku snaro mbroḇ ḇyedi nari ḇyuk ankarkar nabore fa ifrowes i. Inja, rodiso na wasma informasi ḇekakuya? Yahwe ḇyuk kwar Wos Ḇyena, Refoya. Ro Refoya, naser rosai monda wafandunna fa pampum Setan propaganda ḇyena.—2 Timotius 3:16, 17.

Ḇape, Setan i kako ifawi. Inja byuk dunya ine fa ifrowes ko insama komewer kowasya ma kofarkor Refoya. Koswarepen insama kosampum ”Ibiris ankarkar ḇyena”! (Efesus 6:11) Kofawi knam ro napnapes imnai rodia mondaḇa. Ḇape fandun fa koḇensewar kaku fa kofawi napnapes syadiwer. (Efesus 3:18) Manfasfas Noam Chomsky ikofen, ”Snonkaku osoḇaḇeri ḇyuk napnapes ya ro swaruser bedi. Au iso na ḇesewar ro mankundaw.” Inja koiso ḇesewar napnapes ro mankunko kuker ’ras ras kam kowasya Refoya’.—Kisah 17:11.

Setan imewer nwa kakara ḇemnis ma wafawi napnapes rwower kwar anna. Rosai ḇefnai ya? Snaro snonkaku oso napyan fa propaganda ine ”nawyae i” rofyor ”kyaramnis roi oso ḇaim”. (Media and Society in the Twentieth Century) Wakyar famfnom awer  faro roi warower ya, ḇape kwara mnisna resari. (Amsal 14:15) Allah ḇyuk ḇe Au ”samambraḇ ro swaruser” ma ”kakara ḇemnis”, inja buk nafa swambraḇser kakyar bedi.—Amsal 2:10-15; Roma 12:1, 2.

Rofyor propaganda nawyae sordade sya ido, nari sḇebri ma siryaḇ werḇa ro mamamun ya. Iba syadiwer propaganda bisa ifrur fa sordadesya bisa smunyae si ḇaido simewer sḇeoser kuker sordade ḇesesyawer. Jenderal oso ro Jerman ikofen, sḇemkeiḇa ro Mamamun Dunya I snaro propaganda ya. Doḇe, propaganda ine nawyae snonkaku sya imnis raris sehipnotis ḇaido sikrur si. Fafisu ine Setan ḇyuk nyan ḇemnis radirya fa nawyae ḇaḇeoser snonkaku Kristensya. Imnis raris, ifrur fa naek srar sya simasasoryae. Ḇaido ifrur fa snonkaku sya sisaebur organisasi ya, ma skara Yahwe organisasi ḇyedi ḇyuk farkankin ḇemnis ḇa ḇaido organisasi ifrur sasar.

Wasasor Au insama ifrowes Au ḇa! Wasomnis ananun ro Allah Wos ḇyena ma ḇeoser pdef kuker naek srar sya. Imnis raris, Refo danun ḇeko fa ’koḇuk ampunyae faro oso ma ḇesesya kuker sne ḇesiper’ ma fasawḇeri kofrurmnis famfabri rosai monda. (Kolose 3:13, 14; Matius 5:23, 24) Refoya kako ḇyuk swarapepen ḇeko insama kobinkwanbur awer sidang. (Amsal 18:1) Wafasos Au fa pampum Setan propaganda ḇyedi. Kwarapan kada, ’Fafisu naek oso ifrurduf sne yedi, rosai yafrur faro i na nkurfasna yafrur Allah imarisen ke, ḇaido Setan i?’—Galatia 5:16-26; Efesus 2:2, 3.

Rofyor Sordade oso ikyar faro manfarkin ḇyedi ḇa ido, nari iso mamamun kuker raryaḇ ḇa. Inja mbroḇ sesya nari sḇuk propaganda fa nawyae kakyar sena faro manfarkin sedi. Rofyor manfarkin ani ifrur sasar ido, mbroḇ sesya nari sikofen radine, ”Wakyar awer i!” na ”ifrur susa mko!” Setan i kako ifrur roi ḇemnis. Imarisen ifrur fa wakyar werḇa faro snonkaku Yahwe kyinfir fa ḇefarkin kawasa ḇyesya.

Rariso ḇesasor Au insama sankar awer Au? Ḇensewar kaku fa rwo Yahwe organisasi ḇyedi pdef. Waswarepen snonkaku ḇefarkin Au sima snonkaku ḇenapesḇa, ḇape fandun fa wasouser ma wasaramper si pdef. (1 Tesalonika 5:12, 13) Snonkaku ḇemurtad  ma snonkaku ḇeankarkar sya bisa sembroḇ Yahwe organisasi ḇyeja. (Titus 1:10) Imbude roi sikofenna rya nkaku, ḇape kopok fa ’kokmom ma koḇeḇirḇar fasaw awer’. (2 Tesalonika 2:2) Wasopyum anun Paulus ḇyuk ḇe Timotius i fa, ”Wuf faswef ro ḇaḇenapnapes wasma kwar ani”, ma waswarepen mansei ḇeḇuk farkarkor faro Au sya. (2 Timotius 3:14, 15) Kwarapan kuker bukti nakam befrur fa wakyar snar Yahwe ḇyuk manfamyan ḇeḇesyowi ma ḇefawi nananem fa fyarkor ko napnapes taun utin oser kwar ine.—Matius 24:45-47; Ibrani 13:7, 17.

Setan i kako dawyae Au kuker nyan ḇesnaibos kaku. Fyorno ido ifrur fa wamkak. Teror iso ”oser ro propaganda ḇekwar rofandu propaganda ḇesena”. (Easily Led—A History of Propaganda) Philip M. Taylor, profesor ḇerama ro Inggris, fyas kuker contoh ro snonkaku Asiria sya. Sḇuk teror ma propaganda insama sekafyo mbroḇ sesya. Setan syewar fa ḇyuk makakak koḇena, raris makakak faro snonkaku, makakak faro ḇaḇewayam, ma makakak faro marmar, nafrur fa kofarmyan ḇe Yahwe I werḇa.—Yesaya 8:12; Yeremia 42:11; Ibrani 2:15.

Waswarepen insama Setan ifrur fa wamkak awer! Yesus doḇe, ”Mkokmkak awer faro ḇemun bakenya, ḇape ḇepok ḇefrur royo ro ḇarpurya werḇa.” (Lukas 12:4) Wakyar kaku snar Yahwe nari ifrur asas ḇyena fa fyaduru Au. Nari ḇyuk ḇe Au ’papoik ḇesyadi ro smambraḇ bedi’ ma ifnoḇek Au fa pampum Setan denem ḇyena.—2 Korintus 4:7-9, NW; 1 Petrus 3:14.

Kakuḇae, fyorno ido imbude wamkak ḇaido wasambraḇ ḇa. Ḇape, waswarepen rosai Yahwe ikofen fa syambraḇser Yosua i, ”Fandun kaku ḇebri ma swambraḇ. Wamkak awer ḇaido waradai awer, snar Yahwe, Allah bedi, ryous au ro moḇ sarirya monda rwarona.” (Yosua 1:9) Rofyor nwa makakwarek ido, ḇenadi ḇeri faro Yahwe I. Wakyar snar ’Saswar-ḇaḇye ro Allah, ḇesyadi ro kakara, nari nfaduru sne ma kakara bena.’ Kuker rarirya, nari wasma samambraḇ fa pampum Setan propaganda ḇyena.—Filipi 4:6, 7, 13.

Waswarepen Rabsyake, manwawan ḇerama ro Asiria, ḇeyun wos ḇefrur makakak faro Allah kawasa ḇyesya ke? Imarisen insama sikyar nari osoḇaḇeri myunwarek si bur Asiria ma Yahwe I kako jadiḇa. Ramnai ikofen Yahwe iso ḇewan Asiria fa simkok Yerusalem. Ḇape kakuya Yahwe ikofen, ”Wamkak awer faro rosai rwowerya, ro manfamyan Asiria iwan ansi fa sanonef aya.” (2 Raja-Raja 18:22-25; 19:6) Ramnai Yahwe iwan malaikat oser fa myun sordade Asiria ri 185.000 ro roḇ oser!—2 Raja-Raja 19:35.

Fafisu oso wakmam snonkaku oso ro felem sankar i ke? Ḇape kakuya ifawiḇa snar sankar i. Nari imbe wakofen kaku ḇe i, ’Wakyar awer! Sankar Au!’ Kwarapan kada, malaikat sya sikofen kako ḇe Au, ”Wakyar awer faro Setan i, dankar Au!”

Rwower awer Setan propaganda ḇyena. (Amsal 26:24, 25) Wamnaf Yahwe I ma wakyar faro I ro rosai monda wafrurna. (Amsal 3:5-7) Iswar Au kaku ma imarisen fasna fawinanem ma wafrur fa sne ḇyedi imarisen. (Amsal 27:11) Kuker rarirya, bisa wafaduru kakara bedi!